Ani Oodũ Babaoo?
1 Afɔɔ wiemɔ akɛ: “Kɛ obɔɔ nɔ ko feemɔ he mɔdɛŋ babaoo lɛ, onáa he sɛɛ babaoo hu.” Enɛ ji anɔkwale titri lɛ yɛ wɔjamɔ lɛ he. Bei kɛ mɔdɛŋbɔɔ babaoo ni wɔkɛwoɔ wɔhesaamɔ kɛha kpeei, Maŋtsɛyeli shɛɛ sane lɛ shiɛmɔ, kɛ suɔmɔ ni wɔjieɔ lɛ kpo wɔtsɔɔ wɔnyɛmimɛi lɛ mli lɛ, babaoo hu wɔnaa mumɔŋ dalɛ he sɛɛ hu. Nɔ ni tamɔɔɔ enɛ lɛ hu ji anɔkwale. Kɛ wɔsumɔɔɔ ni wɔkɛ wɔhewalɛ awo nɔ ni wɔfeɔ lɛ mli loo wɔfee kɛ tsui fa-kɛ-fa lɛ, ani wɔbaanyɛ wɔkpa gbɛ lɛlɛŋ akɛ wɔbaawo yibii ni haa tsui nyɔɔ mɔ mli?
2 Bɔfo Paulo jaje shishitoo mla ni yɔɔ 2 Korintobii 9:6, (NW) lɛ jogbaŋŋ akɛ: “Mɔ ni lɛteɔ nii ahe eduɔ lɛ baakpa hu yɛ lɛtemɔ mli; ni mɔ ni duɔ babaoo lɛ baakpa babaoo hu.” Ani oodu babaoo?
3 Teemɔŋ Biblia Kasemɔ: Kɛ wɔɔfee sɔɔlɔi ni woɔ yibii lɛ, esa akɛ klɛŋklɛŋ lɛ, wɔdu babaoo yɛ wɔ teemɔŋ nikasemɔ mli. Esa akɛ mumɔŋ nibii aba wɔtsine waa. (Lala 119:97, 105; Mat. 5:3) Yɛ be mli ni daa gbi shihilɛ he haomɔi feɔ tamɔ jatsu yɛ wɔnɔ lɛ, ebiɔ mɔdɛŋbɔɔ diɛŋtsɛ ni haa mɔ hiɛ hiɔ emumɔŋ hiamɔ nii anɔ. Kɛha wɔteŋ mɛi pii lɛ, ebiɔ ‘ni wɔtsu wɔdekã he nii.’ (Efes. 5:16) Mɛi komɛi toɔ gbɛjianɔ koni amɛte shi mra fioo yɛ gbii lɛ ekomɛi amli koni amɛkase nii yɛ teemɔŋ. Mɛi krokomɛi hu eto gbɛkɛ komɛi amɛmashi kɛha nakai yiŋtoo lɛ. Mɛɛ gbɛ nɔ wɔtsɔɔ wɔkpaa babaoo? Wɔnaa hemɔkɛyeli ni mli wa, hiɛnɔkamɔ ni ma shi shiŋŋ, kɛ jwɛŋmɔŋ toiŋjɔlɛ kpakpa ni haa mɔ mii shɛɔ ehe.—Rom. 10:17; 15:4; 1 Pet. 1:13.
4 Asafoŋ Kpeei: David kɛɛ yɛ Lala 122:1 lɛ, akɛ: “Mimii shɛɔ mihe, kɛ akɛɛ mi akɛ: ‘Ba ni wɔtee Yehowa we lɛ!’ ” Ani onuɔ he nakai nɔŋŋ? Ni wɔɔdu babaoo lɛ tsɔɔ wɔ daa otsi kpeei sɔrɔtoi enumɔ lɛ ni wɔɔɔya daa. Feemɔ ojwɛŋmɔ akɛ oŋmɛŋ gbɛ ni kɔɔyɔŋ tsakemɔ ni atsi onaa. Bei pii lɛ, kɛ wɔye gbɛtsii nii pii anɔ kunim lɛ, wɔjɔɔmɔi hu faa pii.
5 Shɛ jɛmɛ mra ni no sɛɛ lɛ okɛ onyɛmimɛi lɛ agba sane fioo ko ni tswaa mɔ emaa shi. Lɛɛmɔ onaanyobɔɔ lɛ mli koni okɛ mɛi sɔrɔtoi babaoo hu afata he bɔ ni ooonyɛ. Saamɔ ohe jogbaŋŋ kɛha Buu-Mɔɔ Nikasemɔ kɛ kpeei krokomɛi lɛ koni onyɛ odu babaoo kɛtsɔ sane hetoohamɔ nɔ yɛ be mli ni onaa nakai hegbɛ lɛ. Kɛ oha mɛi krokomɛi ‘tɔrɔ’ yɛ kpeei ashishi lɛ, bo hu abaaha ‘otɔ.’—Abɛi 11:25.
6 Shiɛmɔ Nitsumɔ: Ekolɛ he ko kwraa bɛ ni shishitoo mla akɛ adu babaoo lɛ ji anɔkwale babaoo fe yɛ shiɛmɔ nitsumɔ lɛ mli. Kɛ wɔkɛ bei babaoo tsu enɛ lɛ, ehaa wɔnyɛɔ wɔnaa niiashikpamɔi ni ŋɔɔ, sɛɛsaramɔi ni woɔ yibii, kɛ Biblia mli nikasemɔi ni woɔ yibii.
7 Ni wɔɔdu babaoo yɛ shiɛmɔ nitsumɔ mli lɛ biɔ ni emɔ shi ni efa hu. Nɔ ko ni nɔ bɛ ni baaye abua ni wɔ sɔɔmɔ nitsumɔ lɛ afee nɔ ni mɔɔ shi jogbaŋŋ ji Reasoning wolo lɛ. Baafai 9-15 toɔ hiɛkpamɔ wiemɔi ni fa fe 40 ni wieɔ saji 18 ahe lɛ anaa eshwieɔ shi koni eye ebua ni etee mɛi amiishɛɛ shi yɛ shinaai anaa. Kɛ ona akɛ mɔ ko ena he miishɛɛ lɛ, bɔɔ mɔdɛŋ ni okadi enɛ koni onyɛ oku osɛɛ ni oyakpa nɔ ni ejɛ onidumɔ lɛ mli eba lɛ. Hiɛnɔkamɔ yɛ akɛ omɔdɛŋbɔi lɛ baaha ofee Biblia mli nikasemɔ, ni obaanyɛ otsɔɔ mɔ kroko hu bɔ ni afeɔ aduɔ babaoo.
8 Kɛ wɔdu babaoo lɛ, wɔbaanyɛ wɔkpa jɔɔmɔi babaoo gbɛ kɛjɛ Yehowa dɛŋ.—Mal. 3:10.