Shia Biblia Mli Nikasemɔ Feemɔ
1 Te afeɔ shia Biblia mli nikasemɔ ni mɔɔ shi ahaa tɛŋŋ? Mɛɛ nɔkwɛmɔ nɔ titri ko wɔyɔɔ? Mɛɛ gbɛ nɔ abaatsɔ asusu ŋmalɛi ni yɔɔ nikasemɔ lɛ mli lɛ ahe? Namɔ esa akɛ ekane kukuji lɛ amli? Kɛfata shishijee gbɛ ni atsɔɔ nɔ afeɔ nikasemɔ lɛ he lɛ, mɛni hu he hiaa koni eye ebua nikaselɔ lɛ ni eha anɔkwale lɛ atsɔ enɔ? Mɛɛ tɛmɔtɛi esa akɛ atsi he kɛjɛ he?
2 Bɔ ni Afeɔ Nikasemɔ Ahaa: Kɛ wɔɔwie he lɛ, shia Biblia nikasemɔ feemɔ tamɔ gbɛ ni atsɔɔ nɔ afeɔ Buu-Mɔɔ Nikasemɔ lɛ nɔŋŋ. Klɛŋklɛŋ lɛ, abaakane kuku ni abaasusu he lɛ mli. Kɛkɛ lɛ mɔ ni kwɛɔ nikasemɔ lɛ nɔ lɛ ebi nakai kuku lɛ mli sanebimɔ ni aŋma lɛ, ni ebaaha nikaselɔ lɛ aha hetoo. Kɛ nikaselɔ lɛ shashao shi lɛ, esa akɛ nɔkwɛlɔ lɛ afee klalo akɛ ebaabi saji krokomɛi ni baaha nikaselɔ lɛ asusu saneyitso ni nyɛwieɔ he lɛ he, koni enyɛ eshɛ sane naamuu ni ja he.
3 Nyɛsusua bɔ ni ŋmalɛi lɛ kɔɔ kuku lɛ mli sane he ehaa lɛ he. Tsɔɔmɔ nikaselɔ lɛ bɔ ni eeefee ena ŋmalɛi ni aŋmala emli wiemɔi lɛ, ni okɛ lɛ asusu bɔ ni ekɔɔ he ehaa lɛ he. Kɛ atsɛ ŋmalɛi lɛ ayisɛɛ shi aŋmalaaa emli wiemɔi lɛ, no lɛ ehi akɛ nyɛkane kɛjɛ Biblia lɛ mli, kɛji amɛsɛɛ kɛɛɛ fe nine. No lɛ ha nikaselɔ lɛ akane, koni etsɔɔ bɔ ni efiɔ nɔ ni atsɔɔ yɛ kuku lɛ mli lɛ sɛɛ, loo egbalaa mli faŋŋ ehaa.
4 Ye Obua Nikanelɔ Iɛ ni Eha Anɔkwale Iɛ Atsɔ Enɔ: Wo nikaselɔi lɛ hewalɛ ni amɛsaa amɛhe jogbaŋŋ kɛha nikasemɔ lɛ. Maa nɔ mi oha amɛ akɛ nikanemɔ he miihia waa kɛha nikasemɔ. Kɛ nikaselɔ lɛ kaneɔ nii ni abaakase lɛ babaoo ni ejwɛŋɔ nɔ lɛ, ehi jogbaŋŋ. Nɔkwɛlɔ komɛi haa nikaselɔ lɛ kaneɔ kukuji lɛ fɛɛ yɛ Biblia nikasemɔ lɛ mli. Mɛi krokomɛi hu kaneɔ ekome, kɛkɛ lɛ amɛha nikaselɔ lɛ hu ekane ekome. Esa akɛ asusu enɛ he yɛ gbɛ kpakpa nɔ, ni aha nikaselɔ lɛ hiɛyaa yɛ mumɔŋ ahi jwɛŋmɔ mli.
5 Nii lɛ kasemɔ yɛ woloŋlee gbɛ folo kɛkɛ nɔ lɛ baanyɛ aye abua nikaselɔ lɛ ni ena nilee moŋ, shi ani eheɔ nɔ ni ekaseɔ lɛ eyeɔ? Kɛji eeeha anɔkwale lɛ atsɔ lɛ diɛŋtsɛ enɔ lɛ, no lɛ esa akɛ ena bɔ ni nikasemɔ lɛ saa lɛ diɛŋtsɛ ehe ehaa. Te enuɔ nɔ ni ekaseɔ lɛ he ehaa tɛŋŋ? Mɛɛ gbɛ nɔ ebaanyɛ ekɛ nɔ ni ekase lɛ atsu nii yɛ? Tsɔ niiamlitaomɔ sanebimɔi anɔ oshɛ nikaselɔ lɛ tsui he.
6 Kwa Tɛmɔtɛi: Tɛmɔtɛi komɛi yɛ ni esa akɛ akwa beni afeɔ Biblia mli nikasemɔ lɛ. Kɛ saji komɛi te shi, ni ekɔɔɔ sane ni nyɛsusuɔ he lɛ he lɛ, bei pii lɛ ehi jogbaŋŋ akɛ nyɛaasusu he yɛ nikasemɔ lɛ naagbee aloo yɛ be kroko mli. Agbɛnɛ hu, ehe miihia waa akɛ aha nikaselɔ lɛ aha saji ahetoo yɛ lɛ diɛŋtsɛ ewiemɔi amli fe ni eeekane kɛjɛ wolo lɛ mli. Enɛ baaye ebua bo, ákɛ nikasemɔ nɔkwɛlɔ lɛ, koni ona akɛ ani nikaselɔ lɛ miinu nɔ ni nyɛkaseɔ lɛ shishi lo.
7 Mɛni hewɔ okɛfeee oti ni ma ohiɛ akɛ kɛ hoo lɛ obaafee Biblia mli nikasemɔ kome? Ejeee nitsumɔ ni wa, kɛ okɛ ohe fɔ Yehowa nɔ ni onyiɛ gbɛ ni atsɔɔ nɔ afeɔ Buu-Mɔɔ Nikasemɔ lɛ sɛɛ. Gbɛ ni mɔɔ shi fe fɛɛ ni wɔɔtsɔ nɔ wɔtsɔɔ mɛi krokomɛi anɔkwale lɛ ni wɔfee kaselɔi ji kɛtsɔ shia Biblia mli nikasemɔ feemɔ nɔ. Kɛtsɔ enɛ feemɔ nɔ lɛ, bo hu obaana miishɛɛ ni jɛɔ gbɛfaŋnɔ ni mɔɔ shi yɛ Yesu famɔ ni yɔɔ Mateo 28:19, 20 lɛ mlibaa he nitsumɔ mli lɛ mli ŋɔɔmɔ.