Ná Ekãa ni Okɛfee Sɛɛsaramɔi

¹ Ani onaa miishɛɛ kɛ oofee sɛɛsaramɔi? Shiɛlɔi pii naa miishɛɛ. Ekolɛ, klɛŋklɛŋ lɛ oshe gbeyei, titri lɛ yɛ be mli ni okuɔ osɛɛ kɛyaa shiatsɛmɛi ni jie miishɛɛ fioo ko pɛ kpo beni okɛ amɛ gba sane klɛŋklɛŋ kwraa lɛ aŋɔɔ lɛ. Shi be mli ni ‘onaa ekaa yɛ wɔ-Nyɔŋmɔ lɛ mli koni okɛjaje sanekpakpa lɛ’ yɛ sɛɛsaramɔi afeemɔi amli lɛ, ekolɛ ebaafee bo naakpɛɛ akɛ ooona bɔ ni nitsumɔ nɛɛ baanyɛ afee nɔ ni yɔɔ mlɛo ni sɛɛnamɔ yɔɔ he lɛ. (1 Tes. 2:2) Yɛ mɛɛ gbɛ nɔ?

² Sane kome ji akɛ, sɔrɔtofeemɔ ko ni he hiaa waa ka sɛɛsaramɔ kɛ mɔ ŋɔɔ ni ayaa klɛŋklɛŋ lɛ teŋ. Afeɔ sɛɛsaramɔ lɛ yɛ mɔ ko ni ale lɛ momo ŋɔɔ, jeee yɛ mɔ ko ni aleee lɛ ŋɔɔ, ni bei pii lɛ eyɛ mlɛo akɛ akɛ mɔ ko ni ale lɛ momo aaagba sane fe mɔ ko ni aleee lɛ. Yɛ sɛɛnamɔi ni fá ni jɛɔ nitsumɔ nɛɛ mli baa lɛ gbɛfaŋ lɛ, sɛɛsaramɔi baanyɛ atsɔ Biblia mli nikasemɔi ni woɔ yibii.

³ Yɛ be mli ni wɔtsuɔ nii yɛ shia kɛ shia lɛ, wɔyaa mɛi ni bɛ sane lɛ he miishɛɛ beni wɔyasara amɛ klɛŋklɛŋ lɛ aŋɔɔ shii abɔ. Mɛni hewɔ wɔyaa amɛ ŋɔɔ lolo? Wɔyɔseɔ akɛ gbɔmɛi ashihilɛi tsakeɔ, ni akɛ, ekolɛ mɔ ko ni fee tamɔ esumɔɔɔ loo ete shi ewo tsutsu lɛ po baana he miishɛɛ be kroko, kɛ wɔtee eŋɔɔ. Yɛ enɛ ni yɔɔ wɔjwɛŋmɔ mli hewɔ lɛ, wɔsaa wɔhe jogbaŋŋ, ni wɔsɔleɔ wɔbiɔ Yehowa jɔɔmɔ koni nɔ ni wɔɔbaakɛɛ agbɛnɛ lɛ atee miishɛɛ shi.

⁴ Kɛ yɛ wɔ shia kɛ shia nitsumɔ lɛ mli lɛ, wɔjɛɔ wɔsuɔmɔ mli wɔshiɛɔ wɔhaa mɛi ni tsutsu lɛ amɛjieee miishɛɛ kpo kwraa lɛ, ani esaaa akɛ wɔjɛɔ wɔsuɔmɔ babaoo mli wɔyaa mɔ fɛɛ mɔ ni jieɔ miishɛɛ ko kpo yɛ Maŋtsɛyeli shɛɛ sane lɛ he lɛ ŋɔɔ?—Bɔf. 10:34, 35.

⁵ Wɔteŋ mɛi pii yɛ anɔkwale lɛ mli ŋmɛnɛ, ejaakɛ shiɛlɔ ko kɛ tsuishitoo kũ esɛɛ ebasara wɔ. Kɛ oji gbɔmɛi nɛɛ ateŋ mɔ kome lɛ, obaanyɛ obi ohe akɛ: ‘Mɛɛ hewalɛwoo mikɛha shiɛlɔ lɛ klɛŋklɛŋ? Ani mihere Maŋtsɛyeli shɛɛ sane lɛ nɔ amrɔ beni minu he klɛŋklɛŋ kwraa lɛ? Ani mifee tamɔ mɔ ko ni sumɔɔɔ mɔ?’ Esa akɛ wɔna miishɛɛ akɛ nakai shiɛlɔ lɛ ni ku esɛɛ lɛ susu akɛ wɔsa kɛha sɛɛsaramɔ, ni ‘ena ekaa yɛ Nyɔŋmɔ mli,’ ni eku esɛɛ, ni eje shishi akɛ ebaatsɔɔ wɔ anɔkwale lɛ. Ni mɛi ni klɛŋklɛŋ lɛ amɛjie miishɛɛ kpo amɛtsɔɔ, shi sɛɛ mli lɛ etamɔ nɔ ni amɛtaooo wɔ dɔŋŋ lɛ hu? Jwɛŋmɔ ni ja he miihia, taakɛ niiashikpamɔ ni nyiɛ sɛɛ nɛɛ tsɔɔ lɛ.

