Bɔ ni Ooofee Otsɔse Mɛi Hei Koni Amɛshiɛ

1. Gbi klɛŋklɛŋ ni okɛ ohe wo shiɛmɔ nitsumɔ lɛ mli lɛ, te onu he oha tɛŋŋ?

¹ Ani okaiɔ gbi klɛŋklɛŋ ni okɛ ohe wo shĩa kɛ shĩa shiɛmɔ nitsumɔ lɛ mli? Eeenyɛ efee akɛ, otsui fã. Kɛ́ no mli lɛ okɛ mɔ ni kɛ bo kaseɔ Biblia lɛ loo shiɛlɔ kroko ni nyiɛ lɛ, ŋwanejee ko bɛ he akɛ oná he miishɛɛ waa akɛ eye ebua bo. Amrɔ nɛɛ ni bo hu ohe esa akɛ shiɛlɔ lɛ, obaanyɛ oye obua mɛi hei ni amɛshiɛ.

2. Mɛni ehe hiaa ni shiɛlɔi hei akase?

² Ehe miihia ni shiɛlɔi akase bɔ ni akɛ mɛi jeɔ sanegbaa shishi, bɔ ni akɛ Biblia lɛ tsuɔ nii yɛ shinaa naa, bɔ ni afeɔ sɛɛkuu kɛ saramɔi, kɛ bɔ ni ajeɔ Biblia mli nikasemɔ shishi ni atsaa nɔ. Agbɛnɛ hu, esa akɛ amɛkase gbɛi srɔtoi ni atsɔɔ nɔ ashiɛɔ, tamɔ gbɛjegbɛ he odaseyeli kɛ mɛi ni aaaye amɛ odase yɛ nitsumɔhei. Obaanyɛ otsɔ nɔkwɛmɔnɔ ni ooofee otsɔɔ amɛ kɛ ŋaawoi anɔ oye obua amɛ koni amɛle gbɛi nɛɛ fɛɛ kɛnitsumɔ jogbaŋŋ.

3. Te wɔɔfee tɛŋŋ wɔfee nɔkwɛmɔnɔ kɛye wɔbua mɛi lɛ?

³ Feemɔ he Nɔkwɛmɔnɔ Otsɔɔ: Yesu fee bɔ ni ashiɛɔ ahaa lɛ he nɔkwɛmɔnɔ etsɔɔ ekaselɔi lɛ. (Luka 8:1; 1 Pet. 2:21) Kɛji oto gbɛjianɔ akɛ okɛ shiɛlɔ hee ko baaya shiɛmɔ lɛ, taomɔ shiɛmɔ wiemɔ ko ni waaa ni shiɛlɔ lɛ baanyɛ akase, ekolɛ obaanyɛ okɛ nɔ ni yɔɔ wɔwoji lɛ amli lɛ eko atsu nii. No sɛɛ lɛ, bo tsutsu shiɛmɔ yɛ klɛŋklɛŋ shinaa lɛ kɛ ekolɛ nɔ ni ji enyɔ lɛ naa koni shiɛlɔ lɛ abo nɔ ni obaakɛɛ lɛ toi. Kɛ́ nyɛjɛ shinaa kome naa kɛmiiya ekroko naa lɛ, obaanyɛ obi shiɛlɔ lɛ ni etsɔɔ nɔ ni eyɔse yɛ bɔ ni okɛ oshiɛmɔ wiemɔ lɛ tsu nii oha lɛ he. Enɛ baaye abua lɛ ni ena akɛ ehi jogbaŋŋ akɛ ebaafata mɔ ko he kɛya shiɛmɔ, ni ebaaha efee mlɛo kɛha lɛ akɛ eeekpɛlɛ ŋaawoi fɛɛ ni okɛbaaha lɛ lɛ anɔ beni ekɛ eshiɛmɔ wiemɔ lɛ eha sɛɛ.

