1995 “Miishɛɛ Yijielɔi” Kpokpaa Wulu nɔ Kpee

¹ Yiŋtoi enyiɛ wɔyɔɔ ni wɔɔdamɔ nɔ wɔkɛna miishɛɛ? Ekolɛ wɔteŋ mɛi fioo ko ebɔ mɔdɛŋ akɛ amɛaaŋmala fɛɛ amɛshwie shi. Eyɛ mli akɛ wɔyɛ jeŋ ni basabasafeemɔ yɔɔ mli ni hekɛnɔfɔɔ bɛ mli lɛ mli moŋ, shi wɔyɛ yiŋtoi babaoo ni wɔɔdamɔ nɔ wɔkɛna miishɛɛ. Taakɛ atswa adafi yɛ June 1995 Wɔ Maŋtsɛyeli Sɔɔmɔ lɛ mli lɛ, “Miishɛɛ Yijielɔi” ji 1995 kpokpaa wulu nɔ kpeei lɛ saneyitso ni kanyaa mɔ.

² Wɔjieɔ Yehowa yi yɛ anɔkwale lɛ ni etsɔɔ wɔ lɛ hewɔ. (Yes. 54:13; Yoh. 8:32) No sɛɛ lɛ, wɔjɛɔ miishɛɛ mli wɔkɛ mɛi fɛɛ ni taoɔ shweshweeshwe shihilɛ kɛ miishɛɛnamɔ lɛ naa anɔkwale lɛ mli gbɛfaŋnɔ. (Ezek. 9:4; Bɔf. 20:35) Wɔ Kristofoi anyɛmifeemɔ lɛ hu haa wɔnaa miishɛɛ. Mumɔŋ weku ni suɔmɔ yɔɔ mli lɛ haa mɔ tsui nyɔɔ emli ni ehaa mɔ naa miishɛɛ. Enɛɛmɛi ji yiŋtoi ahewɔ ni wɔnaa miishɛɛ ni tsirɛɔ wɔ ni wɔjie Yehowa yi lɛ ateŋ fioo ko pɛ. Kpee lɛ shishi wiemɔi kɛ nɔkwɛmɔ nii lɛ baagbala wɔjwɛŋmɔ kɛya yiŋtoi krokomɛi ni Ŋmalɛi fiɔ sɛɛ ni haa wɔnaa miishɛɛ yɛ gbii ni haomɔ yɔɔ mli nɛɛ mli lɛ anɔ.

³ Gbii Etɛ Kpee: Ani okɛ onitsumɔtsɛ lɛ eto gbɛjianɔ koni eha oba hejɔɔmɔ bɔni afee ni oba gbii etɛ kpee lɛ fɛɛ shishi? Fɔlɔi ni amɛbii yaa skul ni baaya kpeei lɛ eko yɛ be mli ni ayaa skul lolo lɛ kɛ bulɛ akɛɛ tsɔɔlɔi lɛ akɛ, gbekɛbii lɛ baŋ skul Sohaa yɛ amɛjamɔ mli nifeemɔ nii lɛ fa ni he hiaa nɛɛ hewɔ. Nɛgbɛ abaafee kpee ni bɛŋkɛ bo fe fɛɛ lɛ yɛ? Aŋmala gbii kɛ hei ni abaafee kpeei 23, yɛ Ghana nitsumɔ he nine lɛ shikpɔŋkuku lɛ mli lɛ awo June, 1995 Wɔ Maŋtsɛyeli Sɔɔmɔ lɛ mli. Kɛbashi amrɔ nɛɛ nyɛ fɛɛ nyɛkadi saji ni sa kɛha nyɛ asafo lɛ. Abaafee kpeei lɛ yɛ Ŋleshi, Ewe, Fanti, Frafra, Ga, Krobo, kɛ Twi wiemɔi mli.

⁴ Gbɛjianɔtoo lɛ baaje shishi Sohaa leebi 9:40 ni ebaaba naagbee Hɔgbaa aaafee shwane 3:50. Nifeemɔ lɛ baaje shishi leebi 9:30 Hɔɔ kɛ Hɔgbaa.

⁵ Ani Obaaya Eko?: Aawo wɔ hewalɛ ni wɔya gbii etɛ kpee lɛ fɛɛ. Mɛni hewɔ? Yehowa miisumɔ ni wɔhi jɛmɛ. Ŋmɛnɛ, aatutua wɔ hemɔkɛyeli kɛ wɔmumɔŋ hewalɛ lɛ waa diɛŋtsɛ. Paulo kɛ ‘wɔhe naabuamɔ ni wɔkakwa’ lɛ he ŋaawoo ha be ko beni Kristofoi ni yɔɔ Yudea lɛ naa amanehulu babaoo lɛ. (Heb. 3:12, 13; 10:25) No mli lɛ, Filipibii lɛ yɛ “yinɔ kɔɔdɔŋ ni bɛ eŋɛlɛ nɔ . . . teŋ.” Ni kɛlɛ, ‘amɛmiitso tamɔ kanei yɛ je lɛŋ.’ (Fil. 2:15) Mɛni hewɔ ni klɛŋklɛŋ afii oha lɛ mli Kristofoi lɛ yɔɔ sɔrɔto kwraa lɛ? Ejaakɛ amɛnyiɛ mumɔ krɔŋkrɔŋ ni kudɔɔ amɛ koni amɛbua amɛhe naa ni amɛhiɛ “adɔ suɔmɔ kɛ nitsumɔi kpakpai ahe” lɛ gbɛtsɔɔmɔi asɛɛ.—Heb. 10:24.