⁶ Yɛ be mli ni shiɛlɔi enyɔ ko kɛ amɛhe ewo gbɛjegbɛi anɔ odaseyeli mli leebi mra ko lɛ, amɛkɛ obalayoo ko ni miitsi gbekɛ yɛ gbekɛbii ashwiili mli kpe. Yoo lɛ he wolo tɛtrɛɛ lɛ eko, ni efɔ̃ nyɛmimɛi yei lɛ anine ni amɛba eshia Hɔgbaa ni nyiɛ sɛɛ lɛ. Amɛshɛ jɛmɛ yɛ be ni amɛto lɛ naa, shi shiatsɛ lɛ kɛɛ amɛ akɛ ebɛ dekã ni ekɛ amɛ baawie. Shi, ewo shi akɛ yɛ otsi ni baanyiɛ sɛɛ lɛ mli lɛ ebaahi shia. Nyɛmimɛi yei lɛ ayiŋ fee amɛ kɔshikɔshi akɛ ebaanyɛ eye be ni eto amɛ lɛ nɔ, shi beni amɛku amɛsɛɛ lɛ obalayoo lɛ miimɛ amɛ. Aje nikasemɔ shishi, ni yoo lɛ hiɛyaa lɛ yɛ naakpɛɛ. Yɛ be kukuoo mli lɛ ebɔi kpeei yaa daa, ni ekɛ ehe woɔ shiɛmɔ nitsumɔ lɛ mli. Ábaptisi lɛ amrɔ nɛɛ.

⁷ Too Gbɛjianɔ Kɛ Otee Jɛmɛ Klɛŋklɛŋ Lɛ: Bei pii lɛ, atoɔ gbɛjianɔ kɛhaa sɛɛsaramɔ ni yeɔ omanye kɛ atee jɛmɛ klɛŋklɛŋ lɛ. Bó nɔ ni shiatsɛ lɛ wieɔ lɛ toi jogbaŋŋ. Mɛni amɛkɛɔ bo? Ani esumɔɔ Nyɔŋmɔ jamɔ? Ani esumɔɔ maŋ saji ahe wiemɔ? Ani esumɔɔ jeŋ nilee he saji? yinɔsaji? shihilɛ hei lɛ ahe saji? Yɛ be mli ni ogbe naa lɛ, obaanyɛ otee sanebimɔ ko ni hɛleɔ mɔ shi waa lɛ shi, ni owo lɛ shi akɛ, kɛ oku osɛɛ oba lɛ, okɛ lɛ baasusu hetoo ni Biblia lɛ kɛhaa lɛ he.

⁸ Akɛ nɔkwɛmɔ nɔ lɛ, kɛ shiatsɛ lɛ kpɛlɛ paradeiso shiwoo ni Biblia lɛ kɛhaa lɛ nɔ lɛ, abaanyɛ asusu saneyitso lɛ he lolo. Dani obaashi lɛ, obaanyɛ obi akɛ: “Te wɔbaafee tɛŋŋ wɔna nɔmimaa akɛ Nyɔŋmɔ baaye eshiwoo nɛɛ nɔ?” Koni okɛfata he akɛ: “Ekolɛ manyɛ maba yɛ be mli ni weku lɛ mli bii krokomɛi yɔɔ shia, kɛkɛ lɛ manyɛ matsɔɔ bo hetoo ni Biblia lɛ kɛhaa sanebimɔ nɛɛ.”

⁹ Kɛ shiatsɛ lɛ ejieee miishɛɛ kpo etsɔɔɔ yɛ sane titri ko he lɛ, obaanyɛ otee sanebimɔi ni yɔɔ shiɛmɔ wiemɔi ni akɛtsuɔ nii ni yɔɔ Wɔ Maŋtsɛyeli Sɔɔmɔ lɛ sɛɛ lɛ mli lɛ ateŋ ekome shi, ni okɛ no atsu nii kɛha sanegbaa be kroko.

¹⁰ Kadimɔ Mɔ lɛ he Saji ni Ja Jogbaŋŋ yɛ Woji Anɔ: Esa akɛ oshia-kɛ-shia kadimɔ wolo lɛ nɔ nii ni oŋmala lɛ afee nɔ ni ja jogbaŋŋ. Ŋmalamɔ shiatsɛ lɛ gbɛi kɛ adrɛs amrɔ nɔŋŋ kɛ́ oshi shia lɛ. Kaaka oyiŋ otsɛ shia lɛ nɔmba loo gbɛjegbɛ lɛ gbɛi—kwɛmɔ nɔ ni aŋma lɛ ni ona nɔmimaa akɛ eja. Ŋmaa mɔ lɛ he saji ni okɛbaakadi lɛ. Ŋmaa saneyitso ní nyɛsusu he, ŋmalɛi ní nyɛkane, woji fɛɛ ní okɛha, kɛ sanebimɔ ní obaaha hetoo kɛ oku osɛɛ oba lɛ oshwie shi. Okɛ gbi kɛ be ni okɛtee jɛmɛ klɛŋklɛŋ lɛ afata he, kɛ be ni okɛɛ obaaku osɛɛ oba ekoŋŋ lɛ hu. Amrɔ nɛɛ ni nibii ni oŋmala lɛ eja jogbaŋŋ nɛɛ, kaalaaje lɛ! Okɛwo he ko ni yɔɔ shweshweeshwe, koni onyɛ okwɛ mli yɛ sɛɛ mli. Yaa nɔ osusu mɔ lɛ, kɛ bɔ ni obaafee otsu be kroko ni obaaya jɛmɛ lɛ he nii lɛ he.

