Weku Ekomefeemɔ kɛ Sɛɛnamɔi Baa
1 Weku kɔkrɔɔ lɛ ji adesai agbɛjianɔtoo ni etsɛ fe fɛɛ. Ejara wa yɛ Yehowa hiɛ, ejaakɛ lɛ ji “mɛi fɛɛ ni atsɛ amɛ akɛ bii yɛ ŋwɛi kɛ shikpɔŋ lɛ nɔ lɛ atsɛ krɔŋkrɔŋ lɛ.”—Efe. 3:15.
2 Yɛ Biblia bei amli lɛ, tsɛ lɛ ji mɔ ni gbɛnaa nii titri ka enɔ akɛ ekwɛ koni weku lɛ ahi shi akɛ teokrase weku. Nakai eji ŋmɛnɛ. (Yosh. 24:15; Efe. 6:1-4) Ni aaakwɛ weku lɛ saji ni he hiaa lɛ fɛɛ nɔ lɛ ji nɔ ko ni mli wa ni kaa mɔ diɛŋtsɛ. Mɛɛ gbɛ nɔ aaatsɔ ni afee enɛ yɛ? Kɛtsɔ weku ekomefeemɔ kɛ gbɛjianɔtoo nɔ.—1 Kor. 14:40.
Akɛ Yitso Lɛ Nyiɛmɔ Hiɛ
3 Mɔ fɛɛ mɔ mumɔŋ shihilɛ lɛ ji hiamɔ nii titri. Esa akɛ afee weku nikasemɔ lɛ be fɛɛ be ni esa akɛ ekɔ weku lɛ hiamɔ nii ahe. Esa akɛ enɛ hu afee anɔkwale yɛ daa gbi ŋmalɛ lɛ hu hesusumɔ he. Mɛɛ nɔ kpakpa po enɛ ji akɛ aaaje gbi lɛ shishi kɛ Nyɔŋmɔ Wiemɔ lɛ hesusumɔ! Enɔ jwɛŋmɔ yɛ gbi lɛ mli baaye ebua wɔ koni wɔya nɔ ‘wɔsusu nibii ni he tse, nibii ni asumɔɔ. nibii ni yɔɔ gbɛi kpakpa’ lɛ ahe. (Fil. 4:8) Ani ooonyɛ oya ohiɛ yɛ enɛ mli?
4 Kɛfata weku nikasemɔ lɛ he lɛ, mɔ diɛŋtsɛ teemɔŋ nikasemɔ gbɛjianɔtoo he miihia. Wiemɔi ni yɔɔ Yoshua 1:8 lɛ kɔɔ wɔteŋ mɔ fɛɛ mɔ he: “Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ nɔ nyɔɔŋ kɛ shwane koni ojwɛŋ nɔ koni ofee tamɔ bɔ ni aŋma yɛ mli lɛ pɛpɛɛpɛ; ejaakɛ no aaaha ofee nɔbatsɛ kɛ hiɛshikalɔ.”
5 Eji kaa diɛŋtsɛ akɛ beni asafoŋ kpeei aaaje shishi lɛ, no mli lɛ oshɛ asa lɛ nɔ momo. Enɛ hu biɔ ekomefeemɔ. Gbɛtsɔɔmɔ ni jɛ wekuyitso lɛ ŋɔɔ lɛ baakwɛ koni aye ebua yɛ enɛ mɔ fɛɛ mɔ ashɛ yɛ be naa pɛpɛɛpɛ ni ena sɔlemɔ ni akɛjeɔ shishi lɛ mli gbɛfaŋnɔ.
6 Akɛni nibii pii yɔɔ ni wuuɔ shiɔ weku ekomefeemɔ gbɛjianɔtoo lɛ hewɔ lɛ, ehe miihia ni wekuyitso lɛ anyiɛ hiɛ yɛ sɔlemɔ mli. (2 Tim. 3:1-5) Ŋaawoo ni Paulo kɛha yɛ Romabii 12:12 ji akɛ, “nyɛhiɛa sɔlemɔ mli daa.” Enɛ feemɔ daa lɛ baaye ebua ni weku ekomefeemɔ lɛ afee kpɛŋŋ. Nɛkɛ sɔlemɔ nɛɛ fata weku lɛ mli bii aŋkroaŋkroi lɛ asɔlemɔi ahe.
Tsɔ Hiɛ Osaa Ohe
7 Nɔ ni fata wɔjamɔ ni wɔkɛhaa Yehowa lɛ he ji egbɛi lɛ ni wɔhaa aleɔ lɛ. Kɛ weku lɛ miisaa amɛhe amɛha sɔɔmɔ nitsumɔ lɛ ni amɛka nɔ ni amɛaakɛɛ loo amɛaafee lɛ amɛkwɛ lɛ, ehi jogbaŋŋ. Dɛŋdade fɛfɛo ni wɔbaanyɛ wɔkɛtsu nii ji Reasoning wolo lɛ. Abaanyɛ ahala hiɛkpamɔ wiemɔi kɛjɛ baafai 9-15 ni ekɛfata Saneyitso Kɛha Sanegbaa lɛ he. Weku yitso lɛ baanyɛ atsɔɔ loo ewo ŋaa ni baaha aya hiɛ yɛ enɛɛmɛi amli.
8 Ani weku lɛ mlibii lɛ ateŋ mɔ kome loo mɛi enyɔ baanyɛ ni amɛkɛ amɛhe awo be fɛɛ sɔɔmɔ lɛ mli? (1 Kor. 16:9) Enɛ baabi ekomefeemɔ kɛ gbɛjianɔtoo kpakpa yɛ mɛi ni yɔɔ weku lɛ mli lɛ fɛɛ agbɛfaŋ. Akɛni mɛi komɛi eha amɛshihilɛ efee nɔ ni yɔɔ mlɛo ni amɛyeɔ amɛbuaa hewɔ lɛ, wekui pii miina hegbɛ ni tamɔ nɛkɛ mli ŋɔɔmɔ.
9 Eyɛ mli akɛ tsɛ lɛ loo wekuyitso lɛ ji mɔ ni baanyiɛ hiɛ moŋ, shi ehe miihia ni weku lɛ mlibii lɛ ateŋ mɔ fɛɛ mɔ akai akɛ akɛ mɔ aŋkro lɛ, gbɛnaa nii ka enɔ akɛ eye ebua weku lɛ yɛ Yehowa jamɔ mli. Kɛ wɔtao wɔteŋ mɔ fɛɛ mɔ hilɛ-kɛ-hamɔ lɛ, eeeha weku lɛ afee nɔ ni miishɛɛ kɛ ekomefeemɔ yɔɔ mli.