Ani Obuɔ Wɔ Woji Lɛ Akɛ Sɛɛnamɔ Yɛ He Waa?

¹ Diamente kɛ ojarawatɛi krokomɛi he yɛ sɛɛnamɔ waa, ni jeee akɛ yɛ bɔ ni amɛyɔɔ fɛo ha hewɔ pɛ, shi yɛ bɔ ni amɛtaomɔ kɛ amɛtsaa wa waa lɛ hu hewɔ. Yehowa kɛ Yesu Kristo he nilee ji nii ni jara wa kwraa fe enɛ, ni wɔ woji lɛ pɛ ji woji ni yɔɔ je lɛ mli ni tsɔɔ nɛkɛ mumɔŋ ninamɔi nɛɛ amli vii kɛ nilee ni Nyɔŋmɔ gbeyeishemɔ fata he. (Rom. 11:​33; Fil. 3:⁠8) Mɛɛ gbɛ nɔ wɔɔtsɔ wɔjie anɔkwa hiɛsɔɔ ni wɔyɔɔ kɛha wɔ woji lɛ kpo yɛ?

² Aŋkroaŋkroi kɛ wekui pii kɛ nɔ ko toɔ daa koni amɛkɛya Maŋtsɛyeli Asa lɛ nɔ koni amɛkɛwo onia adekai lɛ amli kɛha Maŋtsɛyeli lɛ he nitsumɔ. Aŋkroaŋkroi hu kɛ shika yeɔ buaa jeŋ muu fɛɛ nitsumɔ lɛ beni amɛwoɔ woji wuji kɛ woji tɛtrɛbii ni amɛheɔ yɛ Maŋtsɛyeli Asa lɛ nɔ lɛ ahe nyɔmɔ lɛ.

³ Gbɛ kroko ni wɔɔtsɔ nɔ wɔjie hiɛsɔɔ kpo ji ni wɔ diɛŋtsɛ lɛ wɔkane woji lɛ ni wɔwo mɛi krokomɛi ahewalɛ yɛ shiɛmɔ mli ni amɛ hu amɛkane. Woji ni sɛɛnamɔ yɔɔ he ni wɔkɛhaa yɛ shiɛmɔ mli lɛ tamɔ diamente ni jara wa waa. Kɛ mɔ ni nine shɛɔ nɔ lɛ yoo sɛɛnamɔ ni yɔɔ he lɛ, no pɛ dani ehiɛ baasɔ wolo lɛ. No hewɔ lɛ, ehe miihia ni wɔdi woji ni wɔkɛhaa mɛi lɛ fɛɛ sɛɛ, koni wɔkɛ wɔhe aha ni wɔye wɔbua shiatsɛmɛi lɛ koni woji lɛ ahe aba sɛɛnamɔ kɛha amɛ kɛtsɔ shia Biblia mli nikasemɔ he gbɛjianɔtoo nɔ. Kɛ wɔkɛ mɛi fee nikasemɔ yɛ wɔ woji lɛ amli lɛ, eyeɔ ebuaa amɛ ni amɛleɔ nɔ ni Biblia lɛ tsɔɔ ni egbeleɔ gbɛ kɛhaa amɛ koni amɛtswa amɛkɛ Yehowa teŋ wekukpaa amɛma shi. Sɛɛnamɔ diɛŋtsɛ ni anaa kɛjɛɔ wɔ woji lɛ amli lɛ damɔ gbɛ ni atsɔɔ nɔ akɛtsuɔ nii lɛ nɔ.

⁴ Woji ni abua naa ashwie shi yɛ Maŋtsɛyeli Asa lɛ nɔ loo yɛ wɔshiai amli lɛ tsuuu yiŋtoo hewɔ ni afee lɛ he nii, ni nine shɛɛɛ sɛɛnamɔ ni yɔɔ mli lɛ nɔ. Esa akɛ akɛ woji tɛtrɛbii, woji bibii, woji wuji, kɛ dɛhiɛmɔ woji memeji lɛ po fɛɛ atsu nii jogbaŋŋ. Mɛɛ be nɛ ni wɔkane woji ni wɔyɔɔ yɛ wɔ asafo lɛ mli lɛ? Eeefee wɔ naakpɛɛ akɛ wɔɔyoo abɔ ni bua shi loo atia ashwie shi. Ani woji ni wɔyɔɔ lɛ hi​—etsuko, egbalako, loo ewoko muji akɛni fɛɛ etsɛ hewɔ? Kɛji nakai lɛ, belɛ esa akɛ wɔbɔ mɔdɛŋ fɛɛ ni wɔɔnyɛ ni wɔkɛha yɛ shiɛmɔ mli. Yɛ be mli ni wɔgbalaa wɔjwɛŋmɔ kɛyaa ehee ni wɔkɛtsuɔ nii lɛ nɔ po lɛ, wɔbaanyɛ wɔkpɛ wɔyiŋ yɛ bei komɛi amli ni wɔkɛ wolo kroko aha.

⁵ Bɔɔ mɔdɛŋ ni okɛ woji atsu nii yɛ shiɛmɔ mli, akɛni ole akɛ eji dɛŋdade kpele ni Yehowa kɛwo wɔdɛŋ koni eye ebua Maŋtsɛyeli-shiɛmɔ kɛ kaselɔ-feemɔ nitsumɔ lɛ hewɔ. Kɛ obɛ woji lɛ eko lɛ, eka shi faŋŋ akɛ onyɛŋ okɛ eko aha. No hewɔ lɛ, miamɔ ohiɛ ni ohe wolo kome loo enyɔ ni okɛtsu nii yɛ shiɛmɔ mli be fɛɛ be. Wulamɔ ohe kɛ woji sɔrɔtoi pii ni okɛje nyɔŋ lɛ shishi ni ohe eko owo mli beni amɛtaa lɛ.

⁶ Wɔ woji lɛ ahe baa sɛɛnamɔ waa kɛ akɛha gbɔmɛi ni hiɛ sɔɔ Nyɔŋmɔ anɔkwale Wiemɔ lɛ. Eba akɛ wɔ fɛɛ wɔkɛ ekaa kɛ miishɛɛ aaatsu nɔ ni akɛha wɔ lɛ he nii, koni wɔkɛtsɔɔ bɔ ni wɔhiɛ sɔɔ wɔ woji lɛ waa wɔhaa.