Ye Obua Koni Wekui Aya nɔ Jogbaŋŋ
1 Wekui pii amli egbala ŋmɛnɛ. Yɛ be mli ni gbalashihilɛ he ŋaawolɔi kɛ gbɛtsɔɔmɔi babaoo ni teɔ shi woɔ ehe yɛ bei komɛi amli lɛ haa lɛ, ŋaawoo ni hi fe fɛɛ lɛ yɛ Nyɔŋmɔ Wiemɔ, Biblia lɛ mli. Yɛ enɛ hewɔ lɛ, wɔkɛ Oweku Shihilɛ Ni Oooha Efee Miishɛɛ wolo lɛ baaha yɛ January kɛ February nyɔji lɛ amli. Abaanyɛ akɛ ŋaawoi ni nyiɛ sɛɛ nɛɛ atsu nii yɛ wolo lɛ kɛhamɔ mli.
2 Kɛ okɛ “Weku Shihilɛ” wolo lɛ miiha fɔlɔ ko lɛ, obaanyɛ okɛ mfoniri ni yɔɔ baafa 4 lɛ atsɔɔ ni okɛɛ akɛ:
◼ “Enɛ ji bɔ ni Nyɔŋmɔ to eyiŋ akɛ weku shihilɛ lɛ atamɔ aha lɛ he mfoniri ko ni nitɛŋlɔ efee, shi ŋmɛnɛ lɛ, yɛ bɔ ni gbalamlitsemɔ kɛ mligbalamɔ yaa nɔ efaa babaoo hewɔ lɛ, wekui ni fɔlɔ kome yɔɔ mli lɛ efa babaoo diɛŋtsɛ yɛ je lɛŋ fɛɛ. Mɛni osusuɔ akɛ ehe baahia ni bo kɛ oweku lɛ ahi shi yɛ ekomefeemɔ mli yɛ paradeiso shikpɔŋ nɔ? [Ŋmɛɛ gbɛ ni ewie.] Biblia lɛ tsɔɔ akɛ etsɛŋ ni anɔkwa miishɛɛ baahi shiai amli kɛ̃ yɛ jeŋ fɛɛ ni ákɛ akɛ Paradeiso baaba ekoŋŋ. [Kanemɔ Lala 37:10, 11.] Wolo nɛɛ baanyɛ atsɔɔ nɔ ni he hiaa ni ofee ni ona gbɛjianɔ ni Nyɔŋmɔ eto kɛha wekui ni yɔɔ miishɛɛ lɛ he sɛɛ.”
3 Kɛ okɛ gbekɛ ko kpe yɛ shinaa naa lɛ, obaanyɛ okɛɛ nɔ ko nɛkɛ:
◼ “Ani okpɛlɛɔ nɔ akɛ weku ni yɔɔ ŋmɛnɛ lɛ kɛ kaai ni yinɔi ni eho lɛ leee lɛ kpeɔ? [Ŋmɛɛ gbɛ ni ewie.] Shi, ani osusuɔ akɛ enɛ miiya nɔ? [Kpɛlɛmɔ bɔ ni ejie enaa eha lɛ nɔ. Gbelemɔ 2 Timoteo 3:1-3 lɛ ni okane.] Wiemɔi kukuji ni ji, ‘fɔlɔi anɔ toigbolɔi’ kɛ ‘mɛi ni edɔɔɔ mɔ he’ lɛ tsɔɔ bɔ ni mɛi babaoo yɔɔ ha yɛ wɔgbii nɛɛ amli lɛ mli jogbaŋŋ. Shi kɛlɛ, Nyɔŋmɔ ni gba naagbai nɛɛ ahe sane efɔ shi lɛ nɔŋŋ ji mɔ ni kɛ gbɛtsɔɔmɔ kpakpa ni tsɔɔ bɔ ni weku mli bii baafee ekome kɛhi shi lɛ eha wɔ.” Kanemɔ yitso kome lɛ mli klɛŋklɛŋ kukuji enyɔ ni yɔɔ baafa 5 lɛ. Okɛ wolo lɛ aha ni oto gbɛjianɔ ni oku osɛɛ oba kɛha sanegbaa ni baaya nɔ lolo.
4 Gbɛ kroko ni obaatsɔ nɔ ji ni okɛ adafitswaa mli sane ko ni yɔɔ bianɛ ni kɔɔ shihilɛ mli naagba ko ni anáko enaa tsabaa he lɛ aaaje shishi. Obaanyɛ okɛɛ akɛ:
◼ “Bei pii lɛ wɔnuɔ ni aawie gbekɛbii ni ŋɔɔ hɔ kɛ gbekɛbii atoigbele he yɛ adafitswaa saji amli. Ani osusuɔ akɛ gbi ko baaba ni akutsoŋ hiɛnyiɛlɔi kɛ fɔlɔi baanyɛ aná naagbai nɛɛ anaa tsabaa? [Ŋmɛɛ gbɛ ni shiatsɛ lɛ awie ni okpɛlɛ bɔ ni ejie enaa eha lɛ nɔ.] Wɔ fɛɛ wɔhiɛ baasɔ shihilɛ yɛ jeŋ ni naagbai ni tamɔ nɛkɛ ehiŋ mli lɛ, ejaakɛ gbekɛbii baakpɛlɛ fɔlɔi ahegbɛ nɔ, ni amɛkɛ anɔkwayeli baafi mɔdɛŋ ni amɛbɔɔ lɛ asɛɛ. Enɛ baaba mli kɛ̃ yɛ Nyɔŋmɔ maŋtsɛyeli lɛ nɔyeli ni wɔsɔleɔ yɛ he lɛ mli.” Kanemɔ Efesobii 5:1, 2 koni otsɔɔ bɔ ni yɛ naagbee mli lɛ nine baashɛ toiŋjɔlɛ kɛ shweshweeshwe shihilɛ nɔ. Agbɛnɛ nyɛsusua Weku Shihilɛ wolo lɛ mli otii ni yɔɔ baafa 183 lɛ kuku 5 lɛ he. Okɛ wolo lɛ aha ni oto gbɛjianɔ ni oba ekoŋŋ kɛha sanegbaa babaoo.
5 Kɛ obaasumɔ ni okɛ shiɛmɔ wiemɔ kuku aha lɛ, obaanyɛ ogbele wolo lɛ baafa 2 ni obi akɛ:
◼ “Mɛni baaba weku lɛ nɔ? Mɛi babaoo susuɔ enɛ he. Mɛni osusuɔ yɛ he?” Kpɛlɛmɔ bɔ ni shiatsɛ lɛ jie enaa eha lɛ nɔ, ni no sɛɛ lɛ okane wolo lɛ hiɛkpamɔ wiemɔ ni yɔɔ baafa 2 lɛ. Okɛ wolo lɛ aha, ni otsɔɔ shia Biblia mli nikasemɔ he gbɛjianɔ ni ato lɛ mli.
6 Weku Shihilɛ wolo lɛ ni akɛaatsu nii kɛ hesaa lɛ baaye abua koni atsɔɔ mɛi ni hiɛ tsui kpakpa lɛ gbɛ kɛya weku shihilɛ he ŋaawoo jɛɛhe ni hi fe fɛɛ—Nyɔŋmɔ Wiemɔ lɛ nɔ. (2 Tim. 3:16, 17) Nyɛhaa wɔ fɛɛ wɔmiaa wɔhiɛ yɛ wekui lɛ ayelikɛbuamɔ mli koni ‘amɛdɔrɔ amɛnakutsei amɛha Tsɛ lɛ.’—Efes. 3:14, 15.