¹¹ Lé Otii ni Oyaatsu Amɛhe Nii Lɛ: Klɛŋklɛŋ lɛ, kɛtsɔ miishɛɛ kɛ naanyobɔɔ su kpo ni obaajie lɛ nɔ lɛ, feemɔ bɔ fɛɛ bɔ ni ooonyɛ ni shiatsɛ lɛ aná miishɛɛ. Yɛ be mli ni okoliii esaji amli fitsofitso lɛ, ha ena akɛ oyɛ ehe miishɛɛ. Agbɛnɛ kaimɔ lɛ yɛ sane ko ni obi klɛŋklɛŋ beni obasara lɛ lɛ he. Bó nɔ ni ebaakɛɛ lɛ toi jogbaŋŋ, ni ojie anɔkwa hiɛsɔɔ kpo yɛ nɔ ni ekɛɔ lɛ he. Agbɛnɛ tsɔɔmɔ lɛ nɔ hewɔ ni abaanyɛ akɛ nɔ ni Biblia lɛ kɛɔ lɛ atsu nii. Kɛ ebaahi lɛ, gbalamɔ ejwɛŋmɔ kɛya sane ko ni tamɔ nakai ni yɔɔ Nilee Ni Kɛ Mɔ Yaa Naanɔ Wala Mli wolo lɛ mli lɛ nɔ. Ha ehi ojwɛŋmɔ mli akɛ oti ni ma ohiɛ ni okɛfeɔ sɛɛsaramɔi ji ni oje Biblia mli nikasemɔ shishi.

¹² Bɔ ni akɛ wiemɔi etsu nii tɛ̃ɛ yɛ Nilee wolo lɛ mli lɛ ewo wɔteŋ mɛi pii hewalɛ koni ‘wɔna ekaa’ yɛ Biblia mli nikasemɔi afeemɔ mli, koni wɔwo nikaselɔi lɛ hewalɛ ni amɛba kpeei, ni amɛkɛ Yehowa gbɛjianɔtoo lɛ abɔ. Tsutsu ko lɛ, wɔjeɔ gbɛ wɔmɛɔ aahu kɛyashiɔ be mli ni amɛkase nii saŋŋ yɛ be ko mli dã, dani wɔfɔ̃ɔ amɛ nine koni amɛkɛ wɔ abɔ. Agbɛnɛ nikaselɔi pii yaa kpeei amrɔ nɔŋŋ kɛ akɛ amɛ je nikasemɔ shishi lɛ, ni nɔ ni ejɛ mli eba ji akɛ amɛmiiya amɛhiɛ oyayaayai.

¹³ Gbalashihilɛ mli hefatalɔi ye amɛ naanyo nitsulɔ ko odase trukaa. Beni ejie miishɛɛ kpo yɛ anɔkwale lɛ he lɛ, amɛfɔ lɛ nine koni amɛkɛ lɛ akase Nilee wolo lɛ. Yɛ nakai beaŋ nɔŋŋ lɛ amɛkɛɛ lɛ akɛ esa akɛ eya kpeei, yɛ he ni ebaana hetoo kɛha esanebimɔi lɛ pii yɛ lɛ. Jeee kpɛlɛmɔ nuu lɛ jɛ esuɔmɔ mli ekpɛlɛ nɔ kɛkɛ akɛ akɛ lɛ akase nii, shi moŋ ekaseɔ nii shii enyɔ yɛ otsi mli, ni ebɔi kpeei yaa daa yɛ Maŋtsɛyeli Asa lɛ nɔ.

¹⁴ Okɛ Wolo Bibioo, Mɛni Nyɔŋmɔ Taoɔ yɛ Wɔdɛŋ? lɛ Atsu Nii: Wɔnine shɛ wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ nɔ yɛ “Nyɔŋmɔ Toiŋjɔlɛ He Bɔfɔi” Kpokpaa Wulu nɔ Kpee lɛ shishi. Wolo bibioo nɛɛ hi jogbaŋŋ kɛha Biblia mli nikasemɔi ni akɛ gbɔmɛi ni sheɔ Nyɔŋmɔ gbeyei ní amɛ woloŋlee kɔɔɔ he eko lɛ aaaje shishi lɛ. Nikasemɔi ni mɔɔ shi ni kɔɔ Biblia mli shishijee tsɔɔmɔi ahe yɔɔ mli. Wolo lɛ baafee dɛŋdade ko ni sa jogbaŋŋ ni abaanyɛ atsɔ nɔ akɛ Nyɔŋmɔ he nilee aha. Etsɔɔ anɔkwale lɛ mli faŋŋ, ni eyɛ mlɛo bɔ ni wɔteŋ mɔ fɛɛ mɔ baanyɛ ekɛtsu nii ni ekɛtsɔɔ mɛi krokomɛi Nyɔŋmɔ taomɔ nii. Ekolɛ, shiɛlɔi pii baana hegbɛ ni amɛkɛ wolo bibioo nɛɛ afee Biblia mli nikasemɔ.

