Okɛ Hejɔɔmɔ Be Atsu Nii yɛ Gbɛ Kpakpa Nɔ
1 Yɛ bei babaoo mli lɛ, afɔɔ gbekɛbii ni yaa skul lɛ nɔ ni amɛto ni amɛkɛ amɛgbɛhamɔ lɛ baafee lɛ bimɔ, ni kɛ amɛku amɛsɛɛ amɛtee skul lɛ, ahaa amɛŋmaa nɔ ni amɛfee lɛ he sane. Yɛ anɔkwale mli lɛ, ebaahi jogbaŋŋ akɛ wɔ fɛɛ, onukpai kɛ gbekɛbii fɛɛ aaabi wɔhe akɛ: ‘Mɛni ji nɔ ni wɔto wɔyiŋ akɛ wɔkɛ wɔ skul gbɛhamɔ loo nitsumɔ mli hejɔɔmɔ lɛ baafee? Kɛ be lɛ ho lɛ, ani wɔɔnyɛ wɔbu hejɔɔmɔ be ni he eba sɛɛnamɔ he akɔntaa?’ Kɛji wɔbo ŋaawoo ni akɛhaa akɛ ‘wɔtsu wɔdeka he nii lɛ toi lɛ, no lɛ wɔbaanyɛ.—Efes. 5:15, 16.
Na Kpokpai Wuji Anɔ Kpeei Ahe Sɛɛ
2 Wɔ fɛɛ wɔmiikwɛ kpokpai wuji anɔ kpeei ni abaafee yɛ afi nɛɛ mli lɛ gbɛ waa. Taakɛ atswa he adafi yɛ Volume 33, No. 7 lɛ mli nɔ ni aŋma ahɔ mli lɛ mli lɛ, ato gbɛjianɔ ni maŋ lɛ afa kome aya yɛ August, koni afa kroko lɛ aya kɛjɛ November 1990 kɛyashi January 1991. Nɔ kome ni esa akɛ wɔ fɛɛ wɔkɛwo wɔ gbɛjianɔtoo mli ji “Wiemɔ Krɔŋŋ” Kpokpaa Wulu nɔ kpee lɛ ni wɔɔya. Yɛ no sɛɛ lɛ, ebaahi jogbaŋŋ akɛ wɔɔsaa wɔti nibii ni wɔŋmala lɛ amli ekoŋŋ koni wɔkɛna otii ni wɔkase ni wɔbaanyɛ wɔkɛtsu nii yɛ wɔshihilɛ mli akɛ Yehowa yijielɔi. Awoɔ wɔ hewalɛ yɛ Efesobii 4:25 ni wɔteŋ “mɔ fɛɛ mɔ kɛ enaanyo awie anɔkwale.” Wɔnanemɛi ni bɛŋkɛ wɔ kpaakpa fe fɛɛ ji wɔ diɛŋtsɛ wɔweku lɛ. Wɔbaanyɛ wɔkɛ amɛ aloo wɔmumɔŋ weku lɛ mlibii lɛ agba mumɔŋ niyenii kpakpai ni ato he gbɛjianɔ aha wɔ yɛ kpokpaa wulu nɔ kpee lɛ he gbɛjianɔtoo lɛ mli lɛ he sane. Kɛ wɔfee nakai lɛ, belɛ wɔɔye wɔbua wɔteŋ mɔ fɛɛ mɔ “koni amɛ fɛɛ kwa amɛtsɛ Yehowa gbɛi lɛ, koni amɛkɛ gbee kome asɔmɔ lɛ.”—Zefania 3:9.
Okɛ Ohe Awo Shiɛmɔ Nitsumɔ Lɛ Mli
3 Wolo ni awoɔ wɔ ŋaa ni wɔkɛha yɛ August kɛ September mli ji woji bibii lɛ eko fɛɛ eko, ja skul wolo bibioo lɛ pɛ. Ani wɔto gbɛjianɔ akɛ wɔɔna gbɛfaŋnɔ babaoo yɛ sɔɔmɔ nitsumɔ lɛ mli yɛ nɛkɛ nyɔji enyɔ nɛɛ amli? Kɛji wɔyɛ wɔ diɛŋtsɛ wɔ asafo lɛ mli lɛ, no lɛ wɔbaasumɔ ni wɔfi daa shiɛmɔ he gbɛjianɔtoo lɛ sɛɛ. Obaanyɛ odamɔ saneyitso ni okɛ shiatsɛ lɛ susuɔ he yɛ shia-kɛ-shia sɔɔmɔ lɛ mli lɛ nɔ ni otsi wolo bibioo ni sa lɛ ta otsɔɔ lɛ koni oto gbɛjianɔ ni obaha lɛ eko yɛ be kroko ni oooba jɛmɛ lɛ. Kɛkɛ lɛ oba eŋɔɔ be kroko okɛ wolo lɛ ebaha lɛ. Abaanyɛ akɛ woji bibii lɛ hu aha yɛ sɛɛsaramɔi amli. Okɛ woji bibii lɛ atsu nii yɛ ŋaa mli yɛ shiɛmɔ nitsumɔ lɛ mli.—Yes. 50:4.
