SANEBIMƆI NI BIBLIA LƐ EHÃ HETOO
Mɛni hãa mɛi feɔ efɔŋ?
Namɔ bɔ mɔdɛŋ akɛ ebaahã Yesu afee efɔŋ?—Mateo 4:8-10
Bei pii lɛ, mɛi sumɔɔ ni amɛkɛ mɛi krokomɛi ahi shi yɛ toiŋjɔlɛ mli, amɛye anɔkwa, ni amɛfee mɛi ejurɔ. Belɛ, mɛni hewɔ mɔ ni awuiyeli, jalɛ sane ni ayeee, kɛ yiwalɛ nifeemɔi efa nakai lɛ? Wɔfɔɔ saji gbeyeigbeyei numɔ yɛ adafitswai amli. Ani mɔ ko ji mɔ ni hãa mɛi feɔ nibii gbohii?—Kanemɔ 1 Yohane 5:19.
Ani Nyɔŋmɔ bɔ adesai ni amɛfee esha? Dabi, Yehowa Nyɔŋmɔ bɔ adesai yɛ esubaŋ nɔ, ni ehã amɛ nyɛmɔ ni amɛbaanyɛ amɛkɛkase Nyɔŋmɔ suɔmɔ lɛ. (1 Mose 1:27; Hiob 34:10) Shi Nyɔŋmɔ hã adesai hegbɛ ni amɛkɛhala nɔ ni amɛsumɔɔ, ni enɛ tsɔɔ woo ni eyɔɔ kɛhã amɛ. Be ni wɔ klɛŋklɛŋ fɔlɔi lɛ fee efɔŋ lɛ, amɛkpoo akɛ amɛbaakase Nyɔŋmɔ, ni enɛ hã emuuyeli ŋmɛɛ amɛ. Amɛshi eshafeemɔ amɛhã wɔ akɛ gboshinii.—Kanemɔ 5 Mose 32:4, 5.
Ani efɔŋfeemɔ sɛɛ baafo be ko?
Nyɔŋmɔ miisumɔ ni wɔkpa eshafeemɔ. (Abɛi 27:11) No hewɔ lɛ, etsɔɔ wɔ bɔ ni wɔɔfee wɔkwa efɔŋfeemɔ, kɛ bɔ ni wɔɔfee wɔná anɔkwa miishɛɛ. Shi amrɔ nɛɛ, wɔnyɛŋ wɔkase Nyɔŋmɔ suɔmɔ lɛ kɛmɔ shi.—Kanemɔ Lala 32:8.
Eyɛ mli akɛ efɔŋfeemɔ efa waa moŋ, shi Nyɔŋmɔ eŋmɛ gbɛ ni eya nɔ kɛyashi be ko, koni wɔna nibii gbohii ni jɛɔ mli kɛbaa. (2 Petro 3:7-9) Shi etsɛŋ, shikpɔŋ lɛ nɔ baayi obɔ kɛ mɛi ni yɔɔ miishɛɛ ni boɔ Nyɔŋmɔ toi.—Kanemɔ Lala 37:9-11.