¹⁵ Ekolɛ aŋkroaŋkroi komɛi ni nuɔ he akɛ amɛbɛ be ni amɛkɛaakase Nilee wolo lɛ baasumɔ ni amɛkɛ be fioo akase Taoɔ wolo lɛ. Amɛbaaná nɔ ni amɛkaseɔ lɛ he miishɛɛ waa diɛŋtsɛ! Yɛ baafãi enyɔ loo etɛ pɛ mli lɛ, amɛbaaná hetooi amɛha sanebimɔi ni gbɔmɛi kɛ afii ohai abɔ esusu he aahu lɛ yɛ mli: Namɔ ji Nyɔŋmɔ? Namɔ ji Abonsam? Mɛni ji Nyɔŋmɔ yiŋtoo kɛha shikpɔŋ lɛ? Mɛni ji Nyɔŋmɔ Maŋtsɛyeli lɛ? Te ooofee tɛŋŋ ona anɔkwa jamɔ lɛ? Eyɛ mli akɛ wolo bibioo lɛ kɛ wiemɔi ni waaa tsɔɔ anɔkwale lɛ mli moŋ, shi hewalɛ yɛ eshɛɛ sane lɛ mli. Saji otii ni onukpai lɛ kɛ gbɔmɛi ni abaabaptisi amɛ lɛ baatĩ mli lɛ yɛ mli, ni ebaanyɛ efee nɔ ni anyɛɔ akɛjeɔ nikasemɔ ni mɔɔ shi lɛ shishi yɛ Nilee wolo lɛ mli.

¹⁶ Kɛ obaabi ni okɛ mɔ ko akase nii yɛ sɛɛsaramɔ mli lɛ, obaanyɛ okɛɛ kuku akɛ: “Ani ole akɛ, kɛ ona minitii fioo ko lɛ, obaanyɛ oná hetoo oha Biblia mli sanebimɔ ko ni he hiaa waa?” Agbɛnɛ bi sane ko ni jeɔ kpo yɛ nikasemɔi ni yɔɔ wolo bibioo lɛ mli lɛ ateŋ ekome shishijee lɛ. Akɛ nɔkwɛmɔ nɔ lɛ, kɛ otee mɔ ni eda yɛ afii amli ŋɔɔ lɛ, obaanyɛ okɛɛ akɛ: “Wɔle akɛ tsutsu lɛ Yesu tsa gbɔmɛi. Shi yɛ wɔsɛɛ be mli lɛ, mɛni Yesu baafee eha helatsɛmɛi lɛ? mɛi ni edara lɛ? gbohii lɛ?” Anáa hetooi lɛ yɛ nikasemɔ 5 lɛ mli. Mɔ ko ni sumɔɔ Nyɔŋmɔ jamɔ lɛ baaná sanebimɔ nɛɛ he miishɛɛ: “Ani Nyɔŋmɔ boɔ sɔlemɔi fɛɛ toi?” Aha enɛ hetoo yɛ nikasemɔ 7 lɛ mli. Weku mli bii baasumɔ ni amɛle: “Mɛni Nyɔŋmɔ taoɔ yɛ fɔlɔi kɛ bii adɛŋ?” Amɛbaana yɛ be mli ni amɛkaseɔ nikasemɔ 8 lɛ. Sanebimɔi krokomɛi ji: “Ani gbohii baanyɛ aye hiɛkalɔi awui?” ni atsɔɔ mli yɛ nikasemɔ 11 lɛ; “Mɛni hewɔ jamɔi babaoo kɛɔ akɛ Kristofoi ji amɛ lɛ?” ni asusu he yɛ nikasemɔ 13 lɛ; kɛ “Mɛni esa akɛ ofee koni otsɔ Nyɔŋmɔ naanyo?” ni atsɔɔ mli yɛ nikasemɔ 16 lɛ.

¹⁷ Ye Obua Mɛi ni Wieɔ Wiemɔ Kroko Lɛ: Ni shiatsɛmɛi ni wieɔ wiemɔ kroko lɛ hu? Kɛ aaahi lɛ esa akɛ atsɔɔ amɛ nii yɛ wiemɔ ni amɛle jogbaŋŋ lɛ mli. (1 Kor. 14:9) Asafoŋ woloŋmalɔ lɛ baanyɛ aŋmala asafoi kɛ kui ni yɔɔ jɛmɛ ni wieɔ wiemɔ kroko lɛ agbɛi eshwie shi. Abaanyɛ ana kpokpaa nɔkwɛlɔ lɛ kɛha saji ni kɔɔ asafoi nɛɛ ahe, kɛ́ ehe miihia. Agbɛnɛ asafoŋ woloŋmalɔ lɛ baanyɛ atsɔɔ asafo lɛ mli bii lɛ asafo loo kuu ni wieɔ wiemɔ kroko lɛ. Kɛ asafoi loo kui komɛi bɛ jɛmɛ, ni shiɛlɔi ni baanyɛ awie wiemɔ ni shiatsɛ lɛ nuɔ lɛ bɛ jɛmɛ lɛ, shiɛlɔ lɛ baanyɛ abɔ mɔdɛŋ ni ekɛ Taoɔ wolo bibioo lɛ ni yɔɔ wiemɔi sɔrɔtoi enyɔ mli atsu nii kɛkase.

