Ani Obaanyɛ Oyafata Amɛhe Ekoŋŋ?
1 Nyɛsɛɛ afii enumɔ ni ho lɛ mli lɛ, gbɛgbalɔi 1,565 ni yɔɔ Ghana lɛ na akɛ ehe miihia ni amɛshi gbɛgbalɔi lɛ ateŋ. Ani oji amɛteŋ mɔ kome? Kɛ nakai ni lɛ, no lɛ ŋwanejee ko bɛ he akɛ oyɛ yiŋtoo ni ha oŋmɛɛ nɛkɛ hegbɛ nɛɛ he lɛ. Ekolɛ eji nɔ ko ni okpaaa gbɛ, ni onyɛŋ he nɔ ko ofee hu. Ani nakai yiŋtoo lɛ kã he eyɛ lolo? Kɛji gbɔmɔtsoŋ hewalɛ, shika gbɛfaŋ naagbai, aloo weku mli gbɛnaa nii ha ehe bahia akɛ okpa lɛ, ani oshihilɛ lɛ ehi kɛtee hiɛ saŋŋ? Ani obaanyɛ ofee tsakemɔi komɛi ni sa, ni baaŋmɛ bo gbɛ ni ona daa gbɛgbamɔ mli jɔɔmɔi lɛ amli ŋɔɔmɔ ekoŋŋ? Ani osusu he akɛ obaasaa oŋma gbɛbimɔ wolo ekoŋŋ? Amrɔ nɛɛ, daa gbɛgbalɔi 3,368 kɛ Ghana nitsumɔ he nine lɛ miisɔmɔ.
2 Taakɛ ole lɛ, nibii kɛ be he gbɛjianɔtoo kpakpa he miihia kɛji oooye omanye akɛ gbɛgbalɔ. Eyɛ mli akɛ bei pii lɛ, anaaa be babaoo kɛhaaa hiɛtserɛjiemɔ moŋ, shi bei pii lɛ, be kukuoo ni gbɛgbalɔ lɛ kɛjɔɔ ehe lɛ feɔ nɔ ni haa mɔ miishɛɛ waa, ni nyɔmɔwoo babaoo hu yɔɔ mli. (Abɛi 19:17; Bɔf. 20:35) Kɛ okɛ odeka fɛɛ tsu nii yɛ sɔɔmɔ lɛ mli lɛ, ebuɔ ohe kɛjɛɔ hewalɛ ni pɛsɛmkunya nibii asɛɛdii, kɛ ogbɔjɔ shihilɛ ni je lɛ diɔ sɛɛ lɛ baanyɛ ana yɛ onɔ lɛ he. Yehowa ewo shi akɛ kɛji okɛ ohe sha afɔle, ni okɛ Maŋtsɛyeli lɛ he nibii ye klɛŋklɛŋ gbɛhe lɛ, ebaafee bo niiatsɛ yɛ mumɔŋ. Eka shi faŋŋ akɛ obaana anɔkwa miishɛɛ kɛ tsui ni nyɔɔ mɔ mli kɛtsɔ otsui muu fɛɛ ni okɛtsuɔ nii yɛ Yehowa sɔɔmɔ mli lɛ nɔ.—Abɛi 10:22; Kol. 3:23, 24.
3 Ani esa akɛ abu be-fɛɛ sɔɔmɔ lɛ akɛ hegbɛ ko ni yɔɔ kɛha mɛi fioo krɛdɛɛ ko pɛ? Dabi. Yɛ wɔhenɔjɔɔmɔ kitakamɔ lɛ hewɔ lɛ, esa akɛ Kristofonyo fɛɛ Kristofonyo asusu be-fɛɛ sɔɔmɔ lɛ he waa kɛ hiɛdɔɔ, ja ekolɛ shihilɛ lɛ eŋmɛɛɛ gbɛ.—Mar. 12:30.
4 Kɛji eyɛ faŋŋ akɛ ogbɔmɔtsoŋ hewalɛ kɛ Ŋmalɛ naa gbɛnaa nii eŋmɛɛɛ bo gbɛ ni ofee gbɛgbalɔ amrɔ nɛɛ, kɛlɛ obaanyɛ ona nɔminaa akɛ Yehowa le ni enuɔ shishi hu. Ebaawo bo nyɔmɔ yɛ onɔkwayeli lɛ mli, yɛ nɔ ni oshihilɛ ŋmɛɔ gbɛ lɛ mli. (1 Kor. 4:2; 2 Kor. 8:12) Shi, kɛji etamɔ nɔ ni nibii hi kɛha bo akɛ ooofee gbɛgbalɔ ekoŋŋ lɛ, mɛni hewɔ oyanaaa onukpai asɛinɔtalɔ lɛ koni obi ni aha bo gbɛbimɔ wolo lɛ eko?
5 Ani Oweku lɛ Baanyɛ Aye Abua? Ekolɛ ehe bahia ni oyatsu weku mli gbɛnaa nii komɛi ahe nii, no hewɔ ni oshi amɛteŋ lɛ. Ani eeenyɛ ebalɛ akɛ agbɛnɛ weku lɛ mlibii krokomɛi baanyɛ amɛkɛ yelikɛbuamɔ aha, koni no aha onyɛ osaa obote gbɛgbamɔ nitsumɔ lɛ mli ekoŋŋ? Yɛ mɛi komɛi agbɛfaŋ lɛ, kɛji amɛna yelikɛbumaɔ fioo yɛ gbɛnaa nii komɛi ahe nitsumɔ mli lɛ, no lɛ amɛbaanyɛ amɛshɛ gbɛgbamɔ lɛ he ekoŋŋ.
6 Ekomefeemɔ kpakpa kɛ mɔdɛŋbɔɔ fioo ko ni weku lɛ mlibii krokomɛi lɛ kɛaaha lɛ baaha anyɛ afee enɛ. Ekolɛ yelikɛbuamɔ lɛ baanyɛ afee yelikɛbuamɔ yɛ shika aloo tsɔne gbɛfaŋ, kɛ agbɛnɛ hu be ni aaato daa koni afata amɛhe ni akɛ amɛ atsu nii kutuu yɛ sɔɔmɔ mli. Ekolɛ gbɛi krokomɛi hu yɛ ni amɛaatsɔ nɔ amɛye amɛbua. Kɛji shihilɛ lɛ eŋmɛɛɛ bo gbɛ ni osaa oŋɔ nɛkɛ sɔɔmɔ hegbɛ nɛɛ ekoŋŋ lɛ, ekolɛ abaanyɛ akɛ yelikɛbuamɔ nɛɛ aha weku lɛ mlinyo kroko ni baanyɛ afee nakai.
7 Mɛni hewɔ nyɛsusuuu sane nɛɛ he akɛ weku? Kɛji nyɛfee lɛ weku muu lɛ fɛɛ nitsumɔ lɛ, no lɛ ekolɛ gbɛkpamɔ kpakpa baanyɛ aba. Kɛ abaanyɛ akɛ gbɛgbalɔ kroko afata amɛhe lɛ, no lɛ weku muu lɛ fɛɛ baanyɛ anu he yɛ gbɛ ni ja nɔ akɛ amɛmiina mli gbɛfaŋnɔ. Ni jeee akɛ nɛkɛ nihamɔ mumɔ nɛɛ baaha Maŋtsɛyeli odaseyeli lɛ aya hiɛ yɛ shikpɔŋkuku lɛ mli kɛkɛ, shi moŋ ebaagbala weku lɛ kɛbɛŋkɛ amɛhe kpaakpa yɛ mumɔŋ.—Luka 6:38; Filip. 2:2-4.