Mɛni Hewɔ Esa akɛ Okase Biblia Lɛ?

Ani obi ohe saji ni tamɔ nɛkɛ pɛŋ? Kɛ́ nakai lɛ, jeee bo pɛ saji nɛɛ gbaa onaa. Mɛi ni yɔɔ je lɛŋ fɛɛ lɛ miisusu shihilɛ mli sanebimɔi ni he hiaa waa lɛ ahe. Ani obaanyɛ oná hetooi lɛ?

Mɛi akpekpei abɔ baahã hetoo akɛ, “Hɛɛ!” Mɛni hewɔ? Ejaakɛ Biblia lɛ ehã amɛná hetoi ni hãa mɔ tsui nyɔɔ emli. Ani obaasumɔ ni ole nɔ ni Biblia lɛ kɛɔ? Kɛ́ nakai lɛ, Yehowa Odasefoi lɛ baanyɛ amɛkɛ bo akase Biblia lɛ ni amɛheee nɔ ko.a

Yɛ anɔkwale mli lɛ, kɛ́ ebalɛ Biblia lɛ kasemɔ lɛ, mɛi komɛi kɛɔ akɛ: “Mibɛ dekã.” “Eshishinumɔ wa tsɔ.” “Misumɔɔɔ ni maje ekasemɔ shishi.” Shi esoro bɔ ni mɛi krokomɛi hu naa lɛ. Amɛmiisumɔ ni amɛle nɔ ni Biblia lɛ tsɔɔ. Susumɔ nɔkwɛmɔnii komɛi ahe:

• “Mitee Katolik kɛ Protɛstant sɔlemɔi lɛ eko, mikɛ mihe wo Sikh kɛ Buddha jamɔi lɛ amli, ni mikase nyɔŋmɔjamɔ he nii hu yɛ yunivɛsiti. Fɛɛ sɛɛ lɛ, mináaa misanebimɔi ni kɔɔ Nyɔŋmɔ he lɛ ahetoo. Kɛkɛ ni Yehowa Odasefonyo ko ba mishĩa lɛ. Minya bɔ ni ejɛ Biblia lɛ mli ehã misanebimɔi lɛ ahetoo lɛ he waa, ni mikpɛlɛ ni ekɛ mi kase Biblia lɛ.”​—Gill, England.

• “Miyɛ shihilɛ mli sanebimɔi pii ni miigba minaa, shi hetoi ni wɔsɔfo lɛ hã mi lɛ hãaa mitsui anyɔ mimli. Shi Yehowa Odasefonyo ko kɛ Biblia lɛ pɛ tsu nii kɛhã misanebimɔi lɛ ahetoo. Be ni ebi kɛji masumɔ ni makase babaoo lɛ, mikɛ miishɛɛ kpɛlɛ.”​—Koffi, Benin.

• “Mishwe ni male shihilɛ mli ni gbohii lɛ yɔɔ. Mile akɛ gbohii lɛ baanyɛ aye hiɛkalɔi lɛ awui, shi miisumɔ akɛ male nɔ ni Biblia lɛ kɛɔ yɛ he. No hewɔ lɛ, mihã minaanyo Odasefonyo ko kɛ mi bɔi Biblia lɛ kasemɔ.”​—José, Brazil.

• “Mibɔ mɔdɛŋ akɛ makane Biblia lɛ, shi minuuu shishi. Kɛkɛ ni Yehowa Odasefoi basara mi ni amɛgbala Biblia mli gbalɛi pii amli amɛhã mi. Mishwe ni male babaoo mafata he.”​—Dennize, Mexico.

• “Miyiŋ etɛ̃ɛɛ mi akɛ Nyɔŋmɔ susuɔ mihe. No hewɔ lɛ, mikpɛ miyiŋ akɛ masɔle mahã Nyɔŋmɔ ni Biblia lɛ wieɔ ehe lɛ. Enɔjetsɛremɔ lɛ, Odasefoi batswa mishinaa lɛ, kɛkɛ ni mikpɛlɛ ní amɛkɛ mi akase Biblia lɛ.”​—Anju, Nepal.

Niiashikpamɔi nɛɛ kaiɔ wɔ nɔ ni Yesu wie lɛ akɛ: “Mɛi ni le akɛ Nyɔŋmɔ he miihia amɛ lɛ yɛ miishɛɛ.” (Mateo 5:3) Eji anɔkwale akɛ, abɔ gbɔmɔ kɛ shwelɛ ni baahã ekase Nyɔŋmɔ he nii. Nyɔŋmɔ pɛ baanyɛ atsu nakai shwelɛ lɛ he nii, ni efeɔ nakai kɛtsɔ e-Wiemɔ ni ji Biblia lɛ nɔ.

No hewɔ lɛ, te afeɔ Biblia mli nikasemɔ ahãa tɛŋŋ? Mɛɛ sɛɛ obaaná? Abaahã sanebimɔi nɛɛ ahetoo yɛ sane ni nyiɛ sɛɛ lɛ mli.