¹⁸ Shiɛlɔ ko ni wieɔ Ŋleshi lɛ kɛ nuu ko ni wieɔ Vietnam wiemɔ kɛ eŋa ni wieɔ Thai wiemɔ lɛ je nikasemɔ shishi. Akɛ Asafo lɛ woji kɛ Bibliai ni yɔɔ Ŋleshi, Vietnam, kɛ Thai wiemɔi amli lɛ tsu nii beni akaseɔ nii lɛ. Eyɛ mli akɛ wiemɔi sɔrɔtoi lɛ kɛ naagba ba klɛŋklɛŋ moŋ, shi shiɛlɔ lɛ ŋma akɛ: “Gbalashihilɛ mli hefatalɔi lɛ tee hiɛ oya yɛ mumɔŋ. Amɛna bɔ ni ehe hiaa ni amɛkɛ amɛbii enyɔ lɛ aje kpeeiyaa shishi, ni amɛkaneɔ Biblia lɛ daa gbɛkɛ akɛ weku. Amɛbiyoo ni eye afii ekpaa lɛ feɔ lɛ diɛŋtsɛ e-Biblia mli nikasemɔ.”

¹⁹ Kɛ okɛ gbɔmɛi ni wieɔ wiemɔ kroko lɛ miikase nii lɛ, wiemɔ blɛoo, ni otsɛ wiemɔi lɛ jogbaŋŋ, ni okɛ wiemɔi kɛ wiemɔi ni atsara ni shishinumɔ waaa atsu nii. Shi kɛlɛ, ha ehi ojwɛŋmɔ mli akɛ, esa ákɛ akɛ bulɛ aha mɛi ni wieɔ wiemɔ kroko lɛ. Esaaa akɛ akɛ amɛ yeɔ tamɔ oookɛɛ gbekɛbii ji amɛ.

²⁰ Okɛ mfonirii fɛfɛji ni yɔɔ Taoɔ wolo lɛ mli lɛ atsu nii jogbaŋŋ. Kɛ “mfonirii wieɔ akpe lɛ,” belɛ, mfonirii babaoo ni yɔɔ wolo bibioo lɛ mli lɛ baawie babaoo etsɔɔ shiatsɛ lɛ. Ha ni ekane ŋmalɛi lɛ yɛ lɛ diɛŋtsɛ e-Biblia lɛ mli. Kɛ abaanyɛ afee nikasemɔ lɛ yɛ be mli ni weku lɛ mli nyo ko ni nuɔ wiemɔ ni okɛtsuɔ nii lɛ yɔɔ jɛmɛ ni ebaanyɛ etsɔɔ shishi lɛ, ŋwanejee ko bɛ he akɛ ehe baaba sɛɛnamɔ waa.—Kwɛmɔ Wɔ Maŋtsɛyeli Sɔɔmɔ, September 1984, baafã 3; November 1990, baafã 7-8; October 1993, baafã 7.

²¹ Kaatsɛ, Kɛ́ Obaafee Sɛɛsaramɔ: Be enyiɛ esa akɛ okɛmɛ dani ofee sɛɛsaramɔ? Shiɛlɔi komɛi kuɔ amɛsɛɛ amɛyaa yɛ gbi kome loo gbii enyɔ beni amɛtee jɛmɛ klɛŋklɛŋ lɛ sɛɛ. Mɛi komɛi kuɔ amɛsɛɛ be fioo ko sɛɛ, yɛ nakai gbi lɛ nɔ nɔŋŋ! Ani no yɛ mra tsɔ̃? Bei pii lɛ ejeee haomɔ kɛha shiatsɛmɛi. Bei pii lɛ ehe miihia ni shiɛlɔ ni feɔ sɛɛsaramɔ lɛ ana jwɛŋmɔ ni ja, ni ekɛ ekaafeemɔ fioo afata he. Susumɔ niiashikpamɔi ni nyiɛ sɛɛ nɛɛ ahe okwɛ.

²² Shiɛlɔ ko ni eye afii 13 miitsu nii yɛ shia kɛ shia gbi ko, ni ena yei enyɔ ni miinyiɛ. Akɛni hewalɛwoo ni akɛha yɛ bɔ ni esa akɛ ashiɛɔ atsɔɔ mɛi yɛ he fɛɛ he ni abaana amɛ yɛ lɛ yɛ ejwɛŋmɔ mli hewɔ lɛ, enina yei lɛ yɛ gbɛjegbɛ lɛ nɔ. Amɛjie miishɛɛ kpo yɛ Maŋtsɛyeli shɛɛ sane lɛ he, ni amɛhe Nilee wolo lɛ eko. Nyɛmi nuu fioo lɛ he amɛ adrɛs, ni eku esɛɛ yɛ gbii enyɔ sɛɛ, ni ekɛ amɛteŋ mɔ fɛɛ mɔ je Biblia mli nikasemɔ shishi.

