Sɛɛkuu kɛ Skulyaa Ekoŋŋ

¹ Kɛjɛ September nyɔŋ lɛ nɔ kɛyaa lɛ, wɔ obalaŋtai lɛ baaje skul afi hee shishi. Nibii ni haa mɔ miishɛɛ yɛ ni abaakpa gbɛ, shi saji fioo komɛi hu yɛ ni baanyɛ awo mɔ he gbeyei fioo. Obalaŋtai lɛ ateŋ mɛi pii baana tsɔɔlɔi heei, amɛbaaje skul nikasemɔi heei ashi­shi, ni amɛkɛ skul­bii krokomɛi ni amɛleee amɛ momo lɛ baana sharamɔ ni bɛŋkɛ kpaakpa. Wɔ obalaŋtai lɛ sumɔɔ ni amɛkɛ amɛ skul nɔkwɛlɔi lɛ afee ekome, ni amɛkɛ amɛnanemɛi nikaselɔi lɛ hu akpa gbee, shi esa akɛ amɛkai akɛ esa akɛ amɛkwɛ amɛhe nɔ jogbaŋŋ yɛ nɔ fɛɛ nɔ ni baanyɛ aye amɛ awui yɛ mumɔŋ lɛ he.​—⁠1 Kor. 15:⁠33.

² Nɔ titri ni he hiaa Odasefoi abii kɛ obalaŋtai ji ni amɛtsi amɛhe kɛjɛ je nɛŋ hewalɛ ni woɔ mɔ he muji, ni ŋmɛnɛ egbɛ eshwa nikasemɔ hei amli yɛ maji pii anɔ lɛ he. Esa akɛ Kristofoi gbekɛbii kɛ onukpai fɛɛ ana ekaa ni amɛkɛkpoo je lɛ tɛi ni efolɔ eshwie shi, kɛ esusumɔi ni kɔɔ jeŋba he saji ahe, ni amrɔ nɛɛ awoɔ he hewalɛ lɛ, ni esa akɛ ‘amɛkwɛ amɛhe nɔ jogbaŋŋ’ kɛtsɔ Yehowa wiemɔ lɛ mli kwɛmɔ kɛ ekudɔmɔ nɔ. (Lala 119:⁠9) Esa akɛ fɔlɔi ahiɛ ahi amɛhe nɔ ni amɛle nibii ni fata he yɛ skul nikasemɔ lɛ mli, bɔni afee ni amɛkɛ gbɛtsɔɔmɔ ni sa aha amɛbii lɛ. Kɛji nɔ ni atsɔɔ amɛ yɛ skul lɛ loo he kroko lɛ teɔ shi ewoɔ krɔŋŋ-feemɔ kɛ hetsemɔ ni ataoɔ yɛ Yehowa tsuji ahe lɛ, no lɛ esa akɛ amɛtsi amɛhe kɛjɛ he.​—⁠1 Pet. 1:​15, 16. 

³ Efɔɔ kaa hu akɛ akɛ saji ni kɔɔ maŋ hedɔɔ kusum nifeemɔi ahe lɛ ekomɛi kpeɔ, hejɔɔmɔ gbii ayeli, kpɔiaŋgbɔlemɔ nifeemɔi, aloo hiɛtserɛjiemɔ henaabuamɔi. Skul kɛ Yehowa Odasefoi wolo bibioo lɛ yeɔ ebuaa Kristofoi obalaŋtai waa yɛ nɛkɛ saji nɛɛ amli. Kɛ fɔlɔi ni bii darako tsɔ̃ lɛ ŋɔ hegbɛ lɛ ni amɛkɛ nɛkɛ wolo nɛɛ tee amɛyana tsɔɔlɔi lɛ, ekolɛ ebaanyɛ eha aye jaramɔ shihilɛi komɛi ni baanyɛ aba lɛ anɔ aloo amɛnɔ baagbɔ kwraa. Amɛbaanyɛ amɛtsɔɔ akɛ enɛ baaye abua lɛ tsɔɔlɔ lɛ ni enu nɔ hewɔ ni Yehowa Odasefoi halaa akɛ amɛkɛ amɛhe wooo nifeemɔi komɛi amli lɛ shishi. Nɛkɛ saji nɛɛ ni aaaha tsɔɔlɔ lɛ ale dani naagbai abɔi baa lɛ baanyɛ afee babaoo yɛ ekomefeemɔ mumɔ ni aaahi nyɛteŋ lɛ gbɛfaŋ.

⁴ Kɛfata he lɛ, ebaahi kɛha Kristofoi nikaselɔi akɛ amɛhiɛ amɛ diɛŋtsɛ amɛ Skul wolo bibioo lɛ eko amɛfata amɛ skul woji lɛ ahe yɛ skul. Bei pii lɛ, hegbɛi komɛi baa ni abaanyɛ akɛye nika­se­lɔi krokomɛi ni biɔ saji kɛji agbala jwɛŋmɔ kɛba wɔhemɔkɛyelii anɔ lɛ odase. Agbɛnɛ hu, esa akɛ gbekɛbii ni ji Odasefoi lɛ ahiɛ amɛ Advance Medical Directive/Release woji lɛ loo Identity Card heei ni amɛ­ŋma­la nɔ nibii lɛ jogbaŋŋ, ni akɛ waonaa gbɛi hu ewo shishi lɛ, yɛ amɛ­kotokui amli be fɛɛ be. Eka shi faŋŋ akɛ mɛi ni kɛ nɛkɛ ŋaawoo nɛɛ tsuɔ nii lɛ baafee tamɔ ‘hiɛtɛlɔ ni naa efɔŋ ni baa, ni teeɔ ehe lɛ.’​—⁠Abɛi 22:⁠3.