Ani Kulɛ Oji Daa Gbɛgbalɔ?
1. Mɛɛ hegbɛ kpele mɛi babaoo náa, shi mɛni ehe bahiaa ni mɛi komɛi afee?
1 Yɛ afii ni eho lɛ amli lɛ, mɛi akpei abɔ ená hegbɛ kpele kɛmiisɔmɔ akɛ be fɛɛ shiɛlɔi yɛ “nitsɔɔmɔ” kɛ sanekpakpa lɛ “shiɛmɔ” nitsumɔ lɛ mli. (Bɔf. 5:42) Shi kɛlɛ, ehe bahiaa ni mɛi komɛi akpa gbɛgbamɔ nitsumɔ lɛ yɛ yiŋtoi srɔtoi ahewɔ. Kɛ́ be ko ni eho lɛ oji daa gbɛgbalɔ lɛ, ani opɛi oshihilɛ mli okwɛ akɛ amrɔ nɛɛ obaanyɛ okɛ ohe awo mli ekoŋŋ?
2. Mɛni hewɔ esa akɛ mɛi ni be ko ni eho lɛ amɛji gbɛgbalɔi lɛ apɛi amɛshihilɛ mli ekoŋŋ amɛkwɛ lɛ?
2 Shihilɛi Tsakeɔ: Ekolɛ nɔ ni ha okpa gbɛgbamɔ nitsumɔ lɛ jeee naagba dɔŋŋ amrɔ nɛɛ. Akɛ nɔkwɛmɔnɔ lɛ, kɛ́ okpa gbɛgbamɔ nitsumɔ lɛ akɛni onyɛɛɛ oná ŋmɛlɛtswai 90 ni ataoɔ daa nyɔɔŋ nɔ lɛ hewɔ lɛ, ani obaanyɛ obɔi ekoŋŋ, amrɔ nɛɛ ni atse nɔ kɛba ŋmɛlɛtswai 70 lɛ? Ani amrɔ nɛɛ onitsumɔ eba shi loo oweku sɔ̃i anɔ egbɔ kɛ́ okɛto be mli ni okpa gbɛgbamɔ nitsumɔ lɛ he lɛ? Nyɛmi yoo ko ni kpa gbɛgbamɔ nitsumɔ lɛ yɛ gbɔmɔtsoŋ hewalɛ ni enáaa hewɔ lɛ bɔi ekoŋŋ beni eye afii 89. Yɛ nɔ ni fe afi kome mli lɛ, eyaaa helatsamɔhe, ni no hewɔ lɛ, enu he akɛ ená hewalɛ saŋŋ bɔ ni ebaanyɛ etsu gbɛgbamɔ nitsumɔ lɛ ekoŋŋ!
3. Te weku mlibii aaafee tɛŋŋ amɛye amɛbua weku lɛ mlinyo ko ni etsu gbɛgbamɔ nitsumɔ lɛ?
3 Ekolɛ otsuko gbɛgbamɔ nitsumɔ lɛ eko pɛŋ, shi oweku lɛ mlinyo ko kpa gbɛgbamɔ nitsumɔ lɛ koni enyɛ ekwɛ weku lɛ mlinyo ko, tamɔ fɔlɔ ko ni egbɔ nɛkɛ. (1 Tim. 5:4, 8) Kɛ́ nakai ni lɛ, ani bo loo weku lɛ mlibii krokomɛi baanyɛ aye abua lɛ ni ebɔi ekoŋŋ? Mɛni hewɔ nyɛfeee ekome kɛsusuuu enɛ he? (Abɛi 15:22) Kɛ́ weku lɛ mlibii fɛɛ fee ekome kɛye amɛbua amɛteŋ mɔ ko ni etsu gbɛgbamɔ nitsumɔ lɛ, amɛ fɛɛ amɛbaanu he akɛ amɛmiiná gbɛfaŋnɔ yɛ mli.
4. Kɛ́ amrɔ nɛɛ onyɛɛɛ obɔi gbɛgbamɔ nitsumɔ lɛ ekoŋŋ lɛ, mɛni obaanyɛ ofee?
4 Kɛ́ amrɔ nɛɛ oshihilɛ eŋmɛɛɛ bo gbɛ ni obɔi gbɛgbamɔ nitsumɔ lɛ ekoŋŋ lɛ, kaaha no hao bo. Shwelɛ ni oyɔɔ akɛ obaafee nakai lɛ saa Yehowa hiɛ. (2 Kor. 8:12) Okɛ hesai ni oná beni oji gbɛgbalɔ lɛ atsu nii yɛ osɔɔmɔ nitsumɔ lɛ mli amrɔ nɛɛ. Sɔlemɔ yɛ shwelɛ ni oyɔɔ lɛ he, ni oha ohiɛ ahi ohe nɔ yɛ hegbɛi ni obaanyɛ okɛfee tsakemɔi lɛ ahe. (1 Yoh. 5:14) Ekolɛ, yɛ be ni sa mli lɛ, Yehowa baagbele “shinaa kpeteŋkpele” ni “nitsumɔ pii” yɔɔ mli naa eha bo, koni oná jɔɔmɔi ni jɛɔ gbɛgbamɔ nitsumɔ lɛ mli kɛbaa lɛ ekoŋŋ!—1 Kor. 16:9.