1992 “La Hiɛlɔi” kpokpaa Wulu nɔ Kpee

¹ Yesu wie akɛ esɛɛnyiɛlɔi lɛ baafee “je lɛŋ la lɛ.” (Mat. 5:14) Nɔ ni tamɔɔɔ nakai lɛ, je lɛ mumɔŋ kɛ jeŋba mli duŋ lɛ mli miiti waa gbi fɛɛ gbi ni hoɔ. (Yes. 60:2; Rom. 1:21) Gbɛnaa nii ni ka wɔ nɔ akɛ la hiɛlɔi lɛ he bahiaa waa beni wɔbɛŋkɛɔ nibii agbɛjianɔtoo nɛɛ naagbee lɛ he lɛ. Akɛni wɔyooɔ hegbɛ ni he hiaa ni wɔyɔɔ nɛɛ hewɔ lɛ, wɔkɛ gbɛkpamɔ kpele diɛŋtsɛ miikpa 1992 “La Hiɛlɔi” Kpokpaa Wulu nɔ kpee ni wɔɔya lɛ gbɛ. Nɛkɛ kpeei nɛɛ mli klɛŋklɛŋ nɔ lɛ jeɔ shishi Sohaa, December 18.

² Gbii Etɛ kpee: Afi nɛɛ wɔto kpeei 12 ahe gbɛjianɔ kɛha Ghana. Taakɛ wɔfeɔ daa lɛ, abaatsu gbɛjianɔtoo muu lɛ fɛɛ he nii yɛ Twi, Ewe, Ga kɛ Ŋleshi Blɔfo mli. Gbɛjianɔtoo lɛ baaje shishi Sohaa leebi 9:50 ni ebaaba naagbee kɛ lala kɛ sɔlemɔ yɛ Hɔgbaa shwane aaafee 4:​30. Yehowa webii fɛɛ baasumɔ ni amɛhi kpee lɛ shishi kɛha gbɛjianɔtoo muu lɛ fɛɛ. Ani bo diɛŋtsɛ okpɛ oyiŋ akɛ obaahi jɛmɛ yɛ gbii etɛ lɛ fɛɛ mli? Kaimɔ ni osɔle obi Yehowa jɔɔmɔi kɛha omɔdɛŋbɔi lɛ. Saji ni nyiɛ sɛɛ nɛɛ baaye abua bo yɛ ohesaamɔ mli.

³ Esa akɛ wɔjwɛŋmɔ anyiɛ gbɛjianɔtoo muu lɛ fɛɛ sɛɛ, kɛjɛ wiemɔ ni akɛbaagbele kpee lɛ yɛ Sohaa leebi lɛ aahu kɛyashi naagbee wiemɔ yɛ Hɔgbaa shwane lɛ nɔ. Akɛ saji ni kanyaa mɔ baaha akɛ wiemɔi, nɔkwɛmɔ nii, sanegbaai, kɛ drama. Too ogbɛjianɔ ni onyɛ ota shi dani gbɛjianɔtoo lɛ aje shishi Sohaa. Bei pii lɛ, yɛ klɛŋklɛŋ gbi lɛ nɔ lɛ, eheɔ be babaoo dani anyɛɔ anaa tsɔnei amaamɔ hei, shitaramɔ hei, kɛ nibii krokomɛi. No hewɔ lɛ, ha ohe be babaoo. Kɛji wɔbo gbi lɛ mli wiemɔi lɛ fɛɛ toi ni wɔtara shi aahu kɛyashi naagbee lala kɛ sɔlemɔ lɛ nɔ lɛ, ehaa wɔnaa gbɛjianɔtoo muu lɛ fɛɛ he sɛɛ, ni wɔtsɔɔ hiɛsɔɔ ni wɔyɔɔ kɛha hegbɛ ni wɔna akɛ wɔɔsɔmɔ akɛ la hiɛlɔi lɛ.

⁴ Ha Otoi Anu Wiemɔ: Lalatsɛ lɛ jaje akɛ: “Mijwɛŋɔ odasei lɛ ahe. Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ.” (Lala 119:95b, 97) Be fɛɛ be ni wɔbaabua wɔhe naa ni Yehowa atsɔɔ wɔ nii lɛ, ehe hiaa ni wɔfee toi ni wɔbo nɔ ni akɛɔ lɛ toi, jeee kɛ wɔtoii kɛkɛ: shi moŋ kɛ wɔtsuii hu. Shi enɛ he miihia waa, titri lɛ beni wɔyaa henaabuamɔi wuji tamɔ kpokpaa wulu nɔ kpee shishi lɛ. Nibii babaoo yɛ ni wɔhiŋmɛii baana ni wɔtoii hu baanu. Kwɛ bɔ ni wɔɔlaje nii babaoo wɔha kɛji wɔfite be kɛ shika babaoo kɛtee kpee lɛ, ni kɛlɛ wɔku wɔsɛɛ kɛba shia ni otii kpakpai babaoo ni kɔɔ bɔ ni wɔɔya hiɛ akɛ la hiɛlɔi lɛ he lɛ amli fioo ko pɛ wɔkaiɔ! Kɛji wɔɔna gbɛjianɔtoo muu lɛ fɛɛ he sɛɛ lɛ, no lɛ esa akɛ wɔbɔ mɔdɛŋ fɛɛ ni wɔɔnyɛ ni wɔkɛte shi wɔwo nibii ni aaagbala wɔjwɛŋmɔ. Te wɔɔfee tɛŋŋ wɔna nɔmimaa akɛ beni abaagbe kpee lɛ naa lɛ, no mli lɛ saji ni awie lɛ fɛɛ ehe shi jogbaŋŋ yɛ wɔtsui kɛ wɔjwɛŋmɔ mli?

