Babaoo Dumɔ kɛ Jɔɔmɔi Babaoo Baa
1 Wɔ fɛɛ wɔmiikpa shiwoi kpakpai ni yɔɔ Nyɔŋmɔ Wiemɔ lɛ mli lɛ amlibaa gbɛ. Ŋmɛnɛ po, Yehowa kɛ jɔɔmɔi babaoo ni haa wɔshihilɛ feɔ nɔ ni miishɛɛ yɔɔ mli fataa he ehaa wɔ. Shi kɛlɛ, he ni wɔ diɛŋtsɛ lɛ wɔnáa he sɛɛ kɛyashɛɔ lɛ damɔ mɔdɛŋ ni wɔbɔɔ yɛ he lɛ nɔ titri. Taakɛ bɔfo Paulo wie he lɛ, “mɔ ni duɔ yɛ jɔɔmɔ mli lɛ, jɔɔmɔ mli nɔŋŋ eeekpa yɛ.” (2 Kor. 9:6) Susumɔ hei enyɔ ni abaanyɛ akɛ shishitoo mla nɛɛ atsu nii lɛ he okwɛ.
2 Wɔ Diɛŋtsɛ Wɔ Sɔɔmɔ Nitsumɔ Lɛ: Sanekpakpa lɛ ni wɔɔgba mɛi krokomɛi be fɛɛ be ni wɔɔŋɔ hegbɛ lɛ ni wɔkɛye odase lɛ kɛ jɔɔmɔi babaoo baa. (Abɛi 3:27, 28) Esa yijiemɔ akɛ mɛi pii miidu babaoo kɛtsɔ gbɛfaŋnɔ ni amɛnáa yɛ sɔɔmɔ nitsumɔ lɛ mli lɛ mlilɛɛmɔ nɔ, ni gbɛgbalɔi awamɔ loo daa gbɛgbamɔ fata he. Wɔ fɛɛ wɔbaanyɛ wɔdu babaoo kɛtsɔ hiɛmiamɔ ni wɔkɛaaku wɔsɛɛ kɛyatsu miishɛɛ fɛɛ ni ajie lɛ kpo lɛ kɛ Biblia lɛ kasemɔ he hegbɛ ni wɔkɛaaha be fɛɛ be ni hegbɛ aaaba lɛ nɔ. (Rom. 12:11) Nɔ ni jɛɔ hewalɛ ni wɔkɛwoɔ mli yɛ gbɛ̀i nɛɛ anɔ lɛ mli baa ji niiashikpamɔi ni woɔ mɔ hewalɛ kɛ miishɛɛ ni faa babaoo yɛ wɔ sɔɔmɔ nitsumɔ lɛ mli.
3 Maŋtsɛyeli lɛ He Nibii Asɛɛfimɔ: Paulo wie ‘babaoo dumɔ’ kɛkɔ heloo gbɛfaŋ nibii ni akɛaaha he. (2 Kor. 9:6, 7, 11, 13) Ŋmɛnɛ, babaoo yɛ ni wɔbaanyɛ wɔfee yɛ gbɔmɔtsoŋ kɛ heloo mli ni wɔkɛfi Maŋtsɛyeli lɛ he nibii asɛɛ. Wɔbaanyɛ wɔye wɔbua yɛ Maŋtsɛyeli Asai kɛ Kpeei Asai amaamɔ mli. Wɔbaanyɛ ni wɔkɛ wɔhe aha hu yɛ nɛkɛ anɔkwa jamɔ hei nɛɛ ahe tsemɔ kɛ saamɔ mli. Kɛfata he lɛ, wɔbaanyɛ ni wɔkɛ shika aye abua nyɔmɔ ni asafo ni wɔyɔɔ mli lɛ bɔɔ kɛ agbɛnɛ hu jeŋ muu fɛɛ Maŋtsɛyeli-shiɛmɔ kɛ kaselɔ-feemɔ nitsumɔ lɛ. Yɛ be mli ni wɔ fɛɛ wɔtsuɔ wɔ gbɛfaŋnɔ lɛ, kwɛ bɔ ni wɔmli filiɔ wɔ babaoo akɛ wɔɔna Yehowa jɔɔmɔ yɛ nɛkɛ nitsumɔ ni Nyɔŋmɔ efã nɛɛ nɔ!—Mal. 3:10; Luka 6:38.
4 Nyɔŋmɔ Wiemɔ lɛ woɔ wɔ ŋaa akɛ ‘wɔfee ejurɔ, ni wɔtsɔmɔ niiatsɛmɛi yɛ ejurɔfeemɔi agbɛfaŋ, wɔsumɔ nihamɔ, wɔnine akpɔ.’ Yɛ be mli ni wɔboɔ nakai famɔ lɛ toi lɛ, wɔnine shɛɔ jɔɔmɔi babaoo nɔ bianɛ. Yɛ nakai beaŋ nɔŋŋ lɛ, ‘wɔmiibɔ jwetri wɔmiiha wɔhe, ni efee shishitoo kpakpa eha be ni baaba lɛ, koni wɔmɔ anɔkwa wala lɛ mli.’—1 Tim. 6:18, 19.