⁶ Ekolɛ je lɛ baana wɔnɔ hewalɛ ni wɔfee nɔ kroko, ni egbɔjɔ suɔmɔ ni wɔyɔɔ akɛ wɔkɛ wɔ nyɛmimɛi lɛ aaakpe ni wɔjie Yehowa yi lɛ. Aafɔ nine kɛmiitsɛ wɔ fɛɛ koni wɔba wɔhe shi wɔha Yehowa mumɔ lɛ ni wɔna gbii etɛ kpee lɛ fɛɛ mli miishɛɛ. Ani wɔtswa wɔfai shi akɛ wɔkɛ wɔ weku muu lɛ fɛɛ aaaya eko? Ehe miihia ni wɔha suɔmɔ kɛ hemɔkɛyeli ni wɔyɔɔ lɛ mli awa be fɛɛ be. Yehowa kɛ daa afi kpeei eye ebua wɔ yɛ enɛ gbɛfaŋ.

⁷ Okɛ Jwetiri ko Aya Shia: Te ooofee tɛŋŋ onyɛ ona kpee lɛ he sɛɛ jogbaŋŋ kɛmɔ shi? Wiemɔ pɛ ni akɛaaha sanebimɔ nɛɛ hetoo ji “ni obo sane lɛ toi jogbaŋŋ.” Enɛ jeee nitsumɔ ni yɔɔ mlɛo yɛ ŋmɛnɛŋmɛnɛ adesai ashihilɛ ni yaa hiɛ kɛ foi, ni akɛ henumɔ babaoo tsuɔ nii yɛ mli lɛ eko. Ekolɛ obalahii kɛ obalayei bibii ni yɔɔ ekãa lɛ baana akɛ sane toiboo jogbaŋŋ lɛ wa, shi eji kaa ni wɔ fɛɛ wɔkɛkpeɔ yɛ be mli ni wɔyaa kpokpaa wulu nɔ kpee. Wɔbaana akɛ, ewaaa akɛ aaabo sane toi jogbaŋŋ kɛji wɔto gbɛjianɔ kɛtsɔ hiɛ. Bi ohe akɛ, ‘Mɛni ji kpee lɛ yitso?’ Jwɛŋmɔ nɔ! ‘Mɛni hewɔ miyaa kpee lɛ, ni mɛni mibafee yɛ gbii etɛ lɛ mli? Ani hiɛtserɛjiemɔ baafa babaoo yɛ minɔ gbɛkɛ, loo ani mito be ni fa he gbɛjianɔ kɛha hejɔɔmɔ ni matĩ kpee lɛ shishi saji ni ama nɔ mi lɛ amli?’

⁸ February 1, 1984 Blɔfo Buu-Mɔɔ lɛ mli sane ni ji “Ani Ojwɛŋɔ Sane nɔ loo Osusuɔ Oyiŋ Kɛkɛ?” lɛ kɛ bɔ ni aaafee ana kpee he sɛɛ babaoo kɛmɔ shi lɛ he ŋaawoi sɔrɔtoi ha ni emu sane naa nɛkɛ akɛ: “Ekolɛ jwɛŋmɔ lɛ tsɔsemɔ ji yelikɛbuamɔ ni he hiaa fe fɛɛ.” Bei pii lɛ, kɛ wielɔ lɛ je wiemɔ shishi lɛ, wɔboɔ sane lɛ toi jogbaŋŋ, shi ekolɛ kɛ wɔbo wiemɔ lɛ toi kɛyashɛ he ko lɛ, wɔhaa wɔjwɛŋmɔ “jeɔ sane lɛ nɔ.” Mɛɛ gbɛ nɔ wɔɔtsɔ wɔtsi enɛ naa?

⁹ Esa akɛ atĩ ŋaawoi ni akɛha be ko ni eho lɛ mli akɛni abaanyɛ akɛtsu nii lɛ hewɔ. Kɛ eeehi kwraa lɛ, bɔɔ mɔdɛŋ ni ona hejɔɔmɔ ni fa daa gbɛkɛ. Enɛ bɛ mlɛo yɛ be fɛɛ mli ejaakɛ ekolɛ gbɛfaa hu fata he, ni kɛ oyɛ gbɔiatoo he lɛ, ekolɛ oyawɔŋ mra loo owɔŋ jogbaŋŋ tamɔ kɛ oyɛ shia. Bei pii lɛ gbɛjianɔtoo kpakpa baaha ona wɔ ni sa.

¹⁰ Saji kukuji aŋmalamɔ efee nɔ ni eye ebua kɛha sane toiboo jogbaŋŋ. Ni kɛlɛ, kɛ obɔ mɔdɛŋ akɛ oooŋmala saji babaoo tsɔ lɛ, obaanyɛ olaaje otii komɛi ni he hiaa lɛ kwraa. Ŋaa ni awoɔ ji, ŋmalamɔ saji fioo kɛ jwɛŋmɔ lɛ akɛ, ooomu nifeemɔ lɛ fɛɛ naa oha Biblia mli nikaselɔ loo mɔ ni nyɛɛɛ he ko aya yɛ hela hewɔ lɛ. Eyɛ mli akɛ ekolɛ obɛ mɔ ko pɔtɛɛ yɛ ojwɛŋmɔ mli moŋ, shi obaana yiŋtoo ko yɛ nibii ni oŋmalaa lɛ hewɔ, ni kɛ agbe kpee lɛ naa lɛ, ekolɛ obaana bei komɛi ni okɛ nifeemɔ lɛ he saji otii lɛ aha yɛ be mli ni oyeɔ weku lɛ mli bii ni heee yeee lɛ odase trukaa lɛ. Kɛ oŋmala saji otii lɛ ni okɛ mɛi krokomɛi gba nɔ ni onu lɛ he sane lɛ, ohiɛ kpaŋ sane lɛ nɔ mra. Sanegbaa haa sane lɛ yaa nɔ ekaa mɔ jwɛŋmɔŋ.