²³ Nyɛmi yoo ko toɔ gbɛjianɔ koni eku esɛɛ yɛ otsi ni nyiɛ sɛɛ lɛ mli. Shi yɛ gbi kome loo enyɔ yɛ klɛŋklɛŋ jɛmɛ yaa sɛɛ lɛ, etee jɛmɛ koni eyaha shiatsɛ lɛ wolo tɛtrɛɛ ni wieɔ sane ni amɛsusu he kɛtsɔ hiɛ lɛ. Ekɛɛ shiatsɛ lɛ akɛ: “Mina sane nɛɛ ni misusu akɛ obaasumɔ ni okane. Minyɛŋ ni mikɛ bo agba sane bianɛ, shi maku misɛɛ maba Shɔ shwane taakɛ mikɛɛ bo mito lɛ. Ani nakai be lɛ hi kɛha bo lolo?”

²⁴ Kɛ mɔ ko jie miishɛɛ kpo yɛ anɔkwale lɛ he etsɔɔ lɛ, wɔbaanyɛ wɔma nɔ mi akɛ ekɛ shitee-kɛ-woo baakpe yɛ gbɛ kome loo gbɛ kroko nɔ. Jɛmɛ ni wɔbaaya nɔŋŋ beni wɔtee jɛmɛ klɛŋklɛŋ lɛ sɛɛ lɛ baawo lɛ hewalɛ ni edamɔ nɔnyɛɛ fɛɛ ni jɛɔ ewekumɛi, enanemɛi ni esumɔɔ waa, kɛ mɛi krokomɛi adɛŋ lɛ anaa.

²⁵ Ná Mɛi ni Onaa Amɛ yɛ Maŋ lɛ Mli Hei Sɔrɔtoi lɛ Ahe Miishɛɛ: Wɔteŋ mɛi babaoo naa shiɛmɔ yɛ gbɛjegbɛi ahe, yɛ tsɔnei adaamɔ hei, yɛ maŋ tsɔnei amli, yɛ shwapoi amli, yɛ shwɛmɔ hei kɛ hei krokomɛi lɛ ahe miishɛɛ. Kɛfata woji ni wɔkɛaaha lɛ he lɛ, ehe miihia ni wɔna amɛhe miishɛɛ. Yɛ nakai oti ni mã wɔhiɛ lɛ hewɔ lɛ, esa akɛ wɔbɔ mɔdɛŋ ni wɔna mɛi fɛɛ ni wɔkɛkpeɔ ni yɔɔ he miishɛɛ lɛ agbɛi, adrɛs, ni kɛ aaahi lɛ, wɔná amɛ tɛlifon nɔmba hu. Ewaaa kwraa taakɛ ekolɛ obasusu lɛ akɛ onine aaashɛ amaniɛbɔɔ nɛɛ nɔ lɛ. Yɛ be mli ni sanegbaa lɛ baa enaagbee lɛ, jiemɔ owolo bibioo lɛ ni obi akɛ: “Ani gbɛ ko yɛ ni wɔbaanyɛ wɔtsɔ nɔ wɔtsa sanegbaa nɛɛ nɔ be kroko?” Aloo kɛɛmɔ akɛ: “Miisumɔ ni okane sane ko ni miheɔ miyeɔ akɛ ebaaŋɔɔ onaa lɛ. Ani obaasumɔ ni mikɛba oshia loo ɔfis?” Nyɛmi nuu ko biɔ yɛ gbɛ kuku nɔ akɛ: “Mɛɛ tɛlifon nɔmba nɔ manyɛ matsɔ koni minine ashɛ onɔ?” Ebɔ amaniɛ akɛ, yɛ nyɔji etɛ mli lɛ, gbɔmɛi lɛ fɛɛ na he miishɛɛ akɛ amɛkɛ amɛ tɛlifon nɔmba aaaha, ja mɛi etɛ pɛ.

²⁶ Okɛ Tɛlifon lɛ Atsu Nii ni Onine Ashɛ Amɛnɔ ni Okɛtee Miishɛɛ Shi: Nyɛmi yoo gbɛgbalɔ ko kɛ tɛlifon lɛ tsu nii ni enine shɛ gbɔmɛi ni yɔɔ tsũi ni abuɔ he waa amli lɛ anɔ. Etsɔɔ nakai gbɛ nɔŋŋ nɔ ekɛfeɔ sɛɛsaramɔi. Yɛ eklɛŋklɛŋ wiemɔ lɛ mli lɛ ekɛɔ akɛ: “Mile akɛ oleee mi. Miibɔ mɔdɛŋ waa koni minine ashɛ gbɔmɛi ni yɔɔ jɛmɛ lɛ anɔ, ni mikɛ amɛ asusu Biblia lɛ mli sane ko he. Kɛ oyɛ be fioo lɛ masumɔ ni makane shiwoo ni anaa yɛ . . . lɛ matsɔɔ bo.” Beni ekane ŋmalɛ lɛ sɛɛ lɛ, ekɛɔ akɛ: “Ani efeŋ naakpɛɛ kɛji wɔnyɛ wɔna akɛ nakai be lɛ eba? Mina miishɛɛ waa akɛ mikane enɛ mitsɔɔ bo. Kɛ bo hu óna he miishɛɛ lɛ, masumɔ ni matswa bo tɛlifon ekoŋŋ ni wɔsusu ŋmalɛ kroko hu he.”

