Shiɛmɔ Wiemɔi ni Teeɔ Miishɛɛ Shi
1 Esa akɛ wɔjie henumɔ kɛ miishɛɛ diɛŋtsɛ kpo yɛ mɛi ni wɔkɛkpeɔ yɛ shiɛmɔ nitsumɔ lɛ mli lɛ ahe be fɛɛ be. Amɛjwɛŋmɔ ni wɔɔbi yɛ saji ahe lɛ tsɔɔ bulɛ ni wɔyɔɔ wɔhaa amɛsusumɔi Sane ni wɔkɛ amɛ wieɔ he lɛ kɛ saji ni wɔbiɔ amɛ lɛ baanyɛ akanya amɛ niiahesusumɔ, ni eeeha amɛsumɔ akɛ amɛaakase Nyɔŋmɔ kɛ eyiŋtoo ni eyɔɔ yɛ adesai ahe lɛ he nii babaoo.
2 Yɛ October mli lɛ, wɔbaagbala jwɛŋmɔ kɛba anɔkwale ni kɔɔ adebɔɔ he lɛ nɔ yɛ be mli ni wɔkɛ Life—How Did It Get Here? By Evolution or by Creation? wolo lɛ baa lɛ. Ŋɔɔ be ni bo diɛŋtsɛ oti wolo nɛɛ mli jogbaŋŋ, koni ohala otii pɔtɛɛ ni obaamamɔ nɔ mi. Kɛji nyɛmiigba Creation wolo lɛ mli sane lɛ, gbelemɔ wolo lɛ mli ni okɛha shiatsɛ lɛ. Wiemɔ saji otii pɔtɛɛ kɛ amɛhe mfonirii lɛ ahe. Okɛ miishɛɛ atsɔɔ sɛɛnamɔ diɛŋtsɛ ni yɔɔ nɛkɛ wolo fɛfɛo nɛɛ he.
3 Kɛ okɛ miishɛɛ tsɔɔ mɔ ni oji sɛɛ lɛ, obaanyɛ okɛɛ akɛ: “Ani nilee yɛ mli akɛ aaahe aye, yɛ nɛkɛ ŋmɛnɛŋmɛnɛ jeŋ ni nilee etee hiɛ yɛ mli nɛɛ mli, akɛ Nyɔŋmɔ ko yɛ ni bɔ wɔ kɛ shikpɔŋ fɛfɛo ni wɔyɔɔ nɔ nɛɛ?[Ŋmɛɛ gbɛ ni eha hetoo.] Kɛ wɔsusu bɔ ni je lɛŋ lɛɛ kɛ bɔ ni nibii yɔɔ naakpɛɛ yɛ shikpɔŋ nɔ kɛ je lɛŋ fɛɛ ha lɛ he lɛ,bɔ ni ato emli nibii ahe gbɛjianɔ pɛpɛɛpɛ lɛ feɔ wɔ fɛo waa diɛŋtsɛ. Ani enɛ yeee he odase akɛ Bɔlɔ ko yɛ? Kwɛmɔ Biblia lɛ susumɔ yɛ nɛkɛ sane nɛɛ he. [Kanemɔ Hebribii 3:4.] Nilee yɛ mli akɛ shia fɛɛ shia yɛ ehe gbɛjianɔtolɔ kɛ emalɔ. [ jiemɔ Creation wolo lɛ ni ogbele mfoniri ni yɔɔ baafa 114 lɛ.] Wɔ jeŋ muu nɛɛ fɛɛ yɛ naakpɛɛ kɛ gbeyei! Ani osusuɔ akɛ lɛ diɛŋtsɛ eba shihilɛ mli kɛkɛ?” No sɛɛ lɛ gbelemɔ baafa 122 ni okane nɔ ni aŋma yɛ watsi he mfoniri lɛ shishi lɛ. Abaanyɛ akɛ mfoniri kɛ ŋmalɛ ni atsɛ yisɛɛ yɛ baafa 127 lɛ hu atsu nii. Abaanyɛ ana otii krokomɛi hu ni yeɔ buaa yɛ Reasoning wolo lɛ baafai 84-8.
