Sanepakpa Lɛ Kɛhamɔ—Kɛ Woji Tɛtrɛbii
1 Jajelɔ 12:12 kɛɔ akɛ: “Woji babaoo feemɔ lɛ, ebɛ naagbee.” Nakai wiemɔi lɛ efee anɔkwale yɛ wɔgbii nɛɛ amli yɛ be mli ni tsɔnei ni akɛkalaa woji oyayaayai gbɛɔ woji ni akala lɛ baafai akpekpei toi akpei abɔ eshwaa jeŋ fɛɛ, ni eko fɛɛ eko miigbala kanelɔ lɛ jwɛŋmɔ lɛ. Bɔ ni woji sɔrɔtoi babaoo efa eha nɛɛ kɛ sane ni mli wa diɛŋtsɛ bafɔɔ Maŋtsɛyeli lɛ he sanekpakpa lɛ shiɛlɔi lɛ ahiɛ. Te wɔɔfee tɛŋŋ wɔtsɔ aŋkroaŋkroi ayiŋ akɛ Buu-Mɔɔ lɛ kɛ Awake! lɛ ji woji tɛtrɛbii ni hi fe fɛɛ ni akala lɛ?
Woji Tɛtrɛbii Ni Sɛɛnamɔ Yɔɔ He
2 Ehi jogbaŋŋ akɛ wɔɔpɛi su ni wɔ diɛŋtsɛ lɛ wɔhiɛ yɛ Buu-Mɔɔ lɛ kɛ Awake! lɛ he lɛ mli. Ani obuɔ woji tɛtrɛbii nɛɛ akɛ nɔ ni jara wa, okɛ hehiamɔ kpaa ehee fɛɛ ehee ni baa lɛ gbɛ? Ani otoɔ be he gbɛjianɔ koni okane emli saji lɛ fɛɛ? Kɛ wɔ diɛŋtsɛ lɛ wɔhiɛ sɔɔ woji tɛtrɛbii lɛ, belɛ wɔ miishɛɛ krɔŋŋ kɛ nɔmimaa ni jɛ tsuiŋ tɔɔ lɛ baaye abua wɔ koni wɔye omanye yɛ mɛi krokomɛi ni wɔkɛaaha amɛ lɛ mli.
3 Saji ni he hiaa ni yɔɔ Buu-Mɔɔ lɛ kɛ Awake! lɛ mli lɛ he miihia gbɔmɛi ni yɔɔ wɔshikpɔŋkuku lɛ mii lɛ taakɛ bɔ ni wɔ hu ehe hiaa wɔ lɛ. Saji ni kpa apasa jamɔ osɔfoi lɛ anɔ fɔŋ feemɔ lɛ he mama ni agbɛnɛ etsɔɔ gbalɛ kɔkɔbɔi ni kɔɔ Babilon Kpeteŋkpele lɛ hiɛkpatamɔ ni baa lɛ mli lɛ he ba sɛɛnamɔ kɛha wɔ. Yɛ September 15, 1989 Buu-Mɔɔ lɛ mli lɛ, sane ni je kpo yɛ mli ni ji “Mɛni Esa Akɛ Wɔfee Koni Ahere Wɔyiwala? lɛ woɔ wɔ hewalɛ yɛ wɔ jeŋba kɛ wɔ nifeemɔ he. Awake! lɛ mli saji ni ba nyɛsɛɛ nɛɛ egbala jwɛŋmɔ kɛtee bɔ ni gbɔmɔ fiteɔ shikpɔŋ lɛ kɛ bɔ ni Nyɔŋmɔ ewo shi akɛ ebaaku sɛɛ esaa shikpɔŋ lɛ ni efee lɛ paradeiso lɛ nɔ. Mɛɛ mumɔŋ niyenii babaoo nɛkɛ woji tɛtrɛbii nɛɛ kɛhaa koni ekɛhɛle gbɔmɛi lɛ ajwɛŋmɔ shi kɛya mumɔŋ hiamɔ nii ahe nɛkɛ!
