Bɔ ni Ooofee Onu Biblia lɛ Shishi

Feemɔ ohe mfoniri ni ofã gbɛ kɛtee maŋ ko ni oyako jɛmɛ pɛŋ lɛ nɔ. Esoro amɛkusum, amɛniyenii, amɛshika kɛ nibii krokomɛi. Ŋwanejee ko bɛ he akɛ enɛ baahã ohiɛ afee bo yaa.

Ekolɛ nakai ji bɔ ni obaanu he kɛ́ okane Biblia lɛ klɛŋklɛŋ kwraa. Kɛ́ ookane Biblia lɛ, obaana akɛ ewieɔ blema jeŋ ko ni olé he nɔ ko kwraa lɛ he. Ni obaakane mɛi komɛi ni atsɛɔ amɛ Filistibii, kɛ kusumii komɛi tamɔ ‘atadei ni agbalaa’ lɛ he sane, loo obaakane niyenii ko ni atsɛɔ lɛ mana, kɛ shika ko ni atsɛɔ lɛ drakma lɛ he sane. (2 Mose 16:31; Yoshua 13:2; 2 Samuel 3:31; Luka 15:9) Enɛɛmɛi fɛɛ baanyɛ ahã oyiŋ afutu bo. Kɛ́ oná mɔ ko ni baaye abua bo ni onu Biblia lɛ shishi lɛ, ani eŋɔŋ onaa, tamɔ bɔ ni kɛ́ otee maŋ ko ní olé jɛmɛ lɛ nɔ ni mɔ ko ye ebua bo lɛ ebaaŋɔɔ onaa lɛ?

YELIKƐBUAMƆ NI AKƐHÃ YƐ BLEMA

Kɛjɛ be ni aje Biblia lɛ ŋmaa shishi yɛ afi 1500 D.Ŋ.B. afii lɛ amli lɛ, aye abua mɛi ni amɛnu nibii ni yɔɔ Biblia lɛ mli lɛ shishi. Akɛ nɔkwɛmɔnɔ lɛ, Mose, ni ji mɔ klɛŋklɛŋ ni nyiɛ Israelbii lɛ ahiɛ lɛ bɔi amɛ nɔ ni aŋma lɛ “anaatsɔɔmɔ.”​—5 Mose 1:5, Ga Biblia hee.

Yɛ afii akpe sɛɛ po lɛ, aná mɛi ni he esa ni tsɔɔ Ŋmalɛi lɛ amli. Yɛ afi 455 D.Ŋ.B. lɛ, Yudafoi babaoo, ni gbekɛbii pii hu fata he lɛ, yabua amɛhe naa yɛ blohu ko mli yɛ Yerusalem. Mɛi ni tsɔɔ Biblia lɛ mli lɛ ‘kane [nakai wolo krɔŋkrɔŋ lɛ] faŋŋ.’ Shi jeee kanemɔ pɛ amɛkane. “Amɛtsɔɔ shishi, koni anu nɔ ni akaneɔ lɛ shishi.”​—Nehemia 8:1-8.

Afii ohai enumɔ sɛɛ lɛ, Yesu Kristo hu tsɔɔ mɛi anii nakai nɔŋŋ. Yɛ anɔkwale mli lɛ, mɛi babaoo le lɛ akɛ tsɔɔlɔ. (Yohane 13:13) Etsɔɔ asafoku kɛ aŋkroaŋkroi fɛɛ nii. Be ko po lɛ, ekɛ asafoku kpele ko wie, ni ehã wiemɔ ni ale lɛ waa akɛ Gɔŋ nɔ Shiɛmɔ lɛ, ni “asafoku lɛ ahe jɔ̃ amɛhe yɛ gbɛ ni etsɔ nɔ etsɔɔ nii lɛ hewɔ.” (Mateo 5:1, 2; 7:28) Yɛ April shishijee mli yɛ afi 33 Ŋ.B. lɛ, Yesu kɛ ekaselɔi lɛ enyɔ wie be ni amɛnyiɛ gbɛ kɛmiiya akrowa ko ni bɛŋkɛ Yerusalem lɛ, ‘ni etsɔɔ amɛ Ŋmalɛi lɛ ashishi.’​—Luka 24:13-15, 27, 32.

Yesu kaselɔi lɛ hu ji mɛi ni tsɔɔ Nyɔŋmɔ Wiemɔ lɛ. Be ko lɛ, maŋ onukpa ko ni jɛ Etiopia lɛ miikane sane ko yɛ Ŋmalɛi lɛ amli. Kaselɔ ko ni atsɛɔ lɛ Filipo lɛ tsi bɛŋkɛ lɛ ni ebi lɛ akɛ: “Ani oonu nɔ ni okaneɔ lɛ shishi?” Etiopianyo lɛ hã lɛ hetoo akɛ: “Anɔkwa, te mafee tɛŋŋ manyɛ manu shishi akɛ ja mɔ ko tsɔɔ mi?” Kɛkɛ ni Filipo gbala sane ni ekaneɔ lɛ mli ehã lɛ.​—Bɔfoi 8:27-35.

YELIKƐBUAMƆ NI AKƐHÃA ŊMƐNƐ

Taakɛ mɛi ni tsɔɔ Biblia lɛ yɛ blema lɛ fee lɛ, ŋmɛnɛ lɛ, Yehowa Odasefoi tsɔɔ mɛi Biblia mli sane lɛ yɛ maji 239 nɔ yɛ jeŋ fɛɛ. (Mateo 28:19, 20) Daa otsi lɛ, amɛyeɔ amɛbuaa mɛi ni fa fe akpekpei nɛɛhu koni amɛnu Biblia lɛ shishi. Mɛi ni atsɔɔ amɛ nii nɛɛ ateŋ mɛi babaoo jeee Kristofoi. Kɛ́ akɛ mɛi nɛɛ kase nii lɛ, aheee shika, ni abaanyɛ akɛ mɔ lɛ akase nii lɛ yɛ lɛ diɛŋtsɛ eshĩa loo yɛ he ko ni baahi kɛhã lɛ. Mɛi komɛi po sumɔɔ ni akɛ amɛ akase nii lɛ kɛtsɔ tɛlifoŋ loo Intanɛt lɛ nɔ.

Ofainɛ naa Yehowa Odasefoi lɛ ateŋ mɔ ko ni etsɔɔ bo bɔ ni obaafee oná nikasemɔ gbɛjianɔtoo nɛɛ he sɛɛ. Obaana akɛ, Biblia lɛ jeee wolo ni anyɛŋ anu shishi, shi eji wolo ni he yɔɔ “sɛɛnamɔ kɛhã nitsɔɔmɔ, kɛhã mɔkunemɔ, kɛhã nibii ajajemɔ, kɛhã tsɔsemɔ yɛ jalɛ mli,” ni ebaahã ‘ofee mɔ ni sa jogbaŋŋ, ní asaa lɛ kɛhã nitsumɔ kpakpa fɛɛ nitsumɔ kpakpa.’​—2 Timoteo 3:16, 17.