Yelikɛbuamɔ Yɛ Be Ni Sa Mli
1 Akɛni Yesu yɛ anɔkwa henumɔ kɛha asafo lɛ hewɔ lɛ, ekɛ ‘yelikɛbuamɔ baaha yɛ be ni sa mli’ be fɛɛ be. (Heb. 4:16) Ekɛ yelikɛbuamɔ ni he hiaa nɛɛ babaoo haa kɛtsɔɔ ‘nikeenii yɛ gbɔmɛi ateŋ’ lɛ nɔ, taakɛ awo shi yɛ he yɛ Efesobii 4:8, 11, 12 lɛ. Nikeenii nɛɛ ateŋ ekome ji sɔɔmɔ nɔkwɛlɔi ni yɔɔ asafoi fɛɛ mli lɛ.
2 Mɛɛ gbɛi anɔ sɔɔmɔ nɔkwɛlɔ lɛ baanyɛ aye abua wɔ yɛ? Gbɛi pii yɛ: (1) Ebɔɔ mɔdɛŋ waa bɔni afee ni eha wɔ fɛɛ wɔhiɛ ahi bɔ ni shiɛmɔ kɛ Kaselɔfeelɔi nitsumɔ lɛ he hiaa waa ha lɛ nɔ. (2) Ekwɛɔ hu akɛ akɛ gbɛjianɔtoo kpakpa kɛ hiɛnyiɛmɔ miiha yɛ shiɛmɔ nitsumɔ lɛ mli kɛtsɔ Asafo Woloŋ Nikasemɔ kuui lɛ anɔ. (3) Eyɛ he miishɛɛ akɛ eeena akɛ akɛ yelikɛbuamɔ ni he hiaa wɔ aŋkroaŋkro bɔni afee ni wɔhesaa akɛ sɔɔlɔi lɛ aya hiɛ lɛ miiha wɔ.
Sɔɔmɔ Nɔkwɛlɔ Lɛ Saramɔi
3 Kɛfata yelikɛbuamɔ kpakpa ni akɛhaa kɛtsɔ Asafo Woloŋ Nikasemɔ gbɛjianɔtoo lɛ nɔ lɛ he lɛ, ato gbɛjianɔi krɛdɛɛi komɛi aha wɔ koni wɔna yelikɛbuamɔ aŋkroaŋkro. Yɛ bei babaoo mli lɛ atoɔ gbɛjianɔ koni sɔɔmɔ nɔkwɛlɔ lɛ akwɛ Asafo Woloŋ Nikasemɔ nɔ, shi eshiɔ lɛ diɛŋtsɛ ekuu lɛ shikome yɛ daa nyɔŋ nɔ koni ekɛ woloŋ nikasemɔ kuui krokomɛi lɛ ateŋ ekome eyatsu nii otsi. Kɛ etee lɛ, mɔ ni kwɛɔ esɛɛ lɛ yeɔ enajiaŋ. Etsɔɔ hiɛ etswaa nikasemɔ nɔkwɛlɔ lɛ ehaa lɛ he adafi koni kuu lɛ anyɛ ato gbɛjianɔ ni he hiaa lɛ bɔni afee ni amɛna otsi lɛ mli nitsumɔi lɛ ahe sɛɛ kwraa kɛmɔ shi.
4 Akɛ minitii 45 feɔ woloŋ nikasemɔ lɛ taakɛ afeɔ daa lɛ, yɛ nɛkɛ otsi krɛdɛɛ nɛɛ mli. Enɛ haa sɔɔmɔ nɔkwɛlɔ lɛ naa minitii 15 koni ekɛha ekaawoo wiemɔ ni ato he gbɛjianɔ bɔni afee ni eye ebua wɔ ni wɔya wɔhiɛ yɛ wɔ sanekpakpa jajemɔ nitsumɔ lɛ mli. Ehe miihia ni wɔ fɛɛ, shiɛlɔi kɛ mɛi heei ni yɔɔ wiemɔ lɛ he miishɛɛ lɛ ahi jɛmɛ.
5 Akɛni naatsii lɛ hewɔ lɛ wɔyaaa Maŋtsɛyeli Asa lɛ nɔ hewɔ lɛ, sɔɔmɔ nɔkwɛlɔ lɛ baaya kuu lɛ kpeei kroko, mɛi lɛ fɛɛ yɛ otsi lɛ mli. Shi kɛlɛ, woloŋ nikasemɔ lɛ shishi pɛ ebaaha wiemɔ ni heɔ minitii 15 lɛ yɛ. Kɛji afeɔ woloŋ nikasemɔ lɛ kɛ kpeei krokomɛi hu yɛ nakai gbɛkɛ lɛ nɔŋŋ lɛ, belɛ esa akɛ afee tsakemɔi koni kpeei sɔrɔtoi lɛ fɛɛ, kɛ sɔɔmɔ nɔkwɛlɔ lɛ wiemɔ lɛ hu akahe be ni fa fe ŋmɛlɛtswai enyɔ.
