Okɛ osusuma fɛɛ atsu nii yɛ shiɛmɔ nitsumɔ lɛ mli
Fa 3—Ye obua ni mɛi krokomɛi ashwere kɛ kɛya amɛhiɛ
1 Afɔɔ wekukpaa ni ka nyɛminuu Paulo ni eda lɛ kɛ obalanyo Timoteo ni etu ehe eha lɛ teŋ lɛ he wiemɔ akɛ tsɔsemɔ kɛha sɔɔmɔ lɛ he nɔkwɛmɔ nɔ kpakpa. (1 Kor. 4:17) Paulo fa Timoteo ni ekɛ nilee kɛ tsɔsemɔ ni enine eshɛ nɔ lɛ nɔŋŋ eko aha mɛi krokomɛi (2 Tim. 2: 1, 2) Wɔɔfee jogbaŋŋ akɛ wɔɔdi nifeemɔ gbɛ ni tamɔ nɛkɛ lɛ nɔŋŋ sɛɛ yɛ asafo lɛ mli ŋmɛnɛ.
2 Tsɔsemɔ Mɛi Krokomɛi: Bɔ ni tsɔsemɔ he hiaa ha lɛ bafeɔ nɔ ni yɔɔ faŋŋ kɛ wɔyoo akɛ, abaptisi mɛi heei fe 7,600 yɛ Ghana yɛ afii etɛ ni eho kɛjɛ 1988 kɛbaa lɛ mli. Eka shi faŋŋ akɛ tsɔsemɔ ni shiɛlɔi ni he esalɛ baanyɛ amɛkɛha lɛ he baaba sɛɛnamɔ aha mɛnɛɛmɛi ateŋ mɛi pii. Nyɛmiyoo ko ni fɔɔ ŋmɛlɛtswaa kome loo enyɔ hamɔ daa nyɔŋ nɔ yɛ sɔɔmɔ lɛ mli lɛ kase shiɛmɔ jogbaŋŋ yɛ shiai beni shiɛlɔ ko ni he esa ye bua lɛ lɛ. Bɔ ni eshashaoɔ shi tsutsu akɛ ekɛ ehe aaawo sɔɔmɔ lɛ mli lɛ laaje, ni ebatsɔ sanekpakpa lɛ shiɛlɔ ni yɔɔ ekãa. Agbɛnɛ, akɛ gbɛgbalɔ ni he esa jogbaŋŋ lɛ, ekwɛɔ esɛɛ ni ekɛɔ akɛ: “Nɔ ni he hiaa mi pɛ ji ni atsɔɔ mi nɔ ni esa akɛ makɛɛ, kɛkɛ ni mibɔi miishɛɛnamɔ yɛ sɔɔmɔ nitsumɔ lɛ mli.”
3 Kɛ oji onukpa, asafoŋ sɔɔlɔ, gbɛgbalɔ, aloo shiɛlɔ ni he esa lɛ, te ooofee tɛŋŋ oye obua ni mɛi krokomɛi aya amɛhiɛ? Klɛŋklɛŋ nii ni esa akɛ ofee ji ni okɛɛ o-Safoŋ Nikasemɔ Kuu nɔkwɛlɔ lɛ akɛ obaasumɔ ni oye obua shiɛlɔ kroko.
4 Too Gbɛjianɔ ni Osaa Ohe: Kɛ nyɛto be he gbɛjianɔ kpakpa ni nyɛtsu nii yɛ ekomefeemɔ mli lɛ, eyeɔ ebuaa. Kɛje shishijee lɛ ohefatalɔ lɛ baanyɛ afee mɔ ni he kpokpoɔ ni eleŋ nɔ ni ebaakɛɛ, shi ehiɛ baasɔ akɛ mɔ ko kɛ lɛ miitsu nii koni eye ebua lɛ kɛ ehe bahia. (Jal. 4:9) Kɛ aaahi lɛ, halamɔ shikpɔŋkuku ko ni nyɛkɛ mɛi ni aaasumɔ ni amɛgba Biblia mli saji aaakpe yɛ mli. Enɛ baaye abua mɔ hee lɛ ni ekɛ ehe awo mli ni ena hekɛnɔfɔɔ.
5 Kɛ nyɛaatsa tsɔsemɔ ni yaa hiɛ lɛ nɔ Iɛ, ehe baaba sɛɛnamɔ akɛ nyɛaasusu bɔ ni afeɔ sɛɛsaramɔ yɛ mɛi ni yɔɔ wiemɔ lɛ he miishɛɛ ni ana amɛ lɛ anɔ lɛ he. Nɔ ni kɔɔ enɛ he ji gbɛjianɔ ni aaato beni atee jɛmɛ klɛŋklɛŋ kwraa lɛ kɛtsɔ sanebimɔ ni aaashi aha shiatsɛ lɛ koni aku sɛɛ aba abaha hetoo lo nɔ. Bɔɔ mɔdɛŋ ni oye obua shiɛlɔ ni he esako lɛ ni esaa ehe, koni ofata ehe kɛya nakai sɛɛsaramɔ lɛ nɔ. Kɛ aje nikasemɔ shishi, ni shiɛlɔ hee lɛ heee ehe eyeee akɛ eeenyɛ etsa nɔ lɛ, shiɛlɔ ni he esa lɛ baasumɔ ni ekwɛ nikasemɔ lɛ nɔ shii abɔ ko kɛyashi be mli ni mɔ hee lɛ he aaasa akɛ eeekwɛ nɔ.
6 Akɛni mɛi heei babaoo miiba gbɛjianɔtoo lɛ mli hewɔ lɛ, nilee ni yɔɔ tsɔsemɔ babaoo ni akɛaaha yɛ sɔɔmɔ nitsumɔ lɛ mli lɛ bafeɔ nɔ ni ka shi faŋŋ. Yelikɛbuamɔ ni mɛi ni amɛ hesaa yɛ shiɛmɔ nitsumɔ lɛ mli lɛ etee hiɛ lɛ kɛaaba lɛ he miihia. Kɛ ooonyɛ oye obua mɔ ko lɛ, yɛ be ni sa mli lɛ, lɛ hu eeena ‘hewalɛ ni ekɛaatsɔɔ mɛi krokomɛi’ anii.—2 Tim. 2:2.