¹¹ Eyɛ mli akɛ afeŋ niyenii ni ehe nitsumɔ fa moŋ, shi abaafite shika saŋŋ lolo yɛ he ni abaahai ni akɛfee kpee lɛ hewɔ, ni bei pii lɛ nɔ ni fata he ji agbai lɛ amaamɔ, nu kɛ sarawa hewalɛ he shika fitemɔ, kɛ ekrokomɛi. Te abaafee tɛŋŋ atsu shika fitemɔ nɛɛ he nii lɛ? Kɛtsɔ onia ni wɔjɛɔ wɔsuɔmɔ mli wɔtsuɔ lɛ nɔ, kɛ́ eji shika diɛŋtsɛ loo kɛtsɔ tsɛk ni aaaŋma aha “Watchtower Convention” lɛ nɔ. Enɛ kɛ Lala 96:8 kɛ 2 Kronika 31:12 kpaa gbee.

¹² Yijielɔi ni Yɔɔ Miishɛɛ Woɔ Yehowa Hiɛ Nyam Kɛtsɔɔ Nyɔŋmɔ Jamɔ Mli Jeŋba Nɔ: Wɔnine shɛ saji kpakpai ni woɔ mɔ hewalɛ ni kɔɔ wɔjeŋba he lɛ nɔ kɛjɛ gbɔiatoo he nitsulɔi kɛ nitsulɔi ni yɔɔ hei ni afee kpee lɛ yɛ lɛ adɛŋ nyɛsɛɛ afi lɛ. Gbɔiatoo he nɔkwɛlɔ ko kɛɛ akɛ: “Eji miishɛɛ sane yɛ be fɛɛ mli akɛ wɔɔha Odasefoi lɛ wɔɔhe ejaakɛ amɛtoɔ amɛtsui shi, ni amɛkɛ mɛi feɔ ekome, ni amɛkwɛɔ amɛbii anɔ jogbaŋŋ.” Gbɔiatoo he kroko nɔ onukpa ko kɛɛ akɛ etamɔ nɔ ni Odasefoi lɛ yɛ miishɛɛ babaoo ni ato amɛhe gbɛjianɔ jogbaŋŋ fe kui krokomɛi. Eyɛ mli akɛ wɔ kpee lɛ da kwraa fe eko fɛɛ eko ni afeɔ yɛ jɛmɛ moŋ, shi ekɛɛ akɛ: “Nii ahe wiemɔ kɛ naagbai fioo ko pɛ wɔyɔɔ ni wɔɔtsi tã fe saji babaoo ni wɔɔwie yɛ kui bibii ahe.”

¹³ Gbɔiatoo he nitsulɔ ko ha ale akɛ nɔ ni jɛ kpee ko ni afee nyɛsɛɛ nɛɛ dani wɔfee wɔ nɔ lɛ mli ba ji nibii babaoo ni afite, kɛ juu hu, eyɛ mli akɛ nitsulɔi lɛ fɛɛ yɛ jɛmɛ. Shi etee nɔ ewie wɔ kpee lɛ he akɛ: “Wɔbɛ naagba ko kwraa yɛ Odasefoi lɛ ahe. . . . Kɛ amɛba biɛ lɛ, nɔ pɛ ni wɔfeɔ ji, wɔhaa nibii asaalɔ kome loo mɛi enyɔ hiɔ shi koni amɛsaa tsɔnei ahe nibii ni baanyɛ afite trukaa lɛ.”

¹⁴ Wɔbaasumɔ ni kulɛ amaniɛbɔi fɛɛ ni wɔnine shɛɔ nɔ lɛ afee nakai nɔŋŋ, shi mɔbɔ sane ji akɛ, ebɛ lɛ nakai yɛ bei fɛɛ mli. Nine eshɛ amaniɛbɔi anɔ akɛ kulɛ mɛi komɛi ni ba kpee lɛ baanyɛ afee jogbaŋŋ akɛ amɛaaha he ni afee kpee lɛ yɛ lɛ kɛ amɛ wɔɔhei lɛ afee falefale. Akɛ woji bibii kɛ ais krim he rɔbai lɛ wooo kɛŋtɛŋi ni akɛha lɛ amli, ni etamɔ nɔ ni mɛi komɛi yɔseee akɛ amɛ nibii ni afɔ he ni amɛkaa kɛ amɛhe nibii krokomɛi ni amɛkɛaashwie shi yɛ he fɛɛ he kɛkɛ lɛ baanyɛ afite bulɛ ni yɔɔ nifeemɔ he lɛ. Yɛ wɔɔhei komɛi lɛ, sanegbaa hoo tee nɔ aahu kɛyashi nyɔɔŋ teŋ loo leebi maaŋkpa.

