Mɛi Krokomɛi ni Wɔɔye Wɔbua Amɛ ni Amɛwo wɔ Bɔlɔ lɛ Hiɛ Nyam
1 Ani onuɔ he taakɛ lalatsɛ lɛ nu he beni ekɛɛ akɛ: “Yehowa, . . . bo oŋɔɔ wala nu bu yɔɔ” lɛ? (Lala 36:6, 10) Te wɔɔfee tɛŋŋ ni wɔ hu wɔnyɛ wɔye wɔbua mɛi krokomɛi koni amɛhiɛ asɔ ni amɛkɛ woo aha Yehowa akɛ wɔ Bɔlɔ lɛ? Kɛtsɔ Life—How Did It Get Here? By Evolution or by Creation? lɛ kɛhamɔ nɔ yɛ June. Nɛkɛ wolo nɛɛ nɔ bɛ, ejaakɛ ekɛ shihilɛ mli ni Nyɔŋmɔ yɔɔ lɛ he odaseyeli ni ma shi shiŋŋ haa ni etsɔɔ nɔ hewɔ ni sutsakemɔ tsɔɔmɔ nyɛŋ afee anɔkwale lɛ mli faŋŋ. Etswaa hekɛnɔfɔɔ ni ayɔɔ yɛ Biblia mli akɛ Nyɔŋmɔ Wiemɔ lɛ emaa shi. Eka shi faŋŋ akɛ wɔmiisumɔ ni mɔ fɛɛ mɔ ale bɔ ni nibɔɔ, ni jeee sutsakemɔ lɛ, woɔ Yehowa Nyɔŋmɔ hiɛ nyam.
2 Naa shiɛmɔ wiemɔ kuku ko, ni yɔɔ tɛ̃ɛ.
Beni oŋa shiatsɛ lɛ sɛɛ mli lɛ, okɛ mfoniri ni yɔɔ baafa 6 lɛ atsɔɔ lɛ, ni obi akɛ:
◼ “Mɛɛ gbɛ nɔ wala tsɔ eje shishi yɛ shikpɔŋ nɔ? Mɛi komɛi kɛɛ fɛɛ balɛ trukaa. Biblia lɛ kɛ enɛ he yijiemɔ fɛɛ haa Nyɔŋmɔ. Te osusuɔ tɛŋŋ? [Ha ni eha hetoo.] Wolo nɛɛ kɛ hetoi ni kɛ Biblia lɛ kɛ jeŋ nilee mli anɔkwa saji lɛ kpaa gbee kwraa kɛmɔɔ shi haa. Masumɔ akɛ ohe koni onyɛ okane odaseyelii lɛ fɛɛ mli ni okpɛ oyiŋ oha bo diɛŋtsɛ ohe.”
3 Yɛ gbɛ kroko nɔ lɛ, beni ojie ohe kpo sɛɛ lɛ, obaanyɛ okɛɛ akɛ:
◼ “Yɛ jeŋ ni ŋmɛnɛŋmɛnɛ jeŋ nilee be nɛɛ mli lɛ, ani eji nɔ ni waaa kwraa akɛ aaahe nibɔɔ aye, aloo osusuɔ akɛ wɔba biɛ trukaa? [Ha ni eha hetoo.] Bo lɛ kadimɔ nɔ ni Biblia lɛ susuɔ yɛ sane nɛɛ he lɛ. [Kanemɔ Hebribii 3:4.] Ani oheŋ oyeŋ akɛ tsu fɛɛ tsu yɛ emalɔ? No hewɔ lɛ, ani jeŋ muu lɛ fɛɛ baanyɛ aba shihilɛ mli ni jeee mɔ ko fee?” Okɛ mfoniri ni yɔɔ Creation wolo lɛ baafa 114 lɛ atsɔɔ lɛ, koni no sɛɛ lɛ ogbala ejwɛŋmɔ kɛya sane hesusumɔ ni atsɔɔ yɛ kuku 2 ni yɔɔ baafa 115 lɛ nɔ. Beni okɛ wolo lɛ eha sɛɛ lɛ, kɛɛmɔ lɛ akɛ kɛ oba be kroko lɛ nyɛbaasusu sanebimɔ ni ji, Mɛni ji gbɔmɔ kɛ shikpɔŋ lɛ wɔsɛɛ be shihilɛ? he.
