Sanebimɔ He

◼ Mɛɛ nibii esa akɛ wɔkɛya kpeei ashishi?

Wɔnine shɛɔ nitsɔɔmɔ kɛ hewalɛwoo nɔ yɛ asafoŋ kpeei ashishi daa otsi. (Yes. 48:17; Heb. 10:24, 25) Shi kɛlɛ, bɔ ni wɔnaa he sɛɛ wɔhaa lɛ damɔɔ wɔhe ni wɔsaa jogbaŋŋ loo wɔhe ni wɔsako beni wɔba lɛ nɔ babaoo.

Ebaahi akɛ weku lɛ mlibii lɛ ateŋ mɔ fɛɛ mɔ aaana lɛ diɛŋtsɛ enikasemɔ he wolo kɛ nibii krokomɛi ni he hiaa kɛha kpeei lɛ. Nɔ ni baafata enɛ he ji Biblia, lala-wolo, wolo loo woji ni akaseɔ lɛ, niŋmaa wolo bibioo ko, kɛ pɛn loo pɛnsil.

Kɛha Teokrase Sɔɔmɔ Skul lɛ, “Theocratic Ministry School Schedule” lɛ kɛ Theocratic Ministry School Guidebook woji lɛ he miihia. Nɛkɛ nibii nɛɛ yeɔ ebuaa wɔ ni wɔhaa nikaselɔi awiemɔi ni ahaa lɛ saneyitsei lɛ hiɔ wɔ jwɛŋmɔ mli, koni wɔjwɛŋmɔ ahi skul nɔkwɛlɔ lɛ ŋaawoo lɛ nɔ. Wɔbaanyɛ ni wɔkɛ ŋaawoo kɛ saji ni atsɔɔ lɛ atsu nii bɔni afee ni wɔya hiɛ yɛ wɔ diɛŋtsɛ wɔ wiemɔi kɛ shiɛmɔyaa he wiemɔi amli. Kɛjɛ January kɛbaa lɛ, ŋaawoo wiemɔi lɛ pii damɔɔ Jehovah’s Witnesses—Proclaimers of God’s Kingdom lɛ nɔ. Ekolɛ ebahiŋ akɛ weku lɛ mlibii lɛ ateŋ mɔ fɛɛ mɔ kɛ enɔ aaaba; ekolɛ abaanyɛ akɛ ekome aba koni weku lɛ nine ashɛ nɔ kɛha saji ataomɔ.

Kɛha Sɔɔmɔ Kpee lɛ, esa akɛ wɔna Wɔ Maŋtsɛyeli Sɔɔmɔ hee lɛ kɛ Reasoning woji lɛ. Okɛ woji fɛɛ ni abaawie emli saji ahe yɛ kpee lɛ shishi, tamɔ woji ni akɛbaatsu nii yɛ shiɛmɔ wiemɔi ni abaafee he nɔkwɛmɔ nii amli lɛ afata he kɛba. Esa akɛ onukpai lɛ ahiɛ Organized to Accomplish Our Ministry lɛ eko.

Esa akɛ fɔlɔi abɔ mɔdɛŋ ni amɛha amɛbii atara shi diŋŋ koni amɛbo saji atoi yɛ asafoŋ kpeei ashishi. Ni oooha amɛteŋ mɔ fɛɛ mɔ ana Buu-Mɔɔ lɛ kɛ woji krokomɛi lɛ eko dani amɛle nikanemɔ po lɛ woɔ amɛ hewalɛ koni amɛna he miishɛɛ. Kɛ atsɔɔ gbekɛbii lɛ akɛ amɛjie bulɛ kpo yɛ teokrase woji ahe ni amɛkɛtsu nii lɛ, nine shɛɔ mumɔŋ sui kpakpai ni hiɔ shi daa nɔ.

Miishɛɛ kɛ tsui ni nyɔɔ mɔ mli ni wɔnaa kɛjɛɔ asafoŋ kpeei amli lɛ faa babaoo kɛ wɔba akɛ mɛi ni esaa amɛhe jogbaŋŋ lɛ. (2 Tim. 3:17) Nɛkɛ ji gbɛ ni hi fe fɛɛ ni wɔbaatsɔ nɔ wɔkwɛ koni “[wɔ]yimɔ obɔbɔ kɛ [Nyɔŋmɔ] suɔmɔnaa nii alee yɛ mumɔŋ nilee kɛ shishinamɔ fɛɛ mli.”—Kol. 1:9.