Mɛi Krokomɛi Ahe Miishɛɛ Diɛŋtsɛ ni Wɔɔna
1 Anaa miishɛɛ ni Yehowa yɔɔ yɛ mɛi krokomɛi ahe lɛ he odaseyeli faŋŋ. Ani ehako ebɔɔnii lɛ amɛheloonaa hiamɔ nibii fɛɛ babaoo? (1 Mose 1:29, 30; 2:16,17; Mat. 5:45; okɛto Luka 6:35 he.) Nɔ ni he hiaa fe fɛɛ lɛ, ani ejieko bɔ ni eyɔɔ wɔhe miishɛɛ lɛ kpo kɛtsɔ gbɛjianɔ ni eto kɛha wɔkpɔmɔ kɛmiijɛ esha kɛ gbele mli lɛ nɔ?—Yoh. 3:16.
2 Beni Yesu yɔɔ shikpɔŋ nɔ lɛ, ekase e-Tsɛ lɛ nɔkwɛmɔ nɔ ni yeɔ emuu ni ji mɛi krokomɛi ahe miishɛɛ ni enaa lɛ. (Mat. 11:28-30; 1 Pet. 2:21) Beni nuu ko ni kpiti eyi ehe obɔ lɛ kɛɛ Yesu akɛ, “Nuŋtsɔ, kɛji oosumɔ lɛ, ooonyɛ oha mihe atse” lɛ, Yesu ha lɛ hetoo akɛ, “Miisumɔ,” ni etsa nuu lɛ. (Mat. 8:2, 3) Beni Yesu bɛŋkɛ Nain maŋ lɛ, ekɛ yarafeelɔi komɛi ni tere obalanyo ko, ni ji yoo okulafo ko binuu kome kɛmiiya amɛyafu lɛ lɛ kpe, ni Yesu musuŋ tsɔ lɛ, ni eha eba wala mli ekoŋŋ. (Luka 7:11-15) Yesu na mɛi krokomɛi ahe miishɛɛ diɛŋtsɛ, ni abiii lɛ ni efee nakai. Ebuɔ gbekɛbii bibii po akɛ mɛi ni esa akɛ enaa be ehaa ni esusuɔ amɛhe, ni efeee ehe mɔ ni bɛ deka ni ekɛaashɛjɛ mɛi krokomɛi amii ni ewo amɛ hewalɛ.—Mat. 20:31-34; Marko 10:13-16.
WEKU KƐ NANEMƐI
3 Esa akɛ wɔbɔ mɔdɛŋ ni wɔtamɔ Yehowa kɛ Yesu Kristo yɛ gbɛi ni wɔɔtao ni wɔkɛjie miishɛɛ kpo yɛ mɛi krokomɛi ahe lɛ mli. No hewɔ Iɛ, nyɛnaa wɔsusua hegbɛi komɛi ni wɔnaa ni wɔkɛaafee enɛ lɛ ahe.
4 Nibii ni he hiaa fe fɛɛ lɛ ateŋ ekome ji ni nyɛmimɛi lɛ ana amɛ diɛŋtsɛ amɛweku lɛ mlibii lɛ ahe miishɛɛ diɛŋtsɛ ni amɛkɛku amɛhiɛ amɛfɔ weku lɛ mumɔŋ shihilɛ nɔ. Nɔ mifata enɛ he ji weku nikasemɔ ni aaatee daa. Kɛ nyɛmiifee weku nikasemɔ lɛ, ani nyɛsusuɔ sane lɛ he yɛ gbɛ ni aaaha ana he miishɛɛ koni anyɛ atsu he nii lɛ nɔ? Ani nyɛkɛtsuɔ nii hu kɛtsɔ oweku lɛ mlibii lɛ ateŋ mɔ fɛɛ mɔ ni okɛ lɛ aaatsu nii yɛ shiɛmɔ miilɛ nɔ? Kɛ oofee nakai Iɛ, ani ebafeɔ be ni anaa he miishɛɛ? Ani oodu yelikɛbuamɔ ni amɛkɛaaha mɛi krokomɛi lɛ hɛ suɔmɔ oowo obii lɛ amli. koni amɛtsɛ nɔ amɛjie Kristofoi anaanyobɔɔ suɔmɔ kpo? Kɛji nyɛbote gbalashihilɛ mli ni nyɛbɛ bii yɛ shia lɛ, ani yɛ enɛ tɛɛ sɛɛ lɛ nyɛfeɔ weku nikasemɔ?
