Ani Osusuɔ Nii Ahe Kɛjɛɔ Ŋmalɛi Lɛ Amli?
1 Asraafonyo ni yɔɔ niiashikpamɔ ni miiya ta lɛ baahiɛ tawuu nii ni ebaawula ehe jogbaŋŋ. Ninenaa nitsulɔ ni he esa ni miisaa ehe ni etsu tsumaa nitsumɔ wulu ko he nii lɛ baahiɛ dɛŋdadei ni he hiaa ni ekɛgbe nitsumɔ lɛ naa Yehowa tsulɔ ni kɛ ehe ewo shiɛmɔ nitsumɔ lɛ mii lɛ baahiɛ ‘eklante’ yɛ edɛŋ ni ekɛtsu nii yɛ ŋaa mli be fɛɛ be ni eeena hegbɛ (Efes. 6:17) Ani enɛ ji anɔkwale yɛ ogbɛfaŋ diɛŋtsɛ? Kɛ okɛ ohe wo sɔɔmɔ nitsumɔ lɛ mli lɛ, ani ohaa Nyɔŋmɔ Wiemɔ lɛ wieɔ koni mumɔ krɔŋkrɔŋ lɛ asa otoibolɔi lɛ atsuii ahe?—Abɛi 8:1, 6.
2 Jeee be fɛɛ be shiɛmɔ feɔ nitsumɔ ni yɔɔ mlɛo. Yɛ shikpɔŋkukuji komɛi amli lɛ, gbɔmɛi efɔɔɔ shia hilɛ, ni bei pii lɛ mɛi ni wɔkɛkpeɔ yɛ shia lɛ bɛ deka, ni hegbɛ bibioo pɛ enɛ haa wɔnaa kɛhaa Biblia mli sanegbaa. Akɛni Biblia lɛ ji wɔ nikasemɔ wolo titri hewɔ lɛ, mɛɛ gbɛ nɔ wɔɔtsɔ wɔkɛtsu nii babaoo yɛ sɔɔmɔ lɛ mli ni wɔŋmɛ gbɛ ni eshɛɛ sane ni jɛ mumɔŋ lɛ ana wɔ toibolɔi lɛ anɔ hewalɛ yɛ?
3 Yɛ Hegbɛ Fɛɛ Hegbɛ Mli: Wɔbaasumɔ ni wɔkɛ Biblia lɛ atsu nii kɛkanya shiatsɛ lɛ yɛ shinaa fɛɛ shinaa naa. Esa akɛ wɔfee klalo akɛ wɔɔfee enɛ, ni wolo ni wɔkɛhaa lɛ kɔɔɔ he eko. Kɛ mɔ lɛ bɛ deka, ni be babaoo bɛ ni okɛ aagbele Biblia lɛ ni okane kuku kome loo enyɔ ko lɛ, ani obaanyɛ otsɛ ŋmalɛ ko sɛɛ aloo ewie he kuku dani okɛ wolo lɛ aha? No kɛkɛ po baanyɛ aha mɔ lɛ awa ni ebo bo toi—Heb. 4:12.
4 Akɛ nɔkwɛmɔ nɔ lɛ, kɛ okɛ December 8, 1993 Awake! ni mli sane ji ‘Jeŋ ni Hela Bɛ Mli’ lɛ miitsu nii lɛ, kɛ okɛ esɛɛ mfoniri lɛ tsɔɔ lɛ sɛɛ lɛ, obaanyɛ obi lɛ akɛ, “Ani oheɔ oyeɔ akɛ hela sɛɛ baafo be ko kɛ̃, be mli ni mɔ fɛɛ mɔ baana gbɔmɔtsoŋ hewalɛ kpakpa mli ŋɔɔmɔ?” Bɔ fɛɛ bɔ ni ebaajie naa eha lɛ, obaanyɛ okane ŋmalɛ ko tɛɛ kɛjɛ (biblia lɛ mli aloo owie he kuku, tamɔ Yesaia 33:24 loo Kpojiemɔ 21:4. Woji tɛtrɛbii lɛ ateŋ eko fɛɛ eko ni ohiɛ lɛ, esaaa ni ewaa kɛhaa bo akɛ okɛ ŋmalɛ kome loo enyɔ ko baatsa ehe wiemɔ nɔ, ni obaanyɛ okane loo ewie he kuku. Yɛ nɛkɛ gbɛ nɔ lɛ, ooha Nyɔŋmɔ Wiemɔ lɛ diɛŋtsɛ miiwie.
5 Yɛ Sɛɛsaramɔi Amli: Esa akɛ wɔsaa wɔhe dani wɔyafee sɛɛsaramɔi. Shi, bei pii lɛ, saji ni wɔsako wɔhe akɛ wɔbaawie he lɛ baatetee shi. Nɛkɛ be nɛɛ ji be mli ni Reasoning From the Scriptures wolo lɛ baanyɛ afee dɛŋdade ni he yɔɔ sɛɛnamɔ waa. Ŋmalɛi ni kɔɔ sane lɛ he, ni wɔɔtse yisɛɛ loo wɔkane kɛjɛ Reasoning wolo lɛ mli lɛ baaye ebua ni gbɔmɛi lɛ ana akɛ Nyɔŋmɔ sɔɔlɔi ji wɔ, shi jeee mɛi ni kɛ Wiemɔ lɛ yeɔ jara.—2 Kor. 2:17.
6 Kɛji ooya mɔ ko ni okɛ lɛ susuko sane pɔtɛɛ ko he lɛ ŋɔɔ ekoŋŋ lɛ, obaanyɛ ogbele Reasoning wolo lɛ kɛya saneyitso ko ni sa, tamɔ ‘Yesu Kristo,’ ‘Naagbee Gbii Lɛ,’ aloo ‘Gbohiiashitee,’ ni okɛ yitsei bibii lɛ ekome atsu nii kɛje sanegbaa lɛ shishi. Obaanyɛ oha shiatsɛ lɛ akane ŋmalɛi lɛ ekomɛi kɛjɛ lɛ diɛŋtsɛ e-Biblia lɛ mli. Yɛ nakai gbɛ nɔ lɛ, amɛbaana Biblia lɛ he miishɛɛ, ni Yehowa mumɔ krɔŋkrɔŋ lɛ baatsu nii kɛji amɛsumɔɔ jalɛ nifeemɔ.
7 Gbɛnaa nii ni ka wɔnɔ akɛ wɔshiɛ sanekpakpa lɛ ni wɔbɔ efɔŋ feelɔ lɛ kɔkɔ lɛ ji nɔni hiɛdɔɔ yɔɔ he. Yehowa shɛɛ sane ni, jeee wɔnɔ. Ha e-Wiemɔ, ni ji mumɔŋ klante lɛ aye abua bo.