Mɛɛ Gbɛjianɔ Oto Kɛha 1996 Gbɛhamɔ Be Lɛ?

Kɛ wɔmiisusu gbɛhamɔ be he lɛ, belɛ wɔmiisusu kɔɔyɔŋ tsakemɔ kpakpa, gbɛjianɔtoo kɛha kpeei bibii loo kpeei wuji ni aaaya, kɛ gbɛjianɔ ni atoɔ kɛhaa hejɔɔmɔ kɛ wekumɛi kɛ nanemɛi ni wɔkɛ miishɛɛ aaasara amɛ lɛ ahe. Kɛ ooto ogbɛhamɔ be he gbɛjianɔ lɛ, naa saji fioo ni baanyɛ aye abua bo ni okɛ Maŋtsɛyeli nitsumɔi lɛ aye klɛŋklɛŋ gbɛhe lɛ ni akɛkaiɔ bo:

◼ Too gbɛjianɔ kpakpa kɛha teokrase kpeei ni oooya tamɔ kpee krɛdɛɛ gbi loo kpokpaa wulu nɔ kpee. Too tsɔne mli ni ooota kɛ owɔɔhe he gbɛjianɔ kɛtsɔ hiɛ kwraa, bɔni afee ni okana naagba ko.

◼ Kɛ otee gbɛhamɔ lɛ, too gbɛjianɔ ni oya kpee ni asafo ni yɔɔ jɛmɛ lɛ feɔ lɛ, ni ona sɔɔmɔ nitsumɔ lɛ mli gbɛfaŋnɔ. Kwɛmɔ ni okɛ oshiɛmɔyaa he akɔntaabui lɛ aha; kɛ ehe baahia lɛ, okɛmaje nyɛ asafo lɛ woloŋmalɔ lɛ.

◼ Wekumɛi ni bɛ anɔkwale lɛ mli ni oooyasara amɛ lɛ baanyɛ aha ona hegbɛ ni ofee trukaa odaseyeli ni woɔ yibii. Kwɛmɔ ni okɛ o-Biblia kɛ woji aya.

◼ Ani osusu asafo ko ni bɛŋkɛ ni oooyaye obua yɛ mli lɛ he, koni akɛtsu eshikpɔŋkuku lɛ mli nii? Okɛ onukpai loo kpokpaa nɔkwɛlɔ lɛ awie he koni ole hiamɔ nii ni yɔɔ okutso lɛ mli lɛ he sane.

◼ Skul gbɛhamɔ bei haa gbekɛbii naa hegbɛ ni nɔ bɛ, koni amɛha amɛ shiɛmɔ nitsumɔ aya hiɛ. Obalahii kɛ obalayei bibii, ani nyɛbaanyɛ nyɛkɛ nyɛhe aha akɛ gbɛgbalɔi awalɔi?

◼ Ekolɛ obaana akɛ obaanyɛ owo yibii ni hi jogbaŋŋ yɛ shiɛmɔ nitsumɔ lɛ mli, kɛtsɔ gbɛkɛ odaseyeli babaoo nɔ, yɛ be mli ni mɛi babaoo yɔɔ shia, be mli ni okɛ tsuishitoo tsuɔ nii yɛ shihilɛ hei krokomɛi amli lɛ.

◼ Esa akɛ onukpai ahiɛ ahi amɛhe nɔ, koni amɛya nɔ amɛto asafo lɛ mli nitsumɔi ahe gbɛjianɔ jogbaŋŋ, koni amɛto gbɛjianɔ ni mɔ ko atsu gbɛnaa nii ni akɛwo mɛi ni baashi kɛya lɛ adɛŋ lɛ ahe nii.

Kaimɔ akɛ “gbɛjianɔ ni mɔdɛŋbɔlɔ toɔ lɛ he baa sɛɛnamɔ lɛlɛŋ.” (Abɛi 21:5, NW) Too gbɛjianɔ ni okɛ teokrase hegbɛi atsu nii kɛmɔ shi yɛ gbɛhamɔ mli.