²⁷ Yɛ tɛlifon lɛ tswaa ekoŋŋ mli lɛ, ekai shiatsɛ lɛ yɛ sane ni amɛgba tsutsu lɛ he, ni ekɛɛ ebaasumɔ ni ekane bɔ ni shihilɛi baatamɔ kɛ ajie efɔŋ feemɔ kɛtee lɛ, kɛjɛ Biblia lɛ mli. Kɛkɛ ni ekɛ shiatsɛ lɛ gba Biblia mli sane kuku. Yɛ mɛi babaoo ni etswaa amɛ tɛlifon ekɛ amɛ gbaa sane lɛ hewɔ lɛ, mɛi 35 efɔ̃ lɛ nine kɛtee amɛshiai amli, ni ekɛ mɛi kpawo eje Biblia mli nikasemɔi ashishi! Ani bei komɛi lɛ ewa kɛha bo akɛ ooofee sɛɛsaramɔi yɛ mɛi ni jie miishɛɛ kpo lɛ aŋɔɔ yɛ kɔɔyɔŋ tsakemɔi, loo hela hewɔ? Kɛ nakai ni lɛ, mɛni hewɔ ni okɛ amɛ ewieee yɛ tɛlifon nɔ?

²⁸ Dii Miishɛɛ ni Mɛi ni Yɔɔ Nitsumɔ Hei lɛ Ejie Kpo lɛ Sɛɛ: Ebiɔ babaoo yɛ shwapoi anaa nitsumɔ mli fe ni akɛ woji tɛtrɛbii lɛ aaaha kɛkɛ. Shwapoi anɔkwɛlɔi babaoo yɛ miishɛɛ diɛŋtsɛ yɛ anɔkwale lɛ he, ni esa akɛ atsu nakai miishɛɛ lɛ he nii. Yɛ shihilɛi komɛi amli lɛ, ekolɛ abaanyɛ asusu Biblia lɛ he loo akase nii yɛ nitsumɔ he lɛ nɔŋŋ po. Yɛ shihilɛi krokomɛi amli hu lɛ, bo kɛ mɔ ni yɔɔ he miishɛɛ lɛ baanyɛ akpe yɛ be mli ni atee hejɔɔmɔ shwane loo yɛ be kroko ni sa mli.

²⁹ Nɔkwɛlɔ gbɛfalɔ ko tee shwapo bibioo ko nɔkwɛlɔ ko ŋɔɔ, ni ebi lɛ koni eha efee Biblia mli nikasemɔ he nɔkwɛmɔ nɔ etsɔɔ lɛ. Beni abi lɛ bei abɔ ni nɔkwɛmɔ nɔ lɛ baahe lɛ, nɔkwɛlɔ gbɛfalɔ lɛ kɛɛ ebaahe minitii 15 pɛ. Yɛ no hewɔ lɛ, shwapo nɔkwɛlɔ lɛ kɛ okadi ni tsɔɔ akɛ: “Kuu Osɛɛ Oba yɛ Minitii 20 Sɛɛ,” tsotsoro shi yɛ shinaa lɛ naa, ni egbala sɛii enyɔ, ni amɛyi enyɔ lɛ susu klɛŋklɛŋ kukuji enumɔ ni yɔɔ Nilee wolo lɛ mli lɛ he. Nuu anɔkwafo nɛɛ ná nɔ ni ekase lɛ he miishɛɛ aahu akɛ etee eyabo Maŋshiɛmɔ lɛ toi, kɛ Buu-Mɔɔ Nikasemɔ lɛ nakai Hɔgbaa lɛ, ni ekpɛlɛ nɔ akɛ ebaatsa nikasemɔ lɛ nɔ yɛ otsi ni nyiɛ sɛɛ lɛ mli.

³⁰ Kɛ obaabi ni okɛ mɔ ko akase nii yɛ nitsumɔ he ko lɛ, obaanyɛ okɛɛ akɛ: “Wɔ Biblia mli nikasemɔ he gbɛjianɔtoo lɛ heɔ minitii 15 pɛ ni wɔkɛtsɔɔ bɔ ni afeɔ lɛ. Kɛ ebaahi lɛ, mana he miishɛɛ akɛ matsɔɔ bo bɔ ni afeɔ lɛ ahaa.” Agbɛnɛ yé be ni eto lɛ nɔ. Kɛ anyɛŋ akɛ be kakadaŋŋ agba sane yɛ nitsumɔ he lɛ, ekolɛ ebaahi akɛ oooya shwapo nɔkwɛlɔ lɛ ŋɔɔ yɛ shia.

³¹ Kuu Osɛɛ Kɛ Okɛ Woji Hako Po: Miishɛɛ fioo kpo ni ajieɔ lɛ sa kɛha sɛɛsaramɔ, kɛ akɛ woji eha loo akɛhako. Yɛ anɔkwale mli lɛ, kɛ eyɛ faŋŋ akɛ shiatsɛ lɛ bɛ Maŋtsɛyeli shɛɛ sane lɛ he miishɛɛ lɛ, ehi akɛ oooya mɛi krokomɛi aŋɔɔ.

