Ye Obua Obii lɛ Ní Amɛtsɔmɔ Kaselɔi
1. Mɛɛ sɔ̃ kã fɔlɔi anɔ?
1 Yesu fã esɛɛnyiɛlɔi lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mat. 28:19, 20) Nitsumɔ ko bɛ ni he hiaa fe enɛ. Nitsumɔ nɛɛ biɔ ni atsɔɔ mɛi ni amɛbale Yehowa, amɛsumɔ lɛ, ni asaŋ amɛsɔmɔ lɛ kɛjɛ amɛtsuiaŋ. Nɔ ni fata sɔ̃ ni kã fɔlɔi anɔ he hu ji ní amɛye amɛbua amɛbii lɛ ni amɛtsɔmɔ kaselɔi.—Efe. 6:4.
2. Te fɔlɔi aaafee tɛŋŋ amɛle nɔ ni amɛbii lɛ susuɔ kɛ nibii ni amɛfeɔ? Nyɛkanea Abɛi 20:5.
2 Gbekɛbii ni aaafee amɛ kaselɔi lɛ biɔ nibii pii. Nibii ni he hiaa fe fɛɛ nɛɛ ateŋ ekome ji ni akɛ amɛ afee weku Biblia nikasemɔ daa otsi. Kɛ́ wɔkɛ mɔ ko ni yɔɔ wiemɔ lɛ he miishɛɛ miikase nii lɛ, wɔsusuɔ esui kɛ enifeemɔ ko ní baanyɛ atsĩ emumɔŋ hiɛyaa naa lɛ he. Wɔbiɔ lɛ saji, ni wɔboɔ lɛ toi jogbaŋŋ, bɔni afee ni wɔle hewalɛwoo ni he baahia lɛ yɛ mumɔŋ. Fɔlɔi ni susuɔ amɛbii ahe lɛ jwɛŋɔ nɔ ni amɛbii lɛ susuɔ kɛ amɛnifeemɔi ahe jogbaŋŋ diɛŋtsɛ.—Abɛi 20:5.
3. Mɛɛ gbɛ nɔ abaanyɛ atsɔ weku nikasemɔ nɔ aye abua gbekɛbii lɛ koni amɛya amɛhiɛ yɛ mumɔŋ?
3 Esa akɛ fɔlɔi ahiɛ ahi amɛhe nɔ koni kɛ́ gbekɛbii lɛ miikpalaŋ kɛmiiya je lɛ mli lɛ, amɛnyɛ amɛyɔse. Kɛ́ ehe miihia ni wɔ ni ji Kristofoi ni edara lɛ wɔkwɛ wɔhe nɔ jogbaŋŋ lɛ, enyiɛ nɔŋŋ ni esaaa akɛ wɔyeɔ wɔbuaa wɔbii lɛ ní amɛya amɛhiɛ yɛ mumɔŋ. Kɛ́ wɔbii lɛ haaa saji ahetoo yɛ kpeei ashishi aloo amɛkaneɔ sane hetoo ni waaa kɛjɛɔ wolo lɛ mli lɛ, no tsɔɔ akɛ fɔlɔi ayelikɛbuamɔ he baahia amɛ. Kɛ́ nyɛmiifee weku nikasemɔ lɛ, ha ni amɛhala kukuji ni amɛbaasumɔ ni amɛwie he lɛ, koni oye obua amɛ ni amɛha hetoo yɛ amɛdiɛŋtsɛ amɛwiemɔ mli. Nyɛyea nyɛbuaa nyɛbii lɛ ni amɛjwɛŋ nibii ni Ŋmalɛ lɛ kɛɔ lɛ he, kɛtsɔ sanebimɔi ni baaye abua amɛ ni nyɛkaatsu nii lɛ nɔ. Nyɛhaa amɛlea akɛ Yehowa yɛ mlihilɛ kɛ suɔmɔ, ni ákɛ amɛbaabu amɛhe akɔntaa amɛha lɛ yɛ nɔ fɛɛ nɔ mli.—Abɛi 1:7.
