Yehowa ni Wɔɔjie Eyi yɛ Lala Mli
1 Kɛ okwɛ olala wolo lɛ naagbee baafa lɛ, mɛni onaa? Kuu ko ni ji Levibii lalɔi akuu yɛ Yehowa sɔlemɔ tsu krɔŋkrɔŋ lɛ mli, ni amɛgbɛ amɛdaaŋ waa, ni amɛmiila kɛ nyamɔ. Lala ji anɔkwa jamɔ ni akɛhaa yɛ Yehowa sɔlemɔ we lɛ ta ko ni he hiaa waa. Beni Maŋtsɛ David yeɔ nɔ lɛ, ahala mɛi ni sɔmɔɔ yɛ sɔlemɔ we lɛ amli nɔ ni fe oha mlijaa 10 ni amɛkɛ lalai ajie Yehowa yi. Ni yɛ nakai yibɔ lɛ fɛɛ mli lɛ, 288 ji lalɔi ni atsɔɔ amɛ lamɔ, “ni amɛ fɛɛ amɛle jogbaŋŋ.” Kɛ okwɛ lɛ obaana akɛ amɛkɛ hiɛdɔɔ diɛŋtsɛ miila.—1 Kron. 23:3. 5; 25:7.
2 Kɛ wɔba Kristofoi abeaŋ lɛ, ahaa wɔleɔ akɛ Yesu kɛ ebɔfoi lɛ la lala ko beni amɛye Nuŋtsɔ lɛ Gbɛkɛnaashi Niyenii lɛ amɛgbe naa lɛ. (Marko 14:26) Ni bɔfo Paulo kɛɔ wɔ yɛ be kɛ bei amli ni wɔla kɛjie wɔ-Nyɔŋmɔ lɛ yi. Eŋma yɛ Kolosebii 3:16 akɛ: “Nyɛhaa Kristo wiemɔ lɛ ahia nyɛmli babaoo yɛ nilee fɛɛ nilee mli; ni nyɛtsɔa nyɛhe nii ni nyɛwiea nyɛtsɔa nyɛhe yɛ saŋkutswaai kɛ yijiemɔ lalai kɛ mumɔŋ lalai amli, ni nyɛkɛ shidaa alaa yɛ nyɛtsuii amli nyɛhaa [Yehowa] Nyɔŋmɔ.”—Kwɛmɔ Efesobii 5:19, 20 hu.
3 Maŋtsɛyeli lalai lɛ alamɔ ji gbɛ kome ni wɔtsɔɔ nɔ wɔjieɔ Yehowa yi. No hewɔ lɛ, ani esaaa ni wɔlaa kɛ wɔtsui muu fɛɛ? Kɛ wɔfee nakai lɛ, wɔkɛ yijiemɔ haa Yehowa. Eboɔ wɔlalai ni wɔlaa wɔhaa lɛ lɛ toi tamɔ eboɔ wɔsɔlemɔi atoi lɛ nɔŋŋ pɛpɛɛpɛ. Ni kɛ wɔla kɛ gbee ni wa lɛ, wɔbaanyɛ wɔha mɛi krokomɛi hu ana miishɛɛ ni wɔ diɛŋtsɛ hu wɔna he sɛɛ.
4 Susumɔ wɔlalai lɛ amli wiemɔi ni ŋɔɔ lɛ ahe okwɛ. Yɛ anɔkwale mli lɛ, eji yelikɛbuamɔ kɛha wɔ yɛ ‘nii ni wɔtsɔɔ wɔhe kɛ wiemɔ ni wɔwieɔ wɔtsɔɔ wɔhe’ lɛ mli. Mɛɛ ŋaawoi kpakpai yɔɔ wɔlalai lɛ amli nɛkɛ! Kɛ wɔkɛ hiɛdɔɔ tsu ŋaawoi lɛ ahe nii lɛ, ebaaye ebua wɔ ni wɔwo mumɔ lɛ yibii lɛ, bɔni afee ni wɔteke nɔ yɛ enɛɛmɛi amli ni wɔkwɛ wɔhe nɔ jogbaŋŋ yɛ hewalɛ ni wɔheloo lɛ kɛ je lɛ nyɛɔ enaa yɛ wɔnɔ lɛ he. ‘Ni wɔɔla yɛ wɔtsuii amli’ lɛ woɔ wɔ hewalɛ ni wɔsɔmɔ Yehowa kɛ ekaa kɛ miishɛɛ.
5 Kɛ abaaje lalai lɛ alamɔ shishi ekpakpa yɛ kpeei ashishi lɛ, no lɛ jeee lala lɛ yibɛ ni sɛinɔtalɔ lɛ baatsɛ, shi moŋ ebaatsɛ yitso ni edamɔ nɔ lɛ hu. Ebaanyɛ etsi Ŋmalɛ ni lala lɛ damɔ nɔ lɛ ta yɛ be kɛ bei amli ni ewie bɔ ni esa wiemɔ ni akɛbaaha lɛ jogbaŋŋ lɛ he kuku.
6 Kingdom Melodies lɛ kɛ wɔlalai lɛ ni akɛ saŋku etswa awo kpaai anɔ lɛ ji dɛŋdadei kpakpai ni wɔɔnyɛ wɔkɛye wɔbua wɔwekui lɛ ni amɛle lalai lɛ jogbaŋŋ. Ni wɔɔtswa yɛ wɔhiɛtserɛjiemɔ amli lɛ haa wɔnaa he miishɛɛ ni eji gbɛ ni wɔɔtsɔ nɔ wɔle wɔlalai lɛ jogbaŋŋ.
7 Ŋmalɛi lɛ kaiɔ wɔ yɛ bei babaoo mli yɛ gbɛnaa nii ni ka wɔnɔ akɛ wɔjie wɔŋwɛi Tsɛ ni yɔɔ suɔmɔ lɛ yi kɛ lalai lɛ he. Nyɛhaa wɔfea enɛ kɛ wɔsusuma muu fɛɛ. Kɛtsɔ nakai feemɔ nɔ lɛ, wɔbaanyɛ wɔkɛ odaseyeli ni kanyaa mɔ tsui aha gbɔi ni baa wɔteŋ lɛ. Hɛɛ, nyɛhaa wɔlaa ni wɔjieɔ Yehowa yi kɛ lalai, taakɛ David ni hi shi yɛ blema lɛ fee lɛ.—Lala 108:2-4.