¹⁵ Naagba kroko hu ni etee nɔ aahu yɛ afii ni eho lɛ amli ji nyɛmimɛi babaoo ni yabuaa amɛhe naa kɛ wiemɔ yɛ agba lɛ sɛɛ yɛ be mli ni kpee lɛ yaa nɔ lɛ. Mɛi ni baa kpee lɛ ateŋ mɛi komɛi taraa tsɔnei ni akɛyamamɔ shi kɛ wɔɔhei ni bɛŋkɛ jɛmɛ lɛ amli ni amɛwieɔ yɛ be mli ni kpee lɛ miiya nɔ. Yɛ kpee ko ni afee nyɛsɛɛ afi lɛ mli lɛ, ana wolo bibioo ko ni aŋma nii yɛ nɔ ni jɛ Biblia mli nikaselɔ ko ŋɔɔ yɛ tooyeli adeka lɛ mli. Ekaneɔ akɛ: “Nɔ ko efeko mi naakpɛɛ pɛŋ tamɔ hoofeemɔ, nifeemɔ, wiemɔ, kɛ jeŋba ni esaaa ni yaa nɔ yɛ hei ni anyiɛɔ lɛ beni ahaa wiemɔi lɛ . . . Mitsɔko Odasefonyo lolo, shi moŋ mɔ ni kaseɔ nii, ni ekaseɔ Nyɔŋmɔ gbeyeishemɔ kɛ bulɛ kɛkɛ ji mi.” Eka shi faŋŋ akɛ, wɔteŋ mɔ ko mɔ ko sumɔŋ ni eshi okadi ko ni tsɔɔ akɛ wɔhiɛ esɔɔɔ nibii ni Yehowa kɛhaa wɔ lɛ.

¹⁶ Esa akɛ wɔbi wɔhe be fɛɛ be akɛ: ‘Namɔ najiaŋ midamɔ, ni mɛni hewɔ miyaa kpee nɛɛ?’ Wɔmumɔŋ shidaamɔ kɛ Nyɔŋmɔ jamɔ hetuu-kɛhamɔ lɛ jeɔ kpo yɛ wɔ wiemɔ, jeŋba, kɛ hiɛsɔɔ ni wɔyɔɔ kɛha mumɔŋ nibii ni akɛhaa wɔ lɛ mli. (Yak. 3:13; 1 Pet. 2:2, 3, 12) Bei pii lɛ anaa akɛ nyɛmimɛi ni eŋmɛ amɛtsui shi yɛ naatsii kɛ nitsumɔ guu mli afii babaoo lɛ boɔ wiemɔ lɛ toi jogbaŋŋ ni amɛjieɔ bulɛ kpo yɛ kpeei ashishi, ni amɛtaraa amɛsɛii anɔ, ni amɛkɛ amɛjwɛŋmɔ maa wiemɔi kɛ nɔkwɛmɔ nii anɔ jogbaŋŋ.

¹⁷ Otade kɛ Ohesaamɔ Wieɔ Ohe: Akaiɔ wɔ yɛ 1 Samuel 16:7 akɛ, “gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!” No hewɔ lɛ, bei pii lɛ gbɔmɛi kojoɔ wɔ yɛ nɔ ni wɔ kponɔgbɛ tsɔɔ lɛ naa. Akwɛɔ wɔtade kɛ hesaamɔ jogbaŋŋ diɛŋtsɛ, titri lɛ kɛ wɔmiiya kpee kɛha jamɔ kɛ nitsɔɔmɔ yɛ Kristofoi ashihilɛ mli. Kɛ oji gbekɛ ni miiya skul loo kɛji oheloonaa nitsumɔ haa okɛ mɛi ni tiuɔ je lɛŋ nifeemɔi asɛɛ lɛ náa sharamɔ gbagbalii lɛ, ebaanyɛ efee kaa kɛha bo akɛ oookpɛtɛ Kristofoi atɛi ni afolɔ ashwie shi kɛha atadewoo ni hiɛshikamɔ yɔɔ mli lɛ he.

¹⁸ Atade kɛ hesaamɔ he tɛi ni afolɔ ashwie shi lɛ tsakeɔ yɛ je lɛŋ he fɛɛ he. Aakpa Kristofoi agbɛ akɛ amɛaawo atadei ni sa, ni tsɔɔ hiɛshikamɔ. Namɔ ji mɔ ni sa akɛ etsɔɔ enɛ? Esa akɛ fɔlɔi akwɛ koni amɛbii ni yeko afii nyɔŋmai enyɔ lɛ akasaa amɛhe tamɔ je lɛŋ obalahii kɛ obalayei bibii ni yaa skul lɛ. Akɛ gbɛtsɔɔmɔi ni ato he gbɛjianɔ eha koni eye ebua ni wɔkpɛ wɔyiŋ jogbaŋŋ yɛ sane ni biɔ ni akwɛ jogbaŋŋ nɛɛ mli. Wɔmiiwo hewalɛ koni atĩ February 8, 1987 Awake! lɛ mli sane ni ji, “Mɛni Atadei Tsɔɔ Kɛha Bo?” lɛ mli. Mɛni ayɔse yɛ wɔ kpeei ni afee nyɛsɛɛ afi lɛ ekomɛi ashishi?

¹⁹ Beni agbe “Nyɔŋmɔ Gbeyeishemɔ” Kpokpaa Wulu nɔ Kpeei lɛ ekome naa lɛ, wɔnine shɛ nɔ ko ni ayɔse nɛɛ nɔ: “Nyɛmimɛi hii kɛ yei lɛ etee hiɛ saŋŋ yɛ amɛ atadewoo, hesaamɔ, kɛ jeŋba mli yɛ afi nɛɛ kpee lɛ shishi. . . . Shi kɛlɛ, shihilɛi kɛ subaŋi komɛi yɛ lolo ni he hiaa ni atsu he nii jogbaŋŋ.” Beni agbe kpee kroko naa lɛ, abɔ amaniɛ akɛ ana atadei babaoo ni bɛ hiŋmɛi nɔ. Amaniɛbɔɔ lɛ tsi tã akɛ, atadei ni mɛi komɛi wo lɛ esaaa mɛi krokomɛi ahiɛ kwraa. Gbɔi ni ba kpee lɛ hu yɔse atadei ni bɛ hiŋmɛi nɔ lɛ. Atadei ni mɛi komɛi wo lɛ haa anaa amɛhe ni efĩɔ amɛ kpɛŋŋ tsɔ hu.