4 Aloo obaanyɛ okɛɛ akɛ: “Mɛni osusuɔ akɛ ehe hiaa kɛha adesai koni no aha amɛnyɛ amɛna anɔkwa toiŋjɔlɛ kɛ miishɛɛ yɛ shikpɔŋ nɛɛ nɔ? [ŋmɛɛ gbɛ ni ejie naa.] Biblia lɛ kɛɔ akɛ esa akɛ wɔshe Nyɔŋmɔ gbeyei ni wɔkpɛlɛ enɔ akɛ ŋwɛi kɛ shikpɔŋ Bɔlɔ.” Kanemɔ Kpojiemɔ 14:7, koni no sɛɛ lɛ ogbele Creation wolo lɛ kɛya ebaafai 140 kɛ 141, ni kɛ ebaahi lɛ okane kukuji 24 kɛ 26, he ni egbalaa mli yɛ akɛ ato shikpɔŋ lɛ he gbɛjianɔ koni adesai anyɛ ahi nɔ lɛ. Kɛji shiatsɛ lɛ miishɛɛ lɛ hiaa ni atsa sanegbaa lɛ nɔ lɛ, no lɛ gbelemɔ kɛya yitso 19 ni ogbala bɔ ni etsɛŋ ni shikpɔŋ nɔ paradeiso shihilɛ baaba diɛŋtsɛ lɛ mli otsɔɔ lɛ.
5 Kɛji shiatsɛ lɛ yiŋ feɔ lɛ kɔshikɔshi yɛ shihilɛ mli ni Bɔlɔ lɛ yɔɔ lɛ he lɛ, obaanyɛ okɛɛ akɛ:
“Mɛi pii kɛɔ kpaa gbee, titri lɛ yɛ amanehului ni anaa yɛ je lɛŋ fee lɛ hewɔ. Kɛji Nyɔŋmɔ ko yɛ lɛ, mɛni hewɔ ebaaŋmɛ piŋmɔ gbɛ? Ani obaanyɛ osusu naatsɔɔmɔ ko ni nilee yɔɔ mli lɛ he?” Obaanyɛ odamɔ bɔ ni ebaajie naa eha lɛ nɔ otsa nɔ kɛtsɔ Creation wolo lɛ yitso 16 kɛ nitsumɔ nɔ, koni okɛtsa sanegbaa lɛ nɔ. Aloo kɛji miishɛɛ fioo ko pɛ ekɛbo toi lɛ, obaanyɛ oma sane ni ji “Mɛni Hewɔ Gbɔmɛi Kpakpai Naa Amanehulu?’ ni je kpo yɛ September 15, 1992 Buu-Mɔɔ lɛ mli lɛ mli oti kome loo enyɔ ko pɛ nɔ mli. Abaanyɛ ana hetoi krokomɛi ni yeɔ buaa yɛ nɛkɛ sanebimɔ nɛɛ hu he yɛ Reasoning wolo lɛ mli, yɛ baafai 399-400. Bei komɛi lɛ, ebaahi akɛ oshi Nɔ Hewɔ ni Obaanyɛ Okɛ Ohe afɔ Biblia lɛ Nɔ dɛhiɛmɔ wolo lɛ eko oha lɛ.
6 Oti ni ma wɔhiɛ lɛ jeee ni wɔtee miishɛɛ shi yɛ Maŋtsɛyeli lɛ he sane lɛ he pɛ kɛkɛ, shi moŋ ni wɔje Biblia mli nikasemɔ shishi hu. Kwɛ bɔ ni eŋɔɔ wɔnaa ha akɛ wɔyɛ nɛkɛ wolo ni mfonirii fɛfɛji yɔɔ mli nɛɛ, ni egbalaa anɔkwale ni kɔɔ adebɔɔ he lɛ mli ni ewoɔ wɔ-Bɔlɔ Kpeteŋkpele lɛ hiɛ nyam hu! Eba akɛ wɔkɛaatsu nii jogbaŋŋ ni wɔkɛtee gbɔmɛi ni yɔɔ jalɛ tsuii ni wɔkɛ amɛ kpeɔ yɛ October mli lɛ amiishɛɛ shi.