Ha Ana akɛ Osusuɔ Mɛi Ahe kɛtsɔ Sɛɛsaramɔi Anɔ
1 Mɛi ni yɔɔ he miishɛɛ lɛ ataomɔ yɛ shinaai anaa lɛ tsɔɔ akɛ oosumɔ ni oha mɛi krokomɛi ana hegbɛ ni amɛbo Maŋtsɛyeli sane lɛ toi. No hewɔ lɛ kwɛmɔ ni onyiɛ woji ni okɛhaa yɛ January nyɔŋ lɛ nɔ lɛ sɛɛ, ejaakɛ enɛ ji gbɛ kpakpa ni okɛaatsɔɔ akɛ osusuɔ mɛi krokomɛi ahe.
2 Kɛ oshi “Let Your Kingdom Come” wolo lɛ oha lɛ, obaanyɛ oje osanegbaa lɛ shishi akɛ:
◼ “Wɔtsɔ hiɛ wɔwie Nyɔŋmɔ Maŋtsɛyeli lɛ kɛ nɔ ni ebaafee eha wɔ lɛ he. Etsɛŋ ni nakai Maŋtsɛyeli lɛ baafee shikpɔŋ nɛɛ paradeiso. Akɛni wɔnako paradeiso pɛŋ hewɔ lɛ, ebaawa akɛ wɔɔfee he mfoniri yɛ wɔ jwɛŋmɔ mli. Bɔ ni ebaatamɔ nɛ. [Tsɔɔmɔ lɛ mfoniri ni yɔɔ baafai 4 kɛ 5 lɛ.] Awo shi yɛ paradeiso ni tamɔ nɛkɛ he yɛ Biblia lɛ mli.” Kanemɔ Lala 72:7. Kɛ etsɔɔ miishɛɛ lɛ, gbelemɔ baafa 175, kukuji 3 kɛ 4, ni otsɔɔ nɔ ni esa akɛ wɔfee kɛ wɔmiisumɔ ni wɔhi shi yɛ Paradeiso ni baa lɛ mli.
3 Naa ŋaa ni awoɔ yɛ “Happiness—How to Find It” wolo ni okɛha lɛ sɛɛdii:
◼ “Wɔ fɛɛ wɔbaasumɔ ni wɔna miishɛɛ. Mɛi pii nuɔ he akɛ anyɛŋ ana miishɛɛ yɛ je nɛɛ mli. Te onuɔ he ohaa tɛŋŋ? [Ŋmɛɛ gbɛ ni ewie.] Afɔɔ wiemɔ akɛ miishɛɛ ji jwɛŋmɔ mli henumɔ ko. Kɛ suɔmɔ kɛha mɛi krokomɛi, bulɛ kɛha Nyɔŋmɔ, kɛ wɔsɛɛ shihilɛ he hiɛnɔkamɔ ni ma shi shiŋŋ eyimɔ wɔjwɛŋmɔi amli obɔbɔ lɛ, wɔbaanyɛ wɔna anɔkwa miishɛɛ yɛ wɔnaagbai lɛ fɛɛ sɛɛ.” Kanemɔ Lala 119:1, 2. Tsɔɔmɔ mli akɛ Biblia lɛ kasemɔ tsɔɔ wɔ bɔ ni wɔɔfee wɔsumɔ mɛi krokomɛi, wɔna bulɛ wɔha Nyɔŋmɔ, ni wɔna wɔsɛɛ be he hiɛnɔkamɔ ni shɛjeɔ mɔ mii.
4 Obaanyɛ okɛ shiɛmɔ wiemɔ kuku ko ni tamɔ nɛkɛ anyiɛ “True Peace and Security—From What Source?” wolo ni okɛha lɛ sɛɛ:
◼ “Je lɛŋ hiɛnyiɛlɔi nyɛɛɛ ni amɛkɛ toiŋjɔlɛ kɛ shweshweeshwe shihilɛ aba. Yehowa Nyɔŋmɔ pɛ ji mɔ ni baanyɛ afee nakai. Biblia lɛ tsɔɔ wɔ nɔ ni ehe hiaa ni wɔfee. [Nyɛsusua otii ni yɔɔ baafa 178 lɛ kukuji 1 kɛ 2 he, no sɛɛ lɛ kanemɔ Yesaia 26:4.] Masumɔ ni matsɔɔ bo bɔ ni wolo nɛɛ baanyɛ aye abua bo.”
5 Obaanyɛ okɛ ŋaawoo nɛɛ atsu nii koni onyiɛ “Ani Nyɔŋmɔ Susuɔ Wɔhe Lɛlɛŋ?” wolo bibioo ni okɛha lɛ sɛɛ:
◼ “Be ko lɛ mishi wolo bibioo nɛɛ eko miha bo, ni eteeɔ sanebimɔ ni he hiaa nɛɛ shi akɛ: ‘Ani Nyɔŋmɔ susuɔ wɔhe lɛlɛŋ?’ Beni okwɛ wolo bibioo nɛɛ mli ogbe naa lɛ, te omu sane naa oha tɛŋŋ? [Ŋmɛɛ gbɛ ni ewie.] Ekolɛ ŋmalɛi ni kɛ paradeiso jeŋ hee ko ni wɔbaanyɛ wɔhi jɛmɛ yɛ toiŋjɔlɛ mli lɛ he shiwoo haa lɛ ni okane lɛ wo bo hewalɛ. [Tsɔɔmɔ mfonirii ni yɔɔ baafai 2 kɛ 3 lɛ, ni otsɔɔ jeŋ hee lɛ mli miishɛɛ nibii komɛi.] Miyɛ nɔmimaa akɛ bo kɛ osuɔlɔi baasumɔ ni nyɛhi jeŋ ni tamɔ nɛkɛ mli. Kadimɔ nɔ ni baafa 31 lɛ kuku 16 kɛɔ yɛ enɛ he.” Kanemɔ kuku lɛ, ni otsɔɔ mli akɛ Yehowa ni wɔɔtao esɛɛ gbɛ lɛ tsɔɔ akɛ, esa akɛ wɔkase lɛ kɛ eyiŋtoi ahe nii babaoo kɛtsɔ e-Wiemɔ, Biblia lɛ kasemɔ nɔ.
6 Yehowa efee nɔkwɛmɔ nɔ ni yeɔ emuu efɔ shi, akɛ Tookwɛlɔ ni yɔɔ suɔmɔ ni kwɛɔ etooi lɛ anɔ. (Ezek. 34:11-14) Mɔdɛŋ ni wɔbɔɔ yɛ anɔkwale mli akɛ wɔɔkase lɛ lɛ saa ehiɛ, etsɔɔ suɔmɔ ni wɔyɔɔ, ni ekɛ jɔɔmɔi bahaa mɛi krokomɛi.