²⁰ Nyɛmimɛi hii kɛ yei lɛ ateŋ mɛi babaoo woɔ atadei ni sa, ní bulɛ yɔɔ he yɛ be mli ni amɛyɔɔ he ni afeɔ kpee lɛ yɛ lɛ. Shi, nyɛmimɛi hii kɛ yei lɛ ekomɛi woɔ “atadei ni kɔla kɛ niji bɛ he, atadei ni akɛ mamai ni mli titii ni hiɛ yɔɔ muji ekpɛ, nikai kukuji, kɛ . . . atadei ni eba nɔ ehee ni esaaa Nyɔŋmɔ webii yɛ be mli ni amɛyɔɔ amɛ wɔɔhei loo niyeli hei lɛ.” Kɛ onukpai lɛ na akɛ etamɔ nɔ ni mɛi komɛi sumɔɔ ni amɛsaa amɛhe yɛ nɛkɛ gbɛ nɔ yɛ amɛ hejɔɔmɔ be mli lɛ, no lɛ ebaafee nɔ ni sa akɛ amɛkɛ ŋaawoo ni mlihilɛ yɔɔ mli ni yɔɔ shiŋŋ hu ni tsɔɔ akɛ atade ni tamɔ nɛkɛ esaaa hiɛ lɛ aaaha dani aya kpee lɛ, titri lɛ ákɛ mɛi ni yaa Kristofoi akpee. Nyɛfainɛ ni nyɛkɛ nyɛ Biblia mli nikaselɔi ni baaya kpee lɛ atĩa gbɛtsɔɔmɔi ni akɛha yɛ jeŋba kɛ atade he ni atsɔɔ yɛ yiteŋgbɛ lɛ mli.

²¹ Wɔɔ Hei: Daa afi lɛ, abɔɔ mɔdɛŋ saŋŋ koni ana wɔɔ hei ni jara waaa, bɔni afee ni akɛ nyɔmɔbɔɔ ko akafɔ mɔ ko nɔ. Nyɛfainɛ nyɛkaia ni nyɛtoa nyɛtsui shi ni nyɛmli ahi yɛ be mli ni nyɛkɛ gbɔiatoo he kɛ skul nitsulɔi sharaa lɛ. Ekolɛ wɔ gbɛfaa lɛ eha etɔ wɔ ni mɛi ni mɛɔ ni aha amɛ wɔɔ hei lɛ ayi fa moŋ, shi nyɛtsui shi ni nyɛaato lɛ efeŋ yaka. Ehe baaba sɛɛnamɔ waa akɛ shiɛlɔi kɛ amɛ Biblia mli nikaselɔi aaatĩ nɔ ni aŋma ahɔ June 1995 Wɔ Maŋtsɛyeli Sɔɔmɔ lɛ mli lɛ ni kɔɔ wɔɔ hei ahe lɛ mli. Esa akɛ wɔkai bɔ ni ehe hiaa ni ake nii yɛ gbɛ ni ja nɔ yɛ gbɔiatoo hei kɛ niyeli hei lɛ.—June 22, 1986 Awake!

²² Kamera kɛ Tsɔnei ni Akɛmɔmɔɔ Wiemɔi: Esa jogbaŋŋ akɛ aaakai mɛi yɛ kamera kɛ tsɔne ni akɛmɔmɔɔ wiemɔi lɛ he yɛ mlijɔlɛ mli. Ofainɛ ni okai akɛ, kɛ oto gbɛjianɔ ni okɛ kamera, tsɔnei bibii ni akɛshaa video, loo tsɔne fɛɛ tsɔne ni akɛmɔmɔɔ nii atsu nii lɛ, susumɔ mɛi ni bɛŋkɛ bo lɛ ahe. Ní ooofo shi yɛ be mli ni nifeemɔi lɛ yaa nɔ loo ni ooomɔmɔ nii kɛaajɛ he ni ota lɛ baanyɛ agbala mɛi krokomɛi ajwɛŋmɔ. Esaaa ni akɛ tsɔne fɛɛ tsɔne ni akɛmɔmɔɔ nii lɛ asɛɛ kpaai lɛ tsaraa sarawa hewalɛ nibii loo adekai ni wiemɔi tsɔɔ mli lɛ asɛɛ kpaai lɛ, ni esaaa akɛ akɛ tsɔne lɛ maa sɛii lɛ ateŋ loo he ni atsɔɔ kɛjeɔ kpo lɛ. Kɛji okpɛ oyiŋ akɛ obaasha mfonirii loo okɛ tsɔnei bibii ni akɛshaa video loo nɔ ni akɛmɔmɔɔ wiemɔ aaatsu nii lɛ, no lɛ bo diɛŋtsɛ osane ni. Mfonirii kɛ nibii ni amɔmɔɔ lɛ baanyɛ aha akai nibii ni yɔɔ miishɛɛ yɛ be mli ni akwɛɔ enɛ gbi kroko lɛ. Esa akɛ akwɛ jogbaŋŋ yɛ tsɔnei ni tamɔ nakai fɛɛ ni akɛaatsu nii lɛ he, yɛ gbɛ ni egbalaŋ mɛi krokomɛi ajwɛŋmɔ loo ehaŋ ona nifeemɔ lɛ he sɛɛ kɛmɔ shi lɛ nɔ. Beni otee shia lɛ, ani obaana be ni okɛtswa nibii ni omɔmɔ lɛ? Ekolɛ obaana akɛ nibii fioo ni oooŋmala oshwie shi lɛ pɛ kɛkɛ fa.

