JIEMƆ NYƆŊMƆ JAMƆ HETUU-KƐHAMƆ KPO TAAKƐ KRISTO FEE LƐ
1 Biblia mli wiemɔ ni ji “Nyɔŋmɔ jamɔ hetuu-kɛhamɔ” lɛ kɔɔ bulɛ ni mli kwɔ ni wɔɔna wɔha Yehowa Nyɔŋmɔ kɛ sɔɔmɔ ni wɔkɛaaha lɛ yɛ anɔkwayeli mli lɛ he. Klɛŋklɛŋ mɔ ni jie Nyɔŋmɔjamɔ hetuukɛhamɔ kpo ji wɔ Nuŋtsɔ Yesu Kristo.
2 Yesu jie ehe kpo faŋŋ akɛ gbɔmɔ ni yɔɔ Nyɔŋmɔ jamɔ hetuu-kɛhamɔ ni eye emuu kɛtsɔ shihilɛ gbɛ ni ekɔ yɛ shikpɔŋ nɛɛ nɔ lɛ nɔ. No hewɔ lɛ, wɔɔfee jogbaŋŋ akɛ wɔɔsusu eshihilɛ mli nibii komɛi ahe, titri lɛ yɛ bɔ ni ekɔɔ egbɛhe akɛ Yehowa Nyɔŋmɔ naawielɔ nukpa fe fɛɛ lɛ he lɛ gbɛfaŋ.
BƆƆ MƆDƐŊ Nl ONA EKAA HU
3 Yesu bɔ mɔdɛŋ waa yɛ nɔ ni Yesaia 61:2 wie he akɛ “Yehowa duromɔ afi” lɛ jajemɔ mli. Esa akɛ wɔkɛ mɔdɛŋbɔɔ ana gbɛfaŋnɔ yɛ nɛkɛ yiwalaheremɔ nitsumɔ nɛɛ mli yɛ nɛkɛ nibii agbɛjianɔtoo fɔŋ nɛɛ naagbee gbii nɛɛ amli, yɛ Yesu nɔkwɛmɔ nɔ lɛ sɛɛnyiɛmɔ mli. Esa akɛ wɔna ekaa hu taakɛ Yesu fee lɛ. Mɛni hewɔ? Ejaakɛ Maŋtsɛyeli shɛɛ sane ni wɔjajeɔ lɛ saa mɛi komɛi ahe waa ni no hewɔ lɛ amɛkpɛlɛɛɛ nɔ, titri lɛ kɛ wɔmiiwie Yehowa oweletɔɔ gbi lɛ he lɛ.
4 Yehowa mumɔ lɛ kɛ egbɛtsɔɔmɔ he miihia wɔ bɔni afee ni wɔwie kɛ ekaa ni wɔjie Nyɔŋmɔ jamɔ hetuu-kɛhamɔ kpo. Yesu kɛɛ yɛ Luka 4:18 akɛ: “Nuŋtsɔ [Yehowa] mumɔ lɛ yɛ minɔ.” Kɛtsɔ Yehowa mumɔ lɛ kɛ ejɔɔmɔ nɔ lɛ, wɔ hu wɔbaanyɛ wɔjie Nyɔŋmɔ jamɔ hetuukɛhamɔ kpo ni wɔsa Yehowa hiɛ. Ni aaajie nɔ ko kpo lɛ tsɔɔ akɛ anaa ni mɔ lɛ fɔɔ feemɔ. Etsɔɔ akɛ nakai nɔ lɛ ebatsɔ wɔ daa gbi shihilɛ lɛ fa. Esa akɛ Nyɔŋmɔ jamɔ hetuu-kɛhamɔ afee shihilɛ gbɛ kɛha Nyɔŋmɔ tsuji. Bɔfo Paulo jaje akɛ: “No hewɔ lɛ, kɛ nii nyɛyeɔ jio, nii nyɛnuɔ jio, aloo nɔ kroko nyɛfeɔ jio, nyɛfea fɛɛ nyɛkɛwoa Nyɔŋmɔ hi nyam.”—1 Kor. 10:31.
NYƆŊMƆ JAMƆ HETUU-KƐHAMƆ, WƆSHIHILƐ GBƐ
5 Amrɔ nɛɛ wɔbote nugbɔnɛmɔ be lɛ mli. Ekɛ naagbai komɛi baa yɛ shiɛmɔ yaa kɛ kpeeiyaa gbɛfaŋ. Shi esaaa ni wɔhiɛ jeɔ wɔhe nɔ yɛ bɔ ni ehe hiaa ni wɔya nɔ wɔkase Kristo daa kɛtsɔ hegbɛ ni wɔɔna ni wɔkɛ mɛi krokomɛi agba anɔkwale lɛ he sane lɛ ni wɔkɛaatsu ni lɛ nɔ. Hɛɛ, esa akɛ wɔmia wɔhiɛ waa koni wɔhi shi akɛ mɛi ni kɛ amɛhe wo shiɛmɔ mli daa; ni wɔhiɛ ahi wɔhe nɔ yɛ wɔmumɔŋ hiamɔ nii ahe. Yɛ be mli ni wɔfeɔ enɛ yɛ July nyɔŋ lɛ mli lɛ, wɔmii wo ŋaa akɛ wɔkɛ Mankind’s Search for God wolo lɛ atsu nii.
6 Wɔshihilɛ gbɛ etsɔɔɔ Yehowa oweletɔɔ gbi lɛ kɛ duromɔ afi lɛ jajemɔ pɛ kɛkɛ shi moŋ ekɔɔ Nyɔŋmɔjamɔ hetuu-kɛhamɔ ni wɔɔjie lɛ kpo yɛ wɔ diɛŋtsɛ kɛ wɔweku shihilɛ mli lɛ hu he. Esa akɛ wɔkase Yesu, ni wɔtsɔ nɔkwɛmɔ nii anɔ wɔtsɔɔ mɛi krokomɛi nɔ ni Nyɔŋmɔ jamɔ hetuu-kɛhamɔ ji diɛŋtsɛ. Kɛ tsɔ Kristo nɔkwɛmɔ nɔ ni efee yɛ Nyɔŋmɔ jamɔ hetuu-kɛhamɔ mli lɛ sɛɛ nyiɛmɔ nɔ lɛ, wɔbɔɔ mɔdɛŋ be fɛɛ be akɛ wɔɔna jwɛŋmɔ ni ja yɛ nɔ fɛɛ nɔ ni wɔfeɔ lɛ he, ni wɔkɛjieɔ Yehowa yi ni wɔtsɔ akɛ enɔkwa sɔɔlɔi ji wɔ.
7 Eba akɛ bɔ ni wɔjieɔ Nyɔŋmɔ jamɔ hetuu-kɛhamɔ kpo lɛ baaye abua mɛi krokomɛi yɛ Nyɔŋmɔ sɛɛ gbɛ ni amɛtao lɛ mli ni etsɔɔ mɛi ni yɔɔ tsui krɔŋŋ lɛ gbɛ kɛya anɔkwa Nyɔŋmɔ, Yehowa he nilee he.