Omumɔŋ Hiamɔ Nii Lɛ Ahe Nitsumɔ
1 Yesu kɛɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ.” (Mat. 5:3. NW) Mɛni hewɔ ni ehe hiaa waa akɛ wɔhiɛ aaahi wɔmumɔŋ hiamɔ nii anɔ lɛ? Mɛɛ gbɛ nɔ wɔɔtsɔ wɔtsɔɔ yɛ faŋŋ mli akɛ wɔhiɛ yɛ nɔ? Mɛɛ tɛmɔtɛi esa akɛ wɔkwa, ni mɛɛ jɔɔmɔi wɔbaana kɛbaaje wɔhiɛ ni aaahi wɔmumɔŋ hiamɔ nii anɔ lɛ mli?
2 Ŋwanejee ko bɛ he akɛ wɔ fɛɛ wɔle tsakpaa ni yɔɔ wɔgbɔmɔtsoŋ hewalɛnamɔ kpakpa kɛ niyenii kpakpa teŋ lɛ jogbaŋŋ. Mɔ ko nyɛŋ aya nɔ aku ehiɛ eshwie eheloonaa hiamɔ nii lɛ anɔ daa ni ekpa gbɛ akɛ ebaanyɛ etsu nitsumɔ kpakpa daa gbi. Kɛji wɔku wɔhiɛ wɔshwie wɔhe ni wɔɔle yɛ mumɔŋ lɛ nɔ lɛ, no lɛ nakai shishitoo mla lɛ nɔŋŋ baakɔ wɔhe.—Mat. 4:4; Yoh. 17:3.
Kpeei Yeɔ Ebuaa Ni Wɔtsuɔ Wɔhiamɔ Nii Ahe Nii
3 Tsakpaa pɔtɛɛ ko yɛ wɔmumɔŋ hewalɛnamɔ kɛ wɔmumɔŋ niyeli gbɛjianɔtoo lɛ mli. “Tsulɔ enɔkwafo kɛ nilelɔ” lɛ kɛ mumɔŋ niyenii sɔrɔtoi ni baaha wɔtsu wɔtaomɔ nii lɛ ahe nii haa wɔ yɛ wɔkpeei ashishi. (Mat. 24:45-47) Kpeei lɛ eko fɛɛ eko tsuɔ yiŋtoo pɔtɛɛ ko he nii, ni esaaa ni wɔkuɔ wɔhiɛ wɔshwieɔ eko eko nɔ. Ani osaa ohe ohaa kpeei lɛ fɛɛ ni oyaa daa lɛ?
4 Nyɛhaa wɔsusuɔ wɔ daa otsi kpeei enumɔ lɛ amli etɛ ahe fioo, kpee titri ni ato he gbɛjianɔ bɔni afee ni wɔkɛ anɔkwale lɛ ni yaa hiɛ lɛ anyiɛ pɛpɛɛpɛ ji Buu-Mɔɔ Nikasemɔ lɛ. Teokrase Sɔɔmɔ Skul lɛ baanyɛ aye ebua wɔ ni wɔhe asa akɛ sɔɔlɔi. Asafo Woloŋ Nikasemɔ lɛ haa wɔnaa hegbɛ ni wɔkaseɔ Biblia mli saneyitsei sɔrɔtoi ahe nii jogbaŋŋ.
5 Ani osaa ohe kɛhaa asafoŋ kpeei? Mɛi komɛi nyɛɔ amɛkwɛɔ nɔ ni abaakase lɛ mli oyayaayai, ni amɛfolɔɔ sanebimɔi lɛ ahetooi lɛ ashishi, shi amɛkwɛɛɛ ŋmalɛi ni atsɛ yisɛɛ lɛ. Ekolɛ amɛbaanyɛ amɛha sanebimɔi lɛ, ekomɛi ahetoo, shi ani amɛnaa hewalɛ ni yɔɔ mumɔŋ niyenii ni akɛha lɛ mli lɛ fɛɛ? Ani nyɛbaanyɛ nyɛya nyɛhiɛ yɛ gbɛ ni bo kɛ oweku lɛ tsɔɔ nɔ nyɛsaa nyɛhe kɛhaa kpeei lɛ mli?
Tsu Odeka He Nii
6 Kɛ oto be pɔtɛɛ ko ni ekɛbaasaa ohe kɛha kpeei lɛ, kaaŋmɛ gbɛ ni televishin aloo nɔ kroko ni he ehiaaa tsɔ miifite gbɛjianɔ ni oto lɛ. Esa akɛ wekuyitsei lɛ titri aye abua amɛwekui lɛ ni amɛkɛ amɛhe akpɛtɛ daa gbi Biblia nikasemɔ gbɛjianɔtoo, kɛ hesaamɔ kɛha kpeei, kɛ amɛhe ni amɛkɛaawo shiɛmɔ nitsumɔ lɛ mli hu lɛ he. Esa akɛ wɔ fɛɛ wɔbu bɔfo Paulo ŋaawoo ni ekɛha akɛ ‘wɔtsu wɔdeka he nii’ lɛ akɛ nɔ ni hiɛdɔɔ yɔɔ mii ni wɔha wɔmumɔŋ hewalɛnamɔ lɛ aye klɛŋklɛŋ gbɛhe.—Efe. 5:15-17.
7 Kɛ wɔhiɛ hi wɔmumɔŋ hiamɔ nii anɔ lɛ, no lɛ wɔbaakwa osharai ni jɛɔ wɔhe ni wɔɔha esa wɔ diɛŋtsɛ wɔhiɛ lɛ mli baa lɛ. Akɛ aŋkroaŋkroi kɛ wekui lɛ, wɔyɛ mumɔŋ hiamɔ nii diɛŋtsɛ. Wɔ naanɔ miishɛɛnamɔ damɔ mɔdɛŋbɔɔ ni wɔkɛwoɔ mli bɔni afee ni wɔtsu wɔmumɔŋ hiamɔ nii ahe nii lɛ nɔ.