²³ Shitaramɔ: Beni ayɔɔ 1994 “Nyɔŋmɔ Gbeyeishemɔ” Kpokpaa Wulu nɔ Kpee lɛ shishi lɛ, ani okadi bɔ ni atee hiɛ aha yɛ sane ni kɔɔ sɛii ni amɔmɔɔ ahaa mɛi lɛ mli? Atee hiɛ bɔ ni sa moŋ, shi ehe miihia ni wɔhiɛ ahi wɔhe nɔ lolo yɛ wiemɔ ni akɛmiikai nɛɛ hewɔ, akɛ: OBAANYƐ OSHI SƐII OHA OWEKU KƆKRƆƆ LƐ MLI BII KƐ MƐI NI KƐ BO BAAFA GBƐ YƐ BO DIƐŊTSƐ OTSƆNE MLI LƐ PƐ.

²⁴ Kpee fɛɛ kpee toɔ gbɛjianɔ kɛhaa mɛi ni nibii krɛdɛɛ he hiaa amɛ lɛ, tamɔ mɛi ni egbɔlɔ lɛ kɛ mɛi ni bɛ gbɔmɔtsoŋ hewalɛ lɛ. Ofainɛ ni okwɛ ni okayatá sɛii ni yɔɔ hei nɛɛ ateŋ eko nɔ kɛji akɛ obɛ naagba ni tamɔ nɛkɛ. Agbɛnɛ hu, kwɛmɔ ni oye obua mɛi ni nibii krɛdɛɛ he hiaa amɛ lɛ ni amɛna sɛi kɛji mɔ ko bɛ ni baakwɛ amɛnɔ lɛ.

²⁵ Niyenii ni Okɛbaaya Kpee lɛ ni Oootsu He Nii: Taakɛ ole lɛ, July 1995 Wɔ Maŋtsɛyeli Sɔɔmɔ lɛ tswa adafi akɛ: “Kɛjɛ kpokpaa wulu nɔ kpeei ni abaafee yɛ 1995 lɛ kɛ 1996 kpeei bibii kɛ kpee krɛdɛɛ gbii ni abaafee lɛ nɔ kɛyaa lɛ, atoŋ niyenii ni ehe nitsumɔ fa lɛ he gbɛjianɔ. Aawo mɔ fɛɛ mɔ hewalɛ ni ekɛ lɛ diɛŋtsɛ eniyenii kɛ nu aba.” Nɔ ni aŋma ahɔ mli lɛ tsɔɔ nɔ hewɔ ni afee tsakemɔ nɛɛ ni ekɛ ŋaawoi kpakpai yɛ bɔ ni mɔ fɛɛ mɔ baanyɛ atsu lɛ diɛŋtsɛ eniyenii kɛ nu hiamɔ nii ahe nii yɛ kpee lɛ shishi lɛ ha. Jeee akɛ ebaahi akɛ wɔ fɛɛ wɔɔtĩ nɔ ni aŋma ahɔ mli lɛ mli, wɔ diɛŋtsɛ kɛkɛ, shi moŋ ni wɔkɛ wɔ Biblia mli nikaselɔi agba he sane yɛ be mli ni amɛsaa amɛhe kɛhaa kpee lɛ. Ehe miihia ni aha Biblia mli nikaselɔi ale akɛ esa akɛ mɔ fɛɛ mɔ ni baaya kpee lɛ kɛ lɛ diɛŋtsɛ eniyenii kɛ nu aya.

²⁶ Bɔni afee ni oma otii komɛi anɔ mi lɛ, obaasumɔ ni okai nibii ni awo ŋaa akɛ akɛba yɛ be mli ni akpa fioo yɛ shwane mli lɛ: niyenii ni mli etsiii, ni ehe nibii faaa, ni haa mɔ hewalɛ ni tamɔ nɔ ni bei pii lɛ mɛi kɛyaa nitsumɔ he, tamɔ bodobodoi ni akɛ nibii ehɔlɔ mli, nibii ni ashã, kɛ aduawai kpakpai komɛi. Nɔ ni baanyɛ afata nii ni anuɔ lɛ he ji kɔfe, nii ni abaanu ni dãa hewalɛ bɛ mli, loo nu ni yɔɔ nii amli, ni yɔɔ nibii ni nyɛɛɛ ajwara loo flask ko mli. Kɛ nibii bibii ni haa nii amli jɔɔ ahe baahia lɛ, no lɛ akpooo kɛji amɛbaaná gbɛ yɛ osɛi lɛ shishi. Shi kɛlɛ, esaaa ni akɛ nibii wuji ni haa nii mli jɔɔ, dãa ni tɔɔ mɔ, loo nibii ni akɛ glase fee ni akɛ nii woɔ mli lɛ baa he ni afeɔ kpee lɛ yɛ lɛ. Esa akɛ akwa niyeli loo nibii bibii ni ayeɔ akɛjieɔ daaŋ beni gbɛjianɔtoo lɛ mli nifeemɔ nii yaa nɔ lɛ. Enɛ baatsɔɔ bulɛ ni abɛ kɛha mumɔŋ niyenii ni akɛhaa lɛ.

