Gbɛgbalɔi Yeɔ Buaa Mɛi Krokomɛi
1 Yesu kɛɛ akɛ: “Nikpamɔ lɛ fa, shi nitsulɔi lɛ faaa; no hewɔ lɛ nyɛkpaa nikpamɔ nuntsɔ lɛ fai, koni etsu nitsulɔi kɛba enikpamɔ lɛ mli.” Akɛni klɛŋklɛŋ afii oha lɛ mli ŋmãakpalɔi lɛ ayifaaa ni amɛyɛ shikpɔŋkukuji babaoo ni amɛbaatsu mli nii hewɔ lɛ, Yesu baanyɛ afã amɛ koni amɛkɛ sanekpakpa lɛ aya mɛi babaoo aŋɔɔ bɔ ni amɛaanyɛ kɛtsɔ amɛ ni eeetsu ekomekomei lɛ nɔ. Yɛ no najiaŋ lɛ, “etsu amɛ enyɔnyɔ.” (Luka 10:1, 2) Mɛni hewɔ enyɔnyɔɔnyɔ?
2 Mɛi heei ji nakai kaselɔi lɛ ni amɛbɛ niiashikpamɔ. Kɛtsɔ ekome ni amɛaafee kɛtsu nii lɛ nɔ lɛ, amɛbaanyɛ amɛkase nii kɛjɛ amɛhe hewalɛ ni amɛbaawo lɛ mli. Taakɛ Salomo tsɔɔ mli lɛ, “mɛi enyɔ hi fe mɔ kome.” (Jaj. 4:9, 10) Beni afɔse mumɔ krɔŋkrɔŋ lɛ ashwie shi yɛ Pentekoste afi 33 Ŋ.B lɛ sɛɛ po lɛ, Paulo, Barnaba, kɛ mɛi krokomɛi fata nanemɛi heyelilɔi lɛ ahe yɛ shiɛmɔ nitsumɔ lɛ mli. (Bɔf. 15:35) Kwɛ hegbɛ ni eji kɛha mɛi komɛi akɛ hii ni yɔɔ nyɛmɔi nɛkɛ aaatsɔse amɛ!
3 Tsɔsemɔ He Gbɛjianɔtoo Kpakpa: Taakɛ eklɛŋklɛŋ afii oha lɛ mli bii lɛ ji lɛ, Kristofoi asafo ni yɔɔ ŋmɛnɛ lɛ ji shiɛmɔ gbɛjianɔtoo. No hu kɛ tsɔsemɔ haa wɔ. Ákɛ aŋkroaŋkroi lɛ, esa akɛ efee wɔtsuiaŋ shwelɛ akɛ wɔkɛ sanekpakpa lɛ baaha yɛ gbɛ ni mɔɔ shi nɔ bɔ ni wɔɔnyɛ. Bɔni afee ni shiɛlɔi babaoo awiemɔ anyɛ amɔ shi jogbaŋŋ lɛ, akɛ yelikɛbuamɔ eha.
4 Yɛ Maŋtsɛyeli Sɔɔmɔ Skul ni afee nyɛsɛɛ nɛɛ mli lɛ, Asafo lɛ tswa gbɛjianɔtoo ko kɛha gbɛgbalɔi ni baaye abua mɛi krokomɛi yɛ shiɛmɔ nitsumɔ lɛ mli lɛ he adafi. Ani enɛ he miihia? Hɛɛ, ehe miihia. Ábaptisi shiɛlɔi ni fa fe akpekpe kome yɛ afii etɛ ni eho nɛɛ mli, ni tsɔsemɔ he miihia mɛi babaoo koni amɛfee mɛi ni amɛshiɛmɔ nitsumɔ lɛ mɔɔ shi. Namɛi abaanyɛ akɛtsu nii koni akɛtsu nakai hiamɔ lɛ he nii?
5 Be-fɛɛ gbɛgbalɔi kɛ mɛi ni amɛgbe Sɔɔmɔ Tsɔsemɔ Skul lɛ naa lɛ baanyɛ aye abua. Yehowa gbɛjianɔtoo lɛ kɛ ŋaawoo kɛ tsɔsemɔ babaoo haa amɛ. Gbɛgbalɔi anine shɛɔ tsɔsemɔ ni saa amɛhiamɔ nii lɛ ahe lɛ nɔ yɛ Gbɛgbamɔ Sɔɔmɔ Skul ni akɛ otsii enyɔ feɔ lɛ mli. Amɛnáa kpee ni kpokpaa bibii kɛ kpokpaa wuji anɔkwɛlɔi kɛ amɛ feɔ lɛ he sɛɛ, ni agbɛnɛ hu amɛnáa gbɛtsɔɔmɔ kɛjɛɔ onukpai lɛ adɛŋ. Eyɛ mli akɛ jeee gbɛgbalɔi fɛɛ yɔɔ niiashikpamɔ tamɔ Paulo kɛ Barnaba yɔɔ lɛ moŋ, shi amɛnine eshɛ tsɔsemɔ ni jara wa nɔ, ni amɛyɛ he miishɛɛ akɛ amɛkɛaaha.
