Ye Obua Mɛi ni Yɔɔ he Miishɛɛ Lɛ
1 Kɛ wɔkɛ wɔ woji tɛtrɛbii lɛ kɛ teokrase woji krokomɛi ha lɛ, belɛ wɔmiigbɛ sane ni Yesu Kristo jaje etsɔɔ lɛ wɔmiishwa. No hewɔ lɛ esa akɛ wɔbɔ mɔdɛŋ krɛdɛɛ ni wɔku wɔsɛɛ wɔya mɔ fɛɛ mɔ ni jieɔ miishɛɛ kpo lɛ ŋɔɔ.
2 Kɛ owie sane pɔtɛɛ ko he yɛ Awake! lɛ mli ni shiatsɛ lɛ na he miishɛɛ lɛ, no lɛ wiemɔ otii krokomɛi ahe kɛjɛ nakai sane lɛ mli kɛ oku osɛɛ otee eŋɔɔ, ni oha osanegbaa lɛ adamɔ ŋmalɛ titri kome nɔ kɛ ekolɛ kuku kome loo kukuji enyɔ pɛ nɔ. Kɛ miishɛɛ lɛ tsa nɔ lolo lɛ, ha ele akɛ Awake! lɛ he baa sɛɛnamɔ kɛhaa weku muu lɛ fɛɛ. Eko fɛɛ eko wieɔ saneyitsei sɔrɔtoi ahe, tamɔ nibii ni ebɔle wɔhe kɛkpe lɛ, mɔ diɛŋtsɛ hiɛyaa, ŋmɛnɛ naagbai lɛ anaadaamɔ, kɛ sanebimɔi ni kɔɔ obalaŋtai ahe. Obaanyɛ oha shiatsɛ lɛ ale akɛ nine shɛɔ awake! lɛ nɔ kɛtsɔɔ shɛɛ nɔ, ni kɛtsɔ no nɔ lɛ, enine baashɛ sɔrɔtoi 24 nɔ yɛ afi mli.
3 Shi kɛ shiatsɛ lɛ bɛ Awake! hee ni eje kpo lɛ mli saji lɛ eko kwraa he miishɛɛ hu? Yɛ nɔ najiaŋ ni ooomu sanegbaa lɛ naa lɛ, ekolɛ obaasumɔ ni okɛ hegbɛ nɛɛ atsu nii ni okɛtsɔɔ shiatsɛ lɛ Yehowa Odasefoi anitsumɔ lɛ he nii babaoo, kɛtsɔ sane ni yɔɔ Reasoning wolo lɛ baafa 206 lɛ kɛ nitsumɔ nɔ.
4 Kɛji okɛ “Buu-Mɔɔ” lɛ eko eha momo kɛtsɔ 2 Timoteo 3:1-5 kɛ wolo tɛtrɛɛ lɛ mli sane ni yɔɔ baafa 2 lɛ nɔmimaa kɛ nitsumɔ nɔ lɛ, no lɛ kɛ oku osɛɛ lɛ, obaanyɛ okɛɛ nɔ ko tamɔ nɛkɛ:
◼ “Yɛ sane ni wɔgba nyɛsɛɛ lɛ mli lɛ, wɔsusu bɔ ni nibii ni yaa nɔ kɛbɔleɔ wɔ yɛ je lɛŋ ŋmɛnɛ lɛ shishinumɔ ji lɛ he. Etamɔ nɔ ni mɛi pii bɛ Nyɔŋmɔ kɛ shihilɛ he mlai ni etsɔɔ, taakɛ akɛha yɛ Biblia lɛ mli lɛ he miishɛɛ dɔŋŋ. Enɛ ena su ni mɛi jieɔ lɛ kpo yɛ mɛi krokomɛi ahe lɛ nɔ hewalɛ waa, taakɛ atsɔɔ mli yɛ ŋmalɛ ni yɔɔ 2 Timoteo 3:1-5 lɛ. Ani osusuɔ akɛ yiŋtoo kpakpa ko yɛ ni wɔɔdamɔ nɔ wɔkpa shihilɛ kpakpa gbɛ yɛ wɔsɛɛ?” Beni oŋmɛ gbɛ ni ejie naa sɛɛ lɛ, obaanyɛ ogbala ejwɛŋmɔ kɛya 2 Petro 3:13 nɔ. No sɛɛ lɛ gbelemɔ Reasoning wolo lɛ baafai 227-33, ni oma nɔ ni Maŋtsɛyeli lɛ baafee eha adesai lɛ nɔ mi oha lɛ.
5 Kɛ otee sɛɛsaramɔ lɛ, ekolɛ obaana akɛ shiatsɛ lɛ shashaoo shi fioo akɛ eeewie ejamɔ he, ejaakɛ ekolɛ enuɔ he akɛ eji lɛ diɛŋtsɛ esane. Obaanyɛ owie no ko tamɔ nɛkɛ:
◼ “Akɛni jamɔi babaoo yɛ “jeŋ ni miifee bibioo be fɛɛ be kɛtsɔ gbɛfaa kɛ sanegbaa gbɛi ni yɔɔ oya nɔ nɛɛ mli hewɔ lɛ, hemɔkɛyelii sɔrɔtoi naa mɛi anɔ hewalɛ yɛ je lɛŋ he fɛɛ he, ekɔɔɔ he eko akɛ wɔsumɔɔ loo wɔsumɔɔɔ. No hewɔ lɛ, mɛi krokomɛi asusumɔi ni wɔɔnu shishi lɛ baanyɛ eha sharamɔ kpakpa aba gbɔmɛi ni hiɛ hemɔkɛyelii sɔrɔtoi ateŋ. Ekolɛ ebaanyɛ ejie hetsɛ ni damɔ jamɔ mli hemɔkɛyelii anɔ lɛ eko kɛjɛ jɛmɛ. Te osusuɔ he ohaa tɛŋŋ?” Beni oha eha hetoo sɛɛ lɛ, gbalamɔ shiatsɛ lɛ jwɛŋmɔ kɛya he ni atsɔɔ Mankind’s Search for God wolo lɛ mli saji yɛ lɛ nɔ.
6 Nyɛhaa wɔbɔa mɔdɛŋ fɛɛ ni wɔɔnyɛ ni wɔya mɛi fɛɛ ni naa anɔkwale lɛ he miishɛɛ lɛ aŋɔɔ ni wɔye wɔbua amɛ kɛba gbɛ ni yaa naanɔ wala mli lɛ nɔ.—Yoh 4:23, 24.