Babaoo ni Wɔɔfee yɛ Yehowa Sɔɔmɔ Mli
1 Wɔna hegbɛ diɛŋtsɛ akɛ wɔɔsɔmɔ Yehowa. Akɛni wɔna Lɛ kɛ e-Bi koome, Yesu he anɔkwa nilee hewɔ lɛ, suɔmɔ tsirɛɔ wɔ koni wɔkɛ wɔhe aha kwraa ni wɔfee E-suɔmɔnaa nii. (Yoh. 17:3) Ekolɛ ebaatɔ wɔ, shi Yehowa haa wɔ hewalɛ koni wɔhewalɛ lɛ ayi obɔ kɛ nyɛmɔ.—Yes. 40:29.
2 Te wɔɔfee tɛŋŋ wɔjie hiɛsɔɔ ni fe fɛɛ kpo yɛ suɔmɔ kpele ni Yehowa Nyɔŋmɔ kɛ Yesu Kristo ejie lɛ kpo yɛ wɔhe lɛ hewɔ? (2 Kor. 5:14, 15) Klɛŋklɛŋ gbɛ lɛ ji ni wɔkase Yesu, ni ye e-Tsɛ lɛ gbɛi kɛ Maŋtsɛyeli lɛ he odase ni etɔɔɔ lɛ lɛ. (1 Pet. 2:21) Kɛ wɔyɛ hemɔkɛyeli ni mli wa lɛ, wɔshihilɛ baagba abɔle nitsumɔ ni Nyɔŋmɔ kɛha ni ji sanekpakpa lɛ shiɛmɔ lɛ.—Mat. 24:14.
3 Ani be falɛ ko yɛ ni esa akɛ wɔtuu wɔha sɔɔmɔ nitsumɔ lɛ? Shihilɛi yɛ sɔrɔto. Ekolɛ dalɛ yɛ afi amli, hewalɛ ni abɛ, aloo weku mli gbɛnaa nii baanyɛ atsi wɔnaa fioo. Kɛlɛ, aabi ni sɔɔmɔ ni wɔkɛhaa Yehowa lɛ afee nɔ ni jɛ susuma muu fɛɛ mli. Enɛ tsɔɔ akɛ esa akɛ wɔ aŋkroaŋkro lɛ wɔtsɔɔ bɔ ni wɔhetuu-kɛhamɔ mli kwɔ ha kɛ bɔ ni wɔhenɔjɔɔmɔ ji krɔŋŋ ha kɛtsɔ fɛɛ ni wɔɔnyɛ wɔfee yɛ sɔɔmɔ lɛ mli lɛ feemɔ nɔ. (2 Tim. 2:16) Agbele hegbɛi anaa aha wɔteŋ mɔ fɛɛ mɔ yɛ bɔ ni wɔteŋ mɔ fɛɛ mɔ shihilɛ ji lɛ naa. Mɛni ji enɛɛmɛi ateŋ ekomɛi?
4 Gbɛi ni Wɔɔtsɔ nɔ Wɔlɛɛ Wɔ Sɔɔmɔ lɛ Mli: Klɛŋklɛŋ lɛ esa akɛ wɔnya wɔsɔɔmɔ lɛ hilɛ ni wɔɔha eya hiɛ lɛ he. Wɔbaanyɛ wɔfee enɛ kɛtsɔ hesaai babaoo ni wɔɔna akɛ tsɔɔlɔ lɛ nɔ. Teokrase Sɔɔmɔ Skul lɛ yiŋtoi titrii lɛ ateŋ ekome ji ni eye ebua wɔ ni wɔhe asa jogbaŋŋ yɛ sɔɔmɔ nitsumɔ lɛ mli. Ani wɔsusuɔ sɔɔmɔ nitsumɔ lɛ he beni wɔsaa wɔhe kɛhaa nitsumɔi ni akɛwo wɔdɛŋ lɛ? Ani wɔkɛ ŋaawoo ni akɛhaa wɔ lɛ tsuɔ nii koni wɔha wɔsɔɔmɔ nitsumɔ lɛ aya hiɛ? (sg bf. 96-9) Nakai nɔŋŋ hu akɛ ŋaawoi pii haa kɛhaa sɔɔmɔ nitsumɔ lɛ yɛ Sɔɔmɔ Kpee lɛ mli. Nyɛhaa wɔkɛ enɛɛmɛi atsua nii amrɔ nɔŋŋ ni wɔɔnyɛ.
5 Agbɛnɛ hu, susumɔ hegbɛ ni ooona ni ofee tsakemɔi yɛ oshihilɛ mli koni okɛ ohe awo gbɛgbalɔi awamɔ loo daa gbɛgbamɔ sɔɔmɔ lɛ mli lɛ he. Eka shi faŋŋ akɛ nakai feemɔ baaha ofee mɔ ni feɔ babaoo yɛ sɔɔmɔ ni wɔkɛhaa Yehowa, wɔ-Tsɛ lɛ mli. (1 Kor. 15:58) Shi kɛ onyɛɛɛ ofee gbɛgbalɔ hu? Obaanyɛ ojie gbɛgbamɔ su kpo kɛtsɔ suɔmɔ ni ooona oha sɔɔmɔ lɛ kɛ gbɔmɛi ni yɔɔ shikpɔŋkuku lɛ mli lɛ ahesusumɔ waa nɔ. Agbɛnɛ hu obaanyɛ okɛ hegbɛ fɛɛ hegbɛ ni ooona lɛ atsu nii ni okɛye obua anɔkwafoi lɛ ni amɛle Yehowa kɛ eyiŋtoi ni yɔɔ naakpɛɛ lɛ kɛtsɔ sɛɛsaramɔi kɛ Biblia kasemɔi anɔ.
6 Ni wɔɔhere tsɛmɔ akɛ wɔyasɔmɔ yɛ he ni hiamɔ lɛ da yɛ lɛ nɔ lɛ hu ji wɔ nɔyaa lɛ fa. (Yes. 6:8) Mɛi ni amɛfa kɛtee asafoi ni yelikɛbuamɔ he miihia yɛ onukpai akuu lɛ teŋ aloo ni amɛmiitao yelikɛbuamɔ yɛ amɛ shikpɔŋkuku lɛ mli nitsumɔ mli lɛ ekpa jɔɔmɔi babaoo diɛŋtsɛ.
7 Beni wɔkase anɔkwale lɛ klɛŋklɛŋ kwraa lɛ, suɔmɔ kɛha Yehowa kɛ Kristo Yesu tsirɛ wɔ koni wɔfee tsakemɔi wuji yɛ wɔshihilɛ mli. Agbɛnɛ beni wɔdaa yɛ wɔ hiɛsɔɔ kɛha wekukpaa ni ka wɔkɛ wɔŋwɛi Tsɛ lɛ teŋ kɛ nɔ ni e-Bi lɛ fee kɛha wɔ lɛ he lɛ, ani tsakemɔi krokomɛi yɛ ni wɔbaanyɛ wɔfee ni wɔkɛlɛɛ wɔsɔɔmɔ nitsumɔ lɛ mli? Nyɛhaa wɔ fɛɛ wɔkɛ wɔhe ahaa kɛtsɔ babaoo ni wɔɔfee yɛ Yehowa sɔɔmɔ mli lɛ nɔ.—Rom. 12:11.