Too Be Oma Shi Kɛha Woji Tɛtrɛbii Kɛhamɔ

¹ Yehowa etswa fai shi akɛ mɛi ni nyiɛɔ egbɛi asɛɛ lɛ baana ‘toiŋjɔlɛ, wɔsɛɛ be, kɛ hiɛnɔkamɔ.’ (Yer. 29:​11. NW) Akɛ gbɛkpamɔ nɛɛ he sane eha yɛ ebe naa pɛpɛɛpɛ yɛ Buu-Mɔɔ kɛ Awake! lɛ amli. Gbɔmɛi sɔrɔtoi fɛɛ ni yɔɔ shihilɛi fɛɛ mli lɛ baanyɛ ana woji tɛtrɛbii nɛɛ ahe sɛɛ. (1 Tim. 2:⁠4) Ani bo kɛ oweku lɛ toɔ be daa kɛhaa woji tɛtrɛbii ajaa?

² Kɛ woji tɛtrɛbii ni okɛhaa lɛ falɛ miiba shi lɛ, te aaafee tɛŋŋ ajaje shi ni ebaa nɛɛ? Nɔ kome ni he hiaa ji ni oha ohiɛ asɔ wɔwoji tɛtrɛbii lɛ amli saji lɛ jogbaŋŋ. Nuu ko ŋma akɛ: “Nyɛ woji tɛtrɛbii lɛ akanemɔ ji niiashikpamɔ ko ni ŋɔɔ diɛŋtsɛ. Amɛjeee ‘miishɛjelɔi’ ni baa shi, ni amɛhe sɛɛnamɔ faaa, shi moŋ gbɛtsɔɔmɔ kɛ kudɔmɔ ni tsɔɔ bɔ ni aaafee aha shihilɛ afee nɔ ni sɛɛnamɔ jɛɔ mli baa yɔɔ mli.” Agbɛlɛ shi jogbaŋŋ akɛtao nibii amli akɛfee Buu-Mɔɔ kɛ Awake! lɛ ni amɛji nibii ni jɛ “tsulɔ anɔkwafo kɛ nilelɔ” lɛ ŋɔɔ. (Mat. 24:45) Amɛji dɛŋdadei kpakpai ni akɛtsuɔ nii akɛshɛ mɛi atsuii ahe.

³ Esa akɛ ole sini sɔrɔtoi ni yɔɔ woji tɛtrɛbii ni okɛhaa lɛ amli lɛ. Taomɔ emli otii ni kɔɔ naagbai ni yaa nɔ amrɔ nɛɛ yɛ nyɛ akutso lɛ mli lɛ ahe. Ehi akɛ wɔɔsaa wɔhe ni wɔtsɔɔ hii, yei, kɛ obalaŋtai ni wɔkɛkpeɔ yɛ shinaai anaa kɛ gbɛjegbɛi anɔ lɛ bɔ ni woji tɛtrɛbii lɛ kɔɔ amɛhe ehaa.

⁴ Ha woji Tɛtrɛbii Ahi ojwɛŋmɔ Mli:

Esa akɛ woji tɛtrɛbii kɛhamɔ lɛ afee oshiɛmɔyaa he gbɛjianɔ ni oto lɛ fa ko ni he hiaa. Mɛni ji bei ni hi fe fɛɛ ni okɛ woji tɛtrɛbii lɛ aaaha? Ani obɔ mɔdɛŋ otsu nii yɛ shinaai anaa ŋmɛlɛtswaa kome loo nɔ kɛmiiba gbɛkɛnaashi loo yɛ gbɛkɛnaashi dani Asafo Woloŋ Nikasemɔ ni oyaa lɛ aaashɛ? Hɔɔ ji gbi ni hi kɛha woji tɛtrɛbii ajaa yɛ gbɛi sɔrɔtoi anɔ moŋ, shi abaanyɛ akɛ gbii krokomɛi tamɔ jarayeli gbii atsu nii hu kɛha enɛ feemɔ. Esa akɛ shia-kɛ-shia, kɛ shwapo-kɛ-shwapo mli nitsumɔ lɛ afee Woji Tɛtrɛbii kɛhamɔ Gbi lɛ fa titri ko.

⁵ Esa akɛ mɔ fɛɛ mɔ ashɛ woji tɛtrɛbii ni baa lɛ fɛɛ eko yibɔ pɔtɛɛ ko, ni wɔ maŋ nɛɛ mli wiemɔi lɛ amli nɔ lɛ eko fata he. Okɛ woji tɛtrɛbii memeji atsu nii yɛ shiɛmɔ nitsumɔ lɛ mli shi kwɛmɔ ni amɛfee nɔ ni hi. Abaanyɛ ashi ememeji lɛ hu yɛ shiai ni anaaa mɛi yɛ lɛ loo helatsamɔ hei ni aaaŋmɛ gbɛ. Abaanyɛ akane woji tɛtrɛbii ni tamɔ enɛɛmɛi lɛ fɛɛ akɛ nɔ ni akɛha ni esa akɛ abu he akɔntaa nyɔŋ fɛɛ nyɔŋ nɔ yɛ Field Service Report wolo lɛ nɔ.

⁶ Kɛ okɛ ŋaawoi ni atsɔɔ yɛ yiteŋgbɛ lɛ tsu nii lɛ, ŋwanejee ko bɛ he akɛ obaana bɔ ni woji tɛtrɛbii ni onyɛɔ okɛhaa lɛ yibɔ faa haa. Mɛi ni hiɛ tsui kpakpa ni ŋmɛnɛŋmɛnɛ nibii agbɛjianɔtoo fɔŋ nɛɛ mli shihilɛ haoɔ amɛ lɛ ahiɛ sɔɔ shɛɛ saji ni shɛjeɔ mɔ mii ni anaa yɛ Buu-Mɔɔ kɛ Awake! lɛ mli lɛ. Nɛkɛ woji tɛtrɛbii nɛɛ kɛ mumɔŋ niyenii ni he hiaa mɛi ni sumɔɔ ni amɛna Yehowa nɔkpɛlɛmɔ lɛ haa amɛ. No hewɔ lɛ, ha woji tɛtrɛbii lɛ ahe sane ahi ojwɛŋmɔ mli daa, ni otao gbɛi ni oootsɔ nɔ okɛ woji tɛtrɛbii ni he yɔɔ sɛɛnamɔ babaoo nɛɛ aha yɛ oshikpɔŋkuku lɛ mli.