Ha Mɛi Fɛɛ Ale Akɛ Jeŋ Fɛɛ Shweshweeshwe Shihilɛ Ebɛŋkɛ
1 Etsɛŋ ni “Toiŋjɔlɛ Lumɔ” lɛ baato anɔkwa toiŋjɔlɛ kɛ shweshweeshwe shihilɛ shishi yɛ jeŋ fɛɛ. Esa akɛ Biblia shiwoo nɛɛ mli hemɔkɛyeli ni wɔyɔɔ lɛ akanya wɔ ni wɔkɛ mɛi krokomɛi awie he. (Yes. 9:6, 7, NW; Mika 4:3, 4) Yɛ February kɛ March nyɔji lɛ amli lɛ, wɔkɛ woji ni hiɛ baafai 192 ni afee yɛ 1983 loo kɛtsɔ hiɛ lɛ baaha. Asafoi ni bɛ nɛkɛ woji nɛɛ eko yɛ amɛwoji ahɔɔmɔ he lɛ baanyɛ amɛkɛ Worldwide Security Under the “Prince of Peace” wolo lɛ aha.
2 Kɛji okwɛ Wɔ Maŋtsɛyeli Sɔɔmɔ nɛɛ baafa 8 lɛ, wɔkɛ hiɛkpamɔ wiemɔi saŋŋ ni obaasumɔ ni okɛtsu nii yɛ sɔɔmɔ nitsumɔ lɛ mli yɛ February mli lɛ eha yɛ jɛmɛ. Akɛ sanegbaa nɔtsamɔ gbɛi etɛ ni baanyɛ aye abua ni akɛgbala shiatsɛmɛi lɛ ajwɛŋmɔ kɛba Worldwide Security wolo lɛ nɔ eha yɛ kukuji ni nyiɛ sɛɛ lɛ amli.
3 Nɔtsamɔ Gbɛ 1: Yɛ ohiɛkpamɔ wiemɔ lɛ sɛɛ lɛ, gbelemɔ baafa 13 ni okɛɛ akɛ: “Atsɛ Yesaia 9:5, 6 mli wiemɔi lɛ asɛɛ pɛpɛɛpɛ kɛjɛ Biblia lɛ mli yɛ klɛŋklɛŋ kuku nɛɛ mli. Ha ni makane jɛmɛ maha bo.” No sɛɛ lɛ bi lɛ akɛ: “Namɔ ji ‘Toiŋjɔlɛ Lumɔ’ lɛ?” Ŋmɛɛ gbɛ ni eha hetoo, koni otsa nɔ akɛ: “Nɛkɛ wolo nɛɛ tsɔɔ mɔ tuuŋtu ni ji ‘Toiŋjɔlɛ Lumɔ’ lɛ, ni etsɔɔ bɔ ni eeefee ekɛ jeŋ fɛɛ toiŋjɔlɛ aba shikpɔŋ nɔ yɛ wɔgbii nɛɛ amli lɛ hu mli faŋŋ. Ani obaasumɔ ni okane, ni ani obaasumɔ ni ole jeŋ hee ni awo shi yɛ he lɛ he saji babaoo?” Bɔ fɛɛ bɔ ni eeeha hetoo lɛ, bɔɔ mɔdɛŋ ni oshi wolo ko oha shiatsɛ lɛ.
