Bɔ ni Ehe Hiaa ni Adesai Atao Nyɔŋmɔ Sɛɛ Gbɛ
1 Gbɔmɛi babaoo efa kɛjɛ hei ni amɛyɔɔ lɛ kɛtee hei krokomɛi, yɛ afii ohai 20 nɛɛ mli, yɛ tai, nɔnyɛɛ, kɛ shika gbɛfaŋ naagbai ahewɔ. Ni akɛni gbɛfaa kɛ gbɛi ni atsɔɔ nɔ akɛ mɛi krokomɛi sharaa lɛ etee oya hewɔ lɛ, ehaa je lɛ feɔ tamɔ nɔ ni eefee bibioo. Enɛ eha jamɔ kui sɔrɔtoi babaoo ebɛŋkɛ amɛhe kpaakpa. Enɛ hewɔ lɛ afɔɔ jamɔ he wiemɔ akɛ esaa gbɔmɛi ashihilɛ he yɛ he fɛɛ he.
2 Enɛ esa wɔ shiɛmɔ nitsumɔ lɛ hu he. Efɔɔɔ kaa dɔŋŋ akɛ wɔkɛ mɛi baakpe ni amɛaakɛɛ akɛ amɛyɛ jamɔ ko mli ni wɔnuko nakai jamɔ lɛ he kwraa da.
3 Aha wɔ Mankind’s Search for God wolo lɛ, bɔni afee ni eye ebua wɔ ni wɔna jamɔi krokomɛi kɛ amɛshishijee he yinɔsane he shishinumɔ ni mli tse jogbaŋŋ. Ehaa saji ni abiɔ yɛ je lɛŋ jamɔi wuji lɛ ahemɔkɛyelii titrii lɛ ahe lɛ ohai abɔ hetoo. Wɔkɛ nɛkɛ wolo nɛɛ baatsu nii yɛ wɔsɔɔmɔ nitsumɔ lɛ mli yɛ July nyɔŋ lɛ mli. Mɛɛ saji ni jɛ yelikɛbuamɔ nɔ̃ ni he yɔɔ sɛɛnamɔ nɛɛ mli wɔbaanyɛ wɔmamɔ nɔ mi ni wɔkɛwo anɔkwafoi lɛ hewalɛ ni amɛkase Nyɔŋmɔ he nii babaoo?
4 Sanebimɔ titri ko ni atsu he nii yɛ wolo lɛ mli fɛɛ ji: Ani gbɔmɔ yɛ susuma ni gbooo ni hiɔ shi yɛ egbele sɛɛ ni etsaa nɔ kɛyaa wala sɛɛ shihilɛ ko mli? Shwɛ fioo kulɛ jamɔi lɛ fɛɛ tsɔɔ nakai tsɔɔmɔ lɛ, yɛ gbɛ kome loo gbɛi sɔrɔtoi anɔ. Sanebimɔi krokomɛi ni asusu he yɛ wolo lɛ mli hu ji: Ani he ko yɛ ni ji hɛl ni awaa susumai ayi yɛ jɛmɛ? Mɛni ji anɔkwa hiɛnɔkamɔ ni yɔɔ kɛha gbohii lɛ? Ani Nyɔmɔ kome pɛ yɔɔ, aloo nyɔŋmɔi babaoo yɛ? Abaanyɛ agbala jwɛŋmɔ kɛya sanebimɔi ni yɔɔ wolo lɛ baafai 17-18 lɛ nɔ. Ni kɛji okɛ mɔ ni heee eyeee akɛ Nyɔŋmɔ yɛ aloo mɔ ni kɛɛ anyɛŋ ale akɛ eyɛ miigba sane lɛ, sanebimɔi 4 kɛ 5 baanyɛ agbala ejwɛŋmɔ ni ekolɛ eeeha sɛɛnamɔ aba nyɛsanegbaa lɛ he.
5 Ehe miihia ni adesai fɛɛ atao Nyɔŋmɔ sɛɛ gbɛ ni amɛtao ehiɛ duromɔ hu bianɛ. Nibii ni yaa nɔ yɛ je lɛŋ lɛ tsɔɔ akɛ Harmagedon miiba oya kɛ foi. Eji be kɛha nitsumɔ kɛ ekaa. Mɛɛ hegbɛ wɔna nɛkɛ akɛ wɔɔwo mɛi krokomɛi hewalɛ ni amɛtao Yehowa sɛɛ gbɛ amrɔ nɛɛ ni abaanyɛ ana lɛ lɛ! (Yes. 55:6, 7) Mɛɛ gbɛ nɔ Mankind’s Search for God wolo lɛ yeɔ ebuaa gbɔmɛi yɛ Nyɔŋmɔ sɛɛ gbɛ ni amɛtaoɔ lɛ mli yɛ? Ekɛ saji ni hɛleɔ mɔ jwɛŋmɔ shi haa, kɛha gbɔmɛi ni jɛ hei sɔrɔtoi fɛɛ. Akɛ nɔkwɛmɔ nɔ lɛ, kuku 26 yɛ baafa 297 lɛ gbalaa mli etsɔɔ Muslimbii akɛ anɔkwa Kristojamɔ etsɔɔɔ Triniti tsɔɔmɔ lɛ. Ekolɛ yitso bibioo ni yɔɔ baafa 295, ni ji ‘Nyɔŋmɔ Ji Ofe, Jeee Yesu’ lɛ baanyɛ atee Muslimbii amiishɛɛ shi kɛji amɛna sɔrɔto-feemɔ ni yɔɔ Kristendom tsɔɔmɔi lɛ kɛ anɔkwa Kristojamɔ tsɔɔmɔi amli lɛ.
6 Wɔyɛ nɔ fɛɛ nɔ ni wɔɔnyɛ wɔdamɔ nɔ wɔkɛ wolo nɛɛ aha kɛ ekaa. Kɛji wɔle emli saji jogbaŋŋ lɛ, no lɛ wɔbaatao hegbɛi ni wɔkɛtee gbɔmɛi anɔkwafoi ni jɛ jamɔi sɔrɔtoi babaoo amli lɛ fɛɛ amiishɛɛ shi. Eba akɛ wɔɔjie ekaa kpo yɛ nɛkɛ sɔɔmɔ nɛɛ he.
7 Yehowa ji Nyɔŋmɔ durolɔ kɛ mɔbɔnalɔ. Kwɛ bɔ ni ekɛ mlihilɛ fɔɔ nine ni gbɔmɛi akase ehe nii! Ekolɛ mɛi babaoo yɛ lolo ni baatsɔmɔ Yehowa yijielɔi. Yɛ July mli lɛ, wɔbaanyɛ wɔye wɔbua mɛi ni yɔɔ Kristendom lɛ ateŋ mɛi babaoo, kɛ agbɛnɛ mɛi ni jɛɛɛ Kristojamɔ shihilɛi amli kɛ mɛi ni jaaa Nyɔŋmɔ kwraa lɛ hu ni amɛbɔi Yehowa jamɔ, “yɛ mumɔ kɛ anɔkwale mli, kɛtsɔ Mankind’s Search for God wolo lɛ yelikɛbuamɔ nɔ.” (Yoh. 4:23, 24) Eba akɛ wɔɔmia wɔhiɛ ni wɔtao mɛi ni taoɔ anɔkwale lɛ sɛɛ gbɛ lɛ ni wɔha amɛkɛ anɔkwa Nyɔŋmɔ lɛ teŋ wekukpaa lɛ mli awa. Abaanyɛ ana lɛ!