Wɔ Woji Memeji lɛ ni Wɔkɛaatsu Nii Jogbaŋŋ
1 Yehowa kɛ mumɔŋ niyenii kpakpai babaoo eha wɔ. Saji nɛɛ babaoo yɛ woji ni hiɛ baafai 192 ni afee yɛ nyɛsɛɛ afii nɛɛ amli lɛ amli. Wɔkɛ woji fɛɛ ni etsu loo woji ni hiɛ baafai 192 ni afee dani 1982 shɛ ni fiteko lolo lɛ baaha yɛ January mli. Ani ekomɛi yɛ asafo lɛ woji atoohe lɛ? Kɛ nakai ni lɛ, ebaahi akɛ oookwɛ amɛmli saji lɛ amli ni ohala otii komɛi ni obaanyɛ owie he yɛ oshiɛmɔ wiemɔ lɛ mli.
2 Kɛ okɛ “Let Your Kingdom Come” wolo lɛ miitsu nii lɛ, obaanyɛ oje shishi akɛ:
◼ “Aaafee afii 2,000 sɔŋŋ nɛ ni Kristofoi esɔle koni Nyɔŋmɔ Maŋtsɛyeli lɛ aba. Mɛni osusuɔ akɛ Maŋtsɛyeli lɛ baafee aha adesai? [Ŋmɛɛ gbɛ ni ewie. Gbelemɔ baafa 25 kɛya akrabatsa lɛ nɔ, ni otsɔɔ jɔɔmɔi komɛi ni abaaná yɛ Maŋtsɛyeli nɔyeli lɛ shishi.] Wolo nɛɛ gbaa nibii ni Maŋtsɛyeli lɛ baatsu lɛ ekomɛi ahe sane ni etsɔɔ bɔ ni bo kɛ osuɔlɔi baanyɛ ana he sɛɛ. Ebaaŋɔɔ minaa akɛ mashi ekome maha bo ni oye obua kɛ shika ni shɛɔ ₵800.”
3 Kɛ oowie “Happiness—How to Find It” wolo lɛ he lɛ, obaanyɛ okɛɛ nɔ ko ni tamɔ nɛkɛ akɛ:
◼ “Ewaa kɛhaa mɛi pii akɛ amɛaana miishɛɛ yɛ je nɛɛ mli ejaakɛ naagbai babaoo yɛ. Ani osusuɔ akɛ abaanyɛ ana miishɛɛ yɛ ŋmɛnɛŋmɛnɛ shihilɛi nɛɛ ashishi? [Ŋmɛɛ gbɛ ni ewie. Gbelemɔ baafa 41, ni otsɔɔ naagbai komɛi ni ale waa ni baanyɛ aha wɔfee yeyeeye.] Biblia lɛ tsɔɔ bɔ ni wɔɔfee wɔdamɔ naagbai nɛɛ anaa koni yɛ naagbee lɛ wɔna miishɛɛ ni bɛ naagbee yɛ toiŋjɔlɛ jeŋ hee ko mli. [Gbelemɔ baafa 190, ni okane Yesaia 32:17, 18.] Biblia lɛ kɛ ŋaawoo pɔtɛɛ ko haa ni baanyɛ aye abua koni wɔna miishɛɛ babaoo yɛ shihilɛ mli. Wolo nɛɛ wieɔ nakai ŋaawoo lɛ he ni etsɔɔ bɔ ni wɔbaanyɛ wɔtsu he nii wɔha.”
4 Kɛ okɛ “True Peace and Security—From What Source?” wolo ni etsu lɛ miitsu nii lɛ, obaasumɔ ni oka enɛ okwɛ:
◼ “Mɔ fɛɛ mɔ baasumɔ ni ehi jeŋ ni toiŋjɔlɛ kɛ shweshweeshwe shihilɛ yɔɔ mli lɛ mli. Eji awerɛho akɛ, wɔnako enɛ yɛ wɔ wala shihilɛ mli pɛŋ. Mɛni osusuɔ akɛ ehe hiaa ni wɔfee koni wɔha toiŋjɔlɛ kɛ shweshweeshwe shihilɛ afee nɔ ni baaba diɛŋtsɛ? [Ŋmɛɛ gbɛ ni ewie.] Nyɔŋmɔ yɛ hewalɛ ni ekɛaaha toiŋjɔlɛ aba shikpɔŋ nɛɛ nɔ, ni ewo shi akɛ ebaafee nakai.” Gbelemɔ mfoniri ni yɔɔ baafa 4 lɛ, ni okane Mika 4:3, 4, ni okɛ otii ni yɔɔ baafai 103-4 lɛ agba he sane. Okɛ wolo lɛ aha lɛ ni oto gbɛjianɔ kɛha sɛɛsaramɔ.
5 Ekolɛ obaasumɔ ni okɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ atsu nii. Kɛ nakai ni lɛ, obaanyɛ okɛɛ akɛ:
◼ “Mɛi pii susuɔ nɔ hewɔ ni Nyɔŋmɔ ŋmɛɔ nɔnaa babaoo gbɛ yɛ je lɛŋ nɛkɛ lɛ he. Akɛni eji ofe hewɔ lɛ, mɛni hewɔ efeee nɔ ko ni ekɛ wɔ haomɔi lɛ aba naagbee? Te onuɔ he ohaa tɛŋŋ? [Ŋmɛɛ gbɛ ni ewie.] Biblia lɛ maa nɔ mi kɛhaa wɔ akɛ Nyɔŋmɔ kwako wɔ.” Gbelemɔ baafa 27 lɛ kuku 22 ni okane Lala 37:11, 29. Tsɔɔmɔ lɛ mfoniri fɛfɛo ni tsɔɔ nɔ ni wɔbaanyɛ wɔkpa gbɛ lɛ. Okɛ wolo bibioo lɛ aha lɛ. Too gbɛjianɔ ni oku osɛɛ obaje Biblia mli nikasemɔ shishi.
6 Wɔ woji lɛ ekanya mɛi akpei abɔ koni amɛpɛi Biblia lɛ mli jogbaŋŋ. Nɔ ni amɛkase lɛ eha amɛna wɔsɛɛ shihilɛ ni miishɛɛ yɔɔ mli lɛ he hiɛnɔkamɔ. (Lala 146:5) Eji hegbɛ ni wɔna akɛ wɔye wɔbua amɛ.