Nyɛwoa Mɔ Ni Bɔ Nii Fɛɛ Lɛ Hiɛ Nyam
1 Satan kɛ ŋaa gbɛ ko ni yeɔ awui nigii etsu nii kɛjɛ afi ohai 19 lɛ mli ni ekɛmiishwila adesai—no ji sutsakemɔ tsɔɔmɔ lɛ. (2 Kor. 4:4) Nɛkɛ tsɔɔmɔ nɛɛ kpooɔ Biblia mli sane ni kɔɔ adebɔɔ he kɛ bɔ ni fee ni gbɔmɔ yabote esha mli lɛ kwraa. Ebaaha Yesu kpɔmɔ afɔleshaa lɛ kɛ Biblia lɛ tsɔɔmɔi ni kɔɔ Maŋtsɛyeli lɛ kɛ naanɔ wala he lɛ afee nɔ ni shishinumɔ bɛ he. Nɔ ni fe fɛɛ lɛ, sutsakemɔ tsɔɔmɔ lɛ haa awuiyeli kɛ ta baa, bɔlɛnamɔ mli jeŋba shara, kɛ mlakwamɔi sɔrɔtoi fɛɛ hu. Namɔ baabɔ adesai akɔkɔ yɛ osharai ni yɔɔ nɛkɛ tsɔɔmɔ gbonyo nɛɛ he lɛ he?
2 Yɛ October nyɔŋ lɛ mli lɛ, akɛni wɔkɛ wɔdeka fɛɛ baajaje Bɔlɔ ni Yehowa ji lɛ wɔtsɔɔ hewɔ lɛ, wɔbaafee nakai. Wɔkɛ Life—How Did It Get Here? By Evolution or by Creation? wolo lɛ baatsu nii yɛ shia-kɛ-shia sɔɔmɔ nitsumɔ lɛ mli, yɛ wɔhejɔɔmɔ bei amli yɛ be mli ni wɔtee nitsumɔ, kɛ be mli ni wɔtee skul hu. Wɔmiishwe ni mɔ fɛɛ mɔ ale bɔ ni sutsakemɔ tsɔɔmɔ lɛ gbeɔ adesai a-Bɔlɔ lɛ he guɔ ehaa.
YE ODASE YƐ GBƐ NI MƆƆ SHI NƆ
3 Kɛ ooye odase trukaa aloo yɛ shia-kɛ-shia lɛ, ekolɛ obaasumɔ ni otsɛ adafitswaa wolo mli sane ko ni ba etsɛko ni kɔɔ shishinumɔi ni yɔɔ keketee ni mɛi komɛi hiɛ yɛ sutsakemɔ tsɔɔmɔ lɛ he lɛ sɛɛ ni okɛje osanegbaa lɛ shishi. Awie wiemɔi sɔrɔtoi babaoo yɛ sane ni abiɔ akɛ ani esa akɛ atsɔɔ sutsakemɔ tsɔɔmɔ lɛ yɛ maŋ lɛŋ skul loo nikasemɔ hei aloo esaaa lɛ he. Eyɛ mli akɛ ekolɛ mɔ ko ekane aloo enu naatsɔɔmɔi loo naataomɔi ni mli wawai ni akɛhaa yɛ nɛkɛ sane nɛɛ he lɛ ekomɛi moŋ, shi ŋwanejee ko bɛ he akɛ ebaana wiemɔ ni yɔɔ tɛ̃ɛ ni jɛ Biblia lɛ mli ni kɔɔ sane lɛ he pɔtɛɛ lɛ he miishɛɛ. No sɛɛ lɛ obaanyɛ otsɛ nɔ ni aŋma yɛ Hebribii 3:4 lɛ sɛɛ. Kanemɔ ŋmalɛ lɛ ni owie he kuku kɛkɛ.
4 Kɛji mɔ lɛ tamɔ mɔ ko ni sumɔɔ Nyɔŋmɔ jamɔ lɛ, no lɛ obaanyɛ otsi ta akɛ mɛi ni sumɔɔ Nyɔŋmɔ jamɔ kɛ mɛi ni heɔ sutsakemɔ amɛyeɔ lɛ fɛɛ kɛ yijiemɔ haa nɔ ko ni bɛ pɔtɛɛ, “Adebɔɔ” aloo nɔ ko ni afeɔ ehe mfoniri tamɔ gbɔmɔ ni atsɛɔ lɛ “Adebɔɔ Nyɛ” lɛ akɛ no ji adebɔɔ hewalɛ ni yɔɔ naakpɛɛ nibii fɛɛ ni wɔnaa ni ebɔle wɔ nɛɛ sɛɛ. Shi Biblia lɛ shiii wɔ-Durolɔ kpele kɛ jeŋ muu fɛɛ ni yɔɔ naakpɛɛ nɛɛ Bɔlɔ lɛ ni etsiii eta. Obaanyɛ ogbala ojwɛŋmɔ kɛya Kpojiemɔ 4:11 nɔ. Beni okane ŋmalɛ lɛ ogbe naa sɛɛ lɛ, ekolɛ mɔ lɛ baasumɔ ni ewie bɔ ni esusuɔ yɛ sane lɛ he. Obaanyɛ okɛ Creation wolo lɛ mli oti kome loo enyɔ ko atsa nɔ, ni kɛ ebaahi lɛ, owo lɛ hewalɛ ni ekane wolo lɛ.
YƐ SKUL
5 Beni agbeleɔ gbɛ kɛha skul afi hee lɛ, obalaŋtai ni ji Yehowa sɔɔlɔi fɛɛ baasumɔ ni amɛti amɛ-Creation wolo lɛ mli ekoŋŋ ni amɛtao gbɛi ni amɛaatsɔ nɔ amɛtee amɛnanemɛi skulbii kɛ amɛtsɔɔlɔi amiishɛɛ shi yɛ wolo lɛ he. Mɛi komɛi ena akɛ kɛ amɛshi wolo lɛ yɛ amɛkpɔlɔ nɔ lɛ, egbalaa mɛi ewoɔ sanegbaa mli. Mɛi krokomɛi eyana tsɔɔlɔi kɛ skul nɔkwɛlɔi yɛ adebɔɔ sane lɛ he ni amɛnyɛ amɛkɛ woji pii eha yɛ nakai gbɛ nɔ.
6 Mɛi pii susuuu Creation wolo lɛ he akɛ nɔ ko ni wieɔ “sɔlemɔ saji” ahe. No hewɔ lɛ, kɛ naatsii lɛ yɛ lolo po lɛ, obaanyɛ okɛ ŋaa atsi sane lɛ kɛ wolo lɛ ta yɛ skul yɛ gbɛ ni naagba baŋ he nɔ.
7 Wɔ fɛɛ wɔmli filiɔ wɔ yɛ gbɛkpamɔ ni ka wɔhiɛ akɛ wɔɔhi jeŋ ni mɔ fɛɛ mɔ woɔ Yehowa hiɛ nyam lɛ mli. Yɛ Kpojiemɔ lɛ mli lɛ, Yohane na mumɔŋ bɔɔnii ni nɔ kwɔlɔ ni amɛkula shi yɛ Yehowa hiɛ ni amɛmiikɛɛ, “Yehowa, wɔ-Nyɔŋmɔ, bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔnaa amɛyɔɔ ni abɔ amɛ. (Kpoj. 4:11, NW) Eba akɛ wɔɔha nɛkɛ wiemɔi nɛɛ ajije yɛ wɔsɔɔmɔ nitsumɔ lɛ mli yɛ October mli!