4. Mɛɛ naagbai gbekɛbii ni ji Kristofoi lɛ kɛkpeɔ, ni mɛɛ gbɛ nɔ fɔlɔi baanyɛ aye abua amɛ kɛtsu he nii?
4 Gbi fɛɛ gbi lɛ, gbekɛbii náa susumɔi heei kɛjɛɔ nibii ni amɛkaseɔ yɛ skul kɛ amɛnanemɛi skulbii aŋɔɔ lɛ mli. Jeee susumɔi nɛɛ fɛɛ hi. Akɛni gbekɛbii bɛ niiashikpamɔ hewɔ lɛ, ekolɛ amɛbaakpɛlɛ susumɔi ni ejaaa nɔ, ni fiofio lɛ, je lɛ mumɔ lɛ baanyɛ afite mumɔŋ tsɔsemɔ ni fɔlɔi lɛ bɔɔ mɔdɛŋ akɛ amɛdũ amɛwo amɛmli lɛ. Daa gbi lɛ, fɔlɔi kɛ naagbai ni kɔɔ bɔ ni amɛaafee amɛyɔse nibii ni adũ awo amɛbii lɛ ajwɛŋmɔi amli lɛ kpeɔ, ni amɛjieɔ nɔ ni ejaaa lɛ, ni amɛkɛ Nyɔŋmɔ Wiemɔ lɛ mli anɔkwalei ni he yɔɔ sɛɛnamɔ lɛ yeɔ najiaŋ. Kɛ́ fɔlɔi baanyɛ afee amɛbii lɛ kaselɔi lɛ, ebiɔ ni amɛsusu nii ahe jogbaŋŋ, ní amɛhiɛ ahi amɛhe nɔ be fɛɛ be. No hewɔ lɛ, ani wɔmiina nilee ni yɔɔ ŋaawoo ni akɛha yɛ osharai ni kɔɔ bii ni akɛ amɛyaa skul ni awɔɔ jɛmɛ koni atsɔse amɛ lɛ mli?—2 Kor. 10:4; Efe. 6:10-18; 1 Pet. 5:8.
5. Mɛɛ gbɛ̀i anɔ abaanyɛ atsɔ aye abua gbekɛbii beni amɛyaa skul lɛ?
5 Beni obii lɛ yaa skul lɛ, ani okɛ mumɔŋ tawuu nibii ní he baahia amɛ koni amɛnyɛ ‘amɛgbe mɔ fɔŋ lɛ gãimlibii ní tsoɔ lɛ fɛɛ’ lɛ wajeɔ amɛ? (Efe. 6:16) Ani amɛnuɔ saji ni amɛbaanyɛ amɛkɛkpe, tamɔ Kristofoi ni kɛ amɛhe wooo maŋ saji amli, aflaŋaa ŋamɔ, gbijuji kɛ kusumii ni esaaa Kristofoi lɛ shishi jogbaŋŋ bɔ ni amɛbaanyɛ amɛgbála mli amɛtsɔɔ mɛi krokomɛi? Beni amɛdaraa lɛ, ani ooye oobua amɛ koni amɛnyɛ amɛkpɛ amɛyiŋ yɛ nibii ni kɔɔ naanyobɔɔ fɔŋ, nyiɛmɔ ni tsɔɔ gbalashihilɛ hiɛ, tsofai fɔ̃ji kɛ nitsumɔ kɛ bɔlɛnamɔ mli jeŋba shara he? Enɛ feemɔ bɛ mlɛo, shi mɔdɛŋ ni ooobɔ lɛ baanyɛ aye abua amɛ ní amɛya amɛhiɛ yɛ mumɔŋ yɛ amɛskulyaa afii lɛ amli.—Fil. 4:13.
