Nifeemɔ ni He Hiaa Fe Fɛɛ yɛ Adesa Yinɔsane Mli
1 Yesu ba shikpɔŋ nɔ yɛ e-Tsɛ lɛ gbɛtsɔɔmɔ naa koni ebaye anɔkwale ni kɛ wɔ baaya naanɔ wala mli lɛ he odase. (Yoh. 18:37) Anɔkwa ni eye kɛyashi gbele mli lɛ kɛ woo baha Yehowa, etse Nyɔŋmɔ gbɛi lɛ he, ni ekɛ kpɔmɔ nɔ ha. (Yoh. 17:4, 6) Enɛ ji nɔ ni ha Yesu gbele lɛ fee nifeemɔ ni he hiaa fe fɛɛ yɛ adesa yinɔsane be fɛɛ mli lɛ.
2 Adesai enyɔ pɛ ni eye emuu bahi shikpɔŋ nɛɛ nɔ. Adam na hegbɛ ni yɔɔ naakpɛɛ akɛ ekɛ jɔɔmɔi abaha eshwiei ni afɔko amɛ lɛ. Yɛ no najiaŋ lɛ, ejɛ pɛsɛmkunya feemɔ mli etse atua, ni eha amɛbote shihilɛ ni yɔɔ awerɛho ni kɛ gbele baaba he fɔbuu mli. Beni Yesu ba lɛ, ejie anɔkwayeli kɛ toiboo ni yeɔ emuu kpo, ni egbele hegbɛ kɛha naanɔ wala namɔ lɛ mli eha mɛi fɛɛ ni jieɔ hemɔkɛyeli kpo lɛ.—Yoh. 3:16; Rom. 5:12.
3 Yesu afɔleshãa gbele lɛ nɔ kwɔ fe nifeemɔi fɛɛ. No tsake bɔ ni adesa yinɔsane yaa lɛ ehaa lɛ mli. No kɛ nɔdaamɔ nɔ kɛha mɛi akpekpei toi akpekpei abɔ ashitee kɛmiijɛ gbohii ateŋ lɛ ha. No kɛ shishitoo nɔ ha kɛha naanɔ Maŋtsɛyeli ni kɛ efɔŋ feemɔ baaba naagbee koni efee shikpɔŋ lɛ paradeiso.—Lala 37:11; Bɔf. 24:15; Rom. 8:21, 22.
4 Enɛɛmɛi fɛɛ yeɔ ebuaa wɔ ni wɔhiɛ asɔ nɔ hewɔ ni Yesu tsɔɔ ekaselɔi lɛ akɛ amɛkɛ Kaimɔ lɛ yeli akai egbele lɛ daa afi lɛ. (Luka 22:19) Akɛni wɔhiɛ sɔɔ nɔ ni edamɔ shi kɛha hewɔ lɛ, wɔmiikpa gbɛ akɛ wɔkɛ Yehowa Odasefoi asafoi ni yɔɔ jeŋ fɛɛ lɛ aaakpe Sohaa, April 14, beni hulu enyɔ shi sɛɛ. Dani nakai be lɛ aaashɛ lɛ, ebaahi akɛ aaakane Biblia mli saji ni kɔɔ Yesu naagbee gbii ni eye yɛ shikpɔŋ nɔ, kɛ ekãa ni ekɛdamɔ shi kɛha anɔkwale lɛ he lɛ he sane kutuu akɛ weku. (Kwɛmɔ 1995 Calendar, April 9-14 lɛ.) Eto nɔkwɛmɔ nɔ efɔ shi eha wɔ kɛtsɔ ehe ni etu eha wɔ Bɔlɔ lɛ nɔ. (1 Pet. 2:21) Nyɛhaa wɔfea bɔ fɛɛ bɔ ni wɔɔnyɛ ni wɔtsɛ wɔnanemɛi kɛ weku lɛ, kɛ Biblia mli nikaselɔi kɛ mɛi krokomɛi hu ni yɔɔ he miishɛɛ. Tsɔ hiɛ otsɔɔ nɔ ni abaafee lɛ kɛ nɔ ni okadii lɛ damɔ shi kɛha lɛ mli.—1 Kor. 11:23-26.
5 Onukpai lɛ ato gbɛjianɔ jogbaŋŋ kɛtsɔ hiɛ koni amɛkwɛ ni Maŋtsɛyeli Asa lɛ nɔ atse ni efee falefale. Esa akɛ ato gbɛjianɔ kɛha okadii lɛ namɔ. Akɛ ŋaawoi ni yeɔ ebuaa ni kɔɔ bɔ ni wɔɔnyɛ wɔjie bulɛ kpo wɔha Nuntsɔ lɛ Gbɛkɛnaashi Niyenii lɛ he lɛ eha yɛ February 1, 1985 Buu-Mɔɔ lɛ baafa 27. Ebaafee nɔ ni sa jogbaŋŋ akɛ asafo lɛ aaato shiɛmɔyaa babaoo he gbɛjianɔ gbii babaoo dani kaimɔ lɛ ashɛ kɛ agbɛnɛ kɛha gbii fioo ni baaba yɛ no sɛɛ lɛ.
6 Nyɛsɛɛ afi lɛ, mɛi 12,288,917 kpe yɛ jeŋ fɛɛ kɛha nifeemɔ ni he hiaa nɛɛ kaimɔ. Akɛni no ji gbi ni he hiaa fe fɛɛ yɛ wɔ kalanda lɛ nɔ hewɔ lɛ, esa akɛ wɔ fɛɛ wɔya.