Le Owoji Tɛtrɛbii Lɛ
4 Te wɔɔfee tɛŋŋ wɔtsɔ mɔ ko yiŋ akɛ Buu-Mɔɔ lɛ kɛ Awake! woji tɛtrɛbii lɛ kanemɔ he baaba sɛɛnamɔ aha lɛ? Gbɛ ni hi fe fɛɛ ji ni wɔtsɔɔ lɛ sane pɔtɛɛ ni ebaana he miishɛɛ ni baakɔ ehe hu. Kɛ wɔɔnyɛ wɔfee enɛ yɛ gbɛ ni mɔɔ shi nɔ lɛ, belɛ ebiɔ ni wɔ diɛŋtsɛ lɛ wɔle woji tɛtrɛbii lɛ jogbaŋŋ ni wɔtsɔ hiɛ wɔsaa wɔhe. Nɛkɛ hesaamɔ nɛɛ jeɔ shishi kɛ woji tɛtrɛbii lɛ akanemɔ wɔ diɛŋtsɛ dani wɔkɛtsu nii yɛ shiɛmɔ mli. Yɛ be mli ni okaneɔ lɛ, ha ohiɛ ahi saji otii ni obaanyɛ okɛtsu nii yɛ sɔɔmɔ nitsumɔ lɛ mli lɛ anɔ. Mɛni hewɔ okadiii nɛkɛ saji otii nɛɛ yɛ bo diɛŋtsɛ owoji tɛtrɛbii amli ni agbɛnɛ oti nɔ ni oŋmala oshwie shi lɛ amli yɛ be mli ni saa ohe kɛhaa shiɛmɔ ni okɛ nɔ ni oosaa ohe kɛjɛ mli nɛɛ atsu nii lɛ?
5 Yɛ be mli ni okaneɔ o-Buu-Mɔɔ lɛ kɛ Awake! lɛ, ehi hu akɛ ooosusu saji lɛ amli nɔ ni he baaba sɛɛnamɔ aha gbɔmɛi pɔtɛɛ komɛi ni yɔɔ oshikpɔŋkuku lɛ mli lɛ ahe. Ani saji komɛi yɛ mli ni baaŋɔɔ datrɛfoi, mlalelɔi, loo tsɔɔlɔi anaa? Yɛ enɛ mli hu lɛ, ohiɛ akakpa wɔsɛɛ be mli nɔ ni baaba ni akadiɔ yɛ woji tɛtrɛbii lɛ amli lɛ nɔ bɔ ni afee ni onyɛ oto gbɛjianɔ bɔ ni sa. Ŋɔɔ hegbɛ ni trukaa odaseyeli kɛhaa bo yɛ onanemɛi ni yɔɔ shia, nitsumɔ he, jara nɔ kɛ hei krokomɛi lɛ ni okɛtsu nii, ni agbɛnɛ okɛ woji tɛtrɛbii lɛ atsɔɔ amɛ yɛ nilee loo ŋaalee mli. Kɛ oto aŋkroaŋkroi ni osumɔɔ ni okɛ woji tɛtrɛbii nɛɛ aha amɛ lɛ naa lɛ, eeeye ebua.
6 Yɛ be mli ni ewie woji babaoo afeemɔ he lɛ sɛɛ lɛ. Jajelɔ 12:12 kɛɔ akɛ: “Nikasemɔ tuutu lɛ, ehaa etɔɔ heloo.” Je lɛŋ woji akanemɔ haa etɔɔ mɔ ejaakɛ ekɛ mumɔŋ miishɛjemɔ kɛ hejɔɔmɔ ko haaa. Nɔ ni tamɔɔɔ nakai lɛ, kwɛ bɔ ni wɔdaa shi akɛ wɔnaa Buu-Mɔɔ lɛ kɛ Awake! woji tɛtrɛbii ni woɔ Yehowa hiɛ nyam ni jajeɔ egbɛi lɛ kɛ Maŋtsɛyeli lɛ jaa kɛhamɔ mli gbɛfaŋnɔ!—Abɛi 3:9.