Okɛ Woji Tɛtrɛbii Iɛ Atsu Nii ni Mɛi Krokomɛi Ana He Sɛɛ

¹ Kwɛ bɔ ni wɔmii shɛ wɔhe ha beni wɔnine shɛ Buu-Mɔɔ lɛ kɛ Awake! ni ba nyɛsɛɛ nɛɛ lɛ anɔ. Wɔmiinya hegbɛ ni wɔna akɛ wɔɔkane enɛɛmɛi oya nɔŋŋ koni wɔna shɛɛsane ni akɛhaa yɛ mli lɛ he sɛɛ lɛ he. Kɛfata emli nikasemɔ ni baaye abua wɔ akɛ aŋkroaŋkroi lɛ he lɛ, eji yiŋtoo kpakpa akɛ wɔɔtao emli saji otii komɛi ni wɔɔnyɛ wɔkɛtsu nii yɛ woji tɛtrɛbii lɛ kɛ mɛi krokomɛi ahamɔ mli. Wɔbaasumɔ akɛ wɔɔkadi emli fai komɛi ni mɛi ni yɔɔ wɔ asafo lɛ shikpɔŋkuku lɛ mli lɛ baanya he titri lɛ wɔshwie shi loo ni wɔŋmala lɛ bibiibii komɛi yɛ wɔwoji tɛtrɛbii ni ji wɔ diɛŋtsɛ wɔnɔ lɛ anaa bɔni afee ni ekai wɔ yɛ emli saji otii komɛi ni wɔkɛ aaatsɔɔ mɛi yɛ hei ni wɔyɔɔ lɛ he.

² Wɔwoji lɛ amli sɛɛnamɔi hiɔ shi daa. Eyɛ mli akɛ klɛŋklɛŋ kwraa lɛ wɔmiigbala jwɛŋmɔ kɛmiiba woji tɛtrɛbii ni wɔnine shɛ nɔ nyɛsɛɛ nɛɛ nɔŋŋ lɛ anɔ moŋ, shi ehe ehiaaa ni wɔshɛrɛ ememeji lɛ wɔshwie, ejaakɛ amɛmli saji lɛ abe hooo. Ha ememeji lɛ ahi oshiɛmɔyaa baagi lɛ mli bɔni afee ni nine ashɛ nɔ yɛ shiɛmɔ nitsumɔ lɛ mli. Enɛɛmɛi ahe baanyɛ aba sɛɛnamɔ kɛ ana ale shiatsɛ lɛ hiamɔ nii pɔtɛɛ ko he sane lɛ. Kɛ nyɛ asafo lɛ yɛ woji tɛtrɛbii memeji lɛ, no lɛ esa akɛ ato he gbɛjianɔ kɛha woji tɛtrɛbii atafaa titri ko bɔni afee ni akɛye abua ni fɛɛ ata.