⁵ Sane toiboo ji ŋaalee ko ni esa akɛ akase ni akɛtsu nii hu. Wiemɔ “bo toi” lɛ shishi ji “ni akɛ niiahesusumɔ jwɛŋmɔ anu wiemɔ.” Susumɔ ŋaawoi fioo nɛɛ ahe okwɛ: (1) Bɔɔ mɔdɛŋ ni ona hejɔɔmɔ kpakpa dani oshɛ he ni afeɔ kpee lɛ yɛ lɛ daa leebi. Enɛ baabi gbɛjianɔtoo kɛ weku lɛ ekomefeemɔ. Kɛji etɔ bo yɛ wɔɔ ni owɔɔɔ ekpakpa, aloo hɔmɔ miiye bo akɛni oyeko nii leebi hewɔ, aloo ohe miitswa shi akɛni ofee kplakpla kɛba hewɔ lɛ, no lɛ gbɛjianɔtoo lɛ he sɛɛ fioo pɛ obaana. (2) Okɛ miishɛɛ akpa bɔ ni abaatsu saneyitso lɛ he nii aha lɛ gbɛ. Kɛji eshwɛ otsii fioo ko ni kpee lɛ baashɛ lɛ, mɛni hewɔ ohaaa weku lɛ mlibii lɛ ateŋ mɔ fɛɛ mɔ atsɔɔ bɔ ni enuɔ la hiɛlɔ ni eji lɛ he ehaa, akɛ nyɛweku nikasemɔ lɛ fa. Beni nyɛyɔɔ kpee lɛ shishi lɛ, nyɛtia nakai gbi lɛ mli saji ni abaasusu he lɛ mli dani wiemɔ lɛ aje shishi. (3) Saamɔ ohe jogbaŋŋ bɔ ni sa, ni okɛ ohe akawo niyeli kɛ nɔ ko numɔ beni wiemɔi lɛ miiya nɔ lɛ mli. Anaa mɛi fioo komɛi yɛ kpee lɛ shishi ni amɛmiiye nii loo amɛmiinu nɔ ko loo amɛkɛ amɛhe ewo nibii krokomɛi ni kɛ gbɛjianɔtoo lɛ bɛ tsakpaa ko lɛ afeemɔ mli, beni wiemɔ lɛ diɛŋtsɛ miiyaa nɔ. Enɛ etsɔɔɔ bulɛ, ni egbalaa mɛi krokomɛi ajwɛŋmɔ, ni etsɔɔ henɔyeli hu ni abɛ.​—Kwɛmɔ November 15, 1991 Buu-Mɔɔ (Vol. 112, No. 22) baafai 8-18.

⁶ Wɔmiisumɔ ni wɔgbala wɔjwɛŋmɔ kɛba saji otii aŋmalamɔ nɔ yɛ gbɛ krɛdɛɛ nɔ. Kɛji afee lɛ jogbaŋŋ lɛ, ebaaye ebua bo ni ojwɛŋmɔ anyiɛ wielɔi lɛ asɛɛ jogbaŋŋ ni okai nɔ ni onuɔ lɛ. Akɛni wɔsusuɔ nii ahe oya kwraa fe bɔ ni wɔwieɔ hewɔ lɛ, gbɛ ni ni fe fɛɛ ni wɔɔtsɔ nɔ wɔkɛtsi wɔjwɛŋmɔ ni aaakpa shi lɛ naa ji ni wɔŋmala saji otii wɔwo woji amli beni ahaa wiemɔ lɛ. Taakɛ niŋmalɔ ko tsɔɔ lɛ, “Bei pii lɛ, wiemɔ toiboo wa kwraa fe ehamɔ.” Ekolɛ obaakai akɛ ale mra be mli Kristofoi lɛ akɛ amɛhiɛɔ shɔɔnii kukuji ni aŋmaa nii yɛ nɔ kɛyaa kpeei, ni amɛkɛ blɛgi kadiɔ ŋmalɛi yɛ nɔ. Duromɔ naa lɛ, wɔbaanyɛ wɔfee enɛ jogbaŋŋ kɛ wolo pɛmpɛoo ni akɛŋmaa nii, kɛ niŋmaa tso. Ni wɔhe aaasa yɛ saji otii aŋmalamɔ mli lɛ tsɔɔ akɛ wɔɔŋmala otii fioo bɔ ni sa ni baaha wɔmɔ sane titri ni yɔɔ mli lɛ, shi jeee babaoo tsɔ bɔ ni baaha wɔŋma nii be fɛɛ be. Enɛ baafite wɔyiŋtoo lɛ, ni eeeha otii komɛi ni he hiaa, ni wielɔ lɛ ewie he lɛ aŋmɛɛ wɔ. Ŋmalamɔ wiemɔi titrii lɛ, kɛ saji kukuji. Otii ni oŋmala lɛ ahe baaba sɛɛnamɔ aha bo waa kɛji oti mli nakai gbɛkɛ lɛ nɔŋŋ, kɛ agbɛnɛ kɛtsɔ asafo lɛ sanegbaa ni akɛbaati kpee lɛ shishi otii amli yɛ Sɔɔmɔ kpee lɛ shishi lɛ hu hiɛ.

