Hiɛkpamɔ Wiemɔi ni Baaha Shiatsɛmɛi Iɛ Abo Wɔ Toi
1 Mɛni ji oshia-kɛ-shia shiɛmɔ lɛ mli nɔ ni he hiaa fe fɛɛ? Wɔteŋ mɛi pii baakpɛlɛ nɔ akɛ no ji hiɛkpamɔ wiemɔ lɛ. Kɛji oyeee omanye yɛ shiatsɛ lɛ miishɛɛ ni oootee lɛ shi yɛ klɛŋklɛŋ hiŋmɛitswai 30 loo nɔ lɛ mli lɛ, no lɛ ekolɛ ebaafo sanegbaa lɛ sɛɛ.
2 Mɛɛ otii esa akɛ osusu he beni osaa hiɛkpamɔ wiemɔ ni mɔɔ shi lɛ? Susumɔ gbɔmɛi ni okpaa gbɛ akɛ okɛ amɛ baakpe lɛ akusum kɛ amɛhiamɔ nii ahe. Yɛ amɛŋamɔ sɛɛ lɛ, ani afɔɔ nibii krokomɛi hu feemɔ, aloo ani akpaa bo gbɛ akɛ oootsɔɔ nɔ hewɔ ni oba jɛmɛ lɛ amrɔ nɔŋŋ? Ani obalaŋtai gbalashihilɛ mli hefatalɔi babaoo yɛ nyɛ akutso lɛ mli? Mɛni amɛfɔɔ he wiemɔ? Ani gbɔmɛi ni yɔɔ nyɛ akutso lɛ mli lɛ susuɔ naagbai ni haoɔ adesai fɛɛ lɛ ahe jogbaŋŋ?
Kɛji okɛɛ nɔ ko tamɔ nɛkɛ lɛ, ekolɛ Obaana amɛ ni amɛbo toi:
◼ “Ofainɛ biɛ fɛɛ. Atsɛɔ mi _. Kɛji mikane bɔ ni hɔmɔ yeɔ gbɔmɛi ni agbeɔ mɛi yɛ tai amli lɛ, ehaoɔ mi waa. Ani ehaoɔ bo hu?” Sanebimɔi krokomɛi ni baanyɛ aye abua kɛha sanegbaa shishijee ji “Mɛni ji je lɛ naagbai lɛ anaa tsabaa?” “Ani osusuɔ akɛ mɔ ko baanyɛ ajie naagbai ni yɔɔ shikpɔŋ nɔ ŋmɛnɛ lɛ kɛjɛ jɛmɛ?” “Ni kɛji akɛ nɔyelɔ ko yɛ hesaai tamɔ nɔ ni atsi ta yɛ Yesaia 9:5, 6 nɛɛ hu? [Kanemɔ ŋmalɛ lɛ ni owie he.]”
3 Yɛ shikpɔŋkukuji komɛi amli lɛ, ekolɛ gbɔmɛi susuɔ amɛshia kɛ amɛweku he waa fe jeŋ muu fɛɛ saji tamɔ jeŋ toiŋjɔlɛ-namɔ he.
Obaanyɛ obi sane nɛɛ ni okɛtee miishɛɛ shi:
◼ “Mɛɛ shihilɛ nɛkɛ okpaa gbɛ kɛha bo diɛŋtsɛ kɛ oweku lɛ yɛ biɛ afii nyɔŋma mli? Susumɔ ni Biblia hiɛ yɛ wɔsɛɛ be he lɛ woɔ mɔ hewalɛ waa ejaakɛ egba nɔyelɔ ko ni kɛ shishitoo mlai ni eye emuu baaye nɔ he sane efɔ shi. Kwɛmɔ nɔ ni Yesaia 9:5, 6 kɛɔ yɛ ehe.”
4 Ani oyɛ akutso ko mli ni afɔɔ awuiyeli kɛ shweshweeshwe feemɔ he wiemɔ daa gbi? Kɛji okɛ klɛŋklɛŋ hiɛkpamɔ wiemɔ ni yɔɔ “Crime/Safety” shishi, yɛ Reasoning wolo lɛ baafa 10 lɛ tsu nii lɛ, ekolɛ mɛi komɛi baabo toi.
Obaanyɛ okɛɛ akɛ:
◼ “Biɛ fɛɛ. Wɔkɛ mɛi fɛɛ miigba aŋkroaŋkro shweshweeshwe feemɔ he sane. Awuiyeli babaoo ebɔle wɔ kɛkpe, ni esaa wɔwala he.” Kɛkɛ lɛ sanebimɔ tamɔ “Mɛni ji enaa tsabaa?” aloo “Ani osusuɔ akɛ mɔ ko baanyɛ ajie naagbai nɛɛ kɛjɛ shikpɔŋ lɛ nɔ?” aloo “Ni kɛji akɛ nɔyelɔ ko yɛ hesaai tamɔ enɛɛmɛi hu?” lɛ baanyɛ aye abua kɛha sanegbaa shishijee. No sɛɛ lɛ obaanyɛ okane Yesaia 9:5, 6.
5 Wɔteŋ mɔ fɛɛ mɔ, kɛ gbekɛbii ni yaa skul lɛ hu baanyɛ ni wɔkɛ shiɛmɔ wiemɔ kuku kɛ ŋmalɛ kome nɛɛ atsu nii. Lɛlɛŋ, ekolɛ obaasumɔ ni oka ekome okwɛ beni okɛ woji tɛtrɛbii haa lɛ. Kaimɔ akɛ, oti ni ma wɔhiɛ ji ni wɔna bɔni shiatsɛ lɛ yɔɔ he miishɛɛ ha, koni wɔha lɛ wolo ko ni sa. Ani okɛ wɔ kpaaa gbee akɛ Ŋmalɛ mli wiemɔ kuku nɛkɛ lɛ baafee gbɛ kpakpa ni wɔɔtsɔ nɔ wɔyoo kɛji wɔtoibolɔ lɛ jieɔ anɔkwa miishɛɛ diɛŋtsɛ kpo? Wɔhiɛ ka nɔ akɛ mɛi pii baana nɛkɛ shiɛmɔ wiemɔi nɛɛ kɛ nitsumɔ he miishɛɛ yɛ February mli, beni amɛkɛ woji tɛtrɛbii kɛ wolo ni wɔkɛtsuɔ nii yɛ nyɔŋ nɛɛ nɔ lɛ fɛɛ haa lɛ.
6 Kɛji okɛ osaramɔ be lɛ mli klɛŋklɛŋ hiŋmɛitswai 30 lɛ tsu nii kɛmɔ shi, kɛtsɔ ojeŋba kɛ ohiɛkpamɔ wiemɔ lɛ hu nɔ lɛ, no lɛ ekolɛ obaanyɛ oshɛ oti ni he hiaa ni ji shiatsɛmɛi lɛ ni aaabo bo toi lɛ he.