6 Namɛi Baaná He Sɛɛ? Ani shiɛlɔi heei loo mɛi heei ni abaptisi amɛ lɛ pɛ ji mɛi ni kɛ amɛhe baawo nɛkɛ gbɛjianɔtoo nɛɛ mli? Dabida! Gbekɛbii kɛ onukpai ni le anɔkwale lɛ afii babaoo nɛ lɛ yɛ, shi amɛbaasumɔ koni aye abua amɛ yɛ shiɛmɔ nitsumɔ lɛ mli hei komɛi. Mɛi komɛi ahe esa kɛ woji ahamɔ shi ewa kɛha amɛ akɛ amɛaafee sɛɛsaramɔi loo amɛje Biblia mli nikasemɔ shishi. Mɛi krokomɛi baanyɛ aje Biblia mli nikasemɔ shishi yɛ gbɛ mlɛo nɔ, shi amɛyɔseɔ akɛ amɛ nikaselɔi lɛ eyaaa hiɛ. Mɛni ji nɔ ni tsiɔ amɛnaa? Abaanyɛ abi ni gbɛgbalɔi ni yɔɔ niiashikpamɔ lɛ aye abua yɛ hei nɛɛ. Gbɛgbalɔi komɛi le bɔ ni ateɔ miishɛɛ shi jogbaŋŋ, bɔ ni ajeɔ Biblia mli nikasemɔ shishi, kɛ bɔ ni atsɔɔ nikaselɔi heei gbɛ kɛyaa gbɛjianɔtoo lɛ nɔ. Amɛniiashikpamɔ lɛ baanyɛ aye abua yɛ nɛkɛ gbɛjianɔtoo hee nɛɛ mli.
7 Ani onaa akɛ ogbɛjianɔtoo eŋmɛɛɛ bo gbɛ koni ofi asafo lɛ kpeei kɛha shiɛmɔ nitsumɔ lɛ sɛɛ babaoo taakɛ bɔ ni obaasumɔ? Gbɛgbalɔ ko baanyɛ ekɛ bo atsu nii yɛ bei ni shiɛlɔi krokomɛi bɛ lɛ mli.
8 Ekomefeemɔ Kpakpa He Miihia: Onukpai lɛ baato gbɛjianɔi shii enyɔ yɛ afi mli kɛha shiɛlɔi ni miitao yelikɛbuamɔ koni amɛkɛ amɛhe awo Gbɛgbalɔi Yeɔ Buaa Mɛi Krokomɛi he gbɛjianɔtoo lɛ mli. Kɛ okpɛlɛ ni onine ashɛ nɛkɛ yelikɛbuamɔ nɔ lɛ, okɛ shiɛlɔ ni ji gbɛgbalɔ ní akɛ nitsumɔ ewo edɛŋ koni eye ebua bo lɛ afee ekome, ni oto shiɛmɔ he gbɛjianɔ ni anyɛɔ atsuɔ he nii, ni okpɛtɛ he. Yé yelikɛfuamɔ fɛɛ yelikɛfuamɔ nɔ. Yɛ be mli ni nyɛtsuɔ nii yɛ ekomefeemɔ mli lɛ, yɔsemɔ gbɛ̀i ni mɔɔ shi ni akɛ sanekpakpa lɛ haa lɛ. Taomɔ nɔ hewɔ ni wiemɔi komɛi kɛhamɔ mɔɔ shi lɛ mli. Susumɔ ŋaawoi ni ekolɛ gbɛgbalɔ shiɛlɔ lɛ kɛbaaha koni okɛha oshiɛmɔ wiemɔi aya hiɛ lɛ he. Be mli ni okɛ nɔ ni okaseɔ lɛ tsuɔ nii lɛ, ohiɛyaa yɛ shiɛmɔ nitsumɔ lɛ mli lɛ baafee faŋŋ, kɛha bo kɛ mɛi krokomɛi fɛɛ. (Kwɛmɔ 1 Timoteo 4:15.) Nyɛfea ekome kɛtsua nii shii abɔ ni nyɛaanyɛ, ni nyɛtsua nii yɛ shiɛmɔ nitsumɔ lɛ mli fãi srɔtoi lɛ fɛɛ ní trukaa odaseyeli fata he lɛ mli, shi nyɛgbalaa nyɛjwɛŋmɔ titri kɛyaa he ni yelikɛbuamɔ diɛŋtsɛ he hiaa bo lɛ nɔ.
9 Shiɛmɔ nitsumɔ nɔkwɛlɔ lɛ yɛ hiɛyaa ni obaaná lɛ he miishɛɛ. Yɛ be kɛ bei amli lɛ, ekɛ Asafo Woloŋ Nikasemɔ nɔkwɛlɔ lɛ baasusu bɔ ni onáa gbɛjianɔtoo lɛ he sɛɛ ohaa lɛ he. Kpokpaa nɔkwɛlɔ lɛ hu baasumɔ koni eye ebua bo nakai nɔŋŋ kɛ́ ebasara asafo lɛ.
10 Yehowa miisumɔ koni atsɔse ewebii lɛ ni ‘asaa amɛ pɛpɛɛpɛ aha nitsumɔ kpakpa fɛɛ nitsumɔ kpakpa.’ (2 Tim. 3:17) Buu gbɛjianɔtoo ni ji Gbɛgbalɔi Yeɔ Buaa Mɛi Krokomɛi lɛ akɛ nikeenii fɛfɛo ni baaye abua mɛi ni miisumɔ koni amɛya hiɛ yɛ amɛnyɛmɔ ni amɛkɛaashiɛ wiemɔ lɛ mli lɛ. Kɛ oná hegbɛ akɛ okɛ ohe aaawo mli lɛ, feemɔ enɛ kɛ shidaa, heshibaa, kɛ miishɛɛ.