Sanekpakpa Lɛ Kɛhamɔ—Akɛ Weku
1 Weku ni ejɔɔ amɛhe nɔ ni kɛ amɛhe woɔ sɔɔmɔ krɔŋŋ mli kwraa kɛmɔɔ shi —ni tsɛ, nyɛ, kɛ bii fɛɛ kɛ tsui muu fɛɛ miisɔmɔ Nyɔŋmɔ—lɛ ji Yehowa gbɛi kpeteŋkpele lɛ yijiemɔ. Eŋɔɔ wɔnaa waa akɛ anaa wekui ni tamɔ nɛkɛ yɛ Yehowa webii lɛ asafoi ni yɔɔ jeŋ fɛɛ lɛ ateŋ.
2 Eji anɔkwale akɛ tsɛ lɛ ji mɔ klɛŋklɛŋ ni gbɛnaa nii ka enɔ akɛ etsu eweku lɛ mumɔŋ hiamɔ nibii ahe nii. (1 Kor. 11:3) Kɛ eŋa kɛ ebii lɛ kɛlɛ fee ekome lɛ, no lɛ eweku lɛ baana hewalɛ ni mli wa waa yɛ mɛi krokomɛi anɔ. (Mat. 5:16) Mɛni ji nibii komɛi ni abaanyɛ̃, ajie nɛkɛ ekomefeemɔ nɛɛ kpo yɛ mli.
Fɔlɔi Nyiɛɔ Hiɛ
3 Yɛ bei babaoo mli lɛ, ekolɛ tsɛ lɛ ji onukpa aloo asafoŋ sɔɔlɔ. Enɛ tsɔɔ akɛ, kɛfata nibii ni he hiaa eweku lɛ ahe nitsumɔ he lɛ, esa akɛ eto be eha asafoŋ nibii hu ni eha ejwɛŋmɔ ahi nɔ. Tsɛ lɛ gbɛnaa nii ji ni ekwɛ koni ejara be ni enaa lɛ mli pɛpɛɛpɛ koni ekaku ehiɛ efɔ eweku lɛ nɔ. Jeee be fɛɛ be enɛ feemɔ baafee mlɛo yɛ nibii babaoo ni heɔ ebe fioo ni enaa lɛ hewɔ. Shi akɛni eweku lɛ ji egbɛnaa nii lɛ amli klɛŋklɛŋ nɔ hewɔ lɛ, esa akɛ eto ebe ni he hiaa waa kɛha lɛ lɛ he gbɛjianɔ daa koni ekɛ eweku lɛ afee ekome yɛ nikasemɔ mli, yɛ shiɛmɔ mli, yɛ kpeei ashishi, kɛ agbɛnɛ hu yɛ hiɛtserɛjiemɔ ni sa mli. Shihilɛi komɛi kɛ gbɛnaa nii krokomɛi baanyɛ atsake tsɛ lɛ gbɛjianɔtoo lɛ yɛ bei komɛi amli, shi kwɛ bɔ ni nyɔmɔwoo yɔɔ mli akɛ eeehe be ni ekɛ eweku lɛ mli bii aya shiɛmɔ yɛ nyɔŋ fɛɛ nyɔŋ nɔ!
4 Ekome ni ŋa lɛ kɛ lɛ baafee lɛ hu he miihia. Ebaanyɛ efata ewu lɛ he yɛ gbɛ ni he hiaa nɔ kɛtsɔ yelikɛbuamɔ ni ekɛɛ aha lɛ ni akɛtsɔse gbekɛbii lɛ yɛ sɔɔmɔ nitsumɔ lɛ mii lɛ nɔ. Ekaa kɛ hetuu-kɛhamɔ ni eeejie kpo yɛ gbɛ ni sa kadimɔ nɔ lɛ baana hewalɛ babaoo yɛ gbekɛbii lɛ anɔ koni amɛdara akɛ mɛi ni yɔɔ hiɛsɔɔ kɛha sɔɔmɔ nitsumɔ lɛ.—2 Tim. 3:14,15.
5 Nɔkwɛmɔ nii fɛfɛji babaoo yɛ ni kɔɔ shihilɛi ni fɔlɔ kome tere mumɔŋ jatsu ni ji gbɛnaa nii lɛ ni ekɛ omanyeyeli tsɔse gbekɛbii lɛ yɛ sɔɔmɔ nitsumɔ lɛ mli lɛ he. Obalaŋtai babaoo ekɔ shidaamɔ ni yɔɔ shiŋŋ yɛ anɔkwale lɛ mli, yɛ nɔkwɛmɔ nɔ kpakpa ni amɛnyɛmɛi loo amɛtsɛmɛi fee lɛ hewɔ, ni amɛkɛ amɛhe ewo be fɛɛ Sɔɔmɔ lɛ po mli.
Bii Agbɛnaa Nii
6 Ni gbɛnaa nii ni ka bii lɛ anɔ lɛ hu? Beni Nyɔŋmɔ Bi ni eye emuu, Yesu, ji gbekɛ bibioo po lɛ, no mli lɛ ebaa ehe shi ehaa gbɛtsɔɔmɔ kɛ famɔ ni efɔlɔi kɛhaa lɛ lɛ. (Luka 2:51) No hewɔ lɛ, kɛji tsɛ kɛ nyɛ lɛ to gbɛjianɔ amɛha weku lɛ ni amɛfee ekome kɛtsu nii yɛ sɔɔmɔ nitsumɔ lɛ mli lɛ, belɛ eji gbɛnaa nii ni ka gbekɛbii lɛ anɔ akɛ amɛtsɔɔ amɛ Nyɔŋmɔ jamɔ hetuu-kɛhamɔ lɛ kɛtsɔ ekome ni amɛkɛ amɛfɔlɔi aaafee lɛ nɔ.—Efes. 6:1-3.
7 Jamɔ ni wɔkɛaaha kutuu akɛ weku —yɛ nikasemɔ mli, yɛ wɔhe ni wɔkɛwoɔ shiɛmɔ nitsumɔ lɛ mli, kɛ kpeeiyaa mli—lɛ haa suɔmɔ kpaa kɛ ekomefeemɔ ni yɔɔ weku lɛ mli lɛ mli waa. Fɔlɔi kɛ bii fɛɛ yɛ gbɛfaŋnɔ yɛ gbɛnaa nii nɛɛ mli.