4 Aloo beni oŋa shiatsɛ lɛ sɛɛ lɛ, obaanyɛ okɛɛ akɛ:
◼ “Te osusuɔ akɛ wɔ klɛŋklɛŋ blematsɛmɛi lɛ tamɔ ha tɛŋŋ? [Ha ni eha hetoo.] Ani amɛtamɔ nɛkɛ ‘gbɔmɔ-aduŋ’ nɛɛ? [Gbelemɔ kɛya Creation wolo lɛ baafa 83.] Kadimɔ nɔ ni Biblia lɛ kɛɔ yɛ Bɔfoi lɛ Asaji 17:26. [Kanemɔ.] No hewɔ lɛ, mɛni nɔ adamɔ ni atɛŋɔ ‘gbɔmɛi-aduji’ lɛ?” Gbalamɔ ejwɛŋmɔ kɛya niŋmaa ni yɔɔ mfoniri ni atɛŋ lɛ shishigbɛ yɛ baafa 89 lɛ nɔ. Kɛɛmɔ shiatsɛ lɛ akɛ ebaanyɛ ena wolo lɛ kanemɔ kɛ sanebimɔ nɛɛ hetoo ni eeele lɛ he sɛɛ.
5 Yɛ gbɛ kroko hu nɔ lɛ obaanyɛ otsɔɔ lɛ “Creation” wolo lɛ sɛɛ mfoniri lɛ ni okɛɛ akɛ:
◼ “Wɔmiibi wɔnanemɛi sane ŋmɛnɛ akɛ, Ani gbɔmɔ tsɔ sutsakemɔ loo nibɔɔ nɔ kɛba biɛ? Te osusuɔ tɛŋŋ? [Ha ni eha hetoo.] Eyɛ mli akɛ mɛi ni etee skul kɛtee hiɛ waa lɛ ateŋ mɛi pii kpɛlɛɔ sutsakemɔ tsɔɔmɔ lɛ nɔ akɛ eji anɔkwale moŋ, shi mɛi ni etee skul kɛtee hiɛ waa lɛ ekomɛi hu yɛ ni amɛheee no amɛyeee. Bo lɛ kadimɔ bɔ ni tsutsu ŋulamiiaŋkwɛlɔ ko mu sane naa eha nɛɛ. [Maa otii ni yɔɔ baafai 122-3 lɛ nɔ mi.] Esa akɛ wɔ diɛŋtsɛ wɔpɛi odaseyeli lɛ mli koni wɔna nɔ ni esa akɛ wɔhe wɔye—sutsakemɔ aloo nibɔɔ.” Dani obaashi ni oya lɛ, teemɔ sanebimɔ ko shi ni abaanyɛ aha hetoo kɛ otee eŋɔɔ be kroko.
6 Ani ooshwe ni oye obua mɛi krokomɛi koni amɛkase anɔkwalei ni yɔɔ naakpɛɛ ni kɔɔ wɔ Bɔlɔ kɛ esuɔmɔ yiŋtoo yɛ enibɔɔ he lɛ he nii? Creation wolo lɛ baanyɛ aye abua bo koni ofee nakai. Ewoɔ wɔ Bɔlɔ Kpeteŋkpele, Jeŋ Muu Fɛɛ Nɔyelɔ Nuŋtsɔ Yehowa hiɛ nyam kɛtsɔɔ enitsumɔi lɛ yijiemɔ nɔ, kɛ enaakpɛɛ yiŋtoo koni atse egbɛi ahe koni ejɔɔ adesai kɛtsɔ Kristo Maŋtsɛyeli lɛ ni ehaa aleɔ lɛ nɔ.