SANEYITSO LƐ MLITSƆƆMƆ | NAMƐI JI YEHOWA ODASEFOI?
Mɛni hewɔ wɔshiɛɔ lɛ?
Ekolɛ nɔ ni kadiɔ wɔ fe fɛɛ ji wɔshiɛmɔ nitsumɔ ni wɔtsuɔ yɛ he fɛɛ he lɛ—yɛ shĩa fɛɛ shĩa, yɛ maŋ, kɛ he fɛɛ he ni wɔnaa mɛi yɛ. Mɛni hewɔ wɔfeɔ nakai lɛ?
Yehowa Odasefoi shiɛɔ kɛwoɔ Nyɔŋmɔ hiɛ nyam, ni amɛkɛhãa aleɔ egbɛ́i lɛ hu. (Hebribii 13:15) Wɔmiisumɔ hu ni wɔbo Kristo Yesu ni kɛ famɔ ni nyiɛ sɛɛ lɛ hã lɛ toi; ekɛɛ akɛ: “No hewɔ lɛ, nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi, . . . nyɛtsɔa amɛ ni amɛye nii fiaa ni mifã nyɛ lɛ nɔ.”—Mateo 28:19, 20.
Kɛfata he lɛ, wɔsumɔɔ wɔnaanyo gbɔmɔ. (Mateo 22:39) Shi wɔle akɛ mɛi babaoo hiɛ hemɔkɛyelii srɔtoi, ni akɛ, jeee mɔ fɛɛ mɔ yɔɔ wɔsane lɛ he miishɛɛ. Shi fɛɛ sɛɛ lɛ, wɔle akɛ Biblia mli tsɔɔmɔi lɛ hereɔ mɔ yiwala. No hewɔ ni wɔyaa nɔ ‘wɔtsɔɔ nii ni wɔjajeɔ Kristo lɛ he sane kpakpa lɛ ni wɔfɔ̃ɔɔ,’ taakɛ Kristofoi ni hi shi yɛ klɛŋklɛŋ afii 100 lɛ mli lɛ fee lɛ.—Bɔfoi 5:41, 42.
Adesai ashihilɛ he nilelɔ Antonio Cova Maduro wie ‘mɔdɛŋ ni Yehowa Odasefoi lɛ bɔɔ koni amɛtsɔ gbɛ fɛɛ gbɛ nɔ amɛhã ŋmalɛi krɔŋkrɔŋ lɛ ayashɛ shikpɔŋ lɛ nɔ he fɛɛ he lɛ’ he yɛ sane ko ni eŋma lɛ mli.—El Universal, Venezuela adafitswaa wolo
Mɛi babaoo ni kaneɔ wɔwoji lɛ jeee Yehowa Odasefoi. Ni wɔkɛ mɛi akpekpei abɔ ni jɛ jamɔi krokomɛi amli lɛ kaseɔ Biblia lɛ. Kɛ̃lɛ, eŋɔɔ amɛnaa akɛ Yehowa Odasefoi baa amɛŋɔɔ.
Shi ekolɛ oyɛ sanebimɔi krokomɛi ni kɔɔ Yehowa Odasefoi lɛ ahe ni obaasumɔ ni obi. Wɔmiifɔ̃ bo nine ni otao hetoi lɛ kɛtsɔ gbɛi ni nyiɛ sɛɛ nɛɛ anɔ:
Bi Yehowa Odasefoi lɛ ateŋ mɔ ko.
Yaa wɔ-Wɛb saiti ni ji, www.jw.org/gaa lɛ nɔ.
Yaa wɔkpeei lɛ eko; aheee shika, ni mɔ fɛɛ mɔ baanyɛ aba.