Ha Miishɛɛ lɛ Aya Hiɛ Kɛtsɔ Sɛɛsaramɔi ni Mɔɔ Shi Nɔ
1 Nibii ni fataa wiemɔ fɛɛ wiemɔ ni asaa he jogbaŋŋ yɛ mli lɛ he ji ehiɛkpamɔ, wiemɔ ni akaseɔ nibii heei yɛ mli, kɛ enaamuu ni kanyaa mɔ. Hiɛkpamɔ wiemɔ lɛ mɔɔ toibolɔi lɛ ajwɛŋmɔ, shi kɛ wiemɔ lɛ diɛŋtsɛ kɛ enaamuu fataaa he lɛ, no haŋ wiemɔ lɛ aye emuu. Nakai nɔŋŋ shishitoo mla nɛɛ ji yɛ wɔ shiɛmɔ nitsumɔ lɛ mli. Eji gbɛ kpakpa waa akɛ aaatee shiatsɛ lɛ miishɛɛ shi yɛ jɛmɛ yaa klɛŋklɛŋ, shi esa akɛ wɔya nɔ wɔha nakai shishijee miishɛɛ lɛ aya hiɛ daa kɛtsɔ sɛɛsaramɔi ni mɔɔ shi ni wɔɔfee lɛ nɔ.
2 Mɛni hewɔ Nyɔŋmɔ eŋmɛ amanehulu gbɛ Iɛ? Mɛɛ sanebimɔ ni kanyaa niiahesusumɔ nɔ! Ani osusuuu akɛ nɛkɛ saneyitso nɛɛ kã mɛi pii ajwɛŋmɔi anɔ ŋmɛnɛ? No hewɔ ni awo ŋaa, yɛ sane ni yɔɔ yiteŋgbɛ lɛ mli akɛ otee sanebimɔ ko shi yɛ ojɛmɛ yaa klɛŋklɛŋ kwraa lɛ naagbee, kɛ jwɛŋmɔ akɛ obaaha hetoo kɛji oba sɛɛsaramɔ lɛ.
3 Obaanyɛ okɛɛ akɛ:
◼ “Biɛ fɛɛ. Nyɛsɛɛ ni wɔgba sane lɛ, wɔbi sane yɛ nɔ hewɔ ni Nyɔŋmɔ eŋmɛ amanehulu gbɛ lɛ he, ni miwo shi akɛ maku misɛɛ maba ni wɔsusu sane lɛ he. Mɛi pii nuɔ he akɛ kɛji Nyɔŋmɔ susuɔ wɔhe lɛlɛŋ lɛ, kulɛ eha amanehulu fɛɛ sɛɛ efo. Ekolɛ bo hu onuɔ he nakai nɔŋŋ. [Ŋmɛɛ shiatsɛ gbɛ ni eha hetoo.] Biblia lɛ maa nɔ mi ehaa wɔ akɛ Nyɔŋmɔ susuɔ wɔhe lɛɛlɛŋ. [Kanemɔ 1 Yohane 4:8.] Nyɔŋmɔ yɛ yiŋtoi kpakpai ahewɔ ni eŋmɛ amanehulu gbɛ aahu kɛbashi bianɛ lɛ. Agbala nakai yiŋtoi lɛ ekome mli yɛ 2 Petro 3:9. [Kanemɔ.] Atsɔɔ yiŋtoi krokomɛi hu yɛ wolo bibioo nɛɛ mli.” No sɛɛ lɛ gbelemɔ Ani Nyɔŋmɔ Susuɔ Wɔhe Lɛlɛŋ? wolo bibioo lɛ baafai 12-14 ni nyɛsusu emli otii ni yɔɔ miishɛɛ lɛ eko he.
4 Shiatsɛmɛi komɛi baana sane miigbalamɔ ni yaa shɔŋŋ lɛ he miishɛɛ, ni ekolɛ ebaabi ni ofee sɛɛsaramɔi babaoo dani amɛtsui baanyɔ amɛmli yɛ hetoo lɛ he jogbaŋŋ kɛmɔ shi. Asafo lɛ woji ni hiɛ baafai 192, ni wɔkɛtsuɔ nii yɛ February mli lɛ ateŋ babaoo hiɛ yitsei ni abaanyɛ akɛtsu nii akɛ nɔdaamɔ nɔ kɛha sanegbaa babaoo yɛ saneyitso nɛɛ he.
5 Beni okɛ sanegbaa Iɛ baa naagbee lɛ, teemɔ sanebimɔ kroko shi koni okɛɛ shiatsɛ lɛ akɛ obaana he miishɛɛ waa akɛ okɛ lɛ baasusu ehe saji ahe be kroko ni oooba lɛ saramɔ lɛ. Mɛi pii baasumɔ ni amɛle nɔ ni baa mɔ ko nɔ yɛ egbele mli. Mɛni hewɔ otooo gbɛjianɔ ni nyɛsusu nakai sane lɛ he yɛ be kroko ni hi jogbaŋŋ mli?
6 Ebaaye ebua jogbaŋŋ akɛ oooha otii krɛdɛɛi etɛ nɛɛ ahi ojwɛŋmɔ mli. Feemɔ tswãa. Ekolɛ shiatsɛ lɛ leee bɔ ni atoɔ be pɔtɛɛ ko ahaa Biblia mli sanegbaa be fɛɛ be. Owiemɔ Lɛ afee kuku. Kaatsɛ tsɔ, ni kaawie otii babaoo ahe fe nine yɛ nyɛ klɛŋklɛŋ sanegbaa lɛ mli. Bei pii lɛ, kɛ owie otii fioo pɛ he yɛ be kuku mli lɛ, ehaa anaa osaramɔi yɛ bei krokomɛi amli Iɛ he miishɛɛ. Jiemɔ miishɛɛ kɛ naanyobɔɔ su kpo. Ha shiatsɛ lɛ ale akɛ oyɛ ehe miishɛɛ diɛŋtsɛ akɛ mɔ aŋkro.
7 Oti ni ma wɔhiɛ klɛŋklɛŋ kwraa ji ni wɔkɛ shiatsɛ lɛ aje Ŋmalɛ mli sanegbaa shishi. No sɛɛ lɛ wɔmiitao wɔje shia Biblia mli nikasemɔ ni woɔ yibii shishi, kɛ wolo ni sa, tamɔ Obaanyɛ Ohi Shi Kɛya Naanɔ wolo lɛ nɛkɛ. Kɛ okɛ tsuishitoo ha shishijee miishɛɛ lɛ tee hiɛ kɛtsɔ sɛɛsaramɔi ni mɔɔ shi feemɔ nɔ lɛ, no lɛ nakai miishɛɛ Iɛ hu aaatsɔ onɔ.