6 Esa akɛ shiɛlɔi fɛɛ ni yɔɔ kuu ni asaraa amɛ lɛ mli lɛ ato gbɛjianɔ koni amɛna sɔɔmɔ lɛ mli gbɛfaŋnɔ kɛmɔ shi yɛ nɛkɛ saramɔ krɛdɛɛ nɛɛ mli, titri lɛ yɛ otsi lɛ naagbee. Kɛ ebaahi lɛ, abaanyɛ ato gbɛkɛnaashi odaseyeli he gbɛjianɔ kɛha nakai otsi lɛ. Otii ni mamɔ sɔɔmɔ nɔkwɛlɔ lɛ hiɛ lɛ ateŋ ekome ji ni ekɛ shiɛlɔi babaoo bɔ ni eeenyɛ atsu nii yɛ sɔɔmɔ lɛ mli. Ekolɛ ebaanyɛ efata wɔteŋ mɛi komɛi ahe kɛya wɔsɛɛsaramɔi kɛ Biblia mli nikasemɔi afeemɔ nɔ. Mɔ fɛɛ mɔ ni nuɔ he akɛ yelikɛbuamɔ loo ekaawoo he miihia lɛ yɛ sɔɔmɔ lɛ mli lɛ baanyɛ abɛŋkɛ lɛ ni ehi yelikɛbuamɔ. Agbɛnɛ hu, wɔnine baanyɛ ashɛ sɛɛnamɔi anɔ kɛtsɔ kpeei kɛha shiɛmɔyaa ni ekwɛɔ nɔ kɛhaa kuu lɛ yɛ nakai otsi lɛ mli lɛ ni wɔɔya lɛ nɔ.
7 Sɔɔmɔ nɔkwɛlɔ lɛ heɔ be bɔni afee ni ekɛ nikasemɔ nɔkwɛlɔ lɛ asusu kuu lɛ nitsumɔ he. Atsakeɔ sɔɔmɔ gbɛjianɔtoo ni akɛtsuɔ nii daa lɛ mli koni no aha anyɛ ato nibii ahe gbɛjianɔ bɔ ni ebaahi eha mɛi fɛɛ ni amɛbaanyɛ amɛkɛtsu nii hu. Kɛji yelikɛbuamɔ aloo ekaawoo he miihia mɛi komɛi bɔni afee ni amɛna sɔɔmɔ nitsumɔ lɛ mli gbɛfaŋnɔ daa lɛ, no lɛ ekɛ amɛ baawie yɛ teemɔŋ ni ekɛ ŋaawoi ni baaye abua amɛ ni amɛya amɛhiɛ lɛ baaha amɛ yɛ suɔmɔ mli. Sɔɔmɔ nɔkwɛlɔ lɛ baanyɛ ato gbɛjianɔ ni ekɛ nikasemɔ nɔkwɛlɔ lɛ ayasara mɛi ni eyaaa shiɛmɔ daa nyɔŋ nɔ lɛ. Agbɛnɛ hu, ebaanyɛ ekɛ kuu lɛ woloŋ nikasemɔ nɔkwɛlɔ lɛ akwɛ Biblia mli nikasemɔi ni abu he akɔntaa lɛ he woji lɛ amli. Ekolɛ amɛbaanyɛ amɛfata shiɛlɔi lɛ ekomɛi ahe kɛya amɛ shia Biblia mli nikasemɔi lɛ aŋɔɔ ni amɛkɛ mumɔŋ hewalɛwoo aha amɛ.
8 Yɛ asafoi ni yɔɔ woloŋ nikasemɔ kuui pii lɛ amli lɛ, sɔɔmɔ nɔkwɛlɔ lɛ saramɔ lɛ efeŋ kpitiokpitio. Yɛ asafoi ni yɔɔ Asafo Woloŋ Nikasemɔi hoo lɛ agbɛfaŋ lɛ, sɔɔmɔ nɔkwɛlɔ lɛ baabɔ mɔdɛŋ ni eyasara kuui lɛ eko fɛɛ eko kɛ hoo lɛ daa nyɔji ekpaa. Bɔ ni wɔshweɔ akɛ wɔɔjɛ wɔtsui muu fɛɛ mli wɔye wɔbua yɛ be mli ni esaraa wɔ Asafo Woloŋ Nikasemɔ kuu lɛ baaye ebua wɔ ni wɔha wɔhesaa yɛ kaselɔ-feemɔ nitsumɔ lɛ mli lɛ aya hiɛ ni wɔna miishɛɛ babaoo yɛ wɔsɔɔmɔ nitsumɔ lɛ mli.