²⁷ Ŋaawoo kroko ni akɛhaa ji akɛ esaaa ni ahoɔ nii yɛ gbɔiatoo he tsũi amli, ja amɛyɛ nihoomɔ hé kɛha nakai feemɔ. Ehi akɛ okɛ hiɛdɔɔ aaasusu anɔkwale ni eji akɛ ato be ni akɛha beni akpa shwane lɛ he gbɛjianɔ koni wɔnyɛ wɔye niyenii ni etsiii fioo ni wɔkɛ wɔ nyɛmimɛi hii kɛ yei ana teokrase naanyobɔɔ mli ŋɔɔmɔ lɛ he. Akɛ Yehowa webii lɛ, wɔyɔseɔ akɛ kpeei lɛ ashishi mumɔŋ niyenii lɛ ji nɔ ni he hiaa titri kɛ akɛto heloonaa nibii ahe, ni esa akɛ wɔto gbɛjianɔ pɛpɛɛpɛ.

²⁸ Abaaje “Miishɛɛ Yijielɔi” Kpokpaa Wulu nɔ Kpeei lɛ ateŋ klɛŋklɛŋ nɔ lɛ shishi yɛ December 15, 1995. Ani ogbe ohesaamɔ naa, ni ofee klalo amrɔ nɛɛ akɛ ooona gbii etɛ naanyobɔɔ ni yɔɔ miishɛɛ kɛ mumɔŋ nibii kpakpai amli ŋɔɔmɔ? Eji wɔsɔlemɔ yɛ anɔkwayeli mli akɛ Yehowa baajɔɔ mɔdɛŋ ni obɔɔ koni okɛ onyɛmimɛi hii kɛ yei lɛ aya afi nɛɛ kpee lɛ yɛ be mli ni wɔsusuɔ bɔ ni wɔɔfee Yehowa yijielɔi ni yɔɔ miishɛɛ he lɛ.

[Akrabatsa ni yɔɔ baafa 6]

Kpokpaa Wulu nɔ Kpee he Kaimɔi

Baptisimɔ: Mɛi ni abaabaptisi amɛ lɛ atara hei ni abaatsɔɔ amɛ lɛ dani Hɔɔ leebi nifeemɔ lɛ aje shishi. Nɔ ko ni ana ji akɛ mɛi komɛi woɔ atadei komɛi ni esaaa ni gbalaa mɛi ajwɛŋmɔ kɛjɛɔ nifeemɔ lɛ nɔ. Esa akɛ mɔ fɛɛ mɔ ni toɔ gbɛjianɔ koni abaptisi lɛ lɛ kɛ atade ni sa ni akɛboteɔ nu mli kɛ papam hu aba. Kɛ wielɔ lɛ ha baptisimɔ wiemɔ lɛ egbe naa kɛ sɔlemɔ hu lɛ, nifeemɔ lɛ sɛinɔtalɔ lɛ kɛ gbɛtsɔɔmɔi kukuji baaha mɛi ni abaabaptisi amɛ lɛ koni no sɛɛ lɛ etsɛ lala ni abaala lɛ. Kɛ ala naagbee kuku lɛ agbe naa lɛ, mɛi ni kwɛɔ shitaramɔ lɛ nɔ lɛ baatsɔɔ mɛi ni abaabaptisi amɛ lɛ gbɛ kɛya he ni abaamii amɛ nu yɛ lɛ. Akɛni baptisimɔ ni feɔ mɔ ko henɔjɔɔmɔ he okadi lɛ ji teemɔŋ sane ni ka mɔ lɛ diɛŋtsɛ pɛ kɛ Yehowa teŋ hewɔ lɛ, atoko gbɛjianɔ ko ahako nɔ ni afɔɔ lɛ tsɛmɔ akɛ hefatalɔi abaptisimɔ ni mɛi enyɔ loo mɛi ni fa fe nakai fuaa amɛhe loo amɛhiɛɔ amɛniji amli yɛ be mli abaptisiɔ amɛ lɛ. Esa akɛ onukpai lɛ, titri lɛ onukpai asɛinɔtalɔi lɛ akwɛ koni amɛkɛ mɛi ni jɛ amɛ asafoi amli ni abaabaptisi amɛ lɛ he saji aha “Immersion Department” lɛ dani kpee lɛ aje shishi Hɔɔ leebi.

Tsitsinaa-tsɛɛ Nii: Ofainɛ tsɛɛ 1995 tsitsinaa-tsɛɛ nii lɛ yɛ kpee lɛ shishi, kɛ agbɛnɛ beni oyaa loo ojɛɔ he ni afeɔ kpee lɛ yɛ lɛ. Bei pii lɛ enɛ haa wɔnyɛɔ wɔyeɔ odase fɛfɛo beni wɔfaa gbɛ lɛ. Esa akɛ ohe tsitsinaa-tsɛɛ nii kɛ nii ni akɛwoɔ mli lɛ yɛ osafo lɛ mli, ejaakɛ akɛ eko baŋ kpee lɛ shishi. Kaimɔ ni ohiɛ o-“Advance Medical Directive/Release” wolo hee lɛ. Esa akɛ Betel weku lɛ mli bii kɛ gbɛgbalɔi ahiɛ amɛ kadimɔ woji lɛ.