³² Yɛ shia kɛ shia nitsumɔ lɛ mli lɛ, nyɛmi yoo ko kɛ obalayoo ko ni jie naanyobɔɔ su kpo waa ni kpoo kwraa akɛ ebaahe woji tɛtrɛbii lɛ kpe. Shiɛlɔ lɛ ŋma akɛ: “Mikɛ gbii pii susu ehe, ni mikpɛ miyiŋ akɛ masumɔ ni mikɛ lɛ awie ekoŋŋ.” Yɛ naagbee lɛ, nyɛmi yoo lɛ sɔle, efee ekãa, ni etswa obalayoo lɛ shinaa lɛ. Ena miishɛɛ waa beni shiatsɛ lɛ bi ni eba mli lɛ. Aje Biblia mli nikasemɔ shishi, ni afee ekoŋŋ yɛ gbi ni nyiɛ sɛɛ lɛ nɔ. Yɛ be ni sa mli lɛ, shiatsɛ lɛ ba anɔkwale lɛ mli.

³³ Too Gbɛjianɔ Kɛtsɔ Hiɛ Koni Otsu Babaoo: Ajie yi akɛ, akɛ bei komɛi atsu nii yɛ otsi lɛ mli akɛfee sɛɛsaramɔi. Abaanyɛ atsu babaoo kɛ ato he gbɛjianɔ jogbaŋŋ. Too hei ni obaafee sɛɛsaramɔi yɛ lɛ anaa yɛ he ni obaatsu shia kɛ shia nitsumɔ lɛ yɛ lɛ oshwie shi. Kɛ tsɔne mli nyɛtaa kɛfeɔ sɛɛsaramɔ lɛ, esa akɛ afee kuu lɛ bibioo bɔni afee ni mɔ fɛɛ mɔ ana hegbɛ afee sɛɛsaramɔi. Esa akɛ tsɔne kudɔlɔ lɛ ale hei ni abaafee sɛɛsaramɔi lɛ yɛ lɛ kɛtsɔ hiɛ, koni akatsɔ hei ni he ehiaaa.

³⁴ Mɛi ni yeɔ omanye yɛ sɛɛsaramɔi kɛ shia Biblia mli nikasemɔi ashishijee mli lɛ kɛɔ akɛ, ehe miihia ni ajie mɔ hesusumɔ ni ayɔɔ yɛ gbɔmɛi ahe yɛ anɔkwale mli lɛ kpo, ni asusu amɛhe lolo yɛ be mli ni atee amɛŋɔɔ klɛŋklɛŋ lɛ sɛɛ po. Ehe miihia hu ni ana Biblia mli sane ko ni ŋɔɔ, ni agba he sane, ni ato gbɛjianɔ kɛha sɛɛsaramɔ dani ashi yɛ be mli ni atee jɛmɛ klɛŋklɛŋ kwraa lɛ. Agbɛnɛ hu, ehe miihia ni oku sɛɛ oya nɔŋŋ ni odi miishɛɛ lɛ sɛɛ. Esa akɛ aha oti akɛ aaaje Biblia mli nikasemɔ shishi lɛ ahi jwɛŋmɔ mli daa nɛɛ.

³⁵ Su ko ni he hiaa waa ni haa mɔ yeɔ omanye yɛ sɛɛsaramɔ nitsumɔ lɛ mli ji ekãafeemɔ. Te afeɔ tɛŋŋ anaa? Bɔfo Paulo hãa hetoo akɛ ‘wɔnaa ekaa’ kɛjajeɔ sanekpakpa lɛ wɔtsɔɔ mɛi krokomɛi yɛ “wɔ-Nyɔŋmɔ lɛ mli.” Kɛ ehe miihia ni oya ohiɛ yɛ enɛ gbɛfaŋ lɛ, sɔlemɔ oha Yehowa kɛha yelikɛbuamɔ. Kɛkɛ lɛ, yɛ osɔlemɔ lɛ kɛ gbeekpamɔ naa lɛ, yaa mɛi fɛɛ ni yɔɔ he miishɛɛ lɛ aŋɔɔ. Eka shi faŋŋ akɛ Yehowa baajɔɔ omɔdɛŋbɔɔ lɛ nɔ!

[Akrabatsa ni yɔɔ baafa 3]

Bɔ ni Aaafee Aye Omanye yɛ Sɛɛsaramɔi Amli

■ Na gbɔmɛi ahe miishɛɛ diɛŋtsɛ.

■ Halamɔ Biblia mli sane ko ni ŋɔɔ kɛha sanegbaa.

■ Too gbɛjianɔ kɛha sɛɛsaramɔ ni yeɔ omanye be fɛɛ be.

■ Yaa nɔ osusu mɔ lɛ he yɛ be mli ni oshi otee sɛɛ.

■ Kuu osɛɛ yɛ gbi kome loo gbii enyɔ sɛɛ obadi miishɛɛ lɛ sɛɛ.

■ Ha oti akɛ obaaje Biblia kasemɔ shishi lɛ ahi ojwɛŋmɔ mli daa.

■ Sɔlemɔ kɛha yelikɛbuamɔ koni ona ekãa kɛha nitsumɔ nɛɛ.