6. Mɛɛ teokrase otii fɔlɔi baanyɛ aye abua amɛbii lɛ koni amɛkɛ mamɔ amɛhiɛ, ni mɛɛ jɔɔmɔi baanyɛ ajɛ mli kɛba?
6 Okɛ teokrase otii tamɔ baptisimɔ, daa gbɛgbamɔ nitsumɔ lɛ, Betel sɔɔmɔ nitsumɔ, loo be fɛɛ sɔɔmɔ nitsumɔi lɛ fã ko amamɔ obii lɛ ahiɛ kɛjɛ amɛgbekɛbiiashi. Wó obii lɛ hewalɛ ni amɛkɛ amɛhe awo gbɛgbalɔi awamɔ nitsumɔ lɛ mli kɛ́ amɛha skul gbɛ. Akɛni Hana kɛ ekromɔ bi lɛ ha ni eyasɔmɔ Yehowa hewɔ lɛ, ená miishɛɛ waa, ni Yehowa jɔɔ lɛ babaoo. (1 Sam. 2:18-21) Ŋmɛnɛ lɛ, fɔlɔi babaoo ni jwɛŋɔ mumɔŋ nibii ahe lɛ náa miishɛɛ kɛji akɛ amɛbii lɛ ateŋ mɔ kome loo nɔ ni fe nakai kɛ ehe wo be fɛɛ sɔɔmɔ nitsumɔ lɛ fã ko mli. Sɛɛnamɔ babaoo yɛ enɛ he fe bi ko ni eye omanye yɛ je lɛŋ wolokasemɔ ko mli! Hii kɛ yei ni amɛdara yɛ mumɔŋ lɛ le akɛ enɛ buɔ amɛbii lɛ ahe, ni agbɛnɛ hu lɛ ehaa Yehowa gbɛi lɛ he tseɔ. Yehowa jɔɔ mɛi ni jɛɔ amɛtsui muu fɛɛ mli amɛsɔmɔɔ lɛ lɛ. (Abɛi 10:22) Fɔlɔi fɛɛ ni woɔ amɛbii lɛ hewalɛ koni amɛkɛ ŋaawoo ni Yesu kɛha ákɛ akɛ Maŋtsɛyeli lɛ he nibii aye klɛŋklɛŋ gbɛhe lɛ atsu nii lɛ ahiɛ kã shi waa.—Mat. 6:33.
7. Mɛni amaniɛbɔi ni jɛɔ nɔkwɛlɔi gbɛfalɔi aŋɔɔ lɛ tsɔɔ yɛ oblahii kɛ oblayei babaoo ni yɔɔ asafo lɛ mli lɛ ahe?
7 Ákɛ nɔkwɛmɔnɔ lɛ, kɛ́ oji fɔlɔ lɛ, ani ooye oobua obii ni shɛɔ Ŋmalɛ naa taomɔnii ahe lɛ koni amɛje shiɛmɔ nitsumɔ lɛ shishi akɛ shiɛlɔi ni abaptisiko amɛ? Yɛ Ghana maŋ nɛɛ mli lɛ, amaniɛbɔɔ ni jɛɔ nɔkwɛlɔi gbɛfalɔi adɛŋ lɛ tsɔɔ akɛ, yɛ asafoi babaoo amli lɛ, oblahii kɛ oblayei ni eye kɛjɛ afii 5 kɛyashi afii 20 ni kɛ amɛfɔlɔi baa kpee daa lɛ jeee “sanekpakpa” shiɛlɔi. (Mar. 13:10) Ani obi fata gbekɛbii ni baanyɛ atsɔmɔ Yesu Kristo kaselɔi nɛɛ ahe?