5 Wɔmiisumɔ ni wɔkɛ mumɔŋ yelikɛbuamɔ aha mɔ tɛɛ mɔ ni wɔɔnyɛ. Shi yɛ wɔshihilɛ ni deka bɛ mli nɛɛ mli lɛ, anɔ̃ wɔhiɛ kpaa nɔ akɛ wɔɔjie miishɛɛ kpo yɛ asafo lɛ mlibii ni yɔɔ hiamɔ nii krɛdɛɛi lɛ ahe? (Abɛi 3:27; Gal. 6:10) Awusãi, mɛi ni edara, okulafoi, mɛi ni egbɔjɔ, mɛi ni yɔɔ jwɛŋmɔŋ nɔnyɛɛ mli, mɛi ni eyaaa shiɛmɔ daa kɛ mɛi ni ekpa yaa kwraa, kɛ mɛi krokomɛi ni yɔɔ hiamɔ nii krɛdɛɛi yɛ Kristofoi esafo lɛ mli. Esaaa ni wɔkuɔ wɔhiɛ wɔshwie wɔnyɛmimɛi hii kɛ yei lɛ fɛɛ ahe miishɛɛ ni wɔɔna lɛ nɔ, yɛ Yehowa kɛ e-Bi Yesu Kristo kasemɔ mli.—1 Kor. 10:24; Fil. 2:4; Heb. 13:16.
6 Eyɛ mli akɛ gbɛnaa nii ka wɔ fɛɛ wɔnɔ akɛ “wɔnaanyo kwɛlɔ” moŋ, shi esa akɛ onukpai lɛ titri ahiɛ ahi amɛhe nɔ jogbaŋŋ yɛ asafo lɛ mli bii fɛɛ amumɔŋ hiamɔ nii ahe. Ani mɛi komɛi yɛ nyɛ asafo lɛ mli ni amɛyaaa shiɛmɔ daa aloo amɛkpa yaa kwraa? Mɛi gbɛjianɔ nyɛto ni nyɛkɛaaye nyɛbua amɛ? Ani mɛi komɛi folɔɔ asafoŋ kpeei amli? Ni akpee kɛha shiɛmɔyaa lɛ hu? Ani mɛi fɛɛ bɔɔ mɔdɛŋ ni amɛba? Agbɛnɛ abaanyɛ awo mɛi fɛɛ ni efeee Biblia mli nikasemɔ loo sɛɛsaramɔ ko lɛ hewalɛ ni amɛba kpee nɛɛ koni amɛfata mɛi ni feɔ eko lɛ ahe kɛya shiɛmɔ. Abaanyɛ abi ni daa gbɛgbalɔi lɛ hu aye abua yɛ enɛ gbɛfaŋ.—Yes. 32:1, 2; Gal. 6:2.
MƐI NI TAMƆ GWANTƐŊI YƐ SHIƐMƆ MLI
7 Mɛɛ gbɛ nɔ wɔɔtsɔ wɔjie miishɛɛ diɛŋtsɛ kpo yɛ mɛi ni wɔkɛfeɔ shia Biblia mli nikasemɔ lɛ ahe? Mɛnɛɛmɛi ateŋ mɛi pii ena akɛ ehe miihia ni amɛfo amɛkɛ je lɛŋ nanemɛi anaanyobɔɔ mli. Eyɛ mli akɛ wɔbɛ deka moŋ, shi ani wɔnaa nɛkɛ nikaselɔi nɛɛ ahe miishɛɛ diɛŋtsɛ ni wɔhaa mɛi ni efee tsakemɔi lɛ nuɔ he akɛ wɔmiihere amɛ atuu akɛ wɔnanemɛi heei? Ani wɔji hewalɛwoo jɛɛhe kɛha amɛ eyɛ mli akɛ jeee wɔ ji mɛi ni kɛ amɛ kaseɔ nii lɛ?—Okɛto Marko 10:28-30 he.
8 Ani obaanyɛ ona gbɛfaŋ nɔ ni yaa hiɛ yɛ mɛi ni sumɔɔ ni amɛbo sanekpakpa lɛ toi lɛ ahe miishɛɛ ni ooona yɛ anɔkwale mli lɛ mli? Ani obaabɔ mɔdɛŋ ni oye obua amɛ ni amɛnine ashɛ amɛmumɔŋ hiamɔ nii anɔ? Akɛ mɔ aŋkro lɛ, mɛni obaanyɛ ofee koni ona gbɛfaŋnɔ babaoo yɛ shiɛmɔ nitsumɔ lɛ mli? Kɛji oyɛ shihilɛ ni baaha onyɛ okɛ ohe awo mli kɛmɔ shi lɛ mli lɛ, no lɛ kaatsi ohe naa.—Luka 9:60-62.
9 Esa akɛ wɔkase Yehowa kɛ Yesu yɛ mɛi krokomɛi ahe miishɛɛ namɔ mli. Ehe miihia ni wɔna musuŋtsɔlɛ ni wɔya wɔhiɛ ni wɔye wɔbua mɛi krokomɛi, taakɛ Yesu fee yɛ nuu ni yeɔ kpiti lɛ gbɛfaŋ lɛ. Hɛɛ, esa akɛ wɔhiɛ ahi wɔhe nɔ yɛ gbɛi ni wɔɔtsɔ nɔ wɔna mɛi krokomɛi ahe miishɛɛ lɛ he.