4. Te wɔɔfee tɛŋŋ wɔye wɔbua shiɛlɔ hee ko beni wɔbo eshiɛmɔ wiemɔ ni ekɛha lɛ toi sɛɛ lɛ?

⁴ Okɛ Ŋaawoo Aha: Yesu kɛ gbɛtsɔɔmɔi ha ekaselɔi lɛ yɛ bɔ ni esa akɛ amɛshiɛ amɛha lɛ he. (Mat. 10:5-14) Obaanyɛ ofee nakai nɔŋŋ kɛye obua shiɛlɔ hee ko. Kɛ́ eshɛ enɔ ni ebaashiɛ lɛ, bo lɛ toi jogbaŋŋ. No sɛɛ kɛ́ nyɛshi shinaa lɛ naa lɛ, jɛɛ mlihilɛ mli ojie eyi yɛ nibii pɔtɛɛ komɛi ahe, kɛji ona nibii komɛi po ni ebaabi ni ejaje yɛ bɔ ni ekɛ eshiɛmɔ wiemɔ lɛ ha lɛ he. Dani obaawo lɛ ŋaa yɛ nɔ ko he lɛ, ekolɛ ebaahi akɛ omɛ fioo ni okwɛ kɛji ebaafee nakai nɔ lɛ jogbaŋŋ yɛ shinaa kroko lɛ naa. Ekolɛ etsui kɛkɛ ni fã. Agbɛnɛ hu, ha ehi ojwɛŋmɔ mli akɛ, esoro shiɛlɔ fɛɛ shiɛlɔ kɛ enyɛmɔ, ni bei pii lɛ, abaanyɛ atsɔ gbɛi srɔtoi ni ja nɔ afee nɔ ko.—1 Kor. 12:4-7.

5. Mɛni obaanyɛ owie kɛ́ bo tsutsu ooŋɔ hegbɛ kɛwo ŋaa lɛ?

⁵ Bei komɛi lɛ, shiɛlɔ hee ko baabi bo ŋaawoo. Shi kɛ́ efeee nakai lɛ, bo tsutsu ŋɔɔ hegbɛ lɛ kɛye obua lɛ. Mɛɛ gbɛ nɔ oootsɔ ofee enɛ yɛ nilee mli? Shiɛlɔi komɛi ni yɔɔ niiashikpamɔ yɛ shiɛmɔ nitsumɔ lɛ mli lɛ biɔ akɛ, “Ani manyɛ mawo bo ŋaa yɛ nɔ ko he?” aloo, “Te onaa bɔ ni ofee lɛ lɛ ohaa tɛŋŋ?” Gbɛ kroko ni obaanyɛ okɛtsu nii hu ji ni okɛɛ akɛ, “Beni mibɔi shiɛmɔ lɛ, no mli lɛ ewa kɛha mi akɛ . . . , shi mina akɛ enɛ ye ebua mi jogbaŋŋ. . . .” Bei komɛi lɛ, ehi jogbaŋŋ akɛ okɛ lɛ baafee ekome kɛkwɛ Reasoning wolo lɛ mli. Bɔni afee ni okaloo ŋaawoo pii oshwie enɔ lɛ, wiemɔ nɔ̃ kome pɛ he yɛ eshiɛmɔ wiemɔ lɛ he.

6. Mɛɛ gbɛ nɔ “dade jɔɔ dade naa” yɛ shiɛmɔ nitsumɔ lɛ mli?

⁶ Dade Jɔɔ Dade Naa: Paulo wo Timoteo ni ji shiɛlɔ ni yɔɔ niiashikpamɔ babaoo lɛ hewalɛ koni eya nɔ etsɔɔ nii ni eya ehiɛ. (1 Tim. 4:13, 15) Eyɛ mli akɛ ekolɛ kɛjɛ beni obɔi shiɛmɔ nɛɛ afii babaoo eho moŋ, shi esa akɛ obɔ mɔdɛŋ ni oya ohiɛ lolo koni ohe asa jogbaŋŋ. Kasemɔ nii kɛjɛ mɛi ni okɛyaa shiɛmɔ lɛ adɛŋ, ní mɛi ni bɛ niiashikpamɔ babaoo yɛ shiɛmɔ nitsumɔ lɛ mli lɛ po fata he, ni ofee klalo akɛ obaajɛ mlihilɛ mli oye obua mɛi, titri lɛ mɛi hei, bɔni afee ni amɛhe asa jogbaŋŋ yɛ sanekpakpa lɛ shiɛmɔ mli.—Abɛi 27:17.