Obaanyɛ Ohi Shi Wolo lɛ ni Oookpa Hiɛ Jogbaŋŋ Kɛmɔ Shi
1 Yesu he esa waa yɛ bɔ ni ekɛ hiɛkpamɔ wiemɔi tsuɔ nii ehaa lɛ mli. Ele nɔ ni esa akɛ ewie koni ekɛtee mɛi amiishɛɛ shi. Be ko lɛ ekɛ Samaria yoo ko je sanegbaa shishi kɛtsɔ sane ni ebi lɛ akɛ eha lɛ nu ni enu lɛ nɔ. Enɛ gbala ejwɛŋmɔ amrɔ nɔŋŋ ejaakɛ “Yudafoi kɛ Samariabii yeee.” Yɛ naagbee lɛ sanegbaa ni tee nɔ lɛ ye ebua lɛ kɛ mɛi krokomɛi babaoo ni amɛbatsɔmɔ heyelilɔi. (Yoh. 4:7-9, 41) Wɔbaanyɛ wɔkase enɔkwɛmɔ nɔ lɛ.
2 Kɛ oosaa ohe ni okɛ Obaanyɛ Ohi Shi wolo lɛ aha lɛ, bi ohe akɛ, ‘Mɛni ji saji ni gbɔmɛi susuɔ he waa bianɛ yɛ wɔ shikpɔŋkuku lɛ mli? Mɛni mɔ ni yeko afii nyɔŋma kɛ enyɔ, mɔ ni eda, wu, loo ŋa ko baanya he?’ Obaanyɛ okɛ hiɛkpamɔ wiemɔ ni fe ekome asaa ohe, ni oto gbɛjianɔ ni okɛ nɔ ni baanyɛ akɔ shihilɛ lɛ he jogbaŋŋ atsu nii.
3 Akɛni weku shihilɛ ni fiteɔ lɛ kɔɔ mɛi pii ahe hewɔ lɛ, obaanyɛ okɛɛ akɛ:
◼ “Daa gbi shihilɛ mli nɔnyɛɛ lɛ kɛ naagbai wuji eba wekui anɔ ŋmɛnɛ. Nɛgbɛ amɛbaana yelikɛbuamɔ yɛ? [Ŋmɛɛ gbɛ ni ewie.] Biblia lɛ baanyɛ aye abua wɔ jogbaŋŋ. [Kanemɔ 2 Timoteo 3:16, 17.] Ŋmalɛi lɛ kɛ gbɛtsɔɔmɔi ni he baa sɛɛnamɔ ni baanyɛ aye abua ni ahere wekui ayiwala haa. Kadimɔ nɔ ni awie yɛ Obaanyɛ Ohi Shi yɛ Paradeiso yɛ Shikpɔŋ Nɔ wolo nɛɛ baafa 238 lɛ kuku 3 lɛ.” Kanemɔ kuku 3 lɛ, ni okɛ wolo lɛ aha.
4 Kɛ okɛ maŋ lɛ mli adafitswaa sane ko miitsu nii lɛ, obaanyɛ okɛɛ akɛ:
◼ “Ani onu adafitswaa sane ni kɔɔ [tsɔɔmɔ adafitswaa sane ni kɔɔ amɛhe] lɛ he? Te osusuɔ he ohaa tɛŋŋ? [Ŋmɛɛ gbɛ ni ewie.] Ehaa osusuɔ nɔ ni baa je nɛŋ nɔ lɛ he waa, aloo jeee nakai? Biblia lɛ gba nakai nibii lɛ ahe saji efɔ shi akɛ odaseyeli ni tsɔɔ akɛ wɔyɛ naagbee gbii lɛ amli.” No sɛɛ lɛ susumɔ sane ni yɔɔ Obaanyɛ Ohi Shi wolo lɛ baafai 150-3 lɛ ahe.
5 Mɛi pii miisusu awuiyeli ni faa babaoo he naagba lɛ he. Obaanyɛ okɛ klɛŋklɛŋ hiɛkpamɔ wiemɔ ni yɔɔ saneyitso ni ji “Crime/Safety” shishi ni yɔɔ “Reasoning” wolo lɛ baafa 10 lɛ atsu nii akɛ:
◼ “Wɔkɛ mɛi miisusu mɔ diɛŋtsɛ shweshweeshwe shihilɛ námɔ sane lɛ he. Awuiyelii babaoo ebɔle wɔ kɛkpe, ni esaa wɔ shihilɛi ahe. Mɛni osusuɔ akɛ abaanyɛ afee koni mɛi ni tamɔ bo kɛ mi fɛɛ ana hebuu yɛ gbɛjegbɛi lɛ anɔ gbɛkɛ?” Obaanyɛ okane Lala 37:10, 11 ni okɛ Obaanyɛ Ohi Shi wolo lɛ baafai 156-8 atsu nii koni okɛtsɔɔ jɔɔmɔi ni Nyɔŋmɔ Maŋtsɛyeli lɛ kɛbaaba.
6 Kɛ oosumɔ ni okɛ gbɛ kuku ko atsu nii lɛ, obaanyɛ okɛ hiɛkpamɔ wiemɔ ni tamɔ nakai ni yɔɔ “Reasoning” wolo lɛ baafa 12 lɛ yiteŋgbɛ lɛ atsu nii:
◼ “Wɔmiiwo wɔnanemɛi ahewalɛ koni amɛsusu wɔsɛɛ be shihilɛ kpakpa ni Biblia lɛ yɔɔ kɛha wɔ lɛ he. [Kanemɔ Kpojiemɔ 21:3, 4.] Ani enɛ tamɔ sanekpakpa kɛha bo? [Ŋmɛɛ gbɛ ni ewie.] Wolo nɛɛ yitso 19 lɛ maa jɔɔmɔi krokomɛi ni adesai heshibalɔi lɛ baaná yɛ Nyɔŋmɔ Maŋtsɛyeli lɛ shishi lɛ nɔ mi.” No sɛɛ lɛ okɛ Obaanyɛ Ohi Shi wolo lɛ aha.
7 Hiɛkpamɔ wiemɔ ni mɔɔ shi ni okɛaasaa ohe lɛ baanyɛ aye abua ni oya mɛi ni jalɛ he hɔmɔ yeɔ amɛ lɛ aŋɔɔ.—Mat. 5:6.