4 Kɛji wɔto gbɛjianɔ akɛ wɔbaafa gbɛ, ekolɛ kɛha kpokpaa wulu nɔ kpee lɛ aloo kɛha wɔhejɔɔmɔ lɛ, wɔbaanyɛ wɔto gbɛjianɔ ni wɔkɛ woji bibii lɛ eko aya. Kɛ wɔna hegbɛi kɛha trukaa odaseyeli lɛ, wɔbaanyɛ wɔgbala jwɛŋmɔ kɛba woji bibii lɛ ekome nɔ. Yɛ be mli ni wɔshi shia lɛ, wɔbaanyɛ wɔtao nyɛmimɛi ni yɔɔ he ni wɔtee lɛ asɛɛ gbɛ, ni wɔya kpeei, ni wɔkɛ amɛ afee ekome kɛna shiɛmɔ nitsumɔ lɛ mli gbɛfaŋnɔ. Enɛ baafee hewalɛwoo babaoo diɛŋtsɛ kɛha wɔ diɛŋtsɛ kɛ nyɛmimɛi ni wɔkɛ amɛ bɔɔ yɛ ekomefeemɔ mli lɛ.—Rom. 1:12.
5 Kɛji eeeba akɛ wɔhiŋ wɔ asafo lɛ mli yɛ nyɔŋ lɛ naagbee lɛ, no lɛ esa akɛ wɔkɛ wɔ shiɛmɔ nitsumɔ he akɔntaabuu lɛ amaje woloŋmalɔ lɛ mra bɔni afee ni ekɛfata akɔntaabuu ni ekɛmajeɔ yɛ nyɔŋ ni nyiɛ sɛɛ lɛ nɔ gbi ni ji ekpaa lɛ nɔ lɛ he.
Bɔɔ Mɔdɛŋ Akɛ Ooofee Nikasemɔi
6 Kɛji wɔbaashi asafo ni wɔyɔɔ mli lɛ kɛya shikpɔŋkuku kroko mli kɛha hejɔɔmɔ lɛ, no lɛ esa akɛ wɔsusu wɔ Biblia kaselɔi lɛ ahe jogbaŋŋ. Te amɛbaafee tɛŋŋ beni wɔbɛ lɛ? Ni wɔɔha otsii pii aho ni wɔkɛ amɛ efeee nikasemɔ lɛ, ani wɔbaanyɛ wɔto gbɛjianɔ ni mɔ kroko ni yɔɔ asafo lɛ mli akwɛ nikasemɔ lɛ nɔ yɛ wɔsɛɛ? Ehi jogbaŋŋ akɛ wɔɔha afee nikasemɔ lɛ be fɛɛ be bɔ ni wɔɔnyɛ bɔni afee ni wɔha bɔ ni ehe hiaa akɛ wɔɔlɛ wɔhe yɛ mumɔŋ daa gbi lɛ ahi nikaselɔ lɛ jwɛŋmɔ mli.
7 Kɛji wɔna mɔ ko ni yɔɔ wiemɔ lɛ he miishɛɛ yɛ shikpɔŋkuku lɛ mli lɛ, no lɛ esa akɛ wɔyadi nakai mɔ ni yɔɔ he miishɛɛ lɛ sɛɛ amrɔ nɔŋŋ. Kɛji shiatsɛ lɛ he woji bibii lɛ eko lɛ, no lɛ wɔbaanyɛ wɔfee bɔ ni akɛtsuɔ nii ahaa lɛ he nɔkwɛmɔ nɔ wɔtsɔɔ lɛ kɛtsɔ kukuji fioo ko ni wɔkɛ lɛ fɛɛ aaasusu he lɛ nɔ. No sɛɛ lɛ esa akɛ wɔbɔ mɔdɛŋ ni wɔkɛ lɛ ato be kɛha sɛɛsaramɔ koni nyɛkɛtsa nikasemɔ lɛ nɔ.
8 Eba akɛ, kɛ wɔɔku wɔsɛɛ wɔkwɛ hejɔɔmɔ ni wɔyeɔ yɛ afi nɛɛ mli akɛ Yehowa webii ni ejɔɔ amɛhe nɔ lɛ, wɔ fɛɛ wɔnyɛ wɔnu he akɛ, yɛ anɔkwale mli lɛ, wɔkɛ be nɛɛ etsu nii yɛ nilee mli, ni ‘wɔhiɛ tsamɔ wiemɔ lɛ mli, ni wɔye wɔbua mɛi krokomɛi hu ni amɛbakase anɔkwa tsamɔ wiemɔi ni jɛɔ Yehowa Wiemɔ lɛ mli lɛ.—3 Tim. 1:13.