8. Mɛni hewɔ esaaa ni fɔlɔi susuɔ akɛ amɛbii lɛ nyɛŋ amɛya amɛhiɛ yɛ shiɛmɔ nitsumɔ lɛ mli lɛ?
8 Kaasusu akɛ obii lɛ nyɛŋ aya amɛhiɛ yɛ shiɛmɔ nitsumɔ lɛ mli. Gbekɛbii babaoo enyɛ amɛkɛ woji eha, ni amɛje Biblia mli nikasemɔi ashishi yɛ gbɛ ni sa kadimɔ waa nɔ. Okɛ obii lɛ atsu nii yɛ shiɛmɔ nitsumɔ lɛ mli be fɛ be. Jee shishi kɛjɛ amɛgbekɛbiiashi. Ye obua amɛ ní amɛtsu amɛnyɛmɔi ahe nii. Jiemɔ amɛyi yɛ bɔ ni amɛbɔɔ mɔdɛŋ kɛ bɔ ni amɛyaa amɛhiɛ lɛ hewɔ.
9. Ani gbekɛbii baanyɛ atsɔmɔ shiɛlɔi? Tsɔɔmɔ mli.
9 Gbekɛyoo fioo ko bi asafoŋ onukpai lɛ koni amɛye amɛbua lɛ ni enyɛ etsɔ Maŋtsɛyeli jajelɔ. Eyɛ mli akɛ no mli lɛ eye afii enumɔ pɛ, ni eleee nikanemɔ moŋ, shi enyɛɔ ekɛ Maŋtsɛyeli shɛɛ sane lɛ haa jogbaŋŋ yɛ shinaai anaa. Ekase hei ni ŋmalɛi lɛ yɔɔ lɛ ewo eyitsoŋ, ni egbeleɔ kɛhaa shiatsɛ lɛ, ehaa shiatsɛ lɛ kaneɔ, kɛkɛ lɛ no sɛɛ lɛ egbála mli.
10. Mɛɛ be gbekɛ ko he baanyɛ asa akɛ shiɛlɔ, ni mɛni fɔlɔi baanyɛ afee kɛye abua gbekɛ lɛ koni eshɛ nakai oti lɛ he?
10 Kɛ́ ona akɛ obii lɛ baanyɛ atsɔmɔ shiɛlɔi ni abaptisiko amɛ, ni amɛ hu amɛmiisumɔ ni amɛfee nakai lɛ, ha onukpai lɛ ale amrɔ nɔŋŋ. Kɛ́ amɛbatsɔmɔ shiɛlɔi lɛ, ebaaha amɛna akɛ sɔ̃ kã amɛnɔ akɛ amɛjie Yehowa yi. Ha ehi ojwɛŋmɔ mli akɛ ehe ehiaaa ni obi lɛ ale nii babaoo tamɔ mɔ ko ni eda ni abaptisi lɛ dani etsɔ shiɛlɔ ni abaptisiko lɛ. Ani obi lɛ nuɔ Biblia mli shishijee tsɔɔmɔi lɛ ashishi? Ani ekɛ Biblia mli shishitoo mlai ni kɔɔ jeŋba he lɛ tsuɔ nii? Ani eesumɔ ni ekɛ ehe awo shiɛmɔ nitsumɔ lɛ mli ni ana lɛ akɛ Yehowa Odasefonyo? Kɛ́ nakai ni lɛ, onukpai lɛ baanyɛ akwɛ akɛ eji mɔ ko ni sa akɛ esɔmɔɔ akɛ shiɛlɔ ni abaptisiko lɛ lo.—Kwɛmɔ Ato Wɔhe Gbɛjianɔ Koni Wɔfee Yehowa Suɔmɔnaa Nii, bf. 79-82.
