SANEBIMƆI NI BIBLIA LƐ EHA HETOO

Mɛɛ Mɔ Nɛkɛ Nyɔŋmɔ Ji?

Nyɔŋmɔ lɛ, mumɔ ni anaaa ji lɛ. Lɛ ebɔ ŋwɛi niiaŋ, shikpɔŋ lɛ, kɛ nibii fɛɛ ni wala yɔɔ amɛmli. Mɔ ko ebɔɔɔ Nyɔŋmɔ​—ebɛ shishijee. (Lala 90:2) Nyɔŋmɔ miisumɔ ni mɛi atao esɛɛgbɛ koni amɛle anɔkwalei ni kɔɔ ehe lɛ.​—Kanemɔ Bɔfoi lɛ Asaji 17:24-27.

Nyɔŋmɔ ji mɔ ko ni wɔbaanyɛ wɔle lɛ kɛ egbɛ́i. Kɛ́ wɔjwɛŋ nibii ni efee lɛ anɔ lɛ, wɔbaanyɛ wɔyɔse esui lɛ ekomɛi. (Romabii 1:20) Shi dani wɔbaanyɛ wɔle Nyɔŋmɔ jogbaŋŋ lɛ, ehe miihia ni wɔkase e-Wiemɔ, ni ji Biblia lɛ. Ehaa wɔleɔ Nyɔŋmɔ sui ni nɔ bɛ lɛ.​—Kanemɔ Lala 103:7-10.

Te Nyɔŋmɔ naa jalɛsane ni ayeee lɛ ehaa tɛŋŋ?

Yehowa, wɔ-Bɔlɔ lɛ miihi jalɛsane ni ayeee lɛ kwraa. Ebɔ adesai yɛ esu nɔ. (5 Mose 25:16) No hewɔ ni wɔteŋ mɛi saŋŋ hiɔ jalɛsane ni ayeee lɛ. Jeee Nyɔŋmɔ ji mɔ ni kɛ jalɛsane ni ayeee ni yaa nɔ yɛ wɔsateŋ lɛ baa. Nyɔŋmɔ kɛ nihalamɔŋ heyeli duro adesa. Shi dɔlɛ sane ji akɛ, mɛi kpotoo kɛ amɛnihalamɔŋ heyeli nɛɛ tsɔɔ jalɛsane hiɛ amɛbuɔ shi. Amɛkɛfeɔ Yehowa nidɔɔnii.​—Kanemɔ 1 Mose 6:5, 6; 5 Mose 32:4, 5.

Yehowa sumɔɔ jalɛsaneyeli, ni ekwɛŋ koni mɛi aya nɔ amɛtsɔ jalɛsane hiɛ amɛbu shi kɔkɔɔkɔ. (Lala 37:28, 29) Biblia lɛ woɔ shi akɛ, etsɛŋ ni Nyɔŋmɔ baafo jalɛsane ni ayeee lɛ fɛɛ sɛɛ.​—Kanemɔ 2 Petro 3:7-9, 13.