4 Nɔtsamɔ Gbɛ 2: Kɛji okane Yesaia 9:5, 6 ogbe naa lɛ, gbelemɔ baafa 4 ni obi shiatsɛ lɛ akɛ: “Mɛɛ toiŋjɔlɛ shihilɛi onaa yɛ nɛkɛ mfoniri nɛɛ mli?” Ŋmɛɛ gbɛ ni eha hetoo, koni otsa nɔ okɛɛ akɛ: “Toiŋjɔlɛ yɛ gbɔmɛi lɛ ateŋ ni toiŋjɔlɛ yɛ amɛkɛ kooloi lɛ hu ateŋ. Ekolɛ mɛi komɛi baasusu akɛ adesai anɔyelii baanyɛ amɛkɛ nɛkɛ toiŋjɔlɛ nɛɛ aba. Shi Nyɔŋmɔ ji mɔ ni kɛ toiŋjɔlɛ kɛ shweshweeshwe shihilɛ diɛŋtsɛ ni agba afɔ shi yɛ Biblia lɛ mli lɛ baaba, jeee adesai. Bɛ okpɛlɛɔ nɔ nakai?” Ŋmɛɛ gbɛ ni eha hetoo, no sɛɛ lɛ kanemɔ kuku 4 yɛ baafa 5 ni ogbala mli akɛ nɛkɛ wolo nɛɛ haa sanebimɔi babaoo ni kɔɔ Maŋtsɛyeli lɛ he kɛ toiŋjɔlɛ yɛ shikpɔŋ nɔ lɛ ahetoo. Okɛ wolo lɛ aha lɛ, koni oto gbɛjianɔ ni oku sɛɛ oya eŋɔɔ kɛha emli saji ahe susumɔ.
5 Nɔtsamɔ Gbɛ 3: Yɛ hei ni gbɔmɛi lɛ fɔɔ sanegbaa mlifoo ni amɛŋmɛɛɛ gbɛ ni ogbe owiemɔ lɛ naa lɛ, obaanyɛ okɛ nɛkɛ gbɛ nɛɛ atsu nii: “Ha mabi bo sane ko?” Kɛji shiatsɛ lɛ kpɛlɛ lɛ, yaa nɔ akɛ: “Yesu wie yɛ Mateo 28:19, 20 akɛ esɛɛnyiɛlɔi lɛ baafee gbɔmɛi ni jɛ jeŋmaji fɛɛ mli ekaselɔi. Sanebimɔ lɛ ji akɛ: Ani ebaabi ni atsake jeŋ muu lɛ fɛɛ dani ebɔi nɔyeli akɛ “Toiŋjɔlɛ Lumɔ lɛ? Te osusuɔ he ohaa tɛŋŋ?” Ŋmɛɛ gbɛ ni eha hetoo, koni okɛɛ akɛ: “Wɔnaa Biblia lɛ hetoo kɛha nakai sanebimɔ lɛ yɛ biɛ yɛ baafa 21.” Kɛkɛ lɛ kanemɔ kuku 2 yɛ baafa 21, ni otsɔɔ lɛ bɔ ni ŋmalɛi ni atsɛ yɛ wolo nɛɛ mli lɛ haa nakai sanebimɔ lɛ kɛ ekrokomɛi babaoo ni kɔɔ jeŋ muu fɛɛ shweshweeshwe shihilɛ kɛ “Toiŋjɔlɛ Lumɔ” lɛ he lɛ ahetoo.
6 Ekolɛ ohala hiɛkpamɔ wiemɔ ko ni osumɔɔ kɛjɛ baafa 8 yɛ Wɔ Maŋtsɛyeli Sɔɔmɔ lɛ mli. Beni oti nɔtsamɔ gbɛi ni yɔɔ sane nɛɛ mli lɛ amli sɛɛ lɛ, ekolɛ obaana eko pɔtɛɛ yɛ mli ni obaaná ekɛ nitsumɔ he miishɛɛ. Ŋɔɔ be ni okɛti ohiɛkpamɔ wiemɔ kɛ gbɛ ni oootsɔ nɔ otsa nɔ lɛ mli dani oya shiɛmɔ. Ohesaamɔ kɛ bɔ ni bo diɛŋtsɛ oyɔɔ nɔmimaa akɛ anɔkwa toiŋjɔlɛ kɛ shweshweeshwe shihilɛ baaba kɛtsɔ “Toiŋjɔlɛ Lumɔ” lɛ kɛ e-Maŋtsɛyeli lɛ nɔ lɛ baaha bɔ ni okɛ Worldwide Security wolo lɛ haa kɛ yiŋtsɔmɔ kɛ ekaa lɛ aya hiɛ babaoo.