Ani Obaanyɛ Ofee Gbɛgbalɔi Awalɔ yɛ April?
1 Yesu je nitsumɔ ko ni he hiaa tamɔ nɛkɛ ni adesai fɛɛ awɔsɛɛ damɔ nɔ ni baajɛ mli aba lɛ nɔ lɛ shishi. (Mat. 4:17) No ji sanekpakpa jajemɔ kɛ kaselɔ feemɔ nitsumɔ lɛ. Nɛkɛ nitsumɔ nɛɛ baashɛ enaagbee yɛ be fioo ko mli dani “naagbee lɛ” baaba, yɛ be mli ni “aaashiɛ Maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase” lɛ.—Mat. 24:14.
2 Akɛni agbɛnɛ wɔshɛ nibii agbɛjianɔtoo nɛɛ naagbee lɛ mli hewɔ lɛ, nɛkɛ nitsumɔ nɛɛ he miihia fe tsutsu lɛ. Akɛni wala ebaje oshara mli hewɔ lɛ, shishashaomɔ ni esaaa lɛ kɛ saji ni mli wawai baaba. Gbɛgbalɔi awamɔ he gbɛjianɔtoo lɛ ewo mɛi babaoo hewalɛ ni amɛkɛ ekaa babaoo atsu nii koni akɛgbe nitsumɔ ni he hiaa waa nɛɛ naa. Ani obaanyɛ ofee gbɛgbalɔi awalɔ yɛ April?
April Kɛ Hegbɛ Nl Hi Haa
3 Akɛni April hiɛ otsii anaagbee enumɔ sɔŋŋ hewɔ lɛ, ebaafee nyɔŋ ni hi jogbaŋŋ kɛha mɛi pii ni amɛkɛfee gbɛgbalɔi awalɔi. Mɛi ni kɛ amɛbe fɛɛ tsuɔ nii lɛ po baanyɛ ni amɛkɛ amɛhe awo mli. Mɛi komɛi ni kɛ amɛhe wo gbɛgbamɔ sɔɔmɔ lɛ mli yɛ nyɛsɛɛ afi lɛ mli lɛ na jɔɔmɔi babaoo ni amɛtsɔɔ akɛ amɛmiishwe ni amɛkɛ amɛhe awo mli ekoŋŋ afi nɛɛ hu. Kɛ oto ogbɛjianɔ amrɔ nɛɛ, ani obaanyɛ ofee gbɛgbalɔi awalɔ yɛ April? Mɛni hewɔ okɛ mɛi ni yɔɔ mli momo lɛ egbaaa he sane amrɔ nɛɛ ni ona ŋaawoi ni obaanyɛ otsu he nii kɛjɛ amɛŋɔɔ?
4 Kɛ wɔlɛɛ wɔsɔɔmɔ lɛ mli lɛ ekɛ miishɛɛ babaoo baaha wɔ. Eyɛ mli akɛ enɛ feemɔ baabi ni wɔkɛ wɔ diɛŋtsɛ wɔ nibii komɛi asha afɔle moŋ, shi kɛ wɔdu babaoo lɛ, wɔbaakpa mumɔŋ jɔɔmɔi babaoo. (2 Kor. 9:6b) Mɛi ni jɛɔ amɛtsui muu fɛɛ mli amɛtsuɔ nii amɛhaa Yehowa lɛ “yimɔɔ obɔbɔ kɛ miishɛɛ” yɛ kaselɔi heei babaoo ni baa lɛ hewɔ.—Bɔfoi 13:48, 52
Teokrase Atrakwei
5 Yɛ be mli ni amɛkɛ gbɛgbalɔi awamɔ sɔɔmɔ lɛ mli ŋɔɔmɔ sa amɛnaa lɛ, eha mɛi babaoo ebatsɔmɔ daa gbɛgbalɔi. Yɛ nɛkɛ gbɛ nɔ lɛ, gbɛgbalɔi awamɔ sɔɔmɔ lɛ ebafee atrakwei kɛha miishɛɛ babaoo namɔ. Kɛ onyɛ ofee gbɛgbalɔi awalɔ yɛ April kɛ nyɔji ni nyiɛ sɛɛ lɛ amli lɛ, obaanyɛ ona sɛɛsaramɔi kɛ Biblia mli nikasemɔi ni baaye abua bo koni onyɛ otsake kɛya daa gbɛgbamɔ sɔɔmɔ lɛ mli yɛ sɔɔmɔ afi ni baaje shishi yɛ September lɛ mli.
6 Mɛni hewɔ ni Yehowa Odasefoi lɛɛɔ amɛsɔɔmɔ nitsumɔ lɛ mli yɛ nɛkɛ bei nɛɛ amli moŋ fe ni amɛaatao heloo naa nibii babaoo yɛ nibii agbɛjianɔtoo nɛɛ mli lɛ? Nɔ hewɔ lɛ ji akɛ amɛmiisumɔ ni amɛjie Yehowa yi ni amɛgba eyiŋtoi lɛ amɛtsɔɔ mɛi krokomɛi. Amɛle akɛ “je lɛ hoɔ eyaa kɛ emli sɛɛdii nii lɛ: shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yoh. 2:17) Amɛtsuɔ nii yɛ anɔkwayeli mli koni ekɛ amɛsɔlemɔi akɛ nikpamɔ lɛ Nuŋtsɔ lɛ “awo nitsulɔi agbɛ kɛba enikpamɔ lɛ mli” lɛ akpa gbee.—Mat. 9:37, 38.
7 Suɔmɔ krɔŋŋ ni wɔyɔɔ kɛhaa Nyɔŋmɔ kɛ wɔnaanyo lɛ tsirɛɔ wɔ koni wɔna kaselɔ feemɔ nitsumɔ lɛ mli gbɛfaŋnɔ bɔ ni wɔɔnyɛ. (Mat. 22:37-39; 28:19) Eyɛ mli akɛ aŋkroaŋkroi pii ashihilɛ eŋmɛɛɛ amɛ gbɛ koni amɛsɔmɔ akɛ gbɛgbalɔi moŋ, shi kɛ wɔfee bɔ ni wɔɔnyɛ yɛ Yehowa sɔɔmɔ mli yɛ bɔ ni wɔshihilɛ ji lɛ naa lɛ ebaaha ajie wɔ yi akɛ mɛi ni ‘tsuɔ nii waa ni wɔgboɔ deŋme hu koni wɔkɛye wɔbua gbɔmɛi fɛɛ ni ahere amɛyiwala.’—1 Tim. 4:10.