Wo Mumɔŋ Otii Asɛɛtiumɔ He Hewalɛ
1 Obalaŋtai babaoo kɛ amɛhe woko Maŋtsɛyeli lɛ he sanekpakpa lɛ shiɛmɔ mli waa tamɔ nɛkɛ da! Amɛteŋ mɛi akpei nyɔŋmai abo miibo ŋaawoo ni yɔɔ Jajelɔ 12:1 lɛ toi jogbaŋŋ diɛŋtsɛ, akɛ: “Asaŋ kaimɔ o-Bɔlɔ lɛ yɛ obalahiaŋ gbii lɛ amli.” Mɛni tsirɛɔ nɛkɛ obalaŋtai nɛɛ ni amɛnaa sɔɔmɔ nitsumɔ lɛ mli gbɛfaŋnɔ daa lɛ, ni mɛni hewɔ amɛteŋ mɛi pii kɛ amɛhe woɔ gbɛgbamɔ sɔɔmɔ lɛ mli lɛ?
2 Ŋwanejee ko bɛ he akɛ amɛteŋ mɛi pii ekɔ obalanyo Timoteo ni fee nɔkwɛmɔ nɔ fɛfɛo lɛ jeŋba. Enyɛ kɛ enaa ha ena mumɔŋ tsɔsemɔ ni amɛkɛha lɛ kɛjɛ egbekɛbiiashi lɛ he sɛɛ, ni amɛwo lɛ hewalɛ ni etiu mumɔŋ otii asɛɛ. (2 Tim 3:14,15) Enɛ hewɔ lɛ, beni hegbɛ ba kɛha mɔmɔ hegbɛi pii namɔ lɛ, no mli lɛ, ehe esa ni efee klalo momo.—Bɔf. 16:1-3.
3 Mɛɛ gbɛ nɔ aaatsɔ awo obalaŋtai babaoo hewalɛ ni amɛtiu mumɔŋ otii asɛɛ yɛ? Mɛɛ shishitoo esa akɛ atswa ama shi? Te fɔlɔi aaafee tɛŋŋ amɛtswa anɔkwale lɛ he hiɛsɔɔ amɛwo amɛbii amli, ni amɛyɛ amɛbua amɛ ni amɛkɛ otii ni sɛɛ tsɛɔ amamɔ amɛhiɛ hu?
4 Tswaa Mumɔŋ Shishitoo Oma Shi: Esa akɛ fɔlɔi ana nɔmimaa akɛ nɔ ni amɛtsɔɔ amɛbii lɛ jɛ Yehowa ŋɔɔ, bɔni afee ni eha amɛbii lɛ atsɔmɔ ‘mɛi ni le nii ni atsɔɔ nɔ kɛyaa yiwalaheremɔ mli.’ (2 Tim. 3:15) Bɔɔ mɔdɛŋ waa ni oba amɛna suɔmɔ ni mli kwɔ amɛba Nyɔŋmɔ Wiemɔ, ni ji Biblia lɛ. Enɛ biɔ Biblia kasemɔ daa ni shishinumɔ yɔɔ he, ni ato he gbɛjianɔ kɛha amɛhiamɔ nii, kɛ agbɛnɛ kpeeiyaa daa hu. Kɛji obalaŋtai aaana hemɔkɛyeli ni mli wa ni baakanya amɛ ni amɛnu mumɔŋ otii asɛɛ lɛ, no lɛ esa akɛ amɛna amɛ diɛŋtsɛ hu amɛteemɔŋ nikasemɔ he gbɛjianɔtoo, ni amɛkɛtswa amɛ diɛŋtsɛ amɛkɛ Yehowa tɛŋ wekukpaa amɛma shi.—1 Tes. 5:21; Heb. 11:1.
5 Kɛji obalaŋtai Kristofoi lɛ afɔlɔi kɛ mɛi krokomɛi ni edara yɛ afi amli ni yɔɔ asafo lɛ mli lɛ fee nɔkwɛmɔ nɔ kpakpa ni amɛjie “Yehowa he nyamɔ lɛ” kpo lɛ, ebaaha amɛfee klalo akɛ amɛaatiu mumɔŋ otii asɛɛ oya. (Neh. 8:10) Kɛji wɔjie miishɛɛ kpo lɛ, wɔ tɛɛ wɔbaanyɛ wɔye wɔbua obalaŋtai lɛ ni amɛna akɛ anɔkwa Kristofoi ataomɔ nii jeee jatsu ko kwraa ni tsii.—1 Yoh. 5:3.
6 Gbɛgbalɔi, maŋsɛɛ sanekpakpa shiɛlɔi, kɛ nɔkwɛlɔi gbɛfalɔi ni kɛ obalaŋtai tsu nii yɛ sɔɔmɔ nitsumɔ lɛ mli, aloo amɛkɛ amɛ na sanegbaa ni hewalɛwoo yɔɔ mli lɛ ena amɛnɔ hewalɛ waa diɛŋtsɛ. Fɔlɔi lɛ hu baanyɛ amɛyɛ amɛbua kɛtsɔ be-fɛɛ sɔɔlɔi ni feɔ nɔkwɛmɔ nɔ kpakpa ni amɛaafɔ amɛ nine kɛba amɛshia kɛha niyeli, aloo yɛ bei krokomɛi amli kɛha Kristofoi anaanyobɔɔ lɛ nɔ. Yesu Kristo fee be ni ŋmɛɔ pɛpɛɛpɛ ni anaa ahaa gbekɛbii lɛ he nɔkwɛmɔ nɔ kpakpa fe fɛɛ.—Mar. 10:13-16.
7 Otii ni Akɛaamamɔ Hiɛ: Bei pii lɛ, kɛji gbekɛbii na gbɛtsɔɔmɔ kpakpa kɛjɛ amɛfɔlɔi aŋɔɔ lɛ, ehaa amɛkɛ mumɔŋ otii mamɔɔ shi haa amɛhe mra yɛ amɛshihilɛ mli. Ni kɛji obalaŋtai lɛ kpɛ amɛyiŋ yɛ mumɔŋ oti kpakpa ni amɛsumɔɔ ni amɛahɛ he lɛ he lɛ, kɛji gbɛgbamɔ sɔɔmɔ jio, mɔmɔ yɛ he ni hiamɔ yɔɔ, aloo Betel, loo maŋsɛɛ sanekpakpa sɔɔmɔ, kɛ gbɛi krokomɛi anɔ jio, fɔlɔi kɛ mɛi krokomɛi ni amɛdara saŋŋ lɛ baanyɛ amɛkɛ miishɛɛ awo amɛ hewalɛ ni amɛya nɔ amɛmia amɛhiɛ kɛshɛ nakai oti lɛ he, ni amɛha amɛ nɔkwɛmɔ nii diɛŋtsɛ ni baanyɛ awo amɛ hewalɛ ni amɛya hiɛ kɛyashɛ he.
8 Asafo fɛɛ asafo tamɔ weku. No hewɔ lɛ esa akɛ wɔteŋ mɔ fɛɛ mɔ ana he miishɛɛ akɛ wɔɔye wɔbua obalaŋtai lɛ ni amɛya nɔ amɛnyiɛ yɛ anɔkwale lɛ mli, ni amɛya amɛhiɛ yɛ mumɔŋ. Ni wɔbaanyɛ wɔfee enɛ kɛtsɔ suɔmɔ ni wɔyɔɔ wɔhaa amɛ lɛ nɔmimaa kɛ amɛ hewalɛwoo nɔ, koni amɛtiu mumɔŋ otii asɛɛ.