11. Mɛɛ gbɛ nɔ nɔkwɛmɔnɔ ni fɔlɔi feɔ lɛ baanyɛ aná amɛbii lɛ anɔ hewalɛ?
11 Gbɛ̀i ni hi fe fɛɛ ni abaanyɛ atsɔ nɔ atsɔse gbekɛ lɛ ateŋ ekome ji kɛtsɔ nɔkwɛmɔnɔ ni aaafee lɛ nɔ. Wiemɔ folo kɛkɛ ni awieɔ shi atsuuu he nii lɛ nyɛŋ aná gbekɛ lɛ nɔ hewalɛ kpakpa. Fɔlɔi ji mɛi titri ni gbekɛ lɛ kaseɔ. Kɛ́ ena akɛ otsuɔ ŋaawoo ni okɛhaa lɛ akɛ ekɛ Maŋtsɛyeli lɛ he nibii aye klɛŋklɛŋ gbɛhe lɛ he nii lɛ, no dani ebaaná enɔ hewalɛ jogbaŋŋ. Kɛ́ fɔlɔi lɛ miiwo gbekɛ lɛ hewalɛ ní ekɛ ehe awo gbɛgbamɔ nitsumɔ lɛ mli lɛ, no lɛ esa akɛ amɛkɛ hiɛdɔɔ atsu shiɛmɔ nitsumɔ lɛ bɔ ni amɛaanyɛ, ní amɛkɛ amɛhe awo gbɛgbalɔi awamɔ nitsumɔ lɛ mli be kɛ beaŋ. Esa akɛ wɔjeŋba kɛ wɔwiemɔ yɛ Maŋtsɛyeli Asa lɛ nɔ kɛ shĩa fɛɛ lɛ afee ekome.
12. Mɛni esa akɛ fɔlɔi afee daa koni amɛbii lɛ anyɛ atsɔmɔ kaselɔi?
12 Eji anɔkwale akɛ, kɛ́ fɔlɔi aaaye abua amɛbii lɛ ni amɛtsɔmɔ kaselɔi lɛ, esa akɛ amɛto gbɛjianɔ ni amɛkɛ gbekɛbii lɛ akase Biblia kasemɔ wolo ko tamɔ Biblia lɛ Tsɔɔ wolo lɛ be fɛɛ be. (5 Mose 6:6, 7) Kɛfata he lɛ, esa ákɛ akɛ hiɛdɔɔ afee weku nikasemɔ lɛ, ni esaaa akɛ afeɔ lɛ jabejabe, loo ní abaafee beni abɛ nɔ ko pɔtɛ̃ɛ ko feemɔ. Fɔlɔi ni bɔɔ mɔdɛŋ akɛ amɛbaafee nɔkwɛmɔnɔ kpakpa, ní amɛfee amɛbii lɛ kaselɔi lɛ baaná miishɛɛ beni amɛnaa akɛ suɔmɔ ni amɛbii lɛ yɔɔ kɛha Yehowa gbɛjianɔtoo lɛ miiya hiɛ lɛ.
13. (a) Mɛni hewɔ ebɛ mlɛo kɛha fɔlɔi akɛ amɛaafee amɛbii lɛ kaselɔi lɛ? (b) Mɛni hewɔ esa akɛ fɔlɔi abɔ enɛ feemɔ he mɔdɛŋ lɛ?
13 Ebɛ mlɛo akɛ aaatsɔse bii yɛ weku lɛ mli yɛ naagbee gbii nɛɛ amli. Eji anɔkwale akɛ wɔyɛ “jaramɔ bei” amli. (2 Tim. 3:1-5) Wɔyɔseɔ akɛ je lɛ miibɔ mɔdɛŋ koni ekudɔ gbekɛbii lɛ ashihilɛ. Wɔle akɛ Yehowa baakpata mɛi ni ŋmɛɔ gbɛ ni je lɛ akudɔ amɛ lɛ ahiɛ. (Rom. 1:28-32) Belɛ, kwɛ bɔ ni ehe hiaa akɛ wɔɔbɔ mɔdɛŋ fɛɛ ni wɔɔnyɛ koni wɔha wɔbii lɛ atsɔmɔ kaselɔi, beni wɔbɔɔ mɔdɛŋ hu akɛ wɔbaaye wɔbua wɔkutsoŋbii lɛ ní amɛmɔ “wala ni yɔɔ agbɛnɛ nɛɛ kɛ nɔ ni baaba lɛ” mli lɛ!—1 Tim. 4:8d.