Sɛɛkuu Kɛ Yiŋtoo Akɛ Aaaje Biblia Kasemɔ Shishi
1 Kɛji wɔna mɔ ko ni yɔɔ wiemɔ lɛ he miishɛɛ klɛŋklɛŋ kwraa lɛ, ehe hiaa ni wɔtsu nii kɛmɔ shi ni wɔha miishɛɛ nɛɛ ahi shi daa. Sɛɛsaramɔ feemɔ baanyɛ atsa nɔ tɛɛ kɛya Biblia mli sanegbaai kɛ Biblia mli nikasemɔi ni hereɔ mɔ yiwala feemɔ mli. Susumɔ nɛkɛ ŋaawoi kɛha sɛɛsaramɔ ni mɔɔ shi nɛɛ ahe okwɛ.
Kɛji otee eŋɔɔ klɛŋklɛŋ ni ooshi jɛmɛ lɛ, obaanyɛ oto gbɛjianɔ kɛha sɛɛsaramɔ kɛtsɔ sanebimɔ nɛɛ nɔ, akɛ:
◼ “Ani osusu nɔ hewɔ ni jamɔi efa babaoo diɛŋtsɛ lɛ he da?” Kɛ otee jɛmɛ ekoŋŋ lɛ, obaanyɛ okɛɛ akɛ: “Nyɛsɛɛ ni miba biɛ lɛ, wɔbi sane ko yɛ nɔ hewɔ ni jamɔi efa babaoo diɛŋtsɛ lɛ he. Yiŋtoi babaoo diɛŋtsɛ yɛ kɛha enɛ. Masumɔ ni makane nɔ ko ni yɔɔ miishɛɛ ni mina beni misusuɔ nɛkɛ sane nɛɛ he lɛ matsɔɔ bo.” Gbelemɔ Reasoning wolo lɛ baafa 322 ni okane sane ni yɔɔ yitso bibioo ni ji ‘Mɛni hewɔ jamɔi efa babaoo nɛkɛ?’ lɛ shishi lɛ.
2 Ani abaanyɛ ana Nyɔŋmɔ yɛ jamɔi fɛɛ amli? Kɛji Nyɔŋmɔ baahi jamɔ ko mli lɛ, no lɛ esa akɛ ewo yibii ni ja.
Kɛji obaaje sɛɛsaramɔ shishi lɛ, obaanyɛ obi akɛ:
◼ “Te esa akɛ jamɔ asa mɔ ko jeŋba he aha tɛŋŋ? Nɔ ni Yesu Kristo wie yɛ Mateo 7:17-20 lɛ kɛ gbɛtsɔɔmɔi ni akpaa gbɛ akɛ anɔkwa jamɔ baanyiɛ sɛɛ lɛ haa wɔ.” Kanemɔ ŋmalɛ lɛ tɛɛ kɛjɛ kuku 19 lɛ naagbee, yɛ Mankind’s Search for God wolo lɛ baafa 12. No sɛɛ lɛ, bi shiatsɛ lɛ nɔ ni enaa yɛ mfoniri ni yɔɔ baafa 13 lɛ mli. “Eyɛ mli akɛ mɛi akpekpei abɔ kɛɔ akɛ amɛheɔ Nyɔŋmɔ nɔ amɛyeɔ moŋ, shi mɛi pii kɛ amɛnitsumɔi kpooɔ lɛ.” No sɛɛ lɛ, kanemɔ kuku 20 lɛ mli klɛŋklɛŋ wiemɔi muji enyɔ lɛ. “Nɛkɛ yiwalɛ nifeemɔi nɛɛ haa ayoɔ jamɔi ni enyiɛɛɛ gbɛtsɔɔmɔ ni Kristo kɛha akɛ wɔsumɔsumɔɔ wɔhe, kɛ wɔhenyɛlɔi tete po lɛ sɛɛ lɛ. Wɔsɛɛ kɛji miba ekoŋŋ lɛ, ekolɛ wɔbaagba nɔ ni esa akɛ jamɔ ko afee, kɛji eewo yibii kpakpai lɛ he sane.”
3 Mɛni yɔɔ wɔsɛɛ he kɛha mɛi ni taoɔ anɔkwa Nyɔŋmɔ lɛ sɛɛ gbɛ lɛ? Ekolɛ nɛkɛ sanebimɔ nɛɛ he susumɔ tɛɛ kɛmiijɛ Mankind’s Search for God wolo lɛ mli baanyɛ atsa nɔ ni etsɔ Biblia mli nikasemɔ.
Kɛji obaaje sanegbaa lɛ shishi lɛ, obaanyɛ okɛɛ akɛ:
◼ “Yɛ bɔ ni shika saji efee bianɛ lɛ hewɔ lɛ, mɛi pii susuuu akɛ amɛbaanyɛ amɛkpa wɔsɛɛ be kpakpa ko gbɛ. Shi mina akɛ bɔ ni Biblia lɛ wieɔ wɔsɛɛ be he ehaa lɛ woɔ mɔ hewalɛ waa. Ha magba bo Nyɔŋmɔ shiwoo ni yɔɔ Yesaia 65:21, 22, 25 lɛ he sane. [Kanemɔ ŋmalɛ lɛ ni owie he kuku.] Mankind’s Search for God wolo lɛ haa sanebimɔi komɛi ni mɔɔ mɔ jwɛŋmɔ, ni kɔɔ enɛ he lɛ ahetoo, kɛjɛ kuku 17 yɛ ebaafa 372.” No sɛɛ lɛ, okɛ kukuji 17-20 lɛ afee Biblia kasemɔ he gbɛjianɔtoo lɛ he nɔkwɛmɔ nɔ otsɔɔ lɛ. “Wɔ sɛɛ otsi lɛ, masumɔ ni wɔsusu sanebimɔ nɛɛ he, Mɛni ji jeŋ hee ni awo shi yɛ he yɛ Biblia lɛ mli lɛ shishitoo?”
4 Okɛ be ni eshwɛ lɛ atsu nii jogbaŋŋ yɛ nilee mli ni okɛ ohe awo odase ni ayeɔ shikpɔŋ lɛ nɔ jeŋmaji fɛɛ kɛmɔɔ shi nɛɛ mli. (Okɛto Bɔfoi lɛ Asaji 20:21 he.) Ni wɔɔfee sɛɛsaramɔ kɛ yiŋtoo akɛ wɔɔje Biblia mli nikasemɔ shishi lɛ baanyɛ afee naanɔ wala kɛha mɛi ni wɔshiɛɔ wɔtsɔɔ amɛ lɛ.