Wɔɔ Hé: Wɔmiibi ni mɔ fɛɛ mɔ ni kpee lɛ “Rooming Department” eha lɛ wɔɔ he lɛ kɛ amɛ afee ekome. Ofainɛ, wɔ he ni akɛha bo lɛ. Enɛ haaa afa yɛ he kome babaoo tsɔ ni ehaaa ana naagba yɛ hei ni asusuɔ akɛ jɛmɛ hi saŋŋ lɛ. Bɔɔ mɔdɛŋ koni oyashɛ jɛmɛ mra koni atsɔɔ bo he ni obaawɔ lɛ yɛ be ni sa mli. Ohiɛ asɔ gbɔfeemɔ ni mɔ ni feɔ bo gbɔ lɛ kɛbaaha lɛ, ni okai ni oha ojeŋba aye odase. (1 Pet. 2:12; 1 Kor. 4:9b; Kol. 3:15) Ha owɔɔ he lɛ atse ni oto nibii ahe gbɛjianɔ jogbaŋŋ. Taakɛ wɔtsi ta momo lɛ, Asafo lɛ hiɛ sɔɔ mɛi ahesusumɔ ni mɛi ni baa kpee lɛ jieɔ lɛ kpo kɛ shika ni amɛkɛfiɔ kpee lɛ sɛɛ yɛ wɔɔ he ni akɛhaa amɛ hewɔ lɛ, eyɛ mli akɛ atsɔɔ akɛ aheee nɔ ko yɛ he.

Ní Aaaye Abua Gbɛgbalɔi ni Ehia Amɛ Lɛ: Akɛni ahoŋ niyenii ni ehe nitsumɔ fa hewɔ lɛ, atoŋ niyenii he tikitii ni akɛkeɔ gbɛgbalɔi lɛ ahe gbɛjianɔ. Aawo aŋkroaŋkroi, wekui, kɛ asafoi ahewalɛ koni amɛkɛ tsɔne mlitamɔ kɛ niyenii he yelikɛbuamɔ aha gbɛgbalɔi ni ehia amɛ lɛ. Be mli ni osusuɔ gbɛgbalɔ pɔtɛɛ ko he lɛ, ani obaanyɛ obua aduawa ko loo bodobodoi ni akɛ nibii ehɔlɔ mli kɛha shwane niyeli fioo lɛ naa ofata bo diɛŋtsɛ oshwane niyenii lɛ he? Yɛ be mli ni jeee ni oofite shika babaoo diɛŋtsɛ lɛ, ani obaanyɛ oha gbɛgbalɔ ko kɛ bo fɛɛ ata otsɔne mli? Ani gbɛi bibii krokomɛi yɛ ni ooonyɛ otsɔ nɔ osusu he yɛ bɔ ni ooofee okɛ “nu-hɔ̃ kpulu kome” aha gbɛgbalɔi ni ehia amɛ lɛ kɛ mɛi krokomɛi lɛ?—Okɛto Mateo 10:42 he.

Volunteer loo Kpee Shishi Nitsumɔ: Ani obaanyɛ oto be koni oye obua yɛ nitsumɔ hei lɛ eko mli yɛ kpee lɛ shishi? Ebaanyɛ efee nɔ ni baaye abua waa ni abaanya he, kɛ́ ŋmɛlɛtswai fioo ko pɛ wɔbaanyɛ wɔkɛsɔmɔ wɔ nyɛmimɛi lɛ. Kɛ obaanyɛ oye obua lɛ, no lɛ ofainɛ yaa “Volunteer Service Department” yɛ kpee lɛ shishi. Gbekɛbii ni yeko afii 16 lɛ hu baanyɛ aye abua ni kpee lɛ aye omanye kɛ amɛfɔlɔ ko loo onukpa kroko baakwɛ amɛnɔ kɛtsu nii.

Kɔkɔbɔɔ Wiemɔi Nɛ: Kɛ wɔha wɔhiɛ hi nibii ni kɛ naagbai baa lɛ anɔ lɛ, wɔbaanyɛ wɔjie naagbai ni esaaa lɛ kɛjɛ jɛmɛ. Bei pii lɛ julɔi kɛ mɛi ni bɛ jeŋba lɛ baasumɔ ni amɛju mɛi ni shiɔ amɛshiai kɛyaa hei krokomɛi lɛ anii. Kwɛmɔ ni oŋmɛ otsɔne lɛ mli be fɛɛ be, ni kaashi nɔ ko yɛ mli ni aaana kɔkɔɔkɔ ni baaka mɔ ko ni eyaju nɔ ko. Julɔi kɛ mɛi ni sharaa nii yɛ mɛi akotokui amli lɛ gbalaa amɛjwɛŋmɔ kɛyaa hei ni mɛi pii ebua amɛhe naa yɛ lɛ. Ebafeŋ nilee akɛ oooshi nibii komɛi ni jara wa waa lɛ yɛ osɛi lɛ nɔ. Onyɛŋ ona nɔmimaa akɛ mɔ fɛɛ mɔ ni yɔɔ omasɛi lɛ ji Kristofonyo. Mɛni hewɔ esa akɛ otsɔ mɔ ko tsɔne? Wɔnu amaniɛbɔi komɛi akɛ mɛi komɛi ni jɛɔ hei komɛi lɛ bɔɔ mɔdɛŋ akɛ amɛaalaka gbekɛbii kɛya. HA OBII LƐ AHI HE NI OBAANYƐ ONA AMƐ YƐ BE FƐƐ BE.

Bei pii lɛ tɛlivishin ni yɔɔ gbɔiatoo hei babaoo lɛ jieɔ yakayaka sinii ni mɛi ejie amɛhe efoji amɛtsɔɔ. Ohiɛ ahi ohe nɔ yɛ tsɔne nɛɛ hewɔ, ni kaaŋmɛ gbekɛbii agbɛ ni amɛna hegbɛ amɛkwɛ TV yɛ tsu lɛ mli ni mɔ ko kwɛɛɛ amɛnɔ.