⁷ Lala kɛ Sɔlemɔ ni Jɛ Tsuiŋ: Yehowa yijiemɔ lalai ni wɔɔla kɛ bulɛ ni wɔkɛaatsi wɔbɛŋkɛ lɛ yɛ sɔlemɔ miilɛ ji wɔ jamɔ lɛ fa. (2 Kron. 30:​21, 27) Enɛɛmɛi ji kpee lɛ he nibii komɛi ni he hiaa waa ni wɔ fɛɛ wɔbaanyɛ wɔkɛ wɔhe awo mli. Wɔbaala Yehowa yijiemɔ lalai 18, ni wɔbaafee ekome yɛ sɔlemɔi kpaanyɔ mli kɛha wɔ ŋwɛi Tsɛ lɛ yɛ gbii etɛ ni wɔkɛbaafee “La Hiɛlɔi” Kpokpaa Wulu nɔ kpee lɛ fɛɛ mli. Lɛlɛŋ, hegbɛi ni jara wa waa diɛŋtsɛ nɛ. Yehowa kɛ nɔ ni fe ŋmɛlɛtswai 12 sɔŋŋ miiha wɔ mumɔŋ tsɔsemɔ kɛ nitsɔɔmɔ. Wɔkɛ nakai minitii fioo ni ato aha lala kɛ sɔlemɔ lɛ daa Yehowa shi yɛ enikeenii babaoo ni ehaa wɔ lɛ he, ni wɔjieɔ eyi hu. Akɛni wɔbaa Yehowa hiɛ yɛ sɔlemɔ mli akɛ asafo ni ebua amɛhe naa hewɔ lɛ, ani wɔbaasumɔ ni ena wɔ akɛ hiɛjoolɔi kɛ aŋkroaŋkroi trumu-feelɔi, akɛni wɔkɛ wɔhe wooo lala kɛ sɔlemɔ lɛ mli yɛ gbɛjianɔ kpakpa ni wɔtooo lɛ hewɔ? Agbɛnɛ, woji ni akɛbaaya kpeei lɛ eko fɛɛ eko shishi afi nɛɛ hu lɛ fa saŋŋ, no hewɔ lɛ mɛi ni taraa shi kɛyashiɔ akpaa kpee lɛ anine baashɛ eko nɔ. Nakai nɔŋŋ hu esaaa ni mɔ ko teɔ shi dani akpaa kpee lɛ, kɛ jwɛŋmɔ akɛ eyaahe niyenii dani mɛi krokomɛi lɛ aba jɛmɛ.​—Mat. 7:​12; Rom. 12:​10; Fil. 2:​1-4.

⁸ Nyɛfea Nibii Fɛɛ Kɛwoa Nyɔŋmɔ Hiɛ Nyam: Daa afi lɛ akɛ mlihilɛ kaiɔ wɔ yɛ bɔ ni jeŋba kpakpa kɛ subaŋ ni sa ni wɔɔjie lɛ kpo yɛ kpee lɛ shishi lɛ he hiaa ha lɛ he. Esa akɛ wɔjie nyɛteŋ mɛi babaoo yi yɛ mɔdɛŋbɔɔ ni nyɛkɛboɔ nɛkɛ kaimɔi nɛɛ atoi lɛ hewɔ. Beni nibii agbɛjianɔtoo nɛɛ bɛŋkɛɔ enaagbee lɛ, eyaa nɔ enyɛɔ wɔnɔ ewoɔ sharamɔ ni wɔkɛ gbɔmɛi ni amɛsubaŋi tamɔ nɔ ni agba afɔ shi yɛ 2 Timoteo 3:1-5 lɛ aaashara yɛ nitsumɔ kɛ skul lɛ mli daa nɛɛ. Nɛkɛ sharamɔ ni wɔkɛ amɛ naa nɛɛ baanyɛ ana wɔnɔ hewalɛ fɔŋ kɛ wɔhaaa wɔhiɛ ahi wɔhe nɔ. Wɔsumɔɔɔ ni ebalɛ akɛ mɔ ko aaana nɔ ko nɔ edamɔ ‘ewie wɔhe akɛ efɔŋfeelɔi.’ (1 Pet. 2:12) Enɛ biɔ ni wɔha wɔhiɛ ahi wɔ Kristofoi asubaŋ lɛ nɔ fe bɔ ni wɔfeɔ daa. Esa akɛ mɔ fɛɛ mɔ hiɛ ahi ehe nɔ jogbaŋŋ yɛ ejeŋba he yɛ kpee lɛ shishi, yɛ mɛi ashiai amli, kɛ maŋ hei krokomɛi fɛɛ, tamɔ gbɔi atoohei kɛ niyeli hei nɛkɛ. Onukpai lɛ naa amɛnyɛmimɛi lɛ fɛɛ ahe miishɛɛ (Fil. 2:⁠4) Esa akɛ amɛye amɛbua, ni amɛjie mɛi krokomɛi ayi hu yɛ amɛjeŋba kpakpa lɛ hewɔ. Esa akɛ onukpai lɛ asumɔ hu akɛ amɛkɛ ŋaawoo ni jɛ suɔmɔ mli aaaha kɛji ehe miihia, kɛji ekolɛ amɛleee nakai nyɛminuu loo nyɛmiyoo lɛ pɔtɛɛ po. Esa akɛ abɔ kpee lɛ shishi Administration Office lɛ amaniɛ yɛ naagba fɛɛ naagba ni hiɛdɔɔ yɔɔ he ni akɛaakpe lɛ he.

⁹ Mɛni ehe hiaa ni wɔha ahi wɔjwɛŋmɔ mli? Kɛji aha bo wɔɔhe yɛ gbɔi atoohe lɛ, kaimɔ akɛ esa akɛ okɛ mɛi ni tsuɔ nii yɛ jɛmɛ lɛ aye kɛ woo kɛ bulɛ. Mɛi ni kwɛɔ tsu namɔ nɔ, ni ji Rooming Department lɛ etsu nii waa ni amɛkɛna tsui ni jara baa shi fe bɔ ni aheɔ lɛ. No hewɔ lɛ kɛji wɔmiitao nibii babaoo fe nine, aloo wɔshi tsu lɛ mli kpɔtɔɔ lɛ, no lɛ ekolɛ gbɔi atoohe lɛ nɔkwɛlɔi lɛ ekpɛlɛŋ akɛ amɛaahe Yehowa Odasefoi kɛha kpeei ni wɔɔfee wɔsɛɛ. Ehe miihia ni akai wɔteŋ mɛi komɛi yɛ enɛ he lolo. Mɛi fioo pɛ nyɛɔ amɛfiteɔ gbɛi kpakpai ni mɛi babaoo ena lɛ kwraa.

¹⁰ Yɛ nɔ ni kɔɔ nii ni atsu aha wɔ he nikee he lɛ, asusu enɛ he yɛ nɔ ni aŋma ahɔ November 1991 Wɔ Maŋtsɛyeli Sɔɔmɔ lɛ mli lɛ mli. (Vol. 34, No. 11) Nyɛfainɛ nyɛtia emli otii lɛ ekomɛi amli.

¹¹ Akɛ gbɔmɔ hee ni atsi ta yɛ Efesobii 4:24 lɛ toɔ atade ni mɔ nyɛɔ ewoɔ beni ejie gbɔmɔ momo lɛ kɛjɛ ehe lɛ he. Esa akɛ nɛkɛ su tsakemɔ nɛɛ aje kpo yɛ wɔ atadewoo diɛŋtsɛ hu mli. Ana akɛ nyɛmimɛi hii kɛ yei lɛ ateŋ mɛi komɛi, titri lɛ obalaŋtai lɛ woɔ atadei komɛi kɛkɛ tamɔ nɔ ni amɛnyiɛ shia, ni bei komɛi po lɛ etsɔɔɔ hiɛshikamɔ kwraa. Ani wɔsaa wɔhe nɛkɛ yɛ Maŋtsɛyeli Asa lɛ nɔ? Agbɛnɛ hu, mɛi ni abaabaptisi amɛ lɛ ateŋ mɛi komɛi woɔ T-shirt ni aŋmala jeŋbii awiemɔi kɛ kadimɔ nii komɛi ni akɛmiitswa jarayeli nibii ahe adafi yɛ mli. Esa akɛ onukpai ni kɛ mɛi ni saa amɛhe kɛhaa baptisimɔ lɛ tiɔ sanebimɔi lɛ amli lɛ akwɛ ni mɛi ni abaabaptisi amɛ lɛ anu nɔ ni abuɔ akɛ eji hesaamɔ ni sa jogbaŋŋ kɛha nakai nifeemɔ lɛ shishi jogbaŋŋ.​—Kwɛmɔ The Watchtower June 1, 1985, baafa 30, kɛ April 15, 1973, baafai 254-5.

¹² Tsɔnei ni Akɛmɔmɔɔ Wiemɔi: Eyɛ mli akɛ aŋmɛɔ video mfoniri shamɔ tsɔne gbɛ moŋ, shi wɔmiiwo mɛi ni kɛtsuɔ nii lɛ hewalɛ ni amɛsusu mɛi krokomɛi ahe, ni amɛhala nibii ni amɛmɔmɔɔ amɛwoɔ kpai anɔ lɛ mli, ni wɔjie bulɛ kpo wɔtsɔɔ mɛi ni ekolɛ amɛsumɔŋ ni asha amɛ mfoniri beni amɛyeɔ nii, loo amɛboɔ wiemɔ lɛ toi, aloo beni asɔleɔ lɛ. Esa akɛ mɔ fɛɛ mɔ ni miisha video aloo eemɔmɔ wiemɔi lɛ akwɛ koni ekagbala toibolɔi lɛ ajwɛŋmɔ loo eehao amɛ yɛ gbɛ ko nɔ. Naatsii ko bɛ wiemɔ ni mɔ ko aaata he ni eta lɛ nɔŋŋ ni emɔmɔ yɛ kpaa nɔ lɛ he. Shi be mli ni ahaa wiemɔ lɛ, ehiŋ akɛ mɔ ko baakpa shi kɛnyiɛ toibolɔi lɛ ateŋ loo toibolɔi lɛ ahiɛ, ni eemɔ wiemɔ lɛ eewo kpaa nɔ. Kɛ ebaahi lɛ, esa akɛ nyɛmimɛi ni kwɛɔ shitaramɔ nɔ lɛ awie atsɔɔ mɔ fɛɛ mɔ ni ejieee nyɛmimɛi asuɔmɔ kpo yɛ enɛ gbɛfaŋ lɛ. Nyɛfainɛ nyɛkaia akɛ akɛ mfoniri-shamɔ tsɔnei loo tsɔnei ni akɛmɔmɔɔ wiemɔi lɛ asɛɛ kpai lɛ tsaaa sarawa hewalɛ kpai loo adekai ni wiemɔi lɛ tsɔɔ mli lɛ asɛɛ kpai lɛ yɛ kpee lɛ shishi, ni nakai nɔŋŋ hu esaaa ni akɛ tsɔnei nɛɛ eko maa sɛii lɛ ateŋ loo he ni atsɔɔ kɛjeɔ kpo lɛ.

¹³ Kɛha Fɔlɔi: Wɔbaasumɔ ni wɔma bɔ ni ehe hiaa ni fɔlɔi akwɛ amɛbii lɛ anɔ jogbaŋŋ yɛ bei fɛɛ mli, kɛ amɛba kpee lɛ shishi aloo beni amɛyɔɔ hei ni amɛwɔɔ lɛ nɔ mi ekoŋŋ. (Abɛi 29:15b; Luka 2:48) Beni wiemɔ lɛ yaa nɔ lɛ, kwɛmɔ akɛ obii lɛ hu miibo toi ni amɛmiiŋmala otii lɛ yɛ amɛwoji amli. (Kwɛmɔ School Guidebook, baafa 27, kuku 12.) Kɛ akɛ leebi gbɛjianɔtoo lɛ ba naagbee lɛ, hegbɛ baa ni haa amɛkɛ amɛnanemɛi ni jɛ asafoi krokomɛi amli lɛ gbaa sane.

¹⁴ Kɛji gbekɛbii lɛ miitao amɛya niiasɛɛ lɛ, esa akɛ akwɛ ni fɔlɔ loo onukpa kroko fata amɛhe. Kɛji wɔɔfee bɔ ni ehe hiaa ni ole he ni obii lɛ yɔɔ be fɛɛ be lɛ he nɔkwɛmɔ nɔ lɛ, taxi kudɔlɔ ko ni yɔɔ maŋtiase ni afee kpee ko yɛ lɛ bɔ nyɛminuu ko amaniɛ akɛ ehole gbekɛbii yei enyɔ komɛi yɛ he ni afeɔ kpee lɛ yɛ lɛ. Eka shi faŋŋ akɛ amɛmiito gbɛjianɔ ni amɛshi kpee lɛ shishi nakai shwane lɛ fɛɛ, ni amɛkɛɛ tsɔne kudɔlɔ lɛ akɛ amɛmami leŋ he ni amɛtee aahu kɛyashi gbɛkɛ 5:00 dã. Nɛkɛ taxi kudɔlɔ nɛɛ miisusu nɔ ni aaanyɛ aba amɛnɔ lɛ he, shi amɛnyɛ diɛŋtsɛ hu? Kwɛ amanehulu ni eeeji, kɛ eeebalɛ akɛ oshara ko aaaba amɛnɔ, kɛ agbɛnɛ heguɔgbee ni enɛ kɛaaba Nyɔŋmɔ gbɛi kɛ ewebii lɛ hu anɔ!

¹⁵ Wɔhiɛ Sɔɔ bɔ ni Nyɛfiɔ Wɔsɛɛ Jogbaŋŋ Kɛmɔɔ Shi Lɛ: Te bɔ ni esa akɛ wɔteŋ mɔ fɛɛ mɔ kɛ gbɛtsɔɔmɔ ni Asafo lɛ kɛha lɛ atsu nii, ni wɔya kpee lɛ yɛ hei ni atsɔɔ akɛ wɔ asafo lɛ aya yɛ lɛ he hiaa ha tɛŋŋ? Asafo lɛ, kɛ nyɛmimɛi ni akɛ nitsumɔ ewo amɛdɛŋ yɛ maji fɛɛ ni abaafee kpeei lɛ yɛ lɛ toɔ gbɛjianɔ jogbaŋŋ ni amɛkɛsaa nibii ni he hiaa kɛhaa kpee lɛ feemɔ. Enɛ biɔ ni ana sɛii, niyenii, woji, kɛ nibii krokomɛi ni fa bɔ ni sa. Kɛji nyɛmimɛi babaoo tee kpee yɛ hei ni atsɔko amɛ akɛ amɛya yɛ lɛ, enyɛɔ ekɛ naagbai baa. Eka shi faŋŋ akɛ, mɛi fioo ko ashihilɛ baabi ni amɛya kpeei lɛ yɛ he kroko. Ekolɛ hei krokomɛi ni afeɔ kpee lɛ yɛlɛ baafee hiɛmɛɛ yɛ yiŋtoi komɛi ahewɔ, shi kɛ nyɛmimɛi lɛ ateŋ mɛi pii tee kpee lɛ yɛ hei ni amɛ diɛŋtsɛ amɛsumɔɔ lɛ, nɔ ni baajɛ mli aba lɛ baagba gbɛjianɔ ni ato lɛ naa waa.

¹⁶ Ekome ni nyɛkɛ wɔ aaafee yɛ sɛishimɔ he sane lɛ mli hu lɛ he miihia. Nyɛfainɛ nyɛkaia akɛ OBAANYƐ OSHI SƐII OHA OWEKU KƆKRƆƆ LƐ Mll BIl KƐ MƐl Nl KƐ BO BAAFA GBƐ YƐ BO DIƐŊTSƐ OTSƆNE MLI LƐ PƐ. Wɔtaoŋ nɔ ni baahi aha wɔ diɛŋtsɛ pɛ kɛkɛ, shi moŋ suɔmɔ baatsirɛ wɔ ni wɔna wɔha mɔ kroko lɛ hu. No hewɔ lɛ, yɛ sɛii agbɛfaŋ lɛ, wɔshiŋ sɛii ni hi fe fɛɛ lɛ wɔnaŋ wɔ diɛŋtsɛ wɔhe kɛ wɔweku lɛ mli bii ni ekolɛ amɛbɛ jɛmɛ yɛ nakai beaŋ lɛ kɛkɛ. Wɔbaasumɔ ni wɔna akɛ mɛi krokomɛi hu ena hei amɛtara, ni amɛhe ejɔ amɛ, titri lɛ mɛi ni edara kɛ mɛi ni bɛ gbɔmɔtsoŋ hewalɛ lɛ, ni amɛnine ashɛ mumɔŋ nibii ni ajɛɔ kpoku lɛ nɔ akɛhaa wɔ lɛ nɔ.​—1 Kor. 10:24: 3 Mose 19:⁠32.

¹⁷ Wɔmiiwo ŋaa akɛ wɔkɛ wɔ diɛŋtsɛ wɔhe nibii fioo ko pɛ aba kpee lɛ shishi. Kɛ nɛkɛ nibii nɛɛ eko eyaŋ osɛi lɛ shishi lɛ, no lɛ ebaahi akɛ oshi yɛ shia. Asumɔŋ ni akɛ nu tɔi agboi amamɔ hei ni atsɔɔ yɛ sɛii lɛ ateŋ lɛ, yɛ shweshweeshwe feemɔ hewɔ, ni kɛ okɛma sɛi ni ma omasɛi lɛ nɔ hu lɛ, ekolɛ ohaŋ mɔ ko ana sɛi ni eta nɔ.

¹⁸ Niyenii he Gbɛjianɔtoo: Taakɛ atsi ta yɛ nɔ ni aŋma ahɔ June 1988 Wɔ Maŋtsɛyeli Sɔɔmɔ lɛ mli lɛ, Asafo lɛ efee niyenii he gbɛjianɔtoo lɛ mlɛo yɛ kpokpai wuji anɔ kpeei ashishi kɛtsɔ jiemɔ ni ajie niyenii komɛi ni asumɔɔ waa, shi amɛhoomɔ wa ni eheɔ be babaoo hu lɛ kɛjɛ mli lɛ nɔ. Enɛ haa wɔnyɛmimɛi hii kɛ yei ni tsuɔ nii yɛ nihoomɔ he lɛ ateŋ mɛi babaoo nyɛɔ amɛbafataa wɔhe yɛ toibolɔi lɛ ateŋ ni mumɔŋ niyenii ni akɛhaa wɔlɛ he baa sɛɛnamɔ kɛhaa amɛ hu. Wɔhiɛ sɔɔ mɛi ni jɛɔ amɛsuɔmɔ mli amɛkɛ amɛhe haa kɛsɔmɔɔ yɛ kpokpai wuji anɔ kpeei ashishi lɛ waa diɛŋtsɛ. Gbɛjianɔtoo ni haa wɔfeɔ nibii fɛɛ mlɛo lɛ haa amɛnitsumɔ lɛ baa shi, ni efeɔ oya hu ni mɔ fɛɛ mɔ naa he sɛɛ!

¹⁹ Mɛi fɛɛ ni baaya kpee lɛ baana akɛ niyenii ni abaahoo yɛ jɛmɛ lɛ ji niyenii kpakpa ni hewalɛ hu yɔɔ mli, ni wɔbaana niyenii sɔrɔtoi wɔye yɛ gbii etɛ lɛ fɛɛ mli. Aje gbɛ abɔ mɔdɛŋ waa ni ahe niyenii kpakpa kɛha kpee lɛ. No hewɔ lɛ kɛ wɔhe niyenii ni wɔnine baashɛ nɔ kɛtsɔ Food Service Department lɛ nɔ lɛ, ebaaha wɔfi kpee lɛ he gbɛjianɔtoo lɛ sɛɛ.

²⁰ Tooyeli: Yehowa webii ahiɛ sɔɔ hegbɛ ni amɛnaa ni amɛkɛkpeɔ kutuu yɛ hei kpakpai bɔni afee ni amɛna mumɔŋ gbɛjianɔtoo ni asaa ato amɛ lɛ ahe sɛɛ lɛ waa diɛŋtsɛ. Wɔhiɛ sɔɔ mɛi ni sɔmɔɔ lɛ kɛ nibii krokomɛi ni wɔnaa mli ŋɔɔmɔ yɛ nɛkɛ henaabuamɔi nɛɛ ashishi lɛ hu waa. Asafo lɛ kɛ be kɛ shika babaoo tsuɔ nii, ni akɛtoɔ sɛii ni fa bɔ ni sa ahe gbɛjianɔ, ni akɛsaa tsɔnei ni hi jogbaŋŋ ni awieɔ awoɔ mli, ni akɛtoɔ niyenii kpakpa he gbɛjianɔ, ni akɛtsuɔ nibii krokomɛi ni haa kpee lɛ yaa feɔ nɔ ni wɔnaa he miishɛɛ kɛ nɔ ni haa wɔ hejɔlɛ yɛ mumɔŋ lɛ ahe nii.

²¹ Ŋwanejee ko bɛ he akɛ, esa akɛ nɛkɛ nibii babaoo ni wɔnaa yɛ Nyɔŋmɔ gbɛjianɔtoo lɛ mli nɛɛ akanya wɔ ni wɔkɛ shidaa atsɔɔ wɔ hiɛsɔɔ kɛtsɔ shika ni wɔkɛaake kɛ tooyelii krokomɛi ni wɔkɛaafɔ̃ kpee lɛ sɛɛ lɛ nɔ. Kɛji oha yɛ miishɛɛ mli, ni oha babaoo hu kɛfi anɔkwa jamɔ sɛɛ lɛ, obaana miishɛɛ babaoo.​—2 Kor. 9:7; Abɛi 3:​9, 10.

²² Yaa “La Hiɛlɔi” Kpokpaa Wulu nɔ kpee Iɛ Eko: Kɛ wɔtee “La Hiɛlɔi” Kpokpaa Wulu nɔ kpee lɛ eko lɛ, wɔbaana miishɛɛ waa akɛ wɔɔnu nɔ hewɔ ni la hiɛlɔi ni wɔji lɛ ji woo kɛ hegbɛ kpele lɛ. Abaakai wɔ hu akɛ eji gbɛnaa nii ni hiɛdɔɔ yɔɔ he. Kɛ wɔbo nibii ni wɔbaanu yɛ kpee lɛ shishi lɛ toi jogbaŋŋ fe bo ni wɔfɔɔ feemɔ daa lɛ, wɔbaaya wɔhiɛ yɛ wɔhesaa kɛ hiɛsɔɔ ni wɔyɔɔ kɛha wɔ nitsumɔ akɛ la hiɛlɔ lɛ mli. Too ogbɛjianɔ bianɛ ni ohi jɛmɔ yɛ bei sɔrɔtoi lɛ fɛɛ mli, kɛjɛ lala ni akɛbaagbele kpee lɛ yɛ Sohaa lɛ nɔ aahu kɛyashi naagbee sɔlemɔ ni akɛbaakpa yɛ Hɔgbaa shwane lɛ.

[Box on page 6]

Kpokpaa Wulu Nɔ Kpee He Kaimɔ

Tsũ he Gbɛjianɔtoo: Nyɛfainɛ nyɛkɛ Rooming Department ni yɔɔ kpee lɛ shishi lɛ afea ekome kɛtsɔ he ni aha bo lɛ hilɛ nɔ. Kɛ wɔfee nakai lɛ ehaaa wɔyi afa tsɔ ni ekɛ naagbai hu baaa hei krokomɛi ni wɔsusuɔ akɛ jɛmɛ hi waa lɛ. Bɔɔ mɔdɛŋ ni oshɛ kpee lɛ shishi mra koni anyɛ atsɔɔ bo he ni obaahi lɛ mra. Jiemɔ hiɛsɔɔ kpo yɛ oshiatsɛ lɛ gbɔfeemɔ lɛ he, ni okai ni oha ojeŋba afee odaseyeli (1 Pet. 2:​12; 1 Cor. 4:9b; Kol. 3:15) Ha he ni aha bo lɛ afee falefale jogbaŋŋ. Taakɛ wɔtsi ta da lɛ, eyɛ mli akɛ atsɔɔ akɛ aheee shika yɛ wɔɔhe lɛ he moŋ, shi Asafo lɛ hiɛ sɔɔ kpeeyalɔi ni jɛɔ niiahesusumɔ mli amɛkɛ shika yelikɛbuamɔ haa yɛ kpee lɛ shishi kɛha amɛwɔɔhei lɛ waa.

TAMALE KPEE LƐ: Kɛji oŋma ogbɛi akɛ obaaya Tamale kpee lɛ, no lɛ wɔhiɛ ka nɔ akɛ kɛbashi amrɔ nɛɛ, oto gbɛjianɔ kɛha owɔɔhe momo, ekolɛ kɛtsɔ kpee lɛ Rooming Department lɛ nɔ loo bo diɛŋtsɛ. Wɔmiisumɔ ni wɔwo mɛi fɛɛ ni baaya Tamale lɛ hewalɛ ni kɛ hoo lɛ amɛto ŋmɛlɛtswaa kome daa gbi, ni kɛ ebaahi lɛ, amɛkɛ amɛhe awo shiɛmɔ mli beni amɛyɔɔ Tamale lɛ. Kooyigbɛ bii lɛ naaa odaseyeli babaoo tamɔ Wuoyigbɛ bii lɛ naa lɛ. No hewɔ lɛ, gbɛɛ sanekpakpa lɛ oshwa, beni oyɔɔ jɛmɛ lɛ! Okɛ leebi maaŋkpa kɛ gbɛkɛnaashi awo shiɛmɔ nitsumɔ lɛ mli. Tswaa ofai shi akɛ obaafee nakai! Ebaaha ona gbɛfaa lɛ he miishɛɛ waa, ni ebaaha ona Yehowa dɛŋ jɔɔmɔi babaoo hũ.

Baptisimɔ: Esa akɛ mɛi ni abaabaptisi amɛ lɛ fɛɛ atara shi yɛ he ni abaatsɔɔ amɛ lɛ dani wiemɔ lɛ aje shishi Hɔɔ leebi Esa akɛ mɛi fɛɛ ni toɔ gbɛjianɔ ni abaptisi amɛ lɛ kɛ atade ni sa ni akɛbaabote nu mli kɛ papam aba. Kɛ wielɔ lɛ ha baptisimɔ wiemɔ lɛ egbe naa ni asɔle lɛ, leebi kpee lɛ sɛinɔtalɔ lɛ kɛ gbɛtsɔɔmɔi fioo ko baaha mɛi ni abaabaptisi amɛ lɛ ni no sɛɛ lɛ ebaatsɛ lala ni abaala. Kɛ agbe naagbee kuku lɛ lamɔ naa lɛ, nyɛmimɛi ni kwɛɔ shitaramɔ nɔ lɛ baatsɔɔ mɛi ni abaabaptisi amɛ lɛ agbɛ kɛya he ni abaamii amɛ nu yɛ lɛ loo tsɔnei ni kɛ amɛ baaya jɛmɛ lɛ ahe. Akɛni baptisimɔ ni feɔ mɔ ko henɔjɔɔmɔ he okadi lɛ ji teemɔŋ sane ni ka mɔ lɛ diɛŋtsɛ pɛ kɛ Yehowa teŋ hewɔ lɛ, atoko gbɛjianɔ ko ahako nɔ ni afɔɔ lɛ tsɛmɔ akɛ hefatalɔi abaptisimɔ ni mɛi enyɔ loo mɛi ni fa lɛ nakai fuaa amɛhe loo amɛhiɛɔ amɛniji amli yɛ be mli ni abaptisiɔ amɛ lɛ.

Volunteer loo kpee Shishi Nitsumɔ: Mɛi ni kɛ amɛhe baaha kɛha nitsumɔ he miihia bɔni alee ni kpokpaa wulu nɔ kpee lɛ anyɛ aya nɔ pɛpɛɛpɛ. Kɛ be ni afeɔ kpee lɛ mli be fioo ko pɛ obaanyɛ okɛtsu nii po lɛ, wɔhiɛ baasɔ nii ni obaatsu lɛ waa diɛŋtsɛ. Kɛ obaanyɛ oye obua lɛ, no lɛ ofainɛ yaa Volunteer Service Department loo mɛi ni kwɛɔ mɛi ni baatsu nii lɛ anɔ lɛ aŋɔɔ kɛji oyashɛ kpee lɛ shishi. Gbekɛbii ni yeko afi 16 lɛ hu baanyɛ aye abua ni kpee lɛ aye omanye, shi aabi ni amɛkɛ amɛfɔlɔi loo onukpai krokomɛi ni baakwɛ amɛnɔ atsu nii.

Gbɛgbamɔ Kadimɔ Wolo: Ehe baahia ni daa gbɛgbalɔ kɛ gbɛgbalɔi krɛdɛɛi kɛ agbɛnɛ nɔkwɛlɔi gbɛfalɔi kɛ Betel weku lɛ mli bii fɛɛ kɛ amɛ Pioneer Service Identification (S-202) wolo lɛ aba kpee lɛ. Ja gbɛgbalɔi lɛ kɛ amɛ Pioneer Service Identification wolo lɛ etsɔɔ yɛ woji ahɔɔmɔ he lɛ dani amɛnine baanyɛ ashɛ woji ni abaajie lɛ kpo ni abaake amɛ, aloo nɔ ni amɛ diɛŋtsɛ amɛtaoɔ amɛhe kɛ gbɛgbalɔi ajara lɛ anɔ. Abaaha gbɛgbalɔi ni beni baashɛ kpee ni amɛbaaya lɛ nɔ lɛ, no mli lɛ amɛna nyɔji ekpaa loo nɔ ni fe nakai lɛ niyeli tikiti yɛ kpee lɛ shishi, kɛ amɛkɛ amɛ gbɛgbalɔi akadimɔ wolo lɛ tsɔɔ yɛ nakai kpee kome lɛ pɛ shishi. Aŋmɛɛɛ gbɛ ni gbɛgbalɔi ahɔɔ nɛkɛ kpee shishi tikiti nɛɛ. Esa akɛ amɛkɛ tikiti ni baashwɛ lɛ aku sɛɛ aha Audit Department loo shika he akɔntaabulɔi lɛ kɛ agbe kpee lɛ naa.

Tsitsinaa-tsɛɛ Nii: Ofainɛ tsɛɛ tsitsinaa-tsɛɛ nii ni aje gbɛ afee kɛha kpee lɛ yɛ kpee shishi, kɛ agbɛnɛ beni oyaa loo ojɛɔ he ni afeɔ kpee lɛ yɛ lɛ. Bei pii lɛ ehaa wɔnyɛɔ wɔyeɔ odase beni wɔfaa gbɛ lɛ. Esa akɛ ohe tsitsinaa-tsɛɛ nii lɛ yɛ osafo lɛ mli, ejaakɛ akɛ eko baŋ kpeei lɛ ashishi.

Ŋaawoo Wiemɔ ko Nɛ: He fɛɛ he ni okɛ otsɔne baama lɛ, esa akɛ oŋmɛ mli be fɛɛ be ni esaaa ni oshiɔ nɔ ko yɛ mli ni aana kɔkɔɔkɔ. Kɛ ebaahi lɛ, okɛ onibii lɛ awo tsɔne lɛ sɛɛ ni oŋmɛ mli. Agbɛnɛ hu kwɛmɔ ohe nɔ jogbaŋŋ yɛ julɔi kɛ mɛi ni sharaa nii kɛjɛɔ mɛi akotokui amli, ni amɛsumɔɔ henaabuamɔi ni tamɔ nɛkɛ lɛ ahe. Enɛ hu biɔ ni wɔkashi nɔ ko ni jara wa yɛ sɛii lɛ anɔ yɛ kpee lɛ shishi ni mɔ ko kwɛɛɛ nɔ. Wɔnu amaniɛbɔi fioo komɛi hu ni tsɔɔ akɛ gbɔmɛi fɔji komɛi kaa akɛ amɛaalaka gbekɛbii bibii lɛ kɛjɛ hei ni afeɔ kpee lɛ yɛ lɛ. Nyɛfainɛ nyɛkwɛa nyɛhe nɔ jogbaŋŋ.

Abɔ amaniɛ akɛ gbɔi atoohei lɛ ekomɛi jieɔ televishin nɔ sinii ni maa jeŋba shara nɔ mi kɛ hii kɛ yei ni ejie amɛhe efoji amɛtsɔɔ. Enɛ maa bɔ ni ehe hiaa ni akwɛ ni atsi gbekɛbii a-TV kwɛmɔ ni akwɛɛɛ amɛnɔ lɛ naa yɛ nɛkɛ